Jueces 2:17 - Chayahuita (Shahui)

¹⁷ Inapotopirinahuëꞌ, israiroꞌsaso co inapita natëantapihuëꞌ. Sinioroíchin chinotacaiso marëꞌ, inapitariso pënënpirinahuëꞌ, israiroꞌsaso co inasáchin cancantopihuëꞌ. Nisha nisha mamanshiroꞌsa moshapi. Shimashonënapitasoꞌ, Sinioro camaitërinsopita natëpi. Inapitaso nipirinhuëꞌ, co inapita pochin nipihuëꞌ.

Jueces 2:17 ပူးပေါင်းရင်းမြစ်များ

Salmos 73:27

Co imarinënquënsopitasohuëꞌ, quëmari ataꞌhuantapon. Aꞌporinënquënsopitantaꞌ, acopitapon.

Éxodo 32:8

Pënënahuësopita naniantatonaꞌ, aꞌnaroáchin pëshonