Malaquías 1:4 - Chayahuita (Shahui)

⁴ Isao shinpitasoꞌ, itomoroꞌsa itopi. Inapitaso inahua capini ninontatonaꞌ: ‘Inimiconënpoapita yaꞌhuërëhuaso noꞌpaꞌ, tapitërinënpoaꞌ. Napoaponahuëꞌ, huëco anoyataantaꞌahuaꞌ,’ niitopi naporini: Caso Sinioroco yaꞌipi nanitapato: ‘Canpitaso yaꞌhuëramaso noꞌpaꞌ anoyataantahuatamaꞌ, cariso naquëranchin tapitaantaranquëmaꞌ,’ ichitohuëꞌ. Napoaton piyapiꞌsasoꞌ, ina noꞌpaꞌ apoyatatonaꞌ: ‘Paꞌpi co noyahuëꞌ nipisopita yaꞌhuëpiso noꞌpaꞌ,’ itaponaꞌ. Naporahuaton: ‘Siniorori noꞌhuimiatërinso nacion,’ itaponaꞌ.

Malaquías 1:4 ပူးပေါင်းရင်းမြစ်များ

Salmos 127:1

Coꞌsoꞌ Sinioro pëicasoꞌ catahuahuachinpoahuëꞌ, topinan quëran pëinaꞌpiroꞌsa sacatopi. Coꞌsoꞌ Sinioro ninano aꞌpaihuachinhuëꞌ, topinan quëran aꞌpaitoroꞌsa aꞌpaitopi.

Salmos 137:7

Quirosarin ninano canahuachinara, itomoroꞌsa capa cancantopi: “¡Ohuatocoꞌ! ¡Pairanën paquëëmarinquë huarëꞌ inapotocoꞌ!” topi. Napopisoꞌ yonquiaton Sinioro inapitanta anaꞌintëquëꞌ.

Salmos 33:10

Nisha nisha piyapiroꞌsa maꞌpitaso nicacaisoꞌ yonquipi. Siniorori yaꞌcopihuachina, co yonquipiso nicaponahuëꞌ.

Amós 1:11

Ina quëran Sinioro taantarin: “Itomoroꞌsantaꞌ, paꞌpi co noyahuëꞌ nipi. Israiroꞌsasoꞌ, quëmopinënapita niponaraihuëꞌ, paꞌpi noꞌhuipi. Noꞌhuitona tëpacaiso marëꞌ sahuëni siꞌhuitahuatona ima imarantapi. Noꞌhuiantopisoꞌ nichinapon chachin, co amasha tëranta nosoropihuëꞌ. Napoaton inapitantaꞌ, anaꞌintaꞌhuaso yaꞌhuërin.

Amós 3:15

Maꞌhuanoꞌsasoꞌ, oꞌnapi pëi yaꞌhuëtopi. Piꞌipi pëinta yaꞌhuëtopi. Yaꞌhuëtopirinahuëꞌ, cari yaꞌipi ataꞌhuantarahuë. Aꞌnaquën pëiroꞌsasoꞌ, huiri pomon quëranpita tapapitarapi. Aꞌnaquëonta panca nisahuaton noyápiachin pëiroꞌsa acopi. Inapopirinahuëꞌ, yaꞌipi ataꞌhuantarahuë.” Ca Sinioroco noꞌtëquën shaꞌhuitaranquëmaꞌ.

Amós 5:11

Popriyaroꞌsa ihuatomaꞌ, naꞌcon naꞌcon trico maꞌparamaꞌ. Naporamaso marëꞌ paꞌpi noya pëiroꞌsa yaꞌhuëtapomarahuëꞌ, co inaquë yaꞌhuëapomahuëꞌ. Noyápiachin oparoroꞌsa yaꞌhuëtapomarahuëꞌ, co inaquëran huino nicatoma oꞌopomahuëꞌ.

Amós 6:11

Sinioro chachin panca pëiroꞌsa yaꞌhuërinsopita, ataꞌhuantacaiso camaitapon niꞌton, inapoaponaꞌ. Huaꞌhuishin pëiroꞌsantaꞌ, inapotacaiso camaitapon. Napohuachina, yaꞌipi pëiroꞌsa taꞌhuantapon.

Amós 6:2

Paapahuachinara, huaꞌanoꞌsari: “Carini ninanoquë paꞌsahuatomaꞌ, onpopinsona yaꞌhuëhuanoꞌsa yaꞌhuëpisoꞌ, niꞌconcoꞌ. Ina quëran Amato ninanoquë paantacoꞌ. Inasoꞌ, panca ninanoꞌ. Amato quëran Cato ninanoquë paꞌmantacoꞌ. Inasoꞌ, huiristinoꞌsa ninanonënaꞌ. Inaquëpita paꞌsahuatomaꞌ, onpopinsona yaꞌhuëpisoꞌ, niꞌconcoꞌ. ¡Inapita ninanoroꞌsasoꞌ, co Israiro noꞌpaquë pochin yaꞌhuëpihuëꞌ! ¡Apinapichin noꞌpaquë yaꞌhuëpi!” itopi.

Mateo 12:30

Co imapatamacohuëꞌ, inimicotaramaco. Co catahuahuatamacohuëꞌ, sopai natëarama huachi. Piyapiꞌsaꞌ anishacancantaramaꞌ ama Yosë imacaiso marëhuëꞌ.