Malaquías 1:6 - Chayahuita (Shahui)

⁶ Siniorosoꞌ, yaꞌipi nanitaparin. Corto huaꞌanoꞌsa pënënaton: “Huaꞌhuaroꞌsasoꞌ, paꞌpina noya nicatona natëcaiso yaꞌhuërin. Patronoꞌsantaꞌ, piyapinënpitari natëcaiso yaꞌhuërin. Caso canpita tatanëmaco niꞌquëhuarëꞌ, ¡noya nicatomaco natëamacoso yaꞌhuërin! Patronëmaco niꞌquëhuarëꞌ, ¡natëamacoso yaꞌhuërin! Canpitaso napoaponahuëꞌ, nocanamaco. Napoapomarahuëꞌ: ‘¿Maquëta nocanainquën?’ itëramaco.

Malaquías 1:6 ပူးပေါင်းရင်းမြစ်များ

Éxodo 20:12

Tatama noya nicatoma natëcoꞌ. Mamamanta natëcoꞌ. Natëhuatamaꞌ, naꞌcon catahuaranquëmaꞌ. Canaan noꞌpaꞌ quëtohuatënquëmaꞌ, huaꞌqui inaquë noya yaꞌhuaramaꞌ.

Isaías 1:2

Piꞌiroꞌtëquë, isoroꞌpaquë, inaquëpita yaꞌhuëramasoꞌ, yaꞌipinquëma Sinioro noninso natancoꞌ: “Huiꞌnahuëpita huaꞌhuishin quëran huarëꞌ asoꞌsorahuë. Inapotopirahuëꞌ, inahuaso co natërinacohuëꞌ.

Isaías 43:23

Co ohuicaroꞌsa ca marëꞌ tëpatoma yaꞌipi ahuiquitëramahuëꞌ. Aꞌnaquën maꞌsharoꞌsanta tëparahuatoma piꞌpian ahuiquitacaso nipirinhuëꞌ, co inaporamahuëꞌ. Co yonarin pochin nininso tëranta natananquëmahuëꞌ. Co inapita quëshiamacosoꞌ natanatënquëma apiranquëmahuëꞌ.

Isaías 45:10

Inapochachin huaꞌhuaroꞌsantaꞌ, co paꞌpina noꞌhuicaiso yaꞌhuërinhuëꞌ: ‘¿Maꞌmarëta huiꞌnaranco niꞌton, isoroꞌpaquë poꞌsarahuë?’ co taꞌcaiso yaꞌhuërinhuëꞌ.

Isaías 64:7

Co incoi tëranta chinotërainquënhuëꞌ. Quëmasáchin cancantaꞌhuaisoꞌ, co nohuantëraihuëꞌ. Napoaton naꞌpitatë pochin nitërancoi. Co noyahuëꞌ ninai niꞌton, aꞌporancoi.

Isaías 64:8

Napopiraihuëꞌ, quëmaso Sinioro tatahuëi pochin ninan. Quiyaso tëshiroꞌpa pochin ninai. Quëmaso tëshitonaꞌpi pochin ninan. ¡Quëmasáchin yaꞌipicoi ninancoi!

Jeremías 23:11

Napoaton Sinioro naporin: “Pënëntonaꞌpiroꞌsaꞌ, corto huaꞌanoꞌsa inapitaso noya noya nicacaiso nipirinhuëꞌ, inapitaꞌton paꞌpi co noyahuëꞌ nipi. Pëinëhuëquë chachin co noyahuëꞌ nipisoꞌ, quënayatërahuë.

Jeremías 31:9

Orarëꞌnachin, naꞌnërëꞌnachin, huëꞌsapi. Cari chiniiꞌ yaꞌhuërinquë quëpaarahuë. Noyá tapapinan ira quëshihuato co iꞌpaponahuëꞌ. Ca mini israiroꞌsa paꞌpina pochin ninahuë. Inapitantaꞌ, paninanëhuë pochin nipi,” tënin.

Oseas 4:6

Co nohuitërinacohuëꞌ niꞌton, piyapinëhuëpita ataꞌhuantarahuë. Canpita corto huaꞌanoꞌsanquëma tëhuërama niꞌton, napotarahuë. Canpita chachinta co nohuitëramacohuëꞌ. Naporahuaton co nohuantëramahuëꞌ nohuitamacosoꞌ. Napoaton cantaꞌ, co corto huaꞌanoꞌsa pochin niꞌnanquëmahuëꞌ. Pënëntërahuësonta naniantërama niꞌquëhuarëꞌ, canta canpita quëran pipipisopita catahuacaꞌhuasoꞌ, naniantarahuë.

