Lucas 8:13 - Chayahuita (Shahui)

¹³ Aꞌnaquëontaꞌ naꞌpiro pochin nipi. Yosë nanamën natanahuatonaꞌ, aꞌnaroáchin paꞌyatatonaꞌ, natëpirinahuëꞌ. Co chiníquën cancantatonahuëꞌ, co natëmiatopihuëꞌ. Maꞌsha onpohuachinara, Yosë aꞌpopi.

Lucas 8:13 ပူးပေါင်းရင်းမြစ်များ

Isaías 58:2

Isopochin shaꞌhuitëquëꞌ: ‘Canpitaso nani tahuëri yonquiramaco. Imatomaco onpopinsona nanpicamasoꞌ nitotëramaꞌ. Napoaton noya cancantaramaꞌ. Noyasáchin ninaꞌpiroꞌsa pochin ninamaꞌ. Camaitërahuësopitantaꞌ, co naniantëramasohuë pochin ninamaꞌ. Noꞌtëquënáchin pënënaꞌhuanquëmasoꞌ nohuantëramaꞌ. Natëtomaco noya ancantëramaso pochin ninamaꞌ.

Ezequiel 33:32

Inapitasoꞌ, arpa piꞌniaton huaino míso cantarinso pochin cancantërinën. Natanpirinënhuëꞌ, co natërinënhuëꞌ.

Oseas 6:4

Napopiramahuë Siniorosoꞌ: “Iprain huënton israiroꞌsanquëmaꞌ, Cota huënton israiroꞌsanquëmaꞌ, ¿Maꞌcha onpotatënquëma anoyachinquëma nicaya? Canpita nosororamacosoꞌ, co huaꞌquiarinhuëꞌ. Tashiramiachin chitoro iꞌcopihuachina, co huaꞌquirinhuëꞌ. Poroncayonta shipihuanpachina, aꞌnaroáchin yanirin. Inapita napopiso pochin nosororamacosoꞌ nisarin.

Marcos 6:20

Irotisërisoꞌ Coansha noya natanin. “Nóya quëmapi inasoꞌ. Co oshahuanhuëꞌ,” taꞌton, co nohuantërinhuëꞌ atëpatacasoꞌ. Coanshari pënënpachina, nisha nisha yonquiaponahuëꞌ, noya natanin.

Lucas 8:12

Aꞌnaquën piyapiꞌsaꞌ ira pochin nipi. Yosë nanamën natanpirinahuëꞌ. Inairaroꞌsari huëcapairinso pochin aꞌnaroáchin sopai huëꞌnin. Yosë nanamën natanpisoꞌ osërëtiirin. Ama natëcaiso marëhuëꞌ ananiantërin. Natëpi naporini, Yosëri cancanënaꞌ anoyachitonhuëꞌ.

Lucas 8:14

Aꞌnaquëontaꞌ nahuanoꞌsaꞌ yaꞌhuërinquë pochin nipi. Yosë nanamën natanpirinahuëꞌ. Isoroꞌparáchin yonquiatonaꞌ, co nanamën yonquipihuëꞌ. Coriquiráchin cancantopi. Nipaꞌyatacasoáchin yonquirapi. Nahuanoꞌsari imotërinso pochin maꞌsharáchin yonquiatonaꞌ, Yosë nanamën naniantopi. Co huachi natëpihuëꞌ.

Juan 15:2

Aꞌna sëꞌpaquën co nitohuachinahuëꞌ, nishitëtërin. Aꞌnaquënso nipirinhuëꞌ piꞌpian nitërin. Ina sëꞌparaꞌhuainpita piꞌpian niꞌquitërin naꞌcon naꞌcon nitacaso marëꞌ. Co niꞌquitohuatërahuëꞌ, co noya nitërinhuëꞌ.

Juan 15:6

Nara sëꞌpaꞌ nohuishatohuachina, ahuirin. Masahuatonaꞌ, pënquë tëꞌyatopi ahuiquitacaiso marëꞌ. Inapochachin co imamiatohuatamacohuëꞌ, Yosë anaꞌintarinquëmaꞌ.

Juan 5:35

Coanshasoꞌ noya quëmapi. Huaroro noya orotërinso pochin niꞌton, noya anitotërinquëmaꞌ. Yaꞌnan natanpatamara, huaꞌquimiachin paꞌyatëramaꞌ.

