Lucas 12:17 - Chayahuita (Shahui)

¹⁷ Napoaton yaꞌipi pëinënpita yaꞌsotërin huachi. ‘¿Insëquëcha maꞌsha acoꞌiya?’ taꞌton, yonquiárin.

Lucas 12:17 ပူးပေါင်းရင်းမြစ်များ

Eclesiastés 11:2

Maꞌsha yaꞌhuëtohuachinquën, ama apiraquësohuëꞌ. Pahuantiinquë huarënta yoꞌquëꞌ. Co nitotërëhuahuëꞌ tashiraya maꞌsha onpocaso niꞌton, inapoquëꞌ.

Isaías 58:7

Cosharo yaꞌhuëtërinquënsoꞌ, pahuantërinsopita quëtëquëꞌ. Saꞌahuaroꞌsa co pëinëna yaꞌhuëtohuachinarahuëꞌ, canpitari pëinëmaquë ichiyaꞌhuëcoꞌ. Aꞌmocaiso pahuantohuachinaꞌ, quëtocoꞌ. Aꞌnapita catahuachináchin cancantocoꞌ.

Mateo 16:7

Natanahuatonaꞌ, caꞌtanoꞌsanënpita capini ninontopi. —¿Onpoatontaꞌ naporin? tënin aꞌnasoꞌ. —Ahuën. Capa pan. Co quënëhuahuëꞌ niꞌton, napotërinpoaꞌ nimara, tënin aꞌnantaꞌ.

Mateo 5:42

Aꞌnaquën: ‘Maꞌsha quëtoco,’ itohuachinënquëmaꞌ, ama apiratomahuëꞌ, quëtocoꞌ. ‘Cantaꞌ maꞌsha aꞌnanco, topirahuëꞌ,’ itohuachinënquëmantaꞌ, aꞌnancoꞌ. Onpopiontaꞌ nosoroatëꞌ catahuacasoꞌ yaꞌhuërin,” tënin.

Lucas 10:25

Ina quëran aꞌna maistro iráca nanan noya nitotërinsoꞌ huanirahuaton, Quisoso tënicaso marëꞌ itapon: —¿Maꞌtaꞌ Maistro onpoꞌi nanpimiataꞌhuaso marëꞌ? itërin.

Lucas 11:41

Cancanëma quëran huarëꞌ saꞌahuaroꞌsaꞌ catahuacoꞌ. Nosorohuatamaꞌ, noyápiachin cancantaramaꞌ.

Lucas 12:16

Itahuaton, aꞌna pënënto nanan shaꞌhuitërin. “Niꞌcoꞌ. Aꞌna maꞌhuan yaꞌhuërin. Iminënquë shaꞌpachina, huaꞌhuayátërahuë nitërin.

Lucas 12:18

Yonquihuachina, tapon: ‘Pëiroꞌsaꞌ iꞌquitahuato, aꞌna pëiroꞌsaꞌ niantarahuë. Panca panca nisarahuë. Inaquë yaꞌipi maꞌshanëhuëpita acoarahuë.

Lucas 12:22

Ina quëran caꞌtanoꞌsanënpita itapon: “Aꞌnaquën maꞌsharáchin yonquipi. Capacaisoꞌ, oꞌocaisoꞌ, aꞌmocaisoꞌ, inasáchin yonquipi. ‘Nani maꞌsha yaꞌhuëtohuachinco, nóya yaꞌhuarahuë,’ topirinahuëꞌ yonquinëna quëran. Ama iyaroꞌsaꞌ ina pochin cancantocosohuëꞌ.

Lucas 12:29

Ama maꞌsha yonquiatomaꞌ, paꞌyancosohuëꞌ. ‘¿Maꞌcha caꞌnëꞌpoya? ¿Maꞌcha oꞌorëꞌpoya?’ ama tocosohuëꞌ.

Lucas 12:33

Ama naꞌcon maꞌsha yontoncosohuëꞌ. Maꞌsha yaꞌhuëtohuachinquëmaꞌ, paꞌanahuatomaꞌ, saꞌahuaroꞌsaꞌ quëtocoꞌ. Inapotohuatamaꞌ, Yosë acanaarinquëmaꞌ. Isoroꞌpaquë maꞌsha aꞌnaroáchin mocarin. Ihuarinënpoaꞌ. Maꞌshari aꞌquirin. Inapaquëso nipirinhuëꞌ Yosë acanahuachinpoaꞌ, yaꞌhuëtomiatarinpoaꞌ.

Lucas 16:3

Inpriatonënsoꞌ pipirahuaton, yonquirarin. ‘¿Maꞌcha onpoꞌi nicaya? Huaꞌanëhuë ocoiarinco. Co nanitërahuëꞌ chiníquën sacataꞌhuasoꞌ. Naporahuaton, tapanato, co nohuantërahuëꞌ coriqui topinan maꞌpataꞌhuasoꞌ.

Lucas 16:9

Coriqui yaꞌhuëtohuachinquëmaꞌ, ama canpitaoráchin iꞌquicosohuëꞌ. Aꞌnapita pahuantohuachinaꞌ, quëtocoꞌ. Inapohuatamaꞌ, Yosëꞌpaꞌ noya niꞌsarinquëmaꞌ. Chiminpatamaꞌ, Yosë inápaquë quëpantarinquëmaꞌ. Coriquinëmaꞌ patopiramahuëꞌ, inatohuaꞌ noya noya yaꞌhuëcontaramaꞌ.

Lucas 18:22

Ina natanahuaton, Quisosori itantarin: —Isontaꞌ Yosë nohuantërin. Paaton, yaꞌipi maꞌshanënpita paꞌanconquëꞌ. Coriqui canaransoꞌ saꞌahuaroꞌsaꞌ quëtonquëꞌ. Ina quëran imaquico. Inapotohuatan, Yosëꞌpaꞌ naꞌcon canamiataran, itërin.

Lucas 19:17

‘Ma noya sacatëran. Natëranco niꞌquëhuarëꞌ, huaꞌan acoꞌinquën. Shonca ninanoroꞌsaꞌ huaꞌanëntaran,’ itërin.

Lucas 3:11

—Piyapiꞌsa maꞌshari pahuantohuachina, ama apiratocosohuëꞌ. Catoꞌ aꞌmocamaso yaꞌhuëtohuachinquëmaꞌ, aꞌnaraꞌ quëtocoꞌ aꞌmoꞌin. Tanahuachinaꞌ, aꞌcacoꞌ caꞌin, itërin Coanshari.

Hechos 16:30

Ina quëran cato chachin ocoirahuaton: —¿Maꞌtaꞌ iyaroꞌsaꞌ onpoꞌi chaꞌëcaꞌhuaso marëꞌ? itërin.

Hechos 2:37

Piyapiꞌsaꞌ natanahuatonaꞌ, naꞌcon sëtopi. —Co noyahuëꞌ ninai. ¿Maꞌtaꞌ iyaroꞌsaꞌ, onpoꞌiisoꞌ? itopi caꞌtanoꞌsaꞌ.

Romanos 12:13

Imapisopita pahuantohuachinaꞌ, maꞌsha quëtocoꞌ. Niꞌtoroꞌsaꞌ yaꞌnotohuachinënquëmaꞌ, noya nontatomaꞌ, aꞌcacoꞌ.

1 Timoteo 6:17

Aꞌnaquën naꞌcon coriqui yaꞌhuëtërin. Inapitantaꞌ api pënënquëꞌ: “Ama aꞌnapita nocancosohuëꞌ. Ama coriquinëmáchin paꞌyatocosohuëꞌ. Inasoꞌ co yaꞌhuëmiataponhuëꞌ. Yosë naꞌcon naꞌcon paꞌyatocoꞌ. Inasoꞌ co apiratërinpoahuëꞌ. Nani maꞌsha quëtërinpoaꞌ nóya cancantatëhua, yaꞌhuëcaso marëꞌ.

1 Juan 3:16

Quisocristoso nipirinhuëꞌ naꞌcon nosoroatonpoaꞌ, nichaꞌëinpoaso marëꞌ chiminin. Chiminaton, nosororinpoasoꞌ anitotërinpoaꞌ. Inapochachin iyaroꞌsaꞌ, yaꞌipi Quisocristo imapisopita nosorocasoꞌ yaꞌhuërin. Naꞌcon ninosoroaꞌahuaꞌ. Quisoso yaꞌhuërënamënpoaꞌ chimininso pochachin nosorocasoꞌ yaꞌhuërin.