Oseas 5:1

Naquëranchin Siniorori piyapinënpita itapon: “Corto huaꞌanoꞌsanquëmaꞌ, yaꞌipi Israiro huaꞌanoꞌsanquëmaꞌ, copirnonta quëmopinënpitarë chachin, yaꞌipinquëma natanco shaꞌhuichinquëmaꞌ: ‘Canpitaso piyapinëhuëpita anishacancantërama niꞌton, Mispa ninanoquë pëcotan acoatë pochin ninamaꞌ. Taporo motopiquënta huënson acoatë pochin ninamaꞌ. Sitin motopianaquëpita noꞌpaꞌ ihuarahuatomaꞌ, pëcotan acoatë pochin ninamaꞌ. Ina marëꞌ anaꞌintaꞌhuanquëmaso yaꞌhuërin,’ tënahuë.

Levítico 19:3

Tatama noya nicatoma natëcoꞌ. Mamamanta natëcoꞌ. Chinoto tahuëri shaꞌhuitëranquëmasoꞌ noya nicatoma chinotocoꞌ. Caso Yosëco napotaranquëma niꞌton, natëco.

Malaquías 2:1

Naquëranchin Siniorori corto huaꞌanoꞌsa pënënaton: “Isontaꞌ, corto huaꞌanoꞌsanquëma shaꞌhuitaantaꞌinquëmaꞌ:

Malaquías 2:10

Iporasoꞌ ca Maraquiasëco Yosë ayonquirinco niꞌton, pënënaranquëmaꞌ: Tëhuënchachin canpoasoꞌ, yaꞌipinpoaꞌ aꞌna tataíchin pochin yaꞌhuëtërinpoaꞌ. Inasoꞌ Yosë. Yaꞌipinpoa acorinpoaꞌ. Napoaton co canpoa capini ninonpitacaso yaꞌhuërinhuëꞌ. Ninonpintohuatëhuaꞌ, Yosë shimashonënpoapitarëꞌ anoyatërinso tapiarihuaꞌ.

Malaquías 2:8

Canpitaso corto huaꞌanoꞌsanquëma nipomarahuëꞌ, noya ninamaso aꞌporamaꞌ. Nonpi nanan aꞌchinatomaꞌ, naꞌa piyapiꞌsa apëshonamaꞌ. Inapoatoma Nihuiroꞌco anoyatërahuësoꞌ tapiramaꞌ.

Malaquías 3:5

Naquëranchin Sinioro nontatënquëmaꞌ: “Caso Sinioroco, yaꞌipi nanitapato shaꞌhuitaantaranquëmaꞌ: ‘Naporoꞌ oꞌmahuato, coisë pochin nisarahuë. Noya nipatamaꞌ, noya acoaranquëmaꞌ. Co noyahuëꞌ cancantatona pënotohuachinasoꞌ, anaꞌintarahuë. Nitëhuananpitohuachinaꞌ, Yoscoarëꞌ taponahuë nonpinpachinaꞌ, patronoꞌsa piyapinënapita co noꞌtëquën pahuërëhuachinahuëꞌ, quëyoronoꞌsaꞌ, saꞌahuaroꞌsaꞌ, inapita co nitocatahuahuachinahuëꞌ, nisharoꞌsa aparisitohuachinaꞌ, co tëꞌhuatohuachinacohuëꞌ, inapitanta anaꞌintarahuë,’ tënahuë,” itërinquëmaꞌ.

Mateo 15:4

Quiricanën quëran pënëninpoaꞌ. “Tatamaꞌ, mamamaꞌ, inapita noya nicatoma natëcoꞌ,” tënin. Naporahuaton, “Inso tëranta paꞌpinaꞌ, aꞌshinaꞌ inapita co noyahuë yonquirapitonaꞌ noꞌhuihuachinaꞌ, tëpacoꞌ,” tënin Yosë iráca.

Mateo 15:6

“Co quëtacasoꞌ yaꞌhuërinhuëꞌ,” toconamaꞌ. Ina pochin aꞌchinatomaꞌ, co Yosë quiricanën natëramahuëꞌ.

