Lucas 18:7 - Chayahuita (Shahui)

⁷ ¡Yosëso nipirinhuëꞌ nóya niꞌton, huayoninsopita naꞌcon catahuarin! Aꞌnapitari aparisitohuachinaꞌ, Yosëri noꞌtëquën anaꞌintarin. Tahuërirë chachin, tashirë chachin ina nontopi niꞌton, catahuaarin. Co naniantarinhuëꞌ.

Lucas 18:7 ပူးပေါင်းရင်းမြစ်များ

Isaías 40:27

Israiroꞌsanquëmaꞌ, canpitaso Cacopo shinpitanquëmaꞌ. Canpitaso naporamaꞌ: “¡Sinioroso co huachi tahuërëtërinpoahuëꞌ! Parisitápirëhuahuëꞌ co nonininpoahuëꞌ,” tënamaꞌ. ¡Co ina pochin yonquicamaso yaꞌhuërinhuëꞌ!

Habacuc 2:3

Shaꞌhuitaranquënsopitasoꞌ, co apiramiachin naniarinhuëꞌ. Napoaponahuë onpopionta nanipon. Huaꞌquiarin pochin nipirinhuëntaꞌ, ninaquëꞌ. Tahuërinën nanihuachin, nanipon.

Mateo 24:22

Yosë nohuanton, co huaꞌquiꞌ aparisitapihuëꞌ. Huaꞌquiꞌ aparisitapi naporini, yaꞌipi piyapiꞌsaꞌ taquiꞌitonahuëꞌ. Nipirinhuëꞌ, piyapinënpita nosoroaton, co nohuantërinhuëꞌ huaꞌquiꞌ aparisitacaisoꞌ. Huayoninsopita nichaꞌësarin huachi.

Mateo 24:24

Naꞌa nonpin nanan pënëntonaꞌpiroꞌsaꞌ huëcaponaꞌ. ‘Casoꞌ Cristoco’ tosapi aꞌnaquën. ‘Casoꞌ ninotonaꞌpico,’ tosapi aꞌnaquëontaꞌ. Sacaiꞌ nininsopita nisapi piyapiꞌsaꞌ nonpintacaiso marëꞌ. Huayoninsopitantaꞌ nonpintochinaichin nisapi.

Mateo 7:11

Canpitasoꞌ co noyahuëꞌ yonquiapomarahuëꞌ, huiꞌnamaꞌ nosororamaꞌ. Noya maꞌsha quëtëramaꞌ. Yosësoꞌ noya noya niꞌton, naꞌcon naꞌcon nosororinquëmaꞌ. Inápaquë yaꞌhuaponahuëꞌ, huiꞌninpita pochin niꞌninquëmaꞌ. Nontohuatamaꞌ, noya nininsoꞌ quëtarinquëmaꞌ. Catahuarinquëmaꞌ noya cancantacamaso marëꞌ.

Lucas 11:13

Canpitasoꞌ co noyahuëꞌ yonquiapomarahuëꞌ, huiꞌnamaꞌ nosororamaꞌ. Noya maꞌsha quëtëramaꞌ. Yosësoꞌ noya noya niꞌton, naꞌcon naꞌcon nosororinquëmaꞌ. Inápaquë yaꞌhuaponahuëꞌ, huiꞌninpita pochin niꞌninquëmaꞌ. Nontohuatamaꞌ, ‘Ispirito Santo ayaꞌcoancantoco,’ itohuatamaꞌ, ayaꞌcoancantarinquëmaꞌ,” itërin.

Lucas 2:37

soꞌini ayananpirin niꞌton, nani huaꞌquiꞌ quëyoronin. Nani posa shonca catapini piꞌipitërin. Yosë chinotopiso pëiquë yaꞌhuëmiatërin. Tahuërirë chachin, tashirë chachin Yosë chinotërin. Apira apira Yosë yonquirin. Co cosharoꞌ yonquiatonhuëꞌ, Yosë nontárin.

Lucas 21:28

Napoaton nisha nisha quira nisahuachinaꞌ, nisha nisha maꞌsha onporahuachinaꞌ, ama paꞌyancosohuëꞌ. Oꞌmantaꞌhuasoꞌ tahuëri naniriarin niꞌton, nóya cancantatomaꞌ, ninaco. Oꞌmantahuato, noya nichaꞌësaranquëmaꞌ. Yosëꞌpaꞌ quëpantaranquëmaꞌ,” itërin Quisosori.

Romanos 8:33

Yosë huayoninpoaꞌ niꞌquëhuarëꞌ, co insonta nanitërinhuë shaꞌhuirapinpoasoꞌ. Yosë chachin noya niꞌninpoaꞌ.

Colosenses 3:12

Yosë nosoroatonpoaꞌ, huayoninpoaꞌ noya nicacaso marëꞌ. Napoaton yaꞌipi piyapiꞌsaꞌ nosoroatomaꞌ, noya nontocoꞌ. Nasha aꞌmorëso pochin noyápiachin cancantocoꞌ. Ama nocantocosohuëꞌ. Nani tahuëriya yonquicoꞌ aꞌnapita catahuacaso marëꞌ. Sano nicatomaꞌ, noya nontocoꞌ. Maꞌsha onpoapomarahuëꞌ, ahuantocoꞌ.

1 Tesalonicenses 3:10

Nani tahuëri tashirë chachin Yosë nontarai canpitataquë pacaꞌhuaiso marëꞌ. Co yaꞌipi Yosë nanamën nitochátëraramahuëꞌ. Pahuantarinquëmaꞌ niꞌton, ina aꞌchinchinquëmaꞌ noya noya imacamaso marëꞌ, tënahuë.

