Lucas 22:26 - Chayahuita (Shahui)

²⁶ Canpitaso nipirinhuëꞌ ama ina pochin yonquicosohuëꞌ. Insosona chiníquën nanantacaso nohuantohuachin, aꞌnapita naꞌcon naꞌcon catahuacasoꞌ yaꞌhuërin. Huaꞌan yanipatamaꞌ, piyapimia pochin cancantocoꞌ.

Lucas 22:26 ပူးပေါင်းရင်းမြစ်များ

Mateo 20:26

Canpitaso nipirinhuëꞌ ama inapita pochin cancantocosohuëꞌ. Yosë huëntonënquë yaꞌconpatëra, co chiníquën nanantacasoꞌ nohuantërëhuëꞌ. Noya noya iyaroꞌsaꞌ yanipatamaꞌ, yaꞌipi piyapiꞌsaꞌ catahuacoꞌ.

Marcos 10:43

Canpitaso nipirinhuëꞌ, ama inapita pochin cancantocosohuëꞌ. Yosë huaꞌanëntërinquë yaꞌconpatëra, co chiníquën nanantacasoꞌ nohuantërëhuëꞌ. Noya noya yanipatamaꞌ, yaꞌipi piyapiꞌsaꞌ catahuacoꞌ.

Marcos 9:35

Napoaton inaquë huënsërahuaton: —Huëcoꞌ iyaroꞌsaꞌ shonca catonquëma chachin natanquico pënëinquëmaꞌ. Inquëmasonaꞌ chini chiníquën nanantamasoꞌ nohuantohuatamaꞌ, topinan piyapi pochin cancantatomaꞌ, yaꞌipi piyapiꞌsaꞌ catahuacoꞌ, itërin.

Lucas 9:48

—Ama chiníquën nanantacamasoꞌ yonquicosohuëꞌ. Imaramaco niꞌton, huaꞌhuasha nosorohuatamaꞌ, nosoroaramaco cantaꞌ. Nosorohuatamaco, co casáchin nosoroaramacohuëꞌ. Yosëntaꞌ nosoroaramaꞌ. Inasoꞌ isoroꞌpaquë aꞌpaimarinco. Huaꞌhuaroꞌsa pochin cancantopisopita Yosëri noya noya niꞌnin, itërin Quisosori.

Romanos 12:2

Iporasoꞌ notohuaroꞌ piyapiꞌsaꞌ co Yosë natëpihuëꞌ. Maꞌsharáchin yonquiatonaꞌ, co Yosë yonquipihuëꞌ. Ama inapita nonancosohuëꞌ. Nani tahuëri Yosë nontocoꞌ yonquirinso chachin quëchinquëmaꞌ. Ina yonquihuatamaꞌ, nohuantërinso chachin anitotarinquëmaꞌ. Ina quëran noya noya cancantohuatamaꞌ, noya niꞌsarinquëmaꞌ.

1 Pedro 5:3

Pënëntohuatamaꞌ, ama chiníquën nontocosohuëꞌ. Ama huaꞌan pochin cancantatomaꞌ, camaitocosohuëꞌ. Yosë acorinquëmaꞌ aꞌchintëramasopita catahuacamasoꞌ. Napoaton noya yonquiatomaꞌ, noya nicoꞌ inapitantaꞌ inachachin nonainquëmaso marëꞌ.

1 Pedro 5:5

Huiꞌnapiꞌsanquëmantaꞌ ansianoꞌsaꞌ natëcoꞌ. Yaꞌipinquëmaꞌ noya yonquiatomaꞌ, nicatahuacoꞌ. Quiricanën quëran itërinpoaꞌ: “Caora noya nisarahuë, taꞌtomaꞌ, nocantohuatamaꞌ, Yosë co noya niꞌsarinquëmahuëꞌ. Nipirinhuëꞌ, ‘Caora co nanitërahuëꞌ noya nicaꞌhuasoꞌ. Catahuaco,’ topatamaꞌ, inaora nohuanton, Yosë nóya catahuarinquëmaꞌ,” tënin.