Lucas 15:24 - Chayahuita (Shahui)

²⁴ Iso huiꞌnahuë chiminin pochin niponahuëꞌ, iporasoꞌ yaꞌnoantarin. Ayatë pochin nipirinhuëꞌ, iporasoꞌ niantarahuë,’ itërin. Ina quëran pita nisapi.

Lucas 15:24 ပူးပေါင်းရင်းမြစ်များ

Génesis 45:28

Capa cancantaton tapon: “¡Tëhuënchachin Cosi nanpiárin! Coꞌhuara chimiantërasocohuëꞌ paꞌmato nimai,” tënin.

Isaías 35:10

Siniorori nichaꞌërinsopita Quirosarinquë huënantaponaꞌ. Capa cancantatona cantarëꞌnachin huënantaponaꞌ. Noya yaꞌhuëatona capa cancantaponaꞌ. Co huachi iquitacaisoꞌ yaꞌhuëaponhuëꞌ. Co huachi naꞌnëcaisoꞌ yaꞌhuëaponhuëꞌ.

Ezequiel 34:4

Sanpatopisopita co catahuaramahuëꞌ. Caniaꞌpi nipisopita co nonënamahuëꞌ. Paꞌhuëna yaꞌpanpisopitantaꞌ, co nonëntatoma tonpotëramahuëꞌ. Chihuëpisopita co yonitoma quënantaramahuëꞌ. Ayapisopitantaꞌ, co yoniramahuëꞌ. Co nosoroatomarahuëꞌ, ahuëanaquëranchin aꞌpairamaꞌ.

Mateo 8:22

Quisosori itërin: —Aꞌnaquën co nohuantopihuëꞌ imainacosoꞌ. Chimipi pochin cancantopi. Inapitari paꞌpichinaꞌ. Quëmaso nipirinhuëꞌ ca naꞌcon naꞌcon yonquiatonco, imaco, itërin.

Marcos 8:22

Ina quëran Pitsaitaquë chinpiconpi. Inaquë somaraya nininsoꞌ Quisosoquë quëpi. “Sëꞌhuaquëꞌ Sinioro noyachin,” itopi.

Lucas 10:19

Nani nanan quëtëranquëmaꞌ canpitantaꞌ sopai minsëcamaso marëꞌ. Ca yonquiatomaco, sopairoꞌsaꞌ nontohuatamaꞌ, patarinquëmaꞌ. Yaꞌhuan, yonpinca inapita iꞌnatohuatamaꞌ, co mantaꞌ onpotarinquëmahuëꞌ. Yaꞌhuan yaquëtërinposo pochin sopaintaꞌ yaacorinquëmaꞌ. Canpitariso nipirinhuëꞌ minsëaramaꞌ. Co mantaꞌ nanitarinhuëꞌ minsëinquëmasoꞌ.

Lucas 15:23

Ina quëran toroaꞌhua amoshin nininsoꞌ maꞌtomaꞌ, tëpacoꞌ caꞌahuaꞌ. Capa cancantatëhuaꞌ, pita niahuaꞌ.

Lucas 15:25

Paninanso nipirinhuëꞌ, iminquë sacatërin quëran huëntararin. Pëiquë yaꞌcaritëriahuasoꞌ, mosica piꞌnirapiso natanin. Nansatonaꞌ, capa cancantapi.

Lucas 15:32

Iyaꞌhuaso nipirinhuëꞌ, nani huënantarin. Chimininso pochin niponahuëꞌ, yaꞌnoantarin. Ayatërëso pochin nitopirëhuahuëꞌ, niantarëhuaꞌ. Ina marëꞌ noya cancantacasoꞌ yaꞌhuërin,’ itërin paꞌpini,” tënin Quisoso.

Lucas 15:4

“Aꞌna quëmapi pasa ohuicaroꞌsaꞌ pëꞌtahuaton, yaꞌipiya nosororin. Aꞌnaya tërantaꞌ chihuëhuachina, yonípon paꞌsarin. Aꞌnapitasoꞌ pastoquëranchin patahuaton, huaꞌquiꞌ yonisarin. Quënanaquë huarëꞌ yonisárin.

