Lucas 18:12 - Chayahuita (Shahui)

¹² Nani simana catoroꞌ ayonarahuë. Yaꞌipi canarahuë quëran, diesmo quëma marëꞌ acorahuë,’ itërin Yosë nontaton.

Lucas 18:12 ပူးပေါင်းရင်းမြစ်များ

Isaías 1:15

Nontamacoso marëꞌ anquihuatamara, co manta yaniꞌnanquëmahuëꞌ. Naꞌaro nontopiramacohuëꞌ, co natanaranquëmahuëꞌ. Naꞌcon tëpatërama niꞌton, huënaiꞌ imirasáchin pochin niꞌnanquëmaꞌ.

Malaquías 3:8

Naporama niꞌton, carimanta ayonquiꞌinquëmaꞌ: ‘¡Caso Yosëco niꞌto, co onporonta ihuamacoso yaꞌhuërinhuëꞌ! ¡Canpitaso napoaponahuëꞌ, ihuaramaco!’ Napoapomarahuëꞌ, ‘¿maꞌta onpoatoi ihuarainquënsoꞌ?’ itaantaramaco. ‘Diesmoroꞌsa co quëtatomacohuëꞌ, ihuaramaco. Maꞌpitaso quëtamacoso nininsontaꞌ, co quëtatomacohuëꞌ naporamaꞌ.

Números 23:4

Inaquë Yosëri yaꞌnotohuachina, Paramori itapon: —Canchisë artaro ninahuë. Aꞌnaya aꞌnayaquë aꞌnara toroaꞌhua nisahuaton aꞌnara carniro tëparahuato, quëma marëꞌ acorahuë, itërin.

Mateo 5:20

Cotio maistroꞌsaꞌ, parisioroꞌsaꞌ, inapita Yosë quiricanën noya nitotaponaraihuëꞌ, co cancanëna quëran imapihuëꞌ. Canpitantaꞌ co yaꞌipi cancanëma quëran huarëꞌ imapatamahuëꞌ, co onporontaꞌ Yosë huaꞌanëntërinquë yaꞌconaramahuëꞌ,” tënin.

Mateo 6:1

Naquëranchin Quisoso pënëntaantarin: “Aꞌnaquënsoꞌ piyapiꞌsari noya nicacaiso marëꞌ noya Yosë imapisopita pochin yaꞌnopirinahuëꞌ, co tëhuënchachin cancanëna quëran huarëꞌ Yosë yonquipihuëꞌ. Ina pochin nipatamaꞌ, co inápaquë Tata Yosë acanaarinquëmahuëꞌ. Ama iyaroꞌsaꞌ inapita pochin nicosohuëꞌ.

Mateo 6:16

Ina quëran itaantarin: “Ama nonpinaꞌpiroꞌsa pochin nicosohuëꞌ. Aꞌnaquën Yosë nontacaso marëꞌ yaꞌipi tahuëri co mantaꞌ coshatërinhuëꞌ. Naporahuaton, co nitapamantarinhuëꞌ. Sëtërëso pochin yaꞌnorin aꞌnapita nitotacaiso marëꞌ. Co cancanën quëran chinotaponahuëꞌ, aꞌnapitari nicacaiso marëꞌ naporin. Niꞌpachinara: ‘Ma noya Yosë chinotërin,’ topi. Piyapiꞌsari noya niꞌpirinahuëꞌ, co huachi Yosëri acanaarinhuëꞌ.

Mateo 6:5

Ina quëran itaantarin: “Yosë nontohuatamaꞌ, ama nonpinaꞌpiroꞌsa pochin nicosohuëꞌ. Inapitasoꞌ niyontonpiso pëiquë huanirahuatonaꞌ, naꞌcon Yosë nontopirinahuëꞌ, co cancanëna quëran huarëꞌ nontopihuëꞌ. Cachiquëntaꞌ aꞌninquëchin Yosë nontopirinahuëꞌ, piyapiꞌsari noya nicacaiso marëꞌ napopi. Co tëhuënchachin Yosë yonquipihuëꞌ. Piyapiꞌsari noya niꞌpirinahuëꞌ, Yosërisoꞌ co acanaarinhuëꞌ.

