Malaquías 2:10 - Chayahuita (Shahui)

¹⁰ Iporasoꞌ ca Maraquiasëco Yosë ayonquirinco niꞌton, pënënaranquëmaꞌ: Tëhuënchachin canpoasoꞌ, yaꞌipinpoaꞌ aꞌna tataíchin pochin yaꞌhuëtërinpoaꞌ. Inasoꞌ Yosë. Yaꞌipinpoa acorinpoaꞌ. Napoaton co canpoa capini ninonpitacaso yaꞌhuërinhuëꞌ. Ninonpintohuatëhuaꞌ, Yosë shimashonënpoapitarëꞌ anoyatërinso tapiarihuaꞌ.

Malaquías 2:10 ပူးပေါင်းရင်းမြစ်များ

Copo naporinso' 31:15

Ina Yosëráchin nohuanton mamanpoa huaꞌhuaninpoaꞌ. Piyapinëhuëpitarëꞌco napopináchin ananpirinco.

Salmos 100:3

Yosëíchin chini chiníquën nanantërin. Ina nitotoco canpitantaꞌ. Inaso nininpoa niꞌton, huaꞌanëntërinpoaꞌ. Ina piyapinënpoa canpoasoꞌ. Ohuicaroꞌsa huaꞌanëni aꞌpairinso pochin noya aꞌpairinpoaꞌ.

Éxodo 19:4

Nani niꞌnama iquipitoroꞌsa anaꞌintërahuësoꞌ. Canpitaso noya aꞌpaiatënquëma yaꞌhuërahuëquë huarëꞌ quënanquëmaꞌ. Panca onian anpiantënquë huaꞌhuin aꞌmitahuaton quëparin. Inapochachin carimantaꞌ, noya quënanquëmaꞌ.

Éxodo 19:5

Yaꞌipi isoroꞌpaquë nisha nisha piyapiꞌsa cari huaꞌanëntërahuë. Napoaton canpitasoꞌ, yaꞌipi camaitërahuëso natëcoꞌ. Maꞌsona taꞌtëhua canpitarëꞌco anoyatërahuësonta coꞌsoꞌ naniantohuatamahuëꞌ, noya niꞌsaranquëmaꞌ. Aꞌnapita piyapiroꞌsa quëran, noya noya niꞌsaranquëmaꞌ.

Éxodo 24:3

Napotohuachina Moisësësoꞌ, paꞌsahuaton yaꞌipi Yosë camaitërinsoꞌ, israiroꞌsa shaꞌhuitoonin. Ina natanahuatonaꞌ: —Noyapaꞌ. Yaꞌipi Yosë camaitërinso nisarai, itopi.

Éxodo 24:7

Ina quëran, Yosërëꞌ anoyatopiso quirica chiníquën nontërin. Yaꞌipi israiroꞌsa natanacaiso marëꞌ naporin. Nani natanpachinara: —Yaꞌipi cancanëhuëi quëran Sinioro camaitërinso natëarai, topi.

Isaías 43:1

Israiroꞌsanquëmaꞌ, nininquëmasoꞌ nontarinquëma natancoꞌ. Canpitaso Cacopo shinpitanquëma niꞌtomaꞌ, noya natancoꞌ: “Carinquëma nichaꞌëranquëma niꞌton, ama tëꞌhuacosohuëꞌ. Carima nininëma quëran përaranquëma niꞌton, huaꞌanëntëranquëmaꞌ.

Isaías 43:15

Caso Sinioroco. Ca nohuanton israiroꞌsanquëma yaꞌhuëramaꞌ. Caso Yosëco noyasáchin nicato huaꞌanëntëranquëmaꞌ,” tënin.

Isaías 43:7

Inapitasoꞌ ca pochachin ninintopi. Cari chachin inapitaso acorahuë. Catahuarahuëso nicatonaꞌ, yaꞌipiya quëran paꞌyatiinacoso marëꞌ acorahuë.

Isaías 63:16

¡Quëmasoꞌ, tatahuëi pochin ninan! Apraanso co aꞌna nohuitomarincoihuëꞌ. Cacoponta co aꞌna yonquimarincoihuëꞌ. Quëmaso Sinioro tatahuëi pochin ninan. Iráca quëran huarëꞌ nichaꞌërancoi.

