Lucas 15:22 - Chayahuita (Shahui)

²² Napotopirinhuëꞌ, paꞌpinisoꞌ naꞌcon nosororin. Piyapinënpita camairin. ‘Manóton paatomaꞌ, noyápiachin nininsoꞌ maconahuatomaꞌ, aꞌmotocoꞌ. Poꞌmoitërantaꞌ noyápiachin nininsoꞌ poꞌmotocoꞌ. Sapatëntaꞌ matonquëꞌ poꞌmoin.

Lucas 15:22 ပူးပေါင်းရင်းမြစ်များ

Génesis 41:42

Napotahuaton huaraonsoꞌ, imisirinquë sicho poꞌmoitëranën poꞌmorinsoꞌ ocoirin. Ina ocoirahuaton Cosi imisirinquë poꞌmotërin. Inapotahuaton, piyapinënpita camairin: “Noya noya rino piꞌshi quëran nëꞌmëtë nipisoꞌ aꞌmotocoꞌ. Naporahuaton, osëtë oro quëran nipisoꞌ, apëꞌpëconotocoꞌ.

Isaías 61:10

¡Sinioro yonquiato, capa cancantërahuë! Inasoꞌ Yosënëhuë niꞌton, acapacancaninco. Nichaꞌërinco niꞌton, naporahuë. Noꞌtëquën yonquinaꞌpi pochin acorinco. Saꞌanaꞌpi yancotë ayancotopiso pochin ninahuë. Nanonta soꞌyacaso marëꞌ nisha nishaquë nitaparinso pochin ninahuë.

Lucas 15:21

‘Co noyahuëꞌ ninahuë, tata. Nonpintëranquën. Co Yosë natëtohuëꞌ, oshahuanahuë. Co noyahuëꞌ ninahuëso marëꞌ co huachi huiꞌnan pochin cancantancosoꞌ yaꞌhuërinhuëꞌ,’ itërin paꞌpin.

Lucas 15:23

Ina quëran toroaꞌhua amoshin nininsoꞌ maꞌtomaꞌ, tëpacoꞌ caꞌahuaꞌ. Capa cancantatëhuaꞌ, pita niahuaꞌ.

Romanos 13:14

Sontaroꞌsaꞌ huaꞌna aꞌmopiso pochin Quisocristo yaꞌcopirinpoaꞌ ama sopai minsëinpoaso marëhuëꞌ. Napoaton Quisocristo naꞌcon yonquiatomaꞌ, ina pochachin cancantocoꞌ. Ina natëtomaꞌ, ama piꞌpian tërantaꞌ yonquicosohuëꞌ co noyahuëꞌ nicacamaso marëꞌ.

Romanos 3:22

Quisocristo imapatëhuaꞌ, Yosë noya niꞌsarinpoaꞌ. Insosona natëhuachin, anoyacancantarin. Co nisha nisha nontërinpoahuëꞌ.

Romanos 8:15

Iráca Yosë tëꞌhuatëramaꞌ. Iporaso nipirinhuëꞌ Ispirito Santo yaꞌcoancantërinpoaꞌ niꞌton, co huachi mantaꞌ tëꞌhuatacasoꞌ yaꞌhuërinhuëꞌ. Huiꞌninpita pochachin Yosë niꞌninpoaꞌ. Ina nontohuatëhuara, “Tata,” itërëhuaꞌ.

Gálatas 3:27

Yaꞌipinpoaꞌ Quisocristo natëhuatëhuaꞌ, huëntonënquë chachin ayaꞌconinpoaꞌ. Yaꞌconpatëhuara, “Quisocristoíchin imasarahuë huachi,” taꞌtëhuaꞌ, aporihuanëhuaꞌ. Nasha aꞌmorëso pochin ninëhuaꞌ niꞌton, Quisocristo pochin yonquiarihuaꞌ.

Efesios 6:15

Shoꞌshorahuan sapatëꞌ pochin nininsoꞌ poꞌmohuachinara, co toꞌcoitopihuëꞌ, noya noya iratopi. Inapochachin canpitantaꞌ Yosë nanamën shaꞌhuitocoꞌ aꞌnapitantaꞌ nitochinaꞌ. Noya nanan yonquihuatëhuaꞌ, sano cancantarihuaꞌ.

Deuteronomio 33:25

Ama inimicoroꞌsari yaꞌcontacaso marëhuëꞌ, ninanonëna yaꞌcoanaroꞌsantaꞌ, noyá acoꞌinaꞌ. Chiníquën niꞌtona yaꞌhuëmiatacaiso marëꞌ nóya acoinaꞌ. Huaꞌnamia quëran, shaꞌpi huaꞌna quëran, ina quëranpita nipiso acoinaꞌ.

Apocalipsis 19:8

Huiríchin aꞌmorëso pochin Yosëri noyápiachin cancan quëtërin. Tëhuënchachin inari catahuarin noya nicacaiso marëꞌ,” tosapi.

Apocalipsis 2:17

Imaramaco niꞌton, Ispirito Santo chachin nontarinquëmaꞌ. Huëratëhuanpatamaꞌ, noya natanatomaꞌ, yonquicoꞌ. Sopai minsëhuatamaꞌ, noya cancantarama huachi. Iráca israiroꞌsaꞌ Yosëri cosharoꞌ aꞌpatimarin, mana itopisoꞌ. Inachachin poꞌorahuësoꞌ carimantaꞌ quëchinquëmaꞌ sano cancantacamaso marëꞌ. Imaramaco niꞌton, nasha nininëmaꞌ aꞌnaya aꞌnayanquëmaꞌ acoꞌinquëmaꞌ. Canpitaora nitotaramaꞌ. Huiri naꞌpiquë ninshitahuato, quëchinquëmaꞌ. Cancanëma quëran noya noya nohuitaramaco huachi. Nani huachi,” itëquëꞌ, ninshitohuatan, itërinco.

Apocalipsis 3:18

Napoaton pënënanquëmaꞌ. Chiníquën nontoco catahuainquëmaꞌ. Niꞌcoꞌ. Oro aꞌpëhuatëra, yaꞌipi nëꞌhuë inquirin. Orosachin quëparitërin, noyasáchin nininsoꞌ. Inapochachin canpitantaꞌ nontoco catahuainquëmaꞌ noya yonquicamaso marëꞌ. Naꞌcon pahuantarinquëmaꞌ Yosë pochin nicacamasoꞌ. Casáchin yonquico Yosë noya niꞌinquëmaꞌ. Yonquihuatamaco, huiríchin aꞌmorëso pochin noya nisaramaꞌ. Somaraya pochin cancantëramaꞌ niꞌton, co tëhuënchachin nohuitëramacohuëꞌ. Nimirioquë acorayatërëso pochin anoyacancanchinquëmaꞌ cancanëma quëran nohuitamacoso marëꞌ.

Apocalipsis 6:11

Napotohuachinara, Yosëri itërin: —Ninatacoꞌ. Oshaquëran anaꞌintarahuë. Co tahuëri naniyatërarinhuëꞌ. Aꞌnapita imarinacosopita ipora huantaꞌ pënëntapi. Aꞌnaquën tëpaantahuachinaꞌ, isëquë chachin huëantapi antaꞌ. Naporo huarëꞌ tëparinënquëmasopita noꞌtëquën anaꞌintarahuë, itërin. Itahuaton, huiríchin aꞌmocaisoꞌ quëtërin. Noyápiachin cancantopi niꞌton, huiríchin aꞌmotërin.

Apocalipsis 7:9

Ina quëran huaꞌnarëso pochin niantarahuë. Huaꞌhuayatërahuëꞌ piyapiꞌsaꞌ Yosëꞌpaꞌ quënanahuë. Co pichicasohuëꞌ. Nisha nisha piyapiꞌsaꞌ Yosë huaꞌanëntacasoꞌ shiranën notënanquë huaniapi, nisha nisha nananquë nonpisopita. Nisha nisha parti quëran huëcatonaꞌ, Carniroaꞌhua yamotatonaꞌ, notërapi. Inapitasoꞌ huiríchin aꞌmopi. Mërëmë pochin nininsoꞌ sëꞌquërahuatonaꞌ, Yosë chinotapi.