Marcos 10:21 - Chayahuita (Shahui)

²¹ Ina natanahuaton, nirayarin. “Tëhuënchachin noya yonquirin,” taꞌton nosororin. —Isontaꞌ iyasha Yosë nohuantërin taꞌa. Paquëꞌ. Yaꞌipi maꞌshanënpita paꞌanahuaton, coriqui canaransoꞌ saꞌahuaroꞌsaꞌ quëtëquëꞌ. Ina quëran huëquëꞌ imaco huachi. Inapohuatan, aꞌna tahuëri Yosëꞌpaꞌ canamiataran, itërin.

Marcos 10:21 ပူးပေါင်းရင်းမြစ်များ

Génesis 34:19

Cacopo huiꞌnin paꞌpi nohuantaton Siquimosoꞌ, aꞌnaroáchin natëtërin. Inasoꞌ, yaꞌipi Amoro huiꞌninpita quëran chini chiníquën nanantërin. Napoaton, paꞌpinë chachin ninano yaꞌcoanaquë paꞌpi. Inaquë yaꞌhuëhuanoꞌsa niyontonpi, maꞌsha yonquiatona anoyatacaiso marëꞌ. Yaꞌhuëhuanoꞌsa niyontonpachinara, itaponaꞌ:

Proverbios 23:23

Noꞌtëquën nanan nitotacasoꞌ, yonquínahuan nicacasoꞌ, aꞌchinpisoꞌ noya natanacasoꞌ, yonqui yonquícharacasoꞌ, inapita cancantëquëꞌ. Ina pochin nipatan, ama aꞌpoquësohuëꞌ.

Mateo 16:24

Ina quëran yaꞌipi caꞌtanoꞌsanënpita itërin: —Yaimapatamaco, canpitaora nohuantëramasoꞌ naniantatomaꞌ, Yosë nohuantërinsoráchin imacoꞌ. Corosëquë chiníquën parisitërëꞌ. Canpitantaꞌ parisitapomarahuëꞌ, imamiatoco.

Mateo 19:21

—Yosë pochachin cancantamasoꞌ nohuantohuatan, yaꞌipi maꞌshanënpita paꞌanconahuaton, coriqui canaransoꞌ saꞌahuaroꞌsaꞌ quëtëquëꞌ. Ina quëran imaco huachi. Co huachi maꞌsharáchin yonquihuatanhuëꞌ, inápaquë canamiataran, itërin Quisosori.

Marcos 10:22

Ina natanahuaton, co huachi noyahuëꞌ cancantërin. “Huaꞌhuayatërahuëꞌ maꞌsha yaꞌhuëtërinco,” taꞌton sëtërin. Sëtaton, paꞌnin huachi.

Marcos 8:34

Naꞌa piyapiꞌsaꞌ yaꞌcariya huaniapi. —Amashamiachin huëcoꞌ iyaroꞌsaꞌ, aꞌchinchinquëmaꞌ, itohuachina, huëꞌpi natanacaiso marëꞌ. Caꞌtanoꞌsanënpitantaꞌ natanapi. —Yaimapatamaco, canpitaora nohuantëramasoꞌ naniantocoꞌ. Yosë nohuantërinsoráchin imaco huachi. Corosëquë chiníquën parisitërëꞌ. Inapochachin canpitantaꞌ parisitapomarahuëꞌ, imamiatoco.

Lucas 10:42

Casáchin natancosoꞌ naꞌcon naꞌcon nohuantërahuë. Mariasoꞌ natanatonco, noya noya nisarin. Naꞌcon yonquirinco niꞌton, noya cancantomiatarin tënahuë, itërin Quisosori.

Lucas 12:33

Ama naꞌcon maꞌsha yontoncosohuëꞌ. Maꞌsha yaꞌhuëtohuachinquëmaꞌ, paꞌanahuatomaꞌ, saꞌahuaroꞌsaꞌ quëtocoꞌ. Inapotohuatamaꞌ, Yosë acanaarinquëmaꞌ. Isoroꞌpaquë maꞌsha aꞌnaroáchin mocarin. Ihuarinënpoaꞌ. Maꞌshari aꞌquirin. Inapaquëso nipirinhuëꞌ Yosë acanahuachinpoaꞌ, yaꞌhuëtomiatarinpoaꞌ.

Lucas 16:9

Coriqui yaꞌhuëtohuachinquëmaꞌ, ama canpitaoráchin iꞌquicosohuëꞌ. Aꞌnapita pahuantohuachinaꞌ, quëtocoꞌ. Inapohuatamaꞌ, Yosëꞌpaꞌ noya niꞌsarinquëmaꞌ. Chiminpatamaꞌ, Yosë inápaquë quëpantarinquëmaꞌ. Coriquinëmaꞌ patopiramahuëꞌ, inatohuaꞌ noya noya yaꞌhuëcontaramaꞌ.

Lucas 18:22

Ina natanahuaton, Quisosori itantarin: —Isontaꞌ Yosë nohuantërin. Paaton, yaꞌipi maꞌshanënpita paꞌanconquëꞌ. Coriqui canaransoꞌ saꞌahuaroꞌsaꞌ quëtonquëꞌ. Ina quëran imaquico. Inapotohuatan, Yosëꞌpaꞌ naꞌcon canamiataran, itërin.

Lucas 19:41

Ina quëran Quirosarin notënanquë canconpi. Canconpachina, piyapiꞌsaꞌ yonquiaton, Quisoso sëtërin. Sëtaton, naꞌnërin.

Lucas 9:23

Ina quëran piyapiꞌsaꞌ pënëantarin. —Yaimapatamaco, canpitaora nohuantëramasoꞌ naniantocoꞌ. Yosë nohuantërinsoráchin imaco huachi. Corosëquë chiníquën parisitërëꞌ. Canpitantaꞌ parisitapomarahuëꞌ, nani tahuëri imamiatoco.

Juan 12:26

Nohuantërahuësoꞌ yanipatamaꞌ, ca pochin cancantatomaꞌ imaco. Insëquësona paꞌpato, piyapinëhuëpita imasarinaco. Inquëma tërantaꞌ ca marëꞌ sacatohuatamaꞌ, Yosë noya niꞌsarinquëmaꞌ, itërin Quisosori.

Juan 16:33

Nani naꞌcon shaꞌhuitëranquëmaꞌ sano cancantacamaso marëꞌ. Casáchin yonquihuatamaco, sano cancantaramaꞌ. Co paꞌyanaramahuëꞌ. Piyapiꞌsaꞌ aparisitopirinënquëmahuëꞌ, catahuaranquëmaꞌ niꞌton, chiníquën cancantocoꞌ. Yaꞌipi isoroꞌpaquë co noyahuëꞌ nipisopita nani minsëarahuë, itërincoi Quisoso.

Hechos 2:45

Aꞌnaquënsoꞌ maꞌshanënapita paꞌanahuatonaꞌ, coriqui maꞌpatopi. Ina quëran aꞌnapita pahuantohuachinara, quëtopi.

2 Corintios 12:15

Napoaton co mantaꞌ maꞌparanquëmahuëꞌ. Noya cancantato, sacatarahuë cosharoꞌ paꞌanaꞌhuaso marëꞌ. Ina quëran parisitaporahuëꞌ, aꞌchintaranquëmaꞌ noya imacamaso marëꞌ. Carimasoꞌ naꞌcon naꞌcon nosoropiranquëmahuëꞌ, canpitasoꞌ co onpopinchin nosororamacohuëꞌ topirahuëꞌ.

2 Timoteo 3:12

Yaꞌipi cancanënpoa quëran Quisocristo imapatëhuaꞌ, aparisitarinënpoaꞌ.

Hebreos 10:34

Tashinan pëiquë poꞌmohuachinara, co tëꞌhuatomarahuëꞌ, nicapomaꞌ paꞌnamaꞌ. Paatomaꞌ, catahuaramaꞌ. Canpitantaꞌ imaramaso marëꞌ maꞌshanëmaꞌ osërëtopirinënquëmahuëꞌ, co sëtëramahuëꞌ. “Yosë chachin nohuitërëhuaꞌ. Nasha cancan quëtërinpoaꞌ. Co insontaꞌ nanitërinhuëꞌ inasoꞌ osërëtinpoasoꞌ,” taꞌtomaꞌ, nóya cancantëramaꞌ.

Santiago 2:10

Yosë chachin pënëninpoaꞌ. “Noya natërai,” topiramahuëꞌ, piꞌpian tërantaꞌ co natëhuatamahuëꞌ, oshahuanaramaꞌ. Anaꞌintinquëmasoꞌ yaꞌhuërin.

Apocalipsis 2:14

co yaꞌipinquëmaꞌ noꞌtëquën imaramacohuëꞌ. Aꞌnaquëmaꞌ Paramo pochin cancantëramaꞌ. Iráca inasoꞌ Yosë nanamën nitotopirinhuëꞌ, Yosë piyapinënpita nonpintërin. Inimiconënpita huaꞌanën shaꞌhuitërin anishacancantacaiso marëꞌ, Paraco itopisoꞌ. Inari shaꞌhuitohuachina, anishacancantopi. Nisha cancantatonaꞌ, mamanshi moshapi. Moshatonaꞌ, nosha mamanshi marëꞌ acopisontaꞌ caꞌpi. Naporahuaton, monshihuanapi.

Apocalipsis 2:20

co yaꞌipi cancanëma quëran imaramacohuëꞌ. Aꞌna sanapi corto pëiquë chachin nonpin nanan aꞌchintopirinquëmahuëꞌ, co aꞌparamahuëꞌ. Iráca Quisapira paꞌpi co noyahuëꞌ sanapi niponahuëꞌ, chiníquën nanantaton, piyapinëhuëpita anishacancantërin. Inapochachin iporasoꞌ ina sanapi pënënarinquëmaꞌ co noyahuëꞌ nicacamasoꞌ. ‘Noya monshihuanacasoꞌ. Mamanshi moshacaso marëꞌ nosha acohuachina, noya capacasoꞌ. Caꞌcoꞌ,’ itohuachinquëmara, aꞌnaquëmaꞌ natëtomaꞌ, monshihuanamaꞌ. Nosha mamanshi marëꞌ acopisoꞌ caꞌnamaꞌ. Ina pochin ina sanapi nonpintërinquëmaꞌ.

Apocalipsis 2:4

Nipirinhuëꞌ, co huachi noya nosororamacohuëꞌ. Iráca yaꞌnan imapomaco, tëhuënchachin nóya nosororamaco. Canpita capinintaꞌ noya ninosororamaꞌ. Iporaso nipirinhuëꞌ co huachi iráca pochin noya ninosororamahuëꞌ. Co huachi cantaꞌ noya nosororamacohuëꞌ. Ina marëꞌ sëtato, co noya niꞌnanquëmahuëꞌ.