Isaías 64:7

Co incoi tëranta chinotërainquënhuëꞌ. Quëmasáchin cancantaꞌhuaisoꞌ, co nohuantëraihuëꞌ. Napoaton naꞌpitatë pochin nitërancoi. Co noyahuëꞌ ninai niꞌton, aꞌporancoi.

Isaías 64:8

Napopiraihuëꞌ, quëmaso Sinioro tatahuëi pochin ninan. Quiyaso tëshiroꞌpa pochin ninai. Quëmaso tëshitonaꞌpi pochin ninan. ¡Quëmasáchin yaꞌipicoi ninancoi!

Jeremías 31:9

Orarëꞌnachin, naꞌnërëꞌnachin, huëꞌsapi. Cari chiniiꞌ yaꞌhuërinquë quëpaarahuë. Noyá tapapinan ira quëshihuato co iꞌpaponahuëꞌ. Ca mini israiroꞌsa paꞌpina pochin ninahuë. Inapitantaꞌ, paninanëhuë pochin nipi,” tënin.

Ezequiel 33:24

“Israiroꞌsa ninanonënapita inimiconënapitari ataꞌhuantërin. Inaquë quëparitopisopitaso napopi: ‘Apraansoꞌ inaoraíchin niponahuëꞌ, yaꞌipi iso noꞌpaꞌ huaꞌanëntërin. Aquëtë huarëꞌ canpoasoꞌ, naꞌaquënpoa nichinapon chachin iso noꞌpaꞌ huaꞌanëntarihuaꞌ,’ toconpi.

Malaquías 1:6

Siniorosoꞌ, yaꞌipi nanitaparin. Corto huaꞌanoꞌsa pënënaton: “Huaꞌhuaroꞌsasoꞌ, paꞌpina noya nicatona natëcaiso yaꞌhuërin. Patronoꞌsantaꞌ, piyapinënpitari natëcaiso yaꞌhuërin. Caso canpita tatanëmaco niꞌquëhuarëꞌ, ¡noya nicatomaco natëamacoso yaꞌhuërin! Patronëmaco niꞌquëhuarëꞌ, ¡natëamacoso yaꞌhuërin! Canpitaso napoaponahuëꞌ, nocanamaco. Napoapomarahuëꞌ: ‘¿Maquëta nocanainquën?’ itëramaco.

Malaquías 2:11

Cota huënton israiroꞌsanpoa co huachi Sinioroíchin cancantërëhuahuëꞌ. Napoaton aꞌnaquëma paꞌpi co noyahuëꞌ nininsopita Quirosarinquë ninamaꞌ. Yaꞌipi Israiro noꞌpaquë inapopi. Cota huënton noꞌpaquë chinotacaso pëi acopi niꞌton, Yosëri noya nicaton nosororin. Inapopirinhuëꞌ, noya sanapi manamasoꞌ tëꞌyatatomaꞌ, mamanshi camayo sanapiroꞌsa manamaꞌ. Inapoatoma Yosëri noya niꞌninsoꞌ, tapiramaꞌ.

Malaquías 2:8

Canpitaso corto huaꞌanoꞌsanquëma nipomarahuëꞌ, noya ninamaso aꞌporamaꞌ. Nonpi nanan aꞌchinatomaꞌ, naꞌa piyapiꞌsa apëshonamaꞌ. Inapoatoma Nihuiroꞌco anoyatërahuësoꞌ tapiramaꞌ.

Mateo 10:21

Aꞌnaquën imasarinaco. Aꞌnaquënso nipirinhuëꞌ co nohuantarinacohuëꞌ niꞌton, quëmopinënpita capini ninoꞌhuiapi. Aꞌnaquën iin chachin niponahuëꞌ, shaꞌhuirapiarin tëpacaiso marëꞌ. Aꞌnaquëontaꞌ huiꞌnin niponahuëꞌ, imapachinco, paꞌpini chachin shaꞌhuirapiarin. Aꞌnaquëontaꞌ aꞌshin chachin, paꞌpin chachin niponahuëꞌ, imapachinaco, huiꞌninpitari shaꞌhuirapiapi.

Mateo 22:16

Napoaton aꞌnaquën aꞌpapi Quisoso natanacaiso marëꞌ. Irotisë paꞌyatopisopitantaꞌ caraya paꞌpi. Canconahuatonaꞌ, noyásha nontonpi nonpintacaiso marëꞌ. —Quëmasoꞌ Maistro, noyanquën. Co onporontaꞌ nonpinanhuëꞌ. Yosë pënëninpoasoꞌ noꞌtëquën aꞌchintërancoi. Piyapiꞌsaꞌ noꞌhuipirinënquëontaꞌ, co ina yonquiranhuëꞌ. Co huaꞌan tërantaꞌ tëꞌhuatëranhuëꞌ.

Mateo 3:9

Ama canpitaora ninonpintocosohuëꞌ. “Apraan shinpitacoi niꞌtoi, Yosë piyapinënpitacoi,” ama tocosohuëꞌ. Yosë nohuantërin naporini, iso naꞌpiroꞌsantaꞌ Apraan shinpita atarantacasoꞌ nanichitonhuëꞌ.

Lucas 1:73

Tata masho Apraan shaꞌhuitërinsoꞌ yonquirárin.

Lucas 3:8

Co noyahuëꞌ yonquiramasopita naniantatomaꞌ, noya nicoꞌ. Ama ninonpintocosohuëꞌ. “Quiyasoꞌ Apraan shinpitacoi niꞌtoi, Yosë piyapinënpitacoi,” ama tocosohuëꞌ. Yosë nohuantërin naporini, iso naꞌpiroꞌsantaꞌ Apraan shinpita atarantacasoꞌ nanichitonhuëꞌ.

Juan 8:39

—Apraan mini quiyaso tatanëhuëi, itopi. —Apraan pochin cancantëramaꞌ naporini, ina pochin noya niitomahuëꞌ.

Juan 8:41

Canpitaso nipirinhuëꞌ tatanëma pochin nininsoꞌ nonanamaꞌ, itërin. —Co quiyasoꞌ maꞌpapiaꞌhuaroꞌsacoihuëꞌ. Yosë chachin tatanëhuëi. Inasáchin natërai, itaantapi.

Juan 8:53

Tata Apraan, pënëntonaꞌpiroꞌsaꞌ, inapita chiminpi. ¿Inapita quëran quëmasoꞌ chini chiníquën nanantëran ti? ¿In pochintaꞌ cancantaton, naporan? itaantapi cotioroꞌsari.

Juan 8:56

Tata Apraan yonquirinco. “Aꞌna tahuëri Yosëri aꞌpaimarinsoꞌ oꞌmararin,” taꞌton, noya cancantërin. Nani niꞌninco niꞌton, noya cancantërin, itërin Quisosori.

Hechos 17:24

Ina Yosësoꞌ chini chiníquën nanantërin. Iráca isoroꞌpaꞌ, yaꞌipi maꞌsha isëquë yaꞌhuërinsontaꞌ acorin. Inasoꞌ huaꞌanënpoaꞌ. Isoroꞌpaquë yaꞌhuërinsopita, inápaquë yaꞌhuërinsopita, yaꞌipimiáchin huaꞌanëntarin. Moshatopiso pëiꞌ piyapiꞌsari nipiquë co Yosë yaꞌhuërinhuëꞌ.

Hechos 17:25

Co piyapi maꞌshanënpita nohuantërinhuëꞌ. Co mantaꞌ pahuantërinhuëꞌ. Inariáchin yaꞌipi maꞌshanënpoaꞌ quëtërinpoaꞌ. Ina nohuanton, nanpirëhuaꞌ. Ina nohuanton, cosharoꞌ, maꞌsha, inapita yaꞌhuëtërinpoaꞌ.

Hechos 17:26

Iráca aꞌna quëmapiraꞌ ninin. Inaya quëranchin yaꞌipi piyapiꞌsaꞌ naꞌapi. Nisha nisha nipisopita naꞌapi yaꞌipiroꞌpaquë yaꞌhuëcaiso marëꞌ. Coꞌhuara yaꞌhuëyatërasëhuahuëꞌ, yonquirinpoaꞌ. Nisha nisha parti yaꞌhuëcaso marëꞌ acorinpoaꞌ. Onporosona nanpicahuasontaꞌ yonquirin. Ina nohuanton, nanpirëhuaꞌ.

