Marcos 8:34 - Chayahuita (Shahui)

³⁴ Naꞌa piyapiꞌsaꞌ yaꞌcariya huaniapi. —Amashamiachin huëcoꞌ iyaroꞌsaꞌ, aꞌchinchinquëmaꞌ, itohuachina, huëꞌpi natanacaiso marëꞌ. Caꞌtanoꞌsanënpitantaꞌ natanapi. —Yaimapatamaco, canpitaora nohuantëramasoꞌ naniantocoꞌ. Yosë nohuantërinsoráchin imaco huachi. Corosëquë chiníquën parisitërëꞌ. Inapochachin canpitantaꞌ parisitapomarahuëꞌ, imamiatoco.

Marcos 8:34 ပူးပေါင်းရင်းမြစ်များ

Números 14:24

Piyapinëhuë Caripi itëramasoráchin nanitaparahuësoꞌ natëton, nishatërin. Napoaton ina tëhuëchinsoꞌ noꞌpaꞌ nohuitacaso marëꞌ paꞌninquë yaꞌconapon. Shinpitanta inaquë yaꞌhuëaponaꞌ.

Mateo 10:38

Imapatamaco, aꞌnapita aparisitarinënquëmaꞌ. Yatëpapirinënquëmaontaꞌ, imamiatoco. Corosëquë chiníquën parisitërëꞌ. Inapochachin canpitantaꞌ imapatamaco, aparisitarinënquëmaꞌ. Co ahuantohuatamahuëꞌ, co tëhuënchachin imaramacohuëꞌ.

Mateo 16:24

Ina quëran yaꞌipi caꞌtanoꞌsanënpita itërin: —Yaimapatamaco, canpitaora nohuantëramasoꞌ naniantatomaꞌ, Yosë nohuantërinsoráchin imacoꞌ. Corosëquë chiníquën parisitërëꞌ. Canpitantaꞌ parisitapomarahuëꞌ, imamiatoco.

Mateo 27:32

Ninano quëran pipirahuatonaꞌ, aꞌna quëmapi nacapipi, Siriniquë yaꞌhuërinsoꞌ. Simon itopi. Ina masahuatonaꞌ, corosë Quisoso quëparinsoꞌ sontaroꞌsari apitëntopi. Inari quëpatërin.

Marcos 10:21

Ina natanahuaton, nirayarin. “Tëhuënchachin noya yonquirin,” taꞌton nosororin. —Isontaꞌ iyasha Yosë nohuantërin taꞌa. Paquëꞌ. Yaꞌipi maꞌshanënpita paꞌanahuaton, coriqui canaransoꞌ saꞌahuaroꞌsaꞌ quëtëquëꞌ. Ina quëran huëquëꞌ imaco huachi. Inapohuatan, aꞌna tahuëri Yosëꞌpaꞌ canamiataran, itërin.

Marcos 7:14

Naquëranchin piyapiꞌsaꞌ përasahuaton, aꞌchintantarin. —Yaꞌipinquëmaꞌ natanco noꞌtëquën yonquicamaso marëꞌ.

Lucas 13:24

—Yosë huëntonën pëi pochin ninin. Yaꞌcoananënsoꞌ yamianasha. Naꞌa piyapiꞌsasoꞌ yayaꞌconpirinahuëꞌ, co noyahuëꞌ cancantatonaꞌ, co nanitopihuëꞌ yaꞌconacaisoꞌ. Canpitaso nipirinhuëꞌ ipora chachin yaꞌconacamasoꞌ nohuantocoꞌ. Ama huaꞌquicosohuëꞌ.

Lucas 14:33

Inapochachin pënënanquëmaꞌ. Sacaiꞌ imamancosoꞌ, tënahuë. Napoaton noya yonquiatomaꞌ, imaco. Casáchin yonquihuatamaco, tëhuënchachin noya imasaramaco,” tënin Quisoso.

