Jueces 2:18 - Chayahuita (Shahui)

¹⁸ Inimiconënpitari aparisitahuachinara, israiroꞌsa tarëtatona naꞌnërápi. Naporoꞌ Siniorori nosororin. Ina nohuanton inapita catahuacaso marëꞌ huaꞌan huanirin. Ina nanpisoꞌ Siniorori catahuarin niꞌton, inimiconënpita quëran israiroꞌsa nichaꞌërin.

Jueces 2:18 ပူးပေါင်းရင်းမြစ်များ

Génesis 6:6

Ina nicaton, sëtërin: “Maꞌmarëcha piyapi acorahuë paya. Ataꞌhuanchi nipachin. Yaꞌipi pëꞌtahuaroꞌsaꞌ, anpiantëhuanoꞌsaꞌ, noꞌpaquë niohuaratërinsopita, inapitarë chachin ataꞌhuantarahuë huachi,” tënin.

Salmos 90:13

Sinioro tahuërëtaantacoi. ¡Ama huachi noꞌhuicoisohuëꞌ! Nosoroatoncoi catahuaantacoi.

Éxodo 2:24

Piyapinënpita parisitopisoꞌ niꞌsahuaton, naꞌnëpisonta natanin. Naporoꞌ iráca shimashonënapitarëꞌ anoyatërinsoꞌ, yonquirin. Apraan, Isaco, Cacopo, inapitarëꞌ anoyatërinso yonquiaton, yacatahuarin huachi.

Éxodo 3:12

—Coꞌta carinquën catahuaranquën. Caꞌtanaranquën niꞌton natëco. Catahuaranquënso nitotamaso marëꞌ, noꞌtëquën shaꞌhuitaranquën. Israiroꞌsa ocoirahuaton, iso motopiquë chachin chinotaramaco, itërin.

Éxodo 32:14

Ina natanaton, Sinioroso co huachi nohuantërinhuë piyapinënpita maꞌsha onpotacasoꞌ.

Oseas 11:8

Canpitaso israiroꞌsanquëmaꞌ. Noꞌhuípiro mini nipiramahuëꞌ, ¡Co nanitërahuë aꞌpomiataꞌhuanquëmasoꞌ! Atoma, Sipoin, inapita ninanoroꞌsasoꞌ, co noyahuëꞌ nipiso marëꞌ iráca ataꞌhuantërahuë. Inapita pochachin ataꞌhuantaꞌhuanquëmasoꞌ, ¡coꞌchi nanitarahuë paya! ¡Nosorochináchin cancantëranquëmaꞌ!

Jonás 3:10

Copirno camaitërinso chachin yaꞌipi piyapiꞌsa co noyahuëꞌ nipiso aꞌpopi. Yosësoꞌ, napopiso niꞌnin. Ina nicaton nosororin. Inapoaton ataꞌhuantacaso yonquirinsoꞌ, tananpitërin.

Deuteronomio 32:36

Naquëranchin Moisësë cantaton tapon: “Canpitaso Sinioro chachin paꞌpoyarinquëmaꞌ. Co huachi nanitëramahuëꞌ niꞌpachina, nosoroarinquëmaꞌ: ‘Piyapinëhuëpita inimiconënpitari yaminsërin. Chiníquënoꞌsa capa niraꞌpiapi. Sanpacharoꞌsanta capa nisapi,’ topachina, catahuaarinquëmaꞌ.

Josué 1:5

Nanpisënquën, co inso tëranta nanitarinhuëꞌ minsëinquënsoꞌ. Moisësë catahuarahuëso pochachin quëmanta catahuaranquën. Co naniantaranquënhuëꞌ. Co pataranquënhuëꞌ.

Jueces 2:19

Napoaponahuëꞌ, ina huaꞌan chiminpachina, naquëranchin Sinioro aꞌpoantapi. Ina aꞌporahuatonaꞌ, mamanshiroꞌsa moshaantapi. Shimashonëna quëran aquë aquëtë co noyahuëꞌ nicoantapi. Inapoatonaꞌ, co natantonoꞌsahuë pochin cancantopi.

Jueces 6:12

Inapoasoꞌ, Sinioro anquëninëni yaꞌnotahuaton itapon: —Quëmasoꞌ chiníquën mashonquën. Naporahuaton, chiníquën cancantëran. ¡Sinioro chachin catahuararinquën! itërin.

Jueces 6:16

—Carinquën catahuaranquën niꞌton, noya nanitapaaran. Aꞌnaíchin quëmapi minsërëso pochin, yaꞌipi matianoꞌsa minsëaran, itërin Siniorori.