Hechos 7:2

—Co onporontaꞌ api Yosë pinorahuëꞌ. Natanco, apiroꞌsaꞌ. Iyaroꞌsaꞌ canpitantaꞌ natanco noꞌtëquën shaꞌhuichinquëmaꞌ. Iráca quëran huarëꞌ shimashonënpoapita Yosë imapi. Cantaꞌ ina imarahuë. Tata Yosësoꞌ noya noya. Iráca Tata Apraan nisha noꞌpaquë yaꞌhuasoꞌ, yaꞌnotimarin. Co Aranquë paꞌshátëraponhuëꞌ, nontërin. Misopotamia parti yaꞌhuëpirinhuëꞌ, inaquë Yosëri itapon:

Hechos 7:26

Tahuëririnquë catoꞌ israiroꞌsa capini niahuërapi, Moisësëri quënanconin. “¿Onpoatomataꞌ canpita capini niahuëaramaꞌ? Nanan anoyatocoꞌ,” itërin.

Romanos 4:1

Apraan naporinsoꞌ shaꞌhuichinquëmaꞌ. Inasoꞌ shimashonënpoaꞌ. ¿Onporahuatontaꞌ Yosëri noya niꞌnin?

Romanos 9:10

Naporahuaton, Tata Isacontaꞌ catoꞌ huiꞌnahuanin. Saꞌin Nipica itopisoꞌ yahuaihuachina, Yosëri itapon:

1 Corintios 8:6

Canpoaso nipirinhuëꞌ Tata Yosëíchin chinotërëhuaꞌ. Yaꞌipi maꞌsha ninin. Ina marëꞌ acorinpoaꞌ. Quisocristoíchin huaꞌanëntërinpoaꞌ. Ina nininpoaꞌ. Nani nichaꞌërinpoaꞌ ina nohuitatëhuaꞌ nanpicaso marëꞌ.

Efesios 4:25

Yaꞌipi imarëhuasopita Yosë huëntonënquë chachin yaꞌconëhuaꞌ. Iyanpoa pochin ninëhuaꞌ. Napoaton ama ninonpintahuasohuëꞌ. Noꞌtëquënáchin ninontahuaꞌ.

Efesios 4:6

Tata Yosëíchin chinotërëhuaꞌ. Yaꞌipi imarëhuasopita huiꞌninpita pochin niꞌninpoaꞌ. Inasoꞌ chini chiníquën nanantaton, huaꞌanëntërinpoaꞌ. Yaꞌipinpoaꞌ catahuarinpoaꞌ ina marëꞌ sacatacasoꞌ. Imapatëhuaꞌ, yaꞌcoancantomiatërinpoaꞌ.

1 Tesalonicenses 4:6

Aꞌna quëmapi saꞌin ama sëꞌhuacosohuëꞌ. Ama ina pochin niꞌtomaꞌ, soꞌin nonpintocosohuëꞌ. Sëꞌhuahuatamaꞌ, Yosë noꞌtëquën anaꞌintarinquëmaꞌ. Iráca inachachin chiníquën pënënainquëmaꞌ.

Hebreos 12:9

Tatanpoaꞌ pënënpachinpoara, natërëhuaꞌ. Piꞌpian anaꞌintopirinpoahuëꞌ, co noꞌhuirëhuahuëꞌ. Noya nicatëhuaꞌ, natërëhuaꞌ. Tata Yosëso nipirinhuëꞌ naꞌcon naꞌcon natëcasoꞌ yaꞌhuërin. Inasoꞌ nininpoaꞌ niꞌton, natëhuatëhuaꞌ, noya noya nanpiarihuaꞌ.

Josué 24:3

Apraansoꞌ, ina quëran ocoirahuë. Ocoirahuato, yaꞌipi iso noꞌpaꞌ paꞌtacaso camairahuë niꞌton, yaꞌipi paꞌtërin. Ina quëran ca nohuanton chachin shinpita naꞌamiatërin. Ca nohuanton huiꞌnahuanpachina Isaco itërin. Inaꞌton canpita shimashonëma ninin.