2 Tesalonicenses 1:6

Iporasoꞌ aꞌnapita noꞌhuirinënquëmaꞌ. Aparisitapirinënquëmahuëꞌ, aꞌna tahuëri Yosëri noꞌtëquën anaꞌintarin. Co naniantarinhuëꞌ. “Oshahuanoꞌsaꞌ anaꞌintacasoꞌ yaꞌhuërin,” tënin.

1 Timoteo 5:5

Aꞌnaquën quëyoronoꞌsaso nipirinhuëꞌ, co huaꞌhuinpita yaꞌhuëtërinhuëꞌ. Yosëíchin yonquiarin. “Ina catahuarinco,” taꞌton, nani tahuëri Yosë nontarin. Tashirë chachin nontarin. Inapitasoꞌ catahuahuaꞌ.

2 Timoteo 1:3

Iráca shimashonëhuëpita Yosë chinotopi. Inapochachin cantaꞌ chinotërahuë. Yosë nanamën noꞌtëquën natëto, chinotërahuë. Ina marëꞌ noyápiachin cancantërahuë. Nani tahuëri tashirë chachin Yosë nontato, quëma yonquiranquën. Noya imaranso marëꞌ: “Yosparinquën Sinioro,” itërahuë.

2 Timoteo 2:10

“Yosë nohuanton, huayoninsopita oshaquëran imasapi,” taꞌto, yaꞌipiya ahuantërahuë. Quisocristo imapachinaꞌ, nichaꞌësarin. Oshanënaꞌ inquitahuaton, anoyacancantarin niꞌton, aꞌna tahuëri Yosëꞌpaꞌ nanpiantarapi. Inatohuaꞌ noya noya yaꞌhuëcontapi. Co onporontaꞌ pipiapihuëꞌ.

Tito 1:1

Ca Paonoco ninshitaranquën, niꞌquëꞌ. ¿Noya yaꞌhuaran? Noya cantaꞌ yaꞌhuarahuë. Tata Yosë huaꞌanëntërinco niꞌton, inasáchin natërahuë. Quisocristo acorinco nanamën aꞌchinaꞌhuaso marëꞌ. Yosë huayoninpoaꞌ niꞌton, huëntonënquë yaꞌconëhuaꞌ. Nóya natëcaiso marëꞌ aꞌchinarahuë. Noꞌtën nanan aꞌchinaꞌhuaso marëꞌ acorinco. Ina natëhuatëhuaꞌ, noꞌtëquën imasarëhuaꞌ.

1 Pedro 1:1

Ca Pitroco ninshitaranquëmaꞌ, niꞌcoꞌ. ¿Noya canpitantaꞌ yaꞌhuaramaꞌ? Noya cantaꞌ isëquë yaꞌhuarahuë. Quisocristo aꞌparinco nanamën aꞌchinaꞌhuaso marëꞌ. Canpitasoꞌ aparisitatënënquëmaꞌ, ayanquërinënquëmaꞌ niꞌton, nisha nisha parti yaꞌhuëaramaꞌ. Pontoquë, Carasiaquë, Capatosiaquë, Asiaquë, Pitiniaquë, inaquëpita yaꞌhuëramasoꞌ nanan aꞌpataranquëmaꞌ. Tëhuënchachin co isoroꞌpaquë yaꞌhuëmiatarihuahuëꞌ. Yosë nohuanton, Quisocristo imarëhuaꞌ niꞌton, Yosëꞌpaꞌ yaꞌhuëmiatarihuaꞌ. Isëquësoꞌ topinan yacapatatëhua pochin ninëhuaꞌ.

2 Pedro 3:9

Aꞌnaquën napopi: “Yosë huaꞌquiarin. Naniantërinpoaꞌ,” topirinahuëꞌ, co huaꞌquirinhuëꞌ. Co topinan quëran shaꞌhuitërinpoahuëꞌ. Nosoroatonpoaꞌ, ninarárin. Co nohuantërinhuëꞌ aꞌna piyapi tërantaꞌ parisitopiquë pacacasoꞌ. Naꞌcon naꞌcon piyapiꞌsaꞌ co noyahuëꞌ yonquipisopita naniantacaiso marëꞌ ninarárin.

Apocalipsis 18:20

Yaꞌipi inápaquë yaꞌhuëramasopitaso nipirinhuëꞌ, ama ina marëꞌ sëtocosohuëꞌ. Imaramaꞌ niꞌton, noya cancantocoꞌ. Aparisitopirinënquëmahuëꞌ, nani Yosëri anaꞌintërin huachi. Ina marëꞌ Quisoso caꞌtaninsopita, pënëntonaꞌpiroꞌsaꞌ, inapitantaꞌ noya cancanchinaꞌ.

Apocalipsis 6:10

Tëpahuachinara, huaꞌyanënaꞌ inápaquë yaꞌhuëcontarahuatonaꞌ, Yosë nontápi. —Quëma Sinioro chini chiníquën nanantëran. Noyasáchin nicaton, noꞌtëquën nonan. ¿Onporo huarëtaꞌ oshahuanoꞌsaꞌ anaꞌintaran? Tëparinacoiso marëꞌ noꞌtëquën anaꞌintacasoꞌ yaꞌhuërin, tosapi.

Apocalipsis 7:15

Napoaton Yosë yaꞌhuërinquë huëntapi. Tahuërirë chachin tashirë chachin ina chinotapi. Yosëri ichiyaꞌhuëaton, niꞌsarin.