Lucas 11:34 - Chayahuita (Shahui)

³⁴ Yaꞌpiranpoꞌ nanparin pochin ninin. Ina quëran maꞌsha quënanëꞌ. Noya yaꞌpiranpoꞌ nipachina, noya quënantërëꞌ. Yaꞌpiranpoꞌ co noyahuëꞌ nipachina, co noya quënantërëhuëꞌ. Inapochachin noya yonquihuatëra, noya cancantërëꞌ. Co noyahuëꞌ yonquihuatëra, tashi pochin cancantërëꞌ.

Lucas 11:34 ပူးပေါင်းရင်းမြစ်များ

Génesis 19:11

Naporo chachin piyapiroꞌsa aipiran nisapisopita, aꞌnaroáchin asomarayapi huachi. Huiꞌnapiroꞌsa quëran, mashoroꞌsaquë huarëꞌ yaꞌipi somarayapi. Ina nipirinahuë tërantaꞌ, amiai huarëꞌ yaꞌcoana yonípi.

Isaías 42:19

Israiroꞌsanquëmasoꞌ, piyapinëhuëpitanquëmaꞌ. Cari huayonanquëma nanamëhuë shaꞌhuicamaso marëꞌ. Carima huayonpiranquëmahuëꞌ, canpitaso aꞌnapita piyapiroꞌsa quëran soma somaraya pochin, nëꞌhuë nëꞌhuëya pochin niconamaꞌ.

Isaías 44:18

Napopisopita napoonpi. Co manta yonquipihuëꞌ. Somaraya pochin cancantatona co nanitopihuëꞌ noꞌtëquën yonquicaisoꞌ.

Isaías 6:10

Piyapinëhuëpita yonquinëna tapitëquëꞌ. Nëꞌhuëya pochin cancanchinaꞌ. Somarayapiso pochin cancantatonaꞌ, ama manta noꞌtëquën yonquiꞌinasohuëꞌ. Shaꞌhuitërahuësoꞌ noꞌtëquën yonquipi naporini, oshanëna aꞌpoitonahuëꞌ. Inapopi naporini, co huachi anaꞌintaꞌhuasoꞌ yaꞌhuëitonhuëꞌ,” itërinco.

Marcos 4:12

Inapitasoꞌ co yanatërinacohuëꞌ niꞌton, natanaponaraihuëꞌ, co natëtapihuëꞌ. Maꞌsona ninahuësontaꞌ nicaponaraihuëꞌ, co yonquiapihuëꞌ. Imarinaco naporini, oshanënaꞌ inquitahuato anoyacancanchitohuëꞌ,” itërin.

Marcos 7:22

Nitëhuananpitëramaꞌ. Paꞌyatacasoráchin cancantëramaꞌ. Aꞌnapita maꞌshanën noyaparamaꞌ. Co noyahuëꞌ ninamaꞌ. Nonpinamaꞌ. Nisha nisha co noyahuëꞌ ninamasoꞌ co yaaꞌporamahuëꞌ. Apiraramaꞌ. Pinotëramaꞌ. “Casoꞌ co aꞌnapita pochincohuëꞌ. Noya noyaco,” toconamaꞌ. Co yonquinahuanhuëꞌ ninamaꞌ.

Marcos 8:18

Noya natanapomarahuëꞌ, ¿onpoatomataꞌ co yonquiramahuëꞌ? Nicapomarahuëꞌ, ¿onpoatomata co natëtëramahuëꞌ?

Lucas 11:35

Napoaton, niꞌcona tashi pochin cancantotamaꞌ. Noꞌtëquën aꞌchintopiranquëmahuëꞌ, co noya natanpatamahuëꞌ, tashi pochin cancantaramaꞌ.

Hechos 13:11

Apiramiachin Yosë nohuanton, co mantaꞌ quënantaranhuëꞌ. Huaꞌquimiachin co piꞌi quënanaranhuëꞌ, itërin. Napotohuachina, aꞌnaroáchin chitoro pochin niꞌtërin. Somaraya pochin nicaton, co mantaꞌ quënantërinhuëꞌ. Siꞌpinantápirinhuëꞌ, aꞌna piyapi nohuantërin matanparahuaton, quëpacaso marëꞌ.

Hechos 2:46

Nani tahuëri Yosë chinotopiso pëiquë niyontonpi. Quisoso chimininsoꞌ yonquiatonaꞌ, aꞌna pëiquë aꞌna pëiquë coshatapatapi. Co apiratonaraihuëꞌ, noya cancantapi. Nóya cancantatonaꞌ, coshatapatapi.

Hechos 26:18

Nisha piyapiꞌsantaꞌ aꞌchintëquëꞌ nanamëhuë nitochinaꞌ. Somaraya pochin cancantatonaꞌ, co nohuitërinacohuëꞌ. Nanamëhuë aꞌchintohuatan, nohuitarinaco. Iporasoꞌ tashi pochin cancantopi. Nohuitohuachinaco, tahuëri pochin cancantapi. Iporasoꞌ sopai huaꞌani camaihuachina, natëpi. Aꞌna tahuërisoꞌ Yosë natërapi. Natëtonaco, imapachinaco, oshanënaꞌ Yosëri inquitarin. Yaꞌipi natërinacosopita nasha cancan quëtarahuë. Yosë piyapinënpita chachin nisapi,’ itërinco.

2 Corintios 1:12

Yosë niꞌsárincoi niꞌton, noꞌtëquën shaꞌhuitarainquëmaꞌ. Co piꞌpian tërantaꞌ nonpintërainquëmahuëꞌ. Noyápiachin cancantatoi, yaꞌipi parti aꞌchinai. Co quiyaora yonquinëhuëi quëran aꞌchintërainquëmahuëꞌ. Yosë inaora nohuanton, catahuarincoi niꞌton, noya ninai. Ina marëꞌ noya cancantërai.

2 Corintios 11:3

Aꞌnaquënso nipirinhuëꞌ yaanishacancantërinënquëmaꞌ. Iráca yaꞌhuani Ipa nonpintërinso pochin yanonpintërinënquëmaꞌ ama Quisocristoíchin yonquicamaso marëhuëꞌ.

2 Corintios 4:4

Sopai nohuanton, co nanitopihuëꞌ noꞌtëquën yonquicaisoꞌ. Maꞌsha aꞌpintërëso pochin nanamën quëran Yosë anitotërinpoaꞌ Quisocristo nohuitacaso marëꞌ. Inasoꞌ Yosë chachin ninin. Inapitaso nipirinhuëꞌ somaraya pochin cancantatonaꞌ, co nanitopihuëꞌ natëtacaisoꞌ.

Efesios 1:17

Tata Yosësoꞌ noya noya ninin. Inasáchin chinotacasoꞌ yaꞌhuërin. Quisocristo isoroꞌpaquë oꞌmaton, Yosë anohuitërinpoaꞌ. Ina yonquiato, canpita marëꞌ Yosë nontërahuë: “Catahuaquëꞌ Sinioro noꞌtëquën yonquiꞌinaꞌ. Noya noya nohuichinënquën. Noya nohuitohuachinënquën, quëma yonquiranso chachin nitotapi.

Efesios 6:5

Patron marëꞌ sacatohuatamaꞌ, noya nicatomaꞌ, natëcoꞌ. Ama nonpintocosohuëꞌ. Quisocristo marëꞌ sacatarëso pochin cancantatomaꞌ, noya sacatocoꞌ.

Colosenses 3:22

Patron marëꞌ sacatohuatamaꞌ, noya natëcoꞌ. Ama nonpintocosohuëꞌ. Co niꞌpirinquëmaontaꞌ, noya sacatocoꞌ. Co patronachin yonquicasoꞌ yaꞌhuërinhuëꞌ. Siniorontaꞌ niꞌsarinquëmaꞌ. Ina yonquiatomaꞌ, yaꞌipi cancanëma quëran natëcoꞌ.