Lucas 18:22

Ina natanahuaton, Quisosori itantarin: —Isontaꞌ Yosë nohuantërin. Paaton, yaꞌipi maꞌshanënpita paꞌanconquëꞌ. Coriqui canaransoꞌ saꞌahuaroꞌsaꞌ quëtonquëꞌ. Ina quëran imaquico. Inapotohuatan, Yosëꞌpaꞌ naꞌcon canamiataran, itërin.

Lucas 20:45

Yaꞌipi piyapiꞌsaꞌ natantapaquë, caꞌtanoꞌsanënpita pënënaton, itapon:

Lucas 9:23

Ina quëran piyapiꞌsaꞌ pënëantarin. —Yaimapatamaco, canpitaora nohuantëramasoꞌ naniantocoꞌ. Yosë nohuantërinsoráchin imaco huachi. Corosëquë chiníquën parisitërëꞌ. Canpitantaꞌ parisitapomarahuëꞌ, nani tahuëri imamiatoco.

Juan 10:27

Casoꞌ ohuica pëꞌtahuanaꞌpi pochin ninahuë. Imarinacosopita ohuicanëhuëpita pochin niꞌnahuë. Nohuitërahuë. Noya nataninaco. Nontohuatëra, natëtonaco, imarinaco.

Juan 19:17

Corosë apitëntohuachinara, inaora quëparin. Paꞌsahuatonaꞌ, “Nansë Motoꞌ,” panën itopiquë canconpi. Cotio nananquësoꞌ, Corocota itopi.

Hechos 14:22

Cara ninanoquë chachin Quisoso imapisopita pënënaꞌpiapi. “Ama iyaroꞌsaꞌ Quisoso aꞌpocosohuëꞌ. Imamiatocoꞌ. Aꞌnapita aparisitarinënpoaꞌ. Parisitacasoꞌ yaꞌhuërin. Parisitatëhuaꞌ, Yosë huaꞌanëntërinquë yaꞌconarëhuaꞌ. Napoaton noya ahuantocoꞌ,” itopi. Pënënpachinara, achinicancanpi.

Romanos 6:6

Catoꞌ cancan pochin yaꞌhuëtërinpoaꞌ. Aꞌna cancansoꞌ sopai yanatërin. Quisocristo imarëhuaꞌ niꞌton, co noyahuëꞌ cancantërëhuasoꞌ corosëquë patanantërëso pochin nitërëhuaꞌ. Ama huachi sopai natëcaso marëhuëꞌ napotërëhuaꞌ. Co noyahuëꞌ cancantërëhuasoꞌ chimininso pochin nitahuaꞌ.

Romanos 8:17

Huiꞌninpoaꞌ niꞌton, naꞌcon naꞌcon catahuarinpoaꞌ. Aꞌna tahuëri yaꞌhuërinꞌpaꞌ noya acoarinpoaꞌ. Quisocristo noya acorinso pochin acoarinpoaꞌ canpoantaꞌ. Ina imarëhuaso marëꞌ aparisitopirinënpoahuëꞌ, inapochachin inarëꞌquënpoaꞌ noya noya yaꞌhuëcontarihuaꞌ.

1 Corintios 15:31

Aꞌnaquën yatëparinaco. Nani tahuëri “Chiminapo nimara,” tënahuë. Tëhuënchachin noꞌtëquën nontëranquëmaꞌ. Quisocristo catahuarinco niꞌton, aꞌchintohuatënquëmara, noya imaramaꞌ. Ina marëꞌ nóya cancantërahuë.

1 Corintios 8:13

Yaꞌipi cosharoꞌ noya capacaso nipirinhuëꞌ, aꞌna tahuëri nosha capasoco iyahuë nicatonco nishacancantohuachin, co huachi ina nosha caꞌsarahuëꞌ. Iyahuë nosoroato, co piꞌpian tërantaꞌ nohuantërahuëꞌ anishacancantaꞌhuasoꞌ.