Mateo 19:19

Tata natëquëꞌ. Mamantaꞌ natëquëꞌ. Quëmaora ninosororanso pochachin aꞌnapitantaꞌ nosoroquëꞌ,” itërin Quisosori.

Mateo 6:9

Napoaton Yosë yanontohuatamaꞌ, iso pochin nontocoꞌ: ‘Tata Yosë, quëmaso inápaquë yaꞌhuaponahuëꞌ, natanancoi. Quëmasáchin noya noyanquën niꞌton, yaꞌipi piyapiꞌsaꞌ chinochinënquën.

Mateo 7:21

Ina quëran itaantarin: “Naꞌa piyapiꞌsaꞌ: ‘Sinioro, Sinioro,’ itopirinacohuëꞌ, aꞌnaquën co cancanëna quëran imarinacohuë niꞌton, co Yosë huaꞌanëntërinquë yaꞌconapihuëꞌ. Yosë natëpisopitaráchin inatohuaꞌ yaꞌhuëcontapi huachi.

Marcos 10:19

Iráca pënëntërinsoꞌ nani nitotëran. “Ama piyapi tëpacosohuëꞌ. Ama nitëhuananpitocosohuëꞌ. Ama ihuatocosohuëꞌ. Ama ninonpinapicosohuëꞌ. Ama nonpincosohuëꞌ. Tatamaꞌ natëcoꞌ. Mamamantaꞌ natëcoꞌ,” tënin Yosë pënëntaton, itërin Quisosori.

Marcos 7:10

Niꞌcoꞌ. Moisësë iráca pënëntaton, naporin: “Tatamaꞌ, mamamaꞌ, inapita noya natëtomaꞌ, catahuacoꞌ. Inso tëranta paꞌpinaꞌ, aꞌshinaꞌ inapita co noyahuë yonquirapitonaꞌ noꞌhuihuachinaꞌ, tëpacoꞌ,” tënin.

Lucas 10:29

—Ina nitotaporahuëꞌ, ¿maꞌtaꞌ onpoꞌi? ¿Inpitaquë huarëtaꞌ nosoroꞌi? itaantarin.

Lucas 18:20

Iráca pënëntërinsoꞌ nitotëran. “Ama saꞌan tëhuananpitëquësohuëꞌ. Ama piyapi tëpaquësohuëꞌ. Ama ihuatëquësohuëꞌ. Ama nonpinapiquësohuëꞌ. Tata natëquëꞌ. Mamantaꞌ natëquëꞌ,” tënin Yosë iráca pënëntaton, itërin.

Lucas 6:36

Tata Yosëri yaꞌipi piyapiꞌsaꞌ nosororin. Inapochachin canpitantaꞌ aꞌnapita nosorocoꞌ,” itërin.

Lucas 6:46

Ina quëran itantarin: “Aꞌnaquëmaꞌ ‘Sinioro, Sinioro,’ itapomaracohuëꞌ, ¿onpoatontaꞌ co natëramacohuëꞌ?

Efesios 6:2

Yosë quiricanën quëran pënëninpoaꞌ. “Tatamaꞌ noya nicatomaꞌ, natëcoꞌ. Mamamantaꞌ natëcoꞌ. Natëhuatamaꞌ, Yosë naꞌcon catahuarinquëmaꞌ. Huaꞌquiꞌ noya yaꞌhuaramaꞌ,” tënin quiricanënquë. Ina pochin nicacasoꞌ Yosë naꞌcon naꞌcon nohuantërin.

Deuteronomio 32:6

¡Co napochitomahuë pora! Napotatomaꞌ, co yonquiramahuë pochin niconamaꞌ. ¡Ina canpitaso nininquëmaꞌ! ¡Huiꞌninpita pochachin aꞌpairinquëmaꞌ! ¡Coꞌta ina acorinquëmaꞌ! ¡Ina nohuanton nacion ocoiramaꞌ!

1 Pedro 1:17

Yosë nontohuatamara, “Tata,” itëramaꞌ. Aꞌna tahuëri inasoꞌ coisë pochin niꞌton, yaꞌipi piyapiꞌsaꞌ noꞌtëquën shaꞌhuitarin. Co noyahuëꞌ nipisopita noꞌtëquën anaꞌintarin. Yaꞌipi oshahuaninsopita anaꞌintarin niꞌton, tëꞌhuatacasoꞌ yaꞌhuërin. Chiminaquë huarëꞌ ina yonquiatomaꞌ, noya nicoꞌ.