Lucas 19:10

Naꞌa piyapiꞌsaꞌ co Yosë natëtonahuëꞌ, chihuëpi pochin nipi. Inapita yonicaꞌhuaso marëꞌ oꞌmarahuë. Cancanënaꞌ anoyacancantaꞌhuaso marëꞌ oꞌmarahuë, tënin Quisoso.

Lucas 9:60

—Aꞌnaquën co nohuantopihuëꞌ imainacosoꞌ. Chimipi pochin cancantopi. Inapitari paꞌpichinaꞌ, tënahuë. Quëmaso nipirinhuëꞌ, ca naꞌcon naꞌcon yonquiatonco Yosë yahuaꞌanëntërinpoasoꞌ shaꞌhuiquëꞌ, itërin Quisosori.

Juan 11:25

—Cari ananpitaantarahuë. Casáchin nanpicasoꞌ quëtërahuë. Insopitasona natëhuachinaco, chiminaponaraihuëꞌ, nanpiantarapi.

Juan 5:21

Tatahuë chimipi ananpitaantarin. Inapochachin cantaꞌ insosona nohuantërahuësoꞌ ananpitaantarahuë.

Romanos 11:15

Iporaso Yosëri tananpitërin niꞌton, nisha nisha piyapiꞌsaꞌ ina nohuitapi. Aꞌna tahuëriso nipirinhuëꞌ israiroꞌsantaꞌ imaantahuachinaꞌ, noya noya nisapi. ¿Ma pochintaꞌ nisapi? Chimipi nanpiantarinso pochin nisapi, tënahuë.

Romanos 12:15

Aꞌnapita naꞌcon yonquicoꞌ. Canpitaora ninatanamaso pochin cancantocoꞌ. Noya cancantohuachinaꞌ, ina marëꞌ canpitantaꞌ noya cancantocoꞌ. Sëtohuachinaꞌ, sëtocoꞌ.

Romanos 6:11

Inapochachin canpitantaꞌ ama huachi oshahuanacamasoꞌ yonquicosohuëꞌ. Quisocristo imaramaꞌ niꞌton, Yosëíchin natëcoꞌ.

Romanos 6:13

Niꞌcoꞌ. Imiramaꞌ, nantëmaꞌ, yaꞌpiramaꞌ, huëratëmaꞌ, nanamëmaꞌ, inapita yaꞌhuëtërinquëmaꞌ. Inapita quëran co noyahuë nicacaso yaꞌhuëpirinhuëꞌ. Ama nohuantocosohuëꞌ. Yosë natëcamasoáchin yonquicoꞌ. Chiminama quëran nanpiantëramaso pochin cancantatomaꞌ, yaꞌipi nonëma quëran huarëꞌ noyasáchin nicoꞌ.

Romanos 8:2

Oshanënpoa natëhuatëhuaꞌ, co noyahuë ninëhuaꞌ. Inapohuatëhuaꞌ, chiminpatëhuaꞌ, anaꞌintarinpoaꞌ. Nipirinhuëꞌ, Quisocristo imapatëhuaꞌ, Ispirito Santo catahuarinpoaꞌ nanpimiatacaso marëꞌ. Naporahuaton, co huachi oshanënpoa natëcasoꞌ yaꞌhuërinhuëꞌ.

1 Corintios 12:26

Maquënpoa tërantaꞌ iquin nipachina, yaꞌipi ninatanëꞌ. Inapochachin maquënpoa tërantaꞌ paꞌyatohuachinënpoaꞌ, yaꞌipi nonënpoaꞌ capa cancantërin.

Efesios 2:1

Iráca canpitasoꞌ co noyahuëꞌ nicatomaꞌ, oshahuanamaꞌ. Co Yosë nohuitatomahuëꞌ, chimipi pochin cancantëramaꞌ.

Efesios 2:5

Oshahuanëhuaꞌ niꞌton, chimipi pochin niꞌpirinpoahuëꞌ, oshanënpoaꞌ inquitërinpoaꞌ. Iporaso huachi Quisocristo imarëhuaꞌ niꞌton, nanpiantarinso pochin Yosë niꞌninpoaꞌ. Anoyacancantërinpoaꞌ noya noya cancantacaso marëꞌ. Nosoroatonpoaꞌ, inaora nohuanton, nichaꞌërinpoaꞌ.

Efesios 5:14

Tahuëri nipachina, yaꞌipi quënanëꞌ. Ninshitatona napopiso chachin ninin. “Co noyahuëꞌ nipatamaꞌ, huëꞌërëso pochin cancantaramaꞌ. Ama ina pochin cancantatomarahuëꞌ, Yosë yonquicoꞌ. Chimipi pochin cancantohuatamaꞌ, Yosë nontocoꞌ nasha cancan quëchinquëmaꞌ. Ina quëran nanpiantarëso pochin cancantaramaꞌ. Quisocristo chachin aꞌpintarinquëmaꞌ noya nicacamaso marëꞌ,” topi.

Colosenses 2:13

Iráca canpitasoꞌ oshahuanatomaꞌ, chimipi pochin ninamaꞌ. Co noyahuëꞌ nicacasoráchin yonquiramaꞌ. Co Yosë piyapinënpita ninamahuëꞌ. Iporaso nipirinhuëꞌ Quisocristo imaramaꞌ niꞌton, anoyacancantërinquëmaꞌ. Oshanëmaꞌ inquitatënquëmaꞌ, nanpiantarinso pochin niꞌninquëmaꞌ.

1 Timoteo 5:6

Aꞌnaquën quëyoronoꞌsaso nipirinhuëꞌ, nipaꞌyatacasoáchin yonquipi. Nanpiaponahuëꞌ, chimipi pochin cancantopi. Co huachi Yosë yonquipihuëꞌ niꞌton, co inapita catahuacasoꞌ yaꞌhuërinhuëꞌ.

Judas 1:12

Quisoso imaramasopita coshatacaso marëꞌ niyontonpatamara, nisha aꞌchinaꞌpiroꞌsantaꞌ huëꞌpi. Naporoꞌ Yosë yonquicaso nipirinhuëꞌ, naꞌcon oꞌotonaꞌ, capa cancantopi. Co Yosë tëꞌhuatatonaraihuëꞌ, napopi. Aꞌnapita catahuacasoꞌ yaꞌhuëpirinhuëꞌ, co nosoropihuëꞌ. Inahuara noya yaꞌhuëcasoráchin yonquipi. Niꞌcoꞌ iyaroꞌsaꞌ. Huaꞌquiꞌ co oꞌnanpachinahuëꞌ, noꞌpaꞌ yaniromarin. Ina pochin nipachina, yararoꞌtëꞌ quënanpatamara, paꞌyatëramaꞌ. “Oꞌnan huëꞌsarin,” topiramahuëꞌ, co oꞌnaninhuëꞌ. Ihuanaꞌ paꞌnin. Inapochachin inapitasoꞌ pënënpirinënquëmahuëꞌ, nonpin nanan aꞌchintatënënquëmaꞌ co catahuarinënquëmahuëꞌ. Nara nitërinsontaꞌ yonquicoꞌ. Piꞌipi tahuëri nanihuachina, nitacasoꞌ yaꞌhuërin. Co nitohuachinahuëꞌ, “Nani chiminin huachi,” taꞌton, huaꞌanëni nishitëtërin. Itënë chachin ocoirin niꞌton, noyá chiminin huachi. Inapochachin nonpin nanan aꞌchinaꞌpiroꞌsaꞌ ina nara pochin niconpi. Quisocristo nanamën nitotaponaraihuëꞌ, chimipi pochin nicatonaꞌ, aꞌpopi. Ina marëꞌ chiníquën anaꞌintacasoꞌ yaꞌhuërin huachi.

Apocalipsis 3:1

Ina quëran Quisoso shaꞌhuitaantarinco: —Ansiano Sartisiquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco ninshitaranquëmaꞌ. Casoꞌ canchisë ispiritoroꞌsaꞌ Yosëri camairinsoꞌ cantaꞌ camairahuë, natërinaco. Naporahuaton, tayoraroꞌsaꞌ sëꞌquërahuëso pochin, ansianoroꞌsantaꞌ acorahuë aꞌchinacaiso marëꞌ. Canpitasoꞌ nohuitëranquëmaꞌ. Yaꞌipi co noyahuëꞌ ninamasopita nitotërahuë. Aꞌnapitasoꞌ nicatënënquëmaꞌ, ‘noya imapi,’ topirinahuëꞌ, co tëhuënchachin imaramacohuëꞌ. Chimipi pochin cancantëramaꞌ.