1 Corintios 9:19

Co insontaꞌ pahuërërincohuëꞌ niꞌton, co insontaꞌ camaincosoꞌ yaꞌhuërinhuëꞌ. Nipirinhuëꞌ, caora nohuanto, yaꞌipi piyapiꞌsaꞌ catahuarahuë. Naꞌcon naꞌcon piyapiꞌsari Quisocristo imacaiso marëꞌ aꞌchinarahuë.

Gálatas 2:20

Quisocristo corosëquë chiminin. Ina imato, cantaꞌ corosëquë chiminahuëso pochin ninahuë. Iráca yonquirahuësoꞌ naniantërahuë. Napoaton co huachi oshahuanacaꞌhuasoꞌ yaꞌhuërinhuëꞌ. Iporasoꞌ Quisocristoíchin yonquirahuë. Co huachi caora nohuanto maꞌsha ninahuëꞌ. Quisocristo yaꞌcoancantërinco niꞌton, catahuarinco noya nicaꞌhuasoꞌ. ‘Nani tahuëri Yosë huiꞌnin chachin catahuarinco,’ taꞌto, noya cancantërahuë. Inasoꞌ paꞌpi nosororinco. Nosoroatonco, yaꞌhuërënamëhuë chiminin.

Gálatas 5:24

Quisocristo corosëquë chiminaton, oshanënpoaꞌ inquitërinpoaꞌ. Napoaton canpoantaꞌ ina imapatëhuaꞌ, co noyahuëꞌ yonquirëhuasopita corosëquë patanantatë pochin nitatëhuaꞌ, naniantacasoꞌ yaꞌhuërin. Co huachi nohuantarihuahuëꞌ sopai pochin cancantacasoꞌ.

Gálatas 6:14

Caso nipirinhuëꞌ piyapiꞌsaꞌ paꞌyataꞌhuasoꞌ co yonquirahuëꞌ. Quisocristo chimininsoáchin yonquirahuë. Corosëquë chiminaton, anoyacancantërinpoaꞌ. Niꞌton, inaroꞌco chiminahuëso pochin co maꞌsha isoroꞌpaquë yaꞌhuërinsoꞌ yonquirahuëꞌ. Naporahuaton, isoroꞌparáchin paꞌyatopisopita co huachi noya niꞌninacohuëꞌ.

Filipenses 3:10

Aquë aquëtëꞌ Quisocristo yanohuitërahuë. Iráca nanpiantarahuaton, chini chiníquën nanantërin. Yaꞌipi nanitaparin niꞌton, catahuaincosoꞌ nohuantërahuë. Noya noya nicaꞌhuaso marëꞌ catahuainco, tënahuë. Iráca Yosë natëton, parisitërin. Canpoa marëꞌ chiminin. Iporasoꞌ cantaꞌ aparisitopirinacohuëꞌ, Quisocristo pochin Yosë natëi. Chimininso pochin yaꞌipi co noyahuëꞌ yonquirahuësoꞌ naniantato, noyápiachin cancanchi, tënahuë.

Filipenses 3:7

Ina marëꞌ Yosë noya niꞌsarinco, tënahuë iráca. Iporaso nipirinhuëꞌ iráca yonquirahuësoꞌ aꞌporahuë Quisocristo imacaꞌhuaso marëꞌ.

Colosenses 1:24

Imarëhuasopita marëꞌ Quisocristo chiníquën parisitërin. Parisitaton, huëntonënquë ayaꞌconinpoaꞌ. Ina quëran imarëhuasopitantaꞌ parisitacasoꞌ yaꞌhuërin aꞌnapitantaꞌ imacaiso marëꞌ. Napoaton ipora cantaꞌ parisitarahuë canpitantaꞌ imacamaso marëꞌ. Parisitaporahuëꞌ, noya cancantërahuë.

