Malaquías 4:1 - Chayahuita (Shahui)

¹ Naquëranchin Sinioro shaꞌhuitaantarinpoaꞌ: “Caso Sinioroco yaꞌipi nanitapato shaꞌhuitaranquëmaꞌ: ‘Niꞌcoꞌ. Co huaꞌquiya quëranhuëꞌ, anaꞌintaꞌhuaso tahuëri naniarin. Ina tahuëri nanihuachin, ornoquë pën huënaratërinso pochin nisarin. Nocantopisopita, co noyahuëꞌ nipisopita, yaꞌipi inapita anaꞌintarahuë. Panca pënquë shinpitë aꞌnaroáchin huëyarinso pochin co noyahuëꞌ nipisopita anaꞌintarahuë.

Malaquías 4:1 ပူးပေါင်းရင်းမြစ်များ

Salmos 37:9

Co noyahuëꞌ nipisopitasoꞌ, yaꞌhuëpiso noꞌpa quëran aꞌpaponaꞌ. Sinioro chinotopisopitaso nipirinhuëꞌ, yaꞌhuëpisoꞌ noꞌpaꞌ huaꞌanëntaponaꞌ.

Éxodo 15:7

Inimicoroꞌsa chinitopirinënhuëꞌ, quëmariso nipincatatë pochin ataꞌhuantëran. Shinpitë ahuiquitërëso pochin noꞌhuitaton anaꞌintëran.

Isaías 40:24

Ina marësoꞌ huaꞌanoꞌsantaꞌ, sharoꞌsa nasha pichopitopiso pochin niconpi. Ipora huarëꞌ itëaꞌhuain pipiarinso pochin, co manta chinipihuëꞌ. Siniorori pihuitë pochin nitohuachina, chiminatona ahuiánahuanapi. Panca ihuan paꞌpachina, trico shaꞌhuëtë quiquirinso pochin nitërin.

Isaías 41:2

¡Ca nohuanton piꞌi pipirinso parti aꞌnara copirno yaꞌconapon! Inasoꞌ, yaꞌipi inimiconënpita minsëapon. Cari catahuarahuë niꞌton, nisha nisha nacionoꞌsa huaꞌanëntapon. Nisha nisha copirnoroꞌsa camaiapon. Sahuëninën, pëꞌchinanën, inapita quëran ahuëaton, trico toꞌnorahuatëra piꞌpitën paꞌsarëso pochin nitapon.

Ezequiel 34:17

Isontaꞌ, ca Sinioroco chachin shaꞌhuitaantaꞌinquëmaꞌ: Ohuicanëhuëpita pochin ninamasopita natanco: Aꞌna tahuëri carima noꞌtëquën shaꞌhuitaranquëmaꞌ. Aꞌnaquëmasoꞌ, ohuica pochin nicatoma co onpopinchin chiniramahuëꞌ. Aꞌnaquëmantaꞌ, carniro pochin, chipo pochin, inapita pochin nicatoma chiníquënoꞌsa ninamaꞌ. Chiníquënoꞌsanquëmasoꞌ, noya noya pasto caꞌnamaꞌ. ¡Co caꞌnamasosoꞌ, co toꞌpi toꞌpichitomahuëꞌ! Noyaiꞌ nininsoꞌ oꞌoramaꞌ. ¡Co oꞌoramasosoꞌ, co toꞌmoitatoma nëꞌhuëichitomahuëꞌ!

Joel 2:1

Quirosarin ninanosoꞌ, Siniorori huayonin. Inaquë pëinën yaꞌhuëcaso marëꞌ huayonin. Inaquë niyátainpichin yaꞌhuëcaiso marëꞌ aꞌpaito sontaroꞌsari, tronpita pihuitona huëhuëpiro huëꞌsarinso shaꞌhuiinaꞌ. Ina natanpisopitantaꞌ, chiníquën “yai,” taꞌtona naporinso aꞌnapita israiroꞌsa shaꞌhuichinaꞌ. Co huaꞌquiya quëranhuë Sinioro anaꞌintiinpoaso tahuëri naniarin. Napoaton yaꞌipi Cota huëntonquë yaꞌhuëpisopita paꞌyanatona ropachinaꞌ.

Joel 2:31

Piꞌintaꞌ tashiarin. Yoquintaꞌ, huënai pochin nisarin. Coꞌhuara anaꞌintaꞌhuaso tahuëri naniyátërasohuëꞌ, napoarin. Ina tahuëri nanihuachin, paꞌpi huëhuëpiro nisarin,” tënin.

Amós 2:9

Ina quëran Siniorosoꞌ, piyapinënpita itapon: “Iráca caso shimashonëmapita isoporinquë poꞌmocaꞌhuaso marëꞌ amororoꞌsa ataꞌhuantërahuë. Inapitasoꞌ nonara pochin inapatopirinahuëꞌ, ataꞌhuantërahuë nopri nara pochin chiníquënoꞌsa nipirinahuëꞌ, inapotërahuë.

Malaquías 3:15

Nocantonoꞌsasoꞌ, co Yosë imaponaraihuëꞌ, noya noya yaꞌhuëpi. Co noyahuëꞌ nipisopitantaꞌ, noya noyatopi. Inapitaso Yosë tënipirinahuëꞌ, co manta onpotërinhuëꞌ,’ taꞌtomaꞌ, co noyahuëꞌ yonquirapiramaco,” itërin.

Malaquías 3:18

Noya nipisopitasoꞌ, noya nicato nichaꞌësarahuë. Co noyahuëꞌ nipisopitasoꞌ, noꞌtëquën anaꞌintarahuë. Ina nicatoma canpitasoꞌ: ‘Yosësoꞌ, co napopináchin piyapinpoa niꞌninpoahuëꞌ. Ina chinotohuatëhuaꞌ, noya acoarinpoaꞌ. Coꞌsoꞌ chinotohuatëhuahuëꞌ, noꞌtëquën anaꞌintarinpoaꞌ,’ tosarama huachi,” tënin.

Malaquías 3:2

Ina oꞌmahuachinso napoaponahuëꞌ, ¡co insoari tërantaꞌ, chinitacaso nanitaponhuëꞌ! ¡Naporosoꞌ, yaꞌipinquëma tëhuëramaso anitotarinquëmaꞌ! Huaꞌna pënquë asoquirahuatonaꞌ, nëꞌhuëtërinso inquitopi. Inapochachin canpitantaꞌ, co noyahuëꞌ ninamaso inquitarinquëmaꞌ. Shapon nëꞌhuë inquitërinso pochin oshanëma inquitarinquëmaꞌ.

Malaquías 3:3

Huënsëaton corto huaꞌanoꞌsa tapararin. Oro, prata, inapita pënquë asoquipiso pochin co noyahuëꞌ nipisopita inquitarin. Naporo huarëꞌ Nihui quëran pipipisopitasoꞌ, noꞌtën chachin ca marëꞌ maꞌsha quëpisoꞌ, aꞌnotaponaco.

Malaquías 4:5

Niꞌcoꞌ. Anaꞌintaꞌhuaso tahuëri nanihuachin, paꞌpi huëhuëpiro nisarin. Coꞌhuara ina tahuëri naniátërasohuëꞌ, Iniasë pënëntonaꞌpi aꞌpataranquëmaꞌ.

Mateo 3:12

Cayarinsoꞌ manëso pochin nisarin. Arosë mapatëra, toꞌnorarëꞌ. Ina quëran pintiarahuatëꞌ, pëiquë acorëꞌ. Shaꞌhuëtënso nipirinhuëꞌ, pënquë ahuiquitërëꞌ. Inasoꞌ co onporontaꞌ tacopiarinhuëꞌ, tënin Coansha.

Lucas 19:43

Napoaton aꞌna tahuëri parisitaramaꞌ. Inimiconëmapita huëcapairahuatënënquëmaꞌ, tancapitarinënquëmaꞌ. Yaꞌipi parti quëran ahuëarinënquëmaꞌ. Ninano pairapiramasoꞌ inápa niponahuëꞌ, maꞌsha aꞌmitë aꞌmitëtapi yaꞌconacaiso marëꞌ.

Lucas 21:20

Notohuaroꞌ sontaroꞌsaꞌ nisha parti quëran huëcatonaꞌ, Quirosarin tancapitapi. Ina niꞌpatamaꞌ, nani tahuëri nanirinsoꞌ nitotaramaꞌ. ‘Quirosarin ataꞌhuantapi,’ tosaramaꞌ.

Lucas 6:23

Iráca Yosë piyapinënpita pënëntohuachinara, shimashonëmapitari inapochachin noꞌhuipi. Napoaton aꞌnapita noꞌhuihuachinënquëmaꞌ, noya cancantocoꞌ. Parisitëramaso marëꞌ Yosëꞌpaꞌ naꞌcon canaaramaꞌ. Ina yonquiatomaꞌ, capa cancantocoꞌ.

2 Tesalonicenses 1:8

Oꞌmantarahuaton, co Yosë nohuitopisopitahuëꞌ anaꞌintarin. Co Sinioro Quisoso nanamën natëpihuëꞌ niꞌton, chiníquën anaꞌintarin.

2 Pedro 3:7

Inapochachin ipora isoroꞌpaꞌ, piꞌiroꞌtëꞌ, inapita yaꞌhuëpirinahuëꞌ, nani Yosëri chinotërin anaꞌintacasoꞌ: “Aꞌna tahuëri pën quëran ataꞌhuantarahuë,” tënin niꞌton, tahuëri nanihuachin, pën quëran chachin ataꞌhuantarin. Naporoꞌ tahuëri yaꞌipi oshahuanoꞌsaꞌ chiníquën anaꞌintarin. Parisitopiquë aꞌpararin.