Lucas 9:2 - Chayahuita (Shahui)

² “Paatomaꞌ iyaroꞌsaꞌ, piyapiꞌsaꞌ aꞌchintoncoꞌ. ‘Yosë yahuaꞌanëntarinquëmaꞌ. Huëntonënquë yaꞌconpatamaꞌ, noya catahuarinquëmaꞌ,’ itocoꞌ. Caniaꞌpiroꞌsantaꞌ anoyatocoꞌ. Carinquëma catahuaranquëmaꞌ anoyatacamaso marëꞌ,” itërin.

Lucas 9:2 ပူးပေါင်းရင်းမြစ်များ

Mateo 10:5

Nani shonca catoyaꞌpi acohuachina, shaꞌhuitërin: “Paatomaꞌ iyaroꞌsaꞌ noya pënëntocoꞌ. Ama nisha piyapiroꞌsaꞌ yaꞌhuëpiquë pacosohuëꞌ. Samaria ninanoroꞌsaquëntaꞌ ama pacosohuëꞌ.

Mateo 13:19

Tricoraya paꞌsarayarëso pochin Yosë nanamën yaꞌipi parti aꞌchintërëꞌ. ‘Yosë yahuaꞌanëntarinquëmaꞌ,’ topachina, aꞌnaquën piyapiꞌsaꞌ ira pochin nipi. Nanamën natanpirinahuëꞌ, co yonquipihuëꞌ. Inairaroꞌsari huëcapairahuatonaꞌ, pëꞌyaquipiso pochin aꞌnaroáchin sopai huëꞌnin. Huëꞌsahuaton, Yosë nanamën natanpisoꞌ osërëtiirin. Ananiantërin huachi.

Mateo 24:14

Yosë huaꞌanëntërinquë yaꞌconacasoꞌ aꞌchintëranquëmaꞌ. Ina nanan chachin yaꞌipi parti aꞌchinacasoꞌ yaꞌhuërin. Yaꞌipi piyapiꞌsaꞌ nitochinaꞌ. Yaꞌipi parti aꞌchintohuachinaꞌ, naporoꞌ ayaroꞌ tahuëri naniarin huachi.

Mateo 3:2

—Yosë huaꞌanëntiinpoasoꞌ tahuëri nani yaꞌcariarinpoaꞌ. Napoaton co noyahuëꞌ yonquiramasopita naniantatomaꞌ, Yosë chachin tahuërëtantaco huachi, itarin. Nani tahuëri ina pochin pënënárin.

Marcos 16:15

Ina quëran itaantarin: “Yaꞌipi parti, iyaroꞌsaꞌ, pacoꞌ. Yaꞌipi piyapiꞌsaꞌ noya nanan carinquëmaꞌ shaꞌhuitëranquëmasoꞌ shaꞌhuitocoꞌ.

Marcos 6:12

Ina quëran caꞌtanoꞌsanënpita paꞌsahuatonaꞌ, piyapiꞌsaꞌ pënënaꞌpiapi: “Yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantaco huachi,” itëraꞌpiapi.

Lucas 10:1

Ina quëran aꞌnapitantaꞌ shaꞌhuitërin pënëntacaisoꞌ. Canchisë shonca catoꞌ quëmapiꞌsaꞌ huayonahuaton, catoya catoya aꞌparin. Nisha nisha ninanoquë aꞌparin. Oshaquëran ina ninanoroꞌsaquë chachin paꞌsarin niꞌton, inapitaꞌton aꞌparin pënëntacaiso marëꞌ. Yapaꞌpachinara itapon:

Lucas 10:11

‘Nani shaꞌhuitopirainquëmahuëꞌ. Co nohuantëramahuëꞌ niꞌton, canpitaora tëhuënëmaquë ninaꞌintaramaꞌ. Co natëpiramahuëꞌ, Yosësoꞌ yahuaꞌanëntarinquëmaꞌ,’ itocoꞌ.

Lucas 10:9

Caniaꞌpiroꞌsaꞌ inaquë yaꞌhuëhuachinaꞌ, anoyatocoꞌ. ‘Iso tahuëriꞌsaꞌ Yosë yahuaꞌanëntarinquëmaꞌ,’ itocoꞌ.

Lucas 16:16

Ina quëran tantarin: “Iráca Moisësë, pënëntonaꞌpiroꞌsaꞌ, inapita pënëntopi nani maꞌsha natëcasoꞌ. Ina quëran Coansha Paotista huëꞌpachina, noya nanan shaꞌhuirin Yosë huaꞌanëntërinquë yaꞌconacaiso marëꞌ. Yayaꞌconpisopitasoꞌ chiníquën cancantatonaꞌ, yaꞌconapi.

Lucas 9:11

Naꞌa piyapiꞌsari natanahuatonaꞌ, imapi. Canquihuachinara, Quisosori noya nontërin. Yosë huaꞌanëntërinquë yaꞌconacaisoꞌ aꞌchintarin. Nani aꞌchintahuaton, caniaꞌpiroꞌsaꞌ aꞌnaroáchin anoyatërin.