Mateo 9:14

Ina quëran Coanshari aꞌchintërinsopita huëcatonaꞌ, Quisoso nontiipi: —Quiyasoꞌ aꞌna tahuëri co coshatatoihuëꞌ, Yosë nontarai. Parisioroꞌsantaꞌ inapopi. Quëma imarinënsopitaso nipirinhuëꞌ, noya coshatapi, oꞌosapi, inapopi. ¿Onpoatontaꞌ co quiya pochin imarinënhuëꞌ? itiipi.

Lucas 11:42

“Parisioroꞌsanquëmaꞌ, ¡maꞌhuantacha canpitasoꞌ nisarama paya! ‘Nani maꞌsha canarëhua quëran, diesmo Yosë quëtacasoꞌ yaꞌhuërin,’ itërinpoaꞌ Moisësë. Ina natëpiramahuëꞌ, co noya ninamahuëꞌ. Nani maꞌsha shaꞌnama quëran, diesmo quëtëramaꞌ. Yaꞌipi cosharoꞌ apimotacaso marëꞌ shaꞌnamaso manama quëran huarëꞌ, diesmo quëtëramaꞌ. Napoaponahuëꞌ, co Yosë nosororamahuëꞌ. Piyapiꞌsantaꞌ yanonpintëramaꞌ. Ina marëꞌ Yosë anaꞌintarinquëmaꞌ. Diesmo Yosë quëtacasoꞌ noya nipirinhuëꞌ, nosorocasoꞌ naꞌcon naꞌcon nohuantërin.

Lucas 17:10

Canpitantaꞌ iyaroꞌsaꞌ, Yosë shaꞌhuitohuachinquëmaꞌ, natëcoꞌ. Nani natëhuatamaꞌ: ‘Topinan piyapinënpoaꞌ niꞌtëhuaꞌ, natërëhuaꞌ,’ nitocoꞌ. Yaꞌipiya natëcamasoꞌ yaꞌhuërin,” itërin Quisosori.

Romanos 3:27

Napoaton co inso tëranta nocanacasoꞌ yaꞌhuërinhuëꞌ, tënahuë. Co pënëntërinsoꞌ natërëhuaso marëꞌ Yosë noya niꞌninpoahuëꞌ. Quisocristo naporinsoꞌ natërëhuaso marëꞌ nichaꞌërinpoaꞌ niꞌton, co aꞌnapita nocanacasoꞌ yaꞌhuërinhuëꞌ.

1 Corintios 1:29

Co insontaꞌ inaora chaꞌëponhuëꞌ. Yosëꞌpaꞌ huanihuatëhuaꞌ, co inquënpoa tërantaꞌ nanitarihuahuëꞌ: “Casoꞌ noyaco,” taꞌcasoꞌ.

Gálatas 1:14

Cotioroꞌsaꞌ napopisoꞌ chiníquën imato, inasáchin yonquirahuë. Carëꞌ napopináchin piꞌipitopisoꞌ noya natëpirinahuëꞌ, casoꞌ naꞌcon naꞌcon natërahuë. Nani maꞌsha shimashonëhuëpita aꞌchinpisoꞌ yanatëpirahuëꞌ.

Efesios 2:9

Co canpoara nanitërëhuahuëꞌ chaꞌëcasoꞌ. Napoaton co nocantacasoꞌ yaꞌhuërinhuëꞌ. “Casoꞌ noyaco niꞌto, Yosëꞌpaꞌ paꞌsarahuë,” co taꞌcasoꞌ yaꞌhuërinhuëꞌ.

1 Timoteo 4:8

Nani tahuëriya sacatohuatëhuara, chinipirëhuahuëꞌ, noya noya Yosë imacasoꞌ yonquihuatëhuaꞌ, achinicancaninpoaꞌ. Achinicancanpachinpoaꞌ, noya noya nisarëhuaꞌ, tënahuë. Noya noya imapatëhuaꞌ, isoroꞌpaquë noya nanpiarëhuaꞌ. Aꞌna tahuërintaꞌ Yosëꞌpaꞌ nanpimiatarihuaꞌ.

1 Samuel 15:13

Napotohuachina Samoirosoꞌ, Saono yaꞌhuëarinquë canconin. Inari quënanahuaton itapon: —Sinioro catahuainquën. Caso Sinioro camairincosoꞌ, yaꞌipi natërahuë, itërin.