Colosenses 3:5

Napoaton piꞌpian tërantaꞌ co noyahuëꞌ yonquihuatamaꞌ, aꞌnaroáchin naniantocoꞌ. Ama monshihuancosohuëꞌ. Ama taparoꞌ yonquicosohuëꞌ. Ama aꞌna sanapi sëꞌhuacamasoꞌ yonquicosohuëꞌ. Ama aꞌna quëmapi saꞌin noyapacosohuëꞌ. Ama nani maꞌsha nohuantapatocosohuëꞌ. Aꞌnaquënsoꞌ maꞌsha naꞌcon nohuantatonaꞌ, mamanshi moshapiso pochin niconpi.

2 Tesalonicenses 3:11

Nanan nani natantërahuë. Aꞌnaquëmaꞌ co yasacatatomahuëꞌ, topinan paꞌsáramaꞌ. Naporahuaton, maꞌtoma maꞌtoma nonatomaꞌ, piyapiꞌsaꞌ chinotëramaꞌ, natantërahuë.

Tito 2:12

Nosoroatonpoaꞌ, pënëninpoaꞌ yaꞌipi co noyahuëꞌ yonquirëhuasopita naniantacaso marëꞌ. Ama maꞌsharáchin nohuantahuasohuëꞌ. Co monshihuanacasoꞌ yaꞌhuërinhuëꞌ. Sano yaꞌhuatëhuaꞌ, nóya yonquiaꞌahuaꞌ. Yosë yonquirinsoráchin imahuaꞌ. Nani tahuëri Yosë chinotatëhuaꞌ, noyasáchin niahuaꞌ. Ina marëꞌ pënëninpoaꞌ.

Hebreos 13:13

Napoaton canpoantaꞌ aparisitohuachinënpoaꞌ, ahuantahuaꞌ. Iráca pënëntërinso nanan naniantatëhuaꞌ, Quisocristoíchin imahuaꞌ. Ina noꞌhuipiso pochin noꞌhuipirinënpoaontaꞌ, ahuantahuaꞌ.

1 Pedro 4:1

Quisocristo isoroꞌpaquë oꞌmaton, tëhuënchachin parisitërin. Napoaton canpitantaꞌ parisitohuatamaꞌ, ahuantocoꞌ. Quisocristo yonquiatëhuaꞌ, noya ahuantohuatëhuaꞌ, noya noya cancantarihuaꞌ. Co huachi oshahuanacasoꞌ paꞌyatarihuahuëꞌ.

1 Pedro 4:13

Quisocristo parisitërinso pochin parisitohuatamaꞌ, noya cancantocoꞌ. Ina quëran chiníquën nanantaton oꞌmantahuachin, noya noya cancantaramaꞌ.

2 Pedro 1:14

Co huaꞌquiya quëranhuëꞌ chiminarahuë. Sinioro Quisocristo nani anitotërinco.

1 Juan 3:16

Quisocristoso nipirinhuëꞌ naꞌcon nosoroatonpoaꞌ, nichaꞌëinpoaso marëꞌ chiminin. Chiminaton, nosororinpoasoꞌ anitotërinpoaꞌ. Inapochachin iyaroꞌsaꞌ, yaꞌipi Quisocristo imapisopita nosorocasoꞌ yaꞌhuërin. Naꞌcon ninosoroaꞌahuaꞌ. Quisoso yaꞌhuërënamënpoaꞌ chimininso pochachin nosorocasoꞌ yaꞌhuërin.

Apocalipsis 2:10

Ipora tahuëriꞌsaꞌ naꞌcon parisitapiramahuëꞌ, ama tëꞌhuacosohuëꞌ. Sopai nohuanton, tashinan pëiquë poꞌmoarinënquëmaꞌ. Yosë aꞌpocamaso marëꞌ napotarinënquëmaꞌ. Shonca tahuëri pochin parisitaramaꞌ. Tëpapirinënquëmaontaꞌ, ama aꞌpocosohuëꞌ. Imamiatohuatamaco, inápaquë acanaranquëmaꞌ. Inatohuaꞌ nanpimiataramaꞌ.