Lucas 5:12 - Chayahuita (Shahui)

¹² Ina quëran aꞌna ninanoquë paantapi. Inaquë aꞌna quëmapi yaꞌhuërin, chana caniori maninsoꞌ. Noshinën noyá pëꞌyatërin. Quisoso nantën pirayan isonahuaton, itapon: —Nohuantohuatan Sinioro, nanitëran anoyatancosoꞌ. Anoyatoco topirahuëꞌ, itërin.

Lucas 5:12 ပူးပေါင်းရင်းမြစ်များ

Génesis 18:14

¡Caso Sinioroco niꞌto, yaꞌipi nohuantërahuësoꞌ nanitaparahuë nicaꞌhuasoꞌ! Aꞌna piꞌi quëran, nicaponquën huëantarahuë. Naporoꞌ Sara huaꞌhuanaton, huaꞌhuin ipoarin huachi, itërin.

1 Reyes 18:39

Ina nicatona yaꞌipi niꞌtërantapisopita isonpi. Noꞌpaquë huarëꞌ monshorahuatonaꞌ: “¡Siniorocha Yosëso paya!” topi.

2 Reyes 5:1

Siria copirno sontaronënpita huaꞌanën, Namano itopi. Inasoꞌ, Copirnori nóya niꞌnin. Siniorori ina huaꞌan quëran siriaroꞌsa catahuarin inimiconënpita minsëpi. Napoaton nóya niꞌnin. Napoaponahuëꞌ, inaso chana caniori manin.

2 Reyes 5:27

Co ina pochin yonquiranso marëhuëꞌ, Namano chana canio inquirinsoꞌ, quëmaquë paꞌsarin. Quëmá quëran pipipisopitantaꞌ, inanpihuanaponaꞌ. Co onporonta inquiapihuëꞌ, itërin. Napotohuachina piyapinënsoꞌ paꞌnin. Paaso chachin chana caniori pipitohuachina, ocai pochin huirihuantërin paꞌnin huachi.

2 Reyes 7:3

Catapini chana caniori maninsopita yaꞌcoana pirayan aipiran quëran yaꞌhuëpi. Inapitasoꞌ ninontatonaꞌ: —Capa capacasoꞌ yaꞌhuëtërinpoahuëꞌ. Co isëranchin chimirin ninacaso yaꞌhuërinhuëꞌ.

Salmos 91:15

Nontohuatamaco aꞌpaniaranquëmaꞌ. Ca chachin caꞌtanaranquëmaꞌ. Maꞌsha onpoatoma co napion ancantopiramahuëꞌ, nichaꞌësaranquëmaꞌ. Inapotaranquëma niꞌton, naní quëran noya niꞌsarinënquëmaꞌ.

Éxodo 4:6

Inapopiranhuëꞌ co natëhuachinënhuëꞌ, aꞌna yaꞌhuërëꞌ aꞌnotaantaquëꞌ: “Imiranën aꞌmoransoanaquë poꞌmoquëꞌ,” itërin. Poꞌmohuachina: “Ocoiquëꞌ,” itaantarin. Ocoihuachina, chana caniori imirinquë manin niꞌnin. Naquëranchin Yosëri shaꞌhuitaantarin: “Inaquë chachin poꞌmoantaquëꞌ,” itaantarin. Poꞌmoantaton, ocoihuachina, noyataantarin. Naporoꞌ Yosëri itërin: —Yaꞌnan aꞌnotëranso nicaponaraihuë co natëhuachinënhuëꞌ, naquëranchin aꞌnotaantahuatan, natëarinën huachi, itërin.

Mateo 26:6

Quisososo nipirinhuëꞌ Pitaniaquë paꞌnin. Simon pëinënquë coshatapatarin. Ina Simon chana caniori mapirinhuëꞌ, anoyatërinsoꞌ.

Mateo 9:28

Pëiquë canconahuatonaꞌ, Quisoso yaꞌconin. Somarayaroꞌsantaꞌ yaꞌconpachinara, Quisosori itërin: —Cari nanitato anoyatërahuësoꞌ ¿natëramaꞌ ipora ti? itërin. —Natërainquën mini Sinioro. Yaꞌipiya nanitaparan tënai, itopi.

Marcos 5:23

—¡Huiꞌnahuë Sinioro, chiminarin! Huëquëꞌ. Sëꞌhuaquiton, anoyatoco, chiminpachin, itárin.

Lucas 17:16

Quisosoquë huënantahuaton, nantëntaquëchin isonquirin. Isonquirahuaton, “Yosparinquën, Sinioro,” itërin. Samaria piyapi inasoꞌ.

Lucas 5:13

Quisosori sëꞌhuarahuaton, itapon: —Nohuantërahuë mini. Apiramiáchin anoyataranquën, itërin. Itohuachina, aꞌnaroáchin canio inquirin.

Deuteronomio 24:8

Piyapi chana caniori mapachina, Nihui huënton corto huaꞌanoꞌsa natëcaiso yaꞌhuërin. Camaitopisoꞌ, noꞌtëquënáchin natëchinaꞌ. Nani cari chachin inapita camairahuë, piyapiꞌsa inanpi caniori mapachina, maꞌsona onpotacaisoꞌ.

Hebreos 7:25

Napoaton nanitërin noyá nichaꞌëinpoasoꞌ. “Quisocristoíchin anoyacancantërinpoaꞌ,” taꞌtëhuaꞌ, Yosë imarëhuaꞌ. Iporahuantaꞌ Quisocristo nanpiárin catahuainpoaso marëꞌ. Nani tahuëri canpoa marëꞌ Yosë nontárin.

Josué 5:14

Napotohuachina, inariso itapon: —Co canpita catahuaranquëmahuëꞌ. Co inimiconëma tëranta catahuarahuëꞌ. Sinioro sontaronënpita huaꞌanënco nicato oꞌmarahuë, itërin. Ina natanaton, Cosoiso isonin quëran noꞌpaquë huarëꞌ monshorin. Monshorinquëranchin nataantarin: —Caso quëma piyapinën pochinco ninahuë. ¿Maꞌta Sinioro nohuantëran nicaꞌhuasoꞌ? itërin.