1 Corintios 13:2

Aꞌnaquënpoaꞌ Yosë yonquirinso chachin nitotatëhuaꞌ, shaꞌhuitarëhuaꞌ. Yaꞌipi nitotarihuarahuëꞌ, co piyapiꞌsaꞌ nosorohuatëhuahuëꞌ, topinan quëran nitotarihuaꞌ, co Yosë noya niꞌsarinpoahuëꞌ. Yosë chiníquën natëtëhuaꞌ, nontohuatëhuaꞌ, motopi chiꞌhuincacaso pochin nanitapapirëhuahuëꞌ, co piyapiꞌsaꞌ nosorohuatëhuahuëꞌ, topinan quëran natërëhuaꞌ, co Yosë noya niꞌsarinpoahuëꞌ.

1 Corintios 15:2

Ina natëmiatohuatamaꞌ, Yosë nichaꞌësarinquëmaꞌ. Aꞌnaquënso nipirinhuëꞌ: “Imarahuë,” taponaraihuëꞌ, topinan quëran napopi. Co cancanëna quëran natëpihuëꞌ. Inapitasoꞌ co nichaꞌësarinhuëꞌ.

Gálatas 3:1

Co noꞌtëquën iyaroꞌsaꞌ yonquiramahuëꞌ. ¿Intaꞌ ahuaꞌyantatënquëmaꞌ, anishacancantërinquëmaꞌ? tënahuë yonquiato. “Quisocristo corosëquë patanantopi. Canpoa marëꞌ chiminin,” itërainquëmaꞌ. Aꞌninquëchin quënanëso pochachin shaꞌhuitohuatënquëmara, natanamaꞌ. “Ina pochin chiminaton, oshanënpoaꞌ inquitërinpoaꞌ,” taꞌtomaꞌ, Quisocristo imaramaꞌ.

Gálatas 3:4

Imaramaso marëꞌ Ispirito Santo naꞌcon catahuapirinquëmahuëꞌ. Quisocristo naniantohuatamaꞌ, topinan quëran catahuarinquëmaꞌ. Napoaponahuëꞌ, co Quisocristo naniantaramahuëꞌ, topirahuëꞌ.

Efesios 3:17

Yaꞌipi cancanëna quëran natëtatonaꞌ, Quisocristoíchin yonquiꞌinaꞌ. ‘Cancanëhuëquë yaꞌhuërarin,’ taꞌtonaꞌ, noya noya nohuichinën. Catahuaquëꞌ noya nosoroꞌinën. Yaꞌipi piyapiꞌsantaꞌ nosoroꞌinaꞌ, Nara itëquën acopoꞌ paꞌpachina, co inpaninhuëꞌ. Inapochachin inapitantaꞌ ‘Quisocristo naꞌcon nosororincoiꞌ,’ taꞌtonaꞌ, aꞌnapitantaꞌ nosoroꞌinaꞌ. Noya ninosorohuachinaꞌ, Ispirito Santori catahuararin chiníquën cancantacaisoꞌ.

Colosenses 1:23

Imamiatohuatamaꞌ, Yosë noya niꞌsarinquëma huachi. Noya nanan natanamaꞌ. “Nichaꞌësarinpoaꞌ,” taꞌtomaꞌ, natërama huachi. Natëmiatocoꞌ. Ama, iyaroꞌsaꞌ, nisha nisha yonquicosohuëꞌ. Ama piꞌpian tërantaꞌ aꞌpocosohuëꞌ. Yaꞌipi parti noya nanan chachin aꞌchinapi. Inachachin cantaꞌ aꞌchinarahuë.

Colosenses 2:7

Niꞌcoꞌ. Maꞌsha shaꞌpatëra, itën acopoꞌ noꞌpaquë paꞌpachina, noya huanirin. Inapochachin canpitantaꞌ Quisocristo noya chinpitocoꞌ. Inasáchin yonquicoꞌ achinicancainquëmaꞌ. Nani iyasha noꞌtëquën aꞌchintërinquëmaꞌ niꞌton, yaꞌipi cancanëma quëran Quisocristo natëcoꞌ. “Yosë naꞌcon nosororinpoaꞌ,” taꞌtomaꞌ, nani tahuëri “Yosparinquën Sinioro,” itocoꞌ.

1 Tesalonicenses 3:5

Napoaton casoꞌ co huachi ahuantatohuëꞌ, Timotio aꞌpatëranquëmaꞌ onpopinsona imaramasoꞌ nitotaꞌhuaso marëꞌ. Sopai yanonpintërinpoaꞌ Yosë aꞌpocaso marëꞌ. Minsërinquëmaꞌ naporini, topinan quëran aꞌchinchitënquëmahuëꞌ. “Co huachi noya imamaraihuëꞌ,” taꞌtoi, Timotio aꞌpatërainquëmaꞌ.

1 Timoteo 1:19

Inasáchin natëton, pënëntëquëꞌ. Quisocristo nohuantërinsoráchin yonquiaton, noya niquëꞌ. Noyápiachin cancantaton, piyapiꞌsaꞌ aꞌchintëquëꞌ. Aꞌnaquënso nipirinhuëꞌ cancanëna quëran noya nicacaisoꞌ nitotopirinahuëꞌ, co yanatëpihuëꞌ. Nani Yosë naniantatonaꞌ, co huachi yonquipihuëꞌ. Quisocristo aꞌpoatonaꞌ, co huachi imapihuëꞌ.

Hebreos 10:39

Insosona aꞌpohuachinaꞌ, parisitopiquë paꞌsapi. Canpoaso nipirinhuëꞌ, co aꞌpoarihuahuëꞌ. Natërëhuaꞌ niꞌton, nichaꞌësarinpoa huachi.

Santiago 2:26

Huaꞌyanënpoꞌ capa nipachina, co nanpirëhuëꞌ. Inapochachin topinan quëran nonpatëhuaꞌ, co noya cancantohuatëhuahuëꞌ, co Yosë natërëhuahuëꞌ. Chimipi pochin cancantatëhuaꞌ, co tëhuënchachin imarëhuahuëꞌ.

2 Pedro 2:20

Quisocristo nanamën natanpachinara, natëpirinahuëꞌ. “Chaꞌësarahuë huachi,” taꞌtonaꞌ, co noyahuëꞌ yonquirinsopita piꞌpian naniantopi. Ina quëran nisha cancantatonaꞌ, Yosë aꞌpoantapi. Co noyahuëꞌ niantahuachinara, sopairi minsërin. Ina marëꞌ naꞌcon naꞌcon Yosëri anaꞌintarin huachi.

2 Pedro 2:22

Maꞌpitacha nipi paya. Imaponaraihuëꞌ aꞌpohuachinara, iráca ninshitatona napopiso chachin nipi: “Niꞌnira imohuachina, co yonquirinhuëꞌ. Imorinso chachin caantarin. Coshintaꞌ iꞌquë paꞌmopirinahuëꞌ, naquëranchin shipiroquë quëhuëantaton, nëꞌhuëtantarin,” topi. Inapochachin inahuanta niconpi.

1 Juan 2:19

“Quiyantaꞌ imarai,” topirinahuëꞌ, nani pipipi. Co tëhuënchachin Yosë huëntonënquë yaꞌconpihuëꞌ. Yaꞌconpi naporini, co pipiitonahuëꞌ. Pipipi quëran nitotërëhuaꞌ. “Co onporontaꞌ cancanëna quëran huarëꞌ imapihuëꞌ,” tënëhuaꞌ.

Judas 1:12

Quisoso imaramasopita coshatacaso marëꞌ niyontonpatamara, nisha aꞌchinaꞌpiroꞌsantaꞌ huëꞌpi. Naporoꞌ Yosë yonquicaso nipirinhuëꞌ, naꞌcon oꞌotonaꞌ, capa cancantopi. Co Yosë tëꞌhuatatonaraihuëꞌ, napopi. Aꞌnapita catahuacasoꞌ yaꞌhuëpirinhuëꞌ, co nosoropihuëꞌ. Inahuara noya yaꞌhuëcasoráchin yonquipi. Niꞌcoꞌ iyaroꞌsaꞌ. Huaꞌquiꞌ co oꞌnanpachinahuëꞌ, noꞌpaꞌ yaniromarin. Ina pochin nipachina, yararoꞌtëꞌ quënanpatamara, paꞌyatëramaꞌ. “Oꞌnan huëꞌsarin,” topiramahuëꞌ, co oꞌnaninhuëꞌ. Ihuanaꞌ paꞌnin. Inapochachin inapitasoꞌ pënënpirinënquëmahuëꞌ, nonpin nanan aꞌchintatënënquëmaꞌ co catahuarinënquëmahuëꞌ. Nara nitërinsontaꞌ yonquicoꞌ. Piꞌipi tahuëri nanihuachina, nitacasoꞌ yaꞌhuërin. Co nitohuachinahuëꞌ, “Nani chiminin huachi,” taꞌton, huaꞌanëni nishitëtërin. Itënë chachin ocoirin niꞌton, noyá chiminin huachi. Inapochachin nonpin nanan aꞌchinaꞌpiroꞌsaꞌ ina nara pochin niconpi. Quisocristo nanamën nitotaponaraihuëꞌ, chimipi pochin nicatonaꞌ, aꞌpopi. Ina marëꞌ chiníquën anaꞌintacasoꞌ yaꞌhuërin huachi.