Lucas 3:16 - Chayahuita (Shahui)

¹⁶ Ina natanahuaton, Coanshari itërin: —Aporintëranquëma mini nipirinhuëꞌ, co casoꞌ Cristocohuëꞌ. Ca piquëran inasoꞌ huëꞌsarin. Inaso chini chiníquën nanantërin. Casoꞌ co piꞌpisha tërantaꞌ ina pochin chiníquën nanantërahuëꞌ. Co maquëyancohuëꞌ niꞌton, co sapatën iꞌquiritaꞌhuaso tërantaꞌ nanitarahuëꞌ. Inasoꞌ huëꞌpachin, aꞌnaquëmaꞌ Ispirito Santo ayaꞌcoancantarinquëmaꞌ. Aꞌnaquëmaso nipirinhuëꞌ, pënquë chiníquën anaꞌintarinquëmaꞌ.

Lucas 3:16 ပူးပေါင်းရင်းမြစ်များ

Proverbios 1:23

Cariima pënënanquëmasoꞌ, natëco huachi. Natëhuatamaco, ispiritonëhuë ayaꞌcoancantaranquëmaꞌ. Naporahuaton, yonquirahuësopita anitotaranquëmaꞌ.

Isaías 32:15

Napoaponahuëꞌ, Siniorosoꞌ yaꞌipi nanitapaton, oꞌmantararin catahuainpoaso marëꞌ. Naporoꞌ inotëroquëntaꞌ, noyaroꞌpaquë pochin shaꞌtaponaꞌ. Noyaroꞌparoꞌsantaꞌ, aquëtë huarëꞌ noya noya nicapon.

Ezequiel 36:25

Canpitaso mamanshiroꞌsa moshatomaꞌ, nëꞌhuëtërinso pochin ninamaꞌ. Napoatoma co noyahuëꞌ nipiramahuëꞌ. Naporamasoꞌ, inquitaranquëmaꞌ. Nëꞌmëtë nëꞌhuëtërinsoꞌ, noyaiquë pëꞌsarëso pochin nitaranquëmaꞌ.

Mateo 3:11

Co noyahuëꞌ yonquiramasopita naniantohuatamaꞌ, iꞌquë aporintaranquëmaꞌ. Ca piquëranso nipirinhuëꞌ aꞌna quëmapi huëꞌsarin. Inasoꞌ chini chiníquën nanantërin. Casoꞌ co piꞌpian tërantaꞌ ina pochin chiníquën nanantërahuëꞌ. Co maquëyancohuëꞌ niꞌto, co sapatën quëpacaꞌhuaso tërantaꞌ nanitarahuëꞌ. Inasoꞌ huëꞌpachin, aꞌnaquëmaꞌ Ispirito Santo ayaꞌcoancantarinquëmaꞌ. Aꞌnaquëmaso nipirinhuëꞌ pënquë chiníquën anaꞌintarinquëmaꞌ.

Mateo 3:12

Cayarinsoꞌ manëso pochin nisarin. Arosë mapatëra, toꞌnorarëꞌ. Ina quëran pintiarahuatëꞌ, pëiquë acorëꞌ. Shaꞌhuëtënso nipirinhuëꞌ, pënquë ahuiquitërëꞌ. Inasoꞌ co onporontaꞌ tacopiarinhuëꞌ, tënin Coansha.

Juan 1:26

—Iꞌquë mini aporintarahuë. Nipirinhuëꞌ, iporasoꞌ aꞌna quëmapi yaꞌhuërin, co nohuitëramasohuëꞌ.

Juan 1:27

Inasoꞌ chini chiníquën nanantërin. Casoꞌ co ina pochin chiníquën nanantërahuëꞌ. Co maquëyancohuëꞌ niꞌton, co sapatën iꞌquiritaꞌhuaso tërantaꞌ nanitarahuëꞌ. Ca piquëran ina pënëntapon, itërin.

Juan 7:38

Natëhuatamaco, cancanëmaquë nanpirin iiꞌ yaꞌhuëtarinquëmaꞌ. Pancaiꞌ noꞌpa quëran pipirinso pochin cancanëmaquë yaꞌhuërápon. Yosë quiricanënquë naporin, itërin.

Hechos 1:5

Coanshasoꞌ iꞌquë aporintërinquëmaꞌ. Iporaso nipirinhuëꞌ Ispirito Santo ayaꞌcoancantaranquëmaꞌ catahuainquëmaso marëꞌ. Co huaꞌqui quëranhuëꞌ yaꞌcoancantarinquëmaꞌ, itërin caꞌtanoꞌsanënpita.

Hechos 10:44

Noninsoꞌ natanahuatonaꞌ, yaꞌipiya natëpi. Nontaso chachin, Ispirito Santori yaꞌcoancantërin.

Hechos 2:33

Ina quëran Yosëri inápaquë quëpantarin. Chiníquën nanantërin niꞌton, inchinanën quëran ahuënsërin. Inapotahuaton, shaꞌhuitërin: ‘Ispirito Santo aꞌpamaquëꞌ piyapiꞌsaꞌ yaꞌcoancanchin. Iꞌhua shaꞌhuitëranquënsoꞌ,’ itërin. Ina quëran Quisosori Ispirito Santo aꞌpaimarin, yaꞌcoancantërincoi, niꞌnamaꞌ. Napoaton nisha nisha nananquë nonai, natanamaꞌ.

1 Corintios 12:13

Ispirito Santo chachin Quisocristo huëntonënquë ayaꞌconinpoaꞌ. Cotioroꞌsahuë nipon, nisha piyapiꞌsahuë nipon, napopináchin Yosë niꞌninpoaꞌ. Aꞌnaquëmaꞌ canpitaora marëꞌ sacatëramaꞌ. Aꞌnaquëmaꞌ nani tahuëri patronëmaꞌ asacatërinënquëmaꞌ. Nisha nishanpoaꞌ nipirihuahuëꞌ, Ispirito Santo catahuarinpoaꞌ. Quisocristo imarëhuaꞌ niꞌton, huëntonënquë ayaꞌconinpoaꞌ. Aporintohuachinënpoara, aꞌna huëntoínchin ninëhuaꞌ. Yaꞌipi imarëhuasopita Ispirito Santo yaꞌcoancantërinpoaꞌ.