Lucas 12:21 - Chayahuita (Shahui)

²¹ Canpitantaꞌ nani maꞌsha canapomarahuëꞌ, co Yosë yonquihuatamahuëꞌ, ina maꞌhuan pochin nisaramaꞌ. Co mantaꞌ yaꞌhuëtomiatarinquëmahuëꞌ. Co Yosëꞌpaꞌ canamiataramahuëꞌ,” tënin Quisoso.

Lucas 12:21 ပူးပေါင်းရင်းမြစ်များ

Proverbios 13:7

Aꞌnaquën maꞌhuan pochin yaꞌnoponaraihuëꞌ, co manta yaꞌhuëtopihuëꞌ. Aꞌnaquëontaꞌ, popriya pochin yaꞌnoponaraihuëꞌ, co manta pahuantopihuëꞌ.

Habacuc 2:9

Canpitaso aꞌnapita minsërahuatomaꞌ, maꞌshanëna matëramaꞌ. Inaquë quëmopinëmapita amaꞌhuanamaꞌ. Yaꞌhuëcamaso marëꞌ noyápiachin pëiroꞌsa ninamaꞌ. Ama maꞌsha onpotiinëmaso marëhuëꞌ noyá niacorapiramaꞌ. Naporamaso marëꞌ carinquëma anaꞌintaranquëma niꞌton, ¡maꞌhuantacha nisarama paya!

Lucas 12:33

Ama naꞌcon maꞌsha yontoncosohuëꞌ. Maꞌsha yaꞌhuëtohuachinquëmaꞌ, paꞌanahuatomaꞌ, saꞌahuaroꞌsaꞌ quëtocoꞌ. Inapotohuatamaꞌ, Yosë acanaarinquëmaꞌ. Isoroꞌpaquë maꞌsha aꞌnaroáchin mocarin. Ihuarinënpoaꞌ. Maꞌshari aꞌquirin. Inapaquëso nipirinhuëꞌ Yosë acanahuachinpoaꞌ, yaꞌhuëtomiatarinpoaꞌ.

Lucas 16:11

Yaꞌipi coriquinëmaꞌ canpitaora marëꞌ iꞌquihuatamaꞌ, co insontaꞌ inápaquë acanarinquëmahuëꞌ.

Lucas 6:24

Aꞌnaquëmasoꞌ nani maꞌsha yaꞌhuëtopirinquëmahuëꞌ, ¡maꞌhuantacha nisarama paya! ‘Noya cancantarëhuaꞌ,’ topiramahuëꞌ, Yosësoꞌ co noya niꞌsarinquëmahuëꞌ.

Romanos 2:5

Canpitaso nipirinhuëꞌ, co natantochináchinhuëꞌ cancantëramaꞌ. Co oshanëmaꞌ yaaꞌporamahuëꞌ. Napoaton ayaroꞌ tahuëri chini chiníquën anaꞌintarinquëmaꞌ. Naporoꞌ yaꞌipi piyapiꞌsaꞌ noꞌtëquën anaꞌintarin.

2 Corintios 6:10

Sëtopiraihuëꞌ, Yosë yonquiatoi, noya cancantërai. Co naꞌcon maꞌsha yaꞌhuëtopirincoihuëꞌ, Yosë nanamën aꞌchintërai niꞌton, naꞌa piyapiꞌsaꞌ natëtonacoi, noya noya cancantapi. Co mantaꞌ yaꞌhuëtopirincoihuëꞌ, Yosë nohuitatoi, sano cancantërai. Co mantaꞌ noya nininsoꞌ pahuantërincoihuëꞌ.

1 Timoteo 6:9

Aꞌnaquënso nipirinhuëꞌ coriqui canacasoáchin yonquipi. Inasáchin cancantatonaꞌ, sopai natëpi. Nani maꞌsha nohuantatonaꞌ huënsonquë maꞌsha manëso pochin nisapi. Inasáchin yonquiatonaꞌ, aquë aquëtëꞌ nohuantaponaꞌ. Ina marëꞌ Yosëri chiníquën anaꞌintarin.

Santiago 2:5

Niꞌcoꞌ iyaroꞌsaꞌ. Naꞌaquënpoaꞌ co naꞌcon coriqui yaꞌhuëtopirinpoahuëꞌ, Yosë huayoninpoaꞌ imacaso marëꞌ. Yosë nohuitohuatëhuaꞌ, nóya cancantarihuaꞌ. Huëntonënquë chachin ayaꞌconinpoaꞌ niꞌton, Yosëꞌpaꞌ noya noya yaꞌhuëcontarihuaꞌ. Nani shaꞌhuitërinpoaꞌ. “Nosorohuatamaco, inápaquë quëpantaranquëmaꞌ,” itërinpoaꞌ.

Apocalipsis 2:9

Imaramacoso marëꞌ naꞌcon parisitëramasoꞌ nitotërahuë. Co naꞌa maꞌsha yaꞌhuëtopirinquëmahuëꞌ, Yosë nohuitacamasoachin cancantatomaꞌ, sano cancantëramaꞌ. Aꞌna tahuërintaꞌ Yosëꞌpaꞌ paꞌpatamaꞌ, co mantaꞌ pahuantarinquëmahuëꞌ. Iporaso nipirinhuëꞌ aꞌnaquën chiníquën pinorinënquëmaꞌ. ‘Yosë piyapinëncoi quiyasoꞌ,’ topirinahuëꞌ, Satanasë huëntonënquë yaꞌconpi.