Levítico 23:2 - Chayahuita (Shahui)

² “Isontaꞌ, israiroꞌsa camaitërahuëso shaꞌhuitëquëꞌ: Nisha nisha yoquiquë, nisha nisha tahuëri nani huayonahuë. Canpita niyontonatomaꞌ, casáchin chinotamacoso marëꞌ huayonahuë. Ina tahuëriꞌsa nohuitatomaꞌ: ‘Sinioro marëꞌ niyontonëhuaso tahuëriꞌsaꞌ,’ tosaramaꞌ.

Levítico 23:2 ပူးပေါင်းရင်းမြစ်များ

Esdras 3:5

Nani tahuëri oshanëna marëꞌ ahuiquitahuatonaꞌ, nani yoquiaꞌhuaraiꞌ pitaquënta inapopi. Nisha nisha Sinioro marëꞌ pita naꞌhuëcaiso yaꞌhuërinquëntaꞌ, inapopi. Inaquë chachin inahuara nohuanton Sinioro maꞌsha quëshihuachinara, ahuiquitopi.

Éxodo 32:5

Ina niꞌsahuaton Aaronsoꞌ, toroaꞌhuaya nonaninsoꞌ notënanquë artaro nitërin. Nani tënihuachina chiníquën nonsahuaton shaꞌhuirin: —¡Tashiraya Sinioro marëꞌ pita niahuaꞌ! itërin.

Isaías 33:20

Quirosarin ninano niꞌcoꞌ. Inaquë nani piꞌiquë pita naꞌhuëcaso marëꞌ paꞌnëhuaꞌ. Inaso ninanoꞌ, noyá acopinan yaꞌhuërin huachi. Sontaroꞌsa nëꞌmëtë pëinëna noya ótënpiso pochin ninin. Inapita achinicaiso marëꞌ noninënpitasoꞌ, co incari tëranta oshitëaponhuëꞌ. Naranënpita paꞌhuacopisontaꞌ, co incari tëranta opanaponhuëꞌ.

Oseas 2:11

Inapotohuato, co huachi noya ancantacaiso yaꞌhuëaponhuëꞌ. Co maꞌsha pita tëranta naꞌhuëcaiso yaꞌhuëaponhuëꞌ. Yoquiaꞌhuaraiꞌ pitaroꞌsaquë tëranta co huachi niyontoanpihuëꞌ. Co sahuatoquë tëranta niyontoantaponahuëꞌ.

Joel 1:14

Yaꞌipi Cota huëntonquë piyapiꞌsa ayontonahuatomaꞌ, ayono nicacaiso camaicoꞌ. Sinioronënpoa chinotërëhuaso pëiquë yaꞌipi ansianoꞌsantaꞌ, niyontoinaꞌ. Niyontonahuatonaꞌ, catahuainpoaso marëꞌ Sinioro nonchinaꞌ.

Joel 2:15

Quirosarinquë tronpita pihuitoma piyapiꞌsa ayontoncoꞌ. Niyontonpachinaꞌ, ayono nicacaiso marëꞌ shaꞌhuicoꞌ.

Levítico 23:1

Siniorori Moisësë nontaton itapon:

Levítico 23:21

Naporo tahuëri chachin canpitantaꞌ, niyontonatoma chinotaramaco. Co manta sacatamaso yaꞌhuërinhuëꞌ. Ipora camairanquëmasopita, co canpitasáchin camairanquëmahuëꞌ. Shiparimapitantaꞌ, natëcaiso yaꞌhuërin. Insëquë tëranta yaꞌhuëpatamaꞌ, ina pochin nicacamaso yaꞌhuërin.

Levítico 23:37

Inapita pitaroꞌsaquë, yonquiaramaco: ‘Sinioro chinotacaso tahuëriꞌsaꞌ,’ tosaramaꞌ. Naporo tahuëriꞌsa ca marëꞌ ofrenda quënamasoꞌ ahuiquitaramaꞌ. Oshanëma marëꞌ maꞌsha quënamasosoꞌ, yaꞌipi ahuiquitaramaꞌ. Trico, sipata, inapita noꞌmoquëontaꞌ, ca marëꞌ quësaramaꞌ. Nanan anoyatërëso marëꞌ nininsontaꞌ, maꞌsha quëshipomaco. Huinonta ofrenda quëcacasoꞌ nininsoꞌ, inanta quësaramaꞌ. Nisha nisha pitaquë quëcamasoꞌ nininsoꞌ quësaramaꞌ. Naporahuaton nani simanaquë chinoto tahuëriꞌsa nanihuachin, chinotamacoso yaꞌhuërin. Maꞌsona tëranta quëtamacosoꞌ shaꞌhuitohuatamaco, quëcatoma aꞌnotamacoso yaꞌhuërin. Canpitaora yonquinëma quëraonta ofrenda yaquëtohuatamaco, quëshitomaco aꞌnotaramaco.

Levítico 23:4

Isopita tahuëriꞌsantaꞌ, noya nicatoma chinotaramaco. Naporo niyontonatomaꞌ, chinotoco:

Levítico 23:44

Siniorori napotërinso chachin Moisësëri israiroꞌsaꞌ, shaꞌhuitërin. Nisha nisha tahuëriꞌsaquë, nisha nisha pita Sinioro yonquiatonaꞌ, noya naꞌhuëcaiso marëꞌ shaꞌhuitërin.

Juan 5:1

Ina quëran cotio niyontonpiso tahuëri naniriarin. Naporoꞌ Quisoso Quirosarinquë paantarin.

Colosenses 2:1

Naꞌcon iyaroꞌsaꞌ yonquiranquëmaꞌ. Naotisiaquë yaꞌhuëpisopitantaꞌ yonquirahuë. Naꞌaquëmaꞌ inatohuaꞌ yaꞌhuëramasopita co nohuitaponquëmarahuëꞌ, naꞌcon yonquiranquëmaꞌ. Co piꞌpisha tërantaꞌ nohuantërahuëꞌ nisha cancantacamasoꞌ. Napoaton ninshitaranquëmaꞌ.

Colosenses 2:16

Napoaton nisha pënënpachinënquëmaꞌ, ama natëcosohuëꞌ. “Nani maꞌsha caꞌpatëhuaꞌ, oꞌopatëhuaꞌ, oshahuanarëhuaꞌ,” topi aꞌnaquën. Nani sahuato tahuëri chinotopi. Nani yoquiaꞌhuaraiquë chinotopi. Nisha nisha niyontopiso tahuëriꞌsaꞌ naꞌhuëpi. “Co quiya pochin nipatamahuëꞌ, co noꞌtëquën imaramahuëꞌ,” itarinënquëmaꞌ. Nipirinhuëꞌ, ama inapitasoꞌ natëcosohuëꞌ.