Marcos 6:6 - Chayahuita (Shahui)

⁶ “¿Onpoatoncha isopita co yanatërinacohuëꞌ nicaya?” tënin, yonquiapon. Ina quëran yaꞌcariya ninanoroꞌsaquë paꞌsahuaton, piyapiꞌsaꞌ aꞌchintarin.

Marcos 6:6 ပူးပေါင်းရင်းမြစ်များ

Jeremías 2:11

¡Co inso nacionquë tërantaꞌ, yosënëna aꞌporahuatonaꞌ, aꞌna chinotaantapihuëꞌ! Inapitasoꞌ nonpin yosëroꞌsa imaponaraihuëꞌ, ¡co onporonta inapochinpihuëꞌ! Piyapinëhuëpitaso nipirinhuëꞌ, aꞌporinaco. Noya noya nipirahuëꞌ, mamanshiroꞌsa co manta catahuatopisopitahuëꞌ, imacaiso marëꞌ aꞌporinaco.

Mateo 4:23

Yaꞌipi Cariria parti paaton, niyontonpiso pëiroꞌsaquë pënënaꞌpiarin. Noya nanan aꞌchinaton: “Yosë yahuaꞌanëntërinquëmaꞌ,” itëraꞌpiarin. Naporahuaton, naꞌa caniaꞌpiroꞌsaꞌ aꞌnaroáchin anoyatërin. Nisha nisha caniori maninsopita anoyatëraꞌpiarin.

Mateo 8:10

Quisosori natanahuaton, paꞌyatërin. Napoaton piyapiꞌsaꞌ itapon: —¡Ma noyacha iso quëmapi natërinco paya! Nisha piyapi niponahuëꞌ, israiroꞌsa quëran noya noya natërinco.

Mateo 9:35

Ina quëran Quisoso paꞌsápaton, nisha nisha ninanoroꞌsaquë aꞌchintëraꞌpiarin. Niyontonpiso pëiroꞌsaquë noya nanan shaꞌhuitëraꞌpiarin. —Yosë yahuaꞌanëntërinquëmaꞌ, itëraꞌpiarin. Insëquësona paꞌpachina, yaꞌipi caniaꞌpiroꞌsaꞌ anoyatëraꞌpiarin. Nisha nisha canio inquitërin.

Marcos 1:39

Ina quëran yaꞌipi Cariria parti paꞌsahuaton, niyontonpiso pëiroꞌsaquë pënëntëraꞌpiarin. Naporahuaton, sopairoꞌsari yaꞌcoancantërinsopita inquitëraꞌpiarin.

Marcos 10:1

Capinaomo quëran pipirahuaton, Cotia parti paantarin. Naporahuaton, Cortaniiꞌ aquëtëran paꞌnin. Inaquë naquëranchin naꞌa piyapiꞌsari huëcapaipi. Quisosori aꞌchintantarin. Nani tahuëri huëꞌpachinara, noya aꞌchintarin.

Lucas 13:22

Ina quëran nisha nisha ninanoquë paꞌsahuaton, aꞌchintëraꞌpiarin. Quirosarinquë huarëꞌ paꞌsarin.

Lucas 4:31

Ina quëran Cariria parti paantarin. Capinaomoquë paaton, chinoto tahuëri aꞌchiantarin.

Lucas 4:44

Ina quëran yaꞌipi cotioroꞌsaꞌ yaꞌhuërin parti paꞌsahuaton, niyontonpiso pëiroꞌsaquë aꞌchinarin.

Juan 9:30

—¡Maꞌpitacha tënama paya! Intohuaransona huëꞌninso canpitaso co nitotopiramahuëꞌ, casoꞌ anoyarayatërinco.

Hechos 10:38

Ina piquëran Yosëri chachin Quisocristo acorin, Nasaritoquë yaꞌhuërinsoꞌ. Yosë nohuanton, Ispirito Santori noyá yaꞌcoancantërin. Napoaton nani maꞌsha nanitaparin nicacasoꞌ. Nisha nisha parti paaton, nóya ninin. Naꞌa caniaꞌpiroꞌsaꞌ aꞌnaroáchin anoyatërin. Aꞌnaquën sopairi yaꞌcoancantërin niꞌton, chiníquën parisitopirinahuëꞌ, inari anoyatërin. Yosëri catahuarin niꞌton, aꞌnaroáchin anoyatërin.