Lucas 20:23 - Chayahuita (Shahui)

²³ Quisososo nipirinhuëꞌ yonquipisopita nitotërin. —¿Onpoatomataꞌ yaatëhuëramaco?

Lucas 20:23 ပူးပေါင်းရင်းမြစ်များ

Salmos 95:9

Inapitasoꞌ naꞌcon catahuato, catapini shonca piꞌipi nani maꞌsha quëtërahuë. Inapotopirahuëꞌ, co natëtonacohuëꞌ tënirinaco. Napoaton inapita noꞌhuito: ‘Isopitasoꞌ, camaitërahuësopita co yanatërinacohuëꞌ. Co yanohuitërinacohuëꞌ. Co cancanëhuë yamapihuëꞌ.

Mateo 16:1

Ina quëran parisioroꞌsaꞌ, satosioroꞌsaꞌ inapita Quisoso nontacaiso marëꞌ huëꞌpi. Nonpintatonaꞌ, nontopi atëhuëcaiso marëꞌ. “Yosë aꞌpaimahuachinquën, sacaiꞌ nicacaso nininsoꞌ niquëꞌ. Quiyantaꞌ ina nicatoi, natëiinquën,” itiipi.

Mateo 22:18

Yanonpintopisoꞌ nitotaton, Quisosori itërin: —¡Canpitasoꞌ nonpintënquëmaꞌ! ¿Maꞌmarëtaꞌ yaatëhuëramaco?

Lucas 20:20

Napoaton aꞌnaquën quëmapiꞌsaꞌ amatahuatonaꞌ, itaponaꞌ: “Nonpintatomaꞌ, Quisosoquë pacoꞌ. Yaimaramaso pochin nicatomaꞌ, ina nontocoꞌ atëhuëcaso marëꞌ. Ina quëran shaꞌhuirapihuatamaꞌ, huaꞌani sontaroꞌsaꞌ aꞌpaarin ina macacaso marëꞌ,” itopi.

Lucas 20:22

Napoaton yanatanainquën. Noma copirnosoꞌ nisha piyapi niponahuëꞌ, yaꞌipinpoaꞌ huaꞌanëntërinpoaꞌ. Coriqui maꞌpainpoaso marëꞌ comisionën aꞌparin. Huëꞌpachinaꞌ, ¿noya ipora quëtacasoꞌ ti? ¿Maꞌtaꞌ Yosë nohuantërin nicaꞌhuaisoꞌ? Shaꞌhuitocoi nitochii, itopi.

Lucas 20:24

Noma coriqui quëshico niꞌi, itërin. Napohuachina, quëtopi. —¿Intaꞌ isosoꞌ nonanpisoꞌ? itohuachina, —Noma copirno, itopi. —¿Intaꞌ nininëontaꞌ isëquë ninshitopi? itaantahuachina, —Noma copirno chachin, itaantapi.

Lucas 5:22

Topinan yonquiarapirinahuëꞌ, inaora yonquinën quëran Quisoso nitotërin. —¿Onpoatomataꞌ co noyahuëꞌ yonquirapiramaco?

Lucas 6:8

Topinan yonquiarapirinahuëꞌ, Quisosori ninorin. Napoaton apia itërin: —Huëꞌsahuaton huancánachin huaniquëꞌ, itërin. Napotohuachina, huanirahuaton, inaquë paꞌnin.

Hechos 13:10

—Quëmasoꞌ sopai pochin cancantëran. Yosësoꞌ noya noya nipirinhuëꞌ, yainimicotëran. Tëhuënchachin nonpintënquën, paꞌpi co noya quëmapinquënhuëꞌ. Sinioro noꞌtëquën shaꞌhuitopirinpoahuëꞌ, ¿onpoatontaꞌ quëmari nonpintaton, aꞌnapita anishacancantaran?

1 Corintios 10:9

Naporahuatonaꞌ Sinioronta tënipi: “Co nimara anaꞌintarinpoahuëꞌ,” taꞌtonaꞌ, co noyahuëꞌ nipi. Ina marëꞌ yaꞌhuanatonaꞌ, naꞌa chiminpi.

1 Corintios 3:19

Co imapisopitasohuëꞌ nani maꞌsha nitotaponaraihuëꞌ: “Co noꞌtëquën yonquipihuëꞌ,” tënin Yosë. Quiricanën quëran anitotërinpoaꞌ. “Naꞌcon nitotatonaꞌ, piyapiꞌsaꞌ nonpintopirinahuëꞌ, co nanitopihuëꞌ Yosësoꞌ nonpintacaisoꞌ. Inari naꞌcon naꞌcon nitotaton, minsëarin,” tënin.

Efesios 4:14

Ina quëran noꞌtëquën yonquiarihuaꞌ. Co huachi huaꞌhuaroꞌsa pochin cancantarihuahuëꞌ. Huaꞌhuaroꞌsasoꞌ co yonquiyatërapihuëꞌ niꞌton, nisha nisha natëtopi. Canpoaso nipirinhuëꞌ chinotënpoa pochin noꞌtëquën yonquiaꞌahuaꞌ. Niꞌcoꞌ. Panca ihuan huëꞌpachina, poti niquëran niquëran ohuërërin. Co noꞌtëquën yanponinhuëꞌ. Inapochachin aꞌnaquën nisha nisha nanan natanpachinara, nisha nisha yonquipi. Co Quisocristo nanamënáchin yonquipihuëꞌ. Aꞌnaquën nisha nisha aꞌchinapi. Noyá nitotopi nonpinacaisoꞌ. Nonpin nanan imatonaꞌ, yanonpintopirinënquëmahuëꞌ, ama piꞌpian tërantaꞌ natëcosohuëꞌ.

Hebreos 4:13

Yaꞌipi ninëhuasopita Yosësoꞌ nitotërin. Poꞌoana quëran nipirëhuahuëꞌ, yaꞌipi niꞌninpoaꞌ. Co piꞌpisha tërantaꞌ inasoꞌ nonpintarihuahuëꞌ. Yaꞌipi yonquirëhuasopitantaꞌ noyá nitotërin. Ayaroꞌ tahuëri yaꞌipinpoaꞌ ninëhuasopita aipitarinpoaꞌ. Naporoꞌ coisë pochin nontarinpoaꞌ. Nontohuachinpoaꞌ, noꞌtëquën shaꞌhuitacasoꞌ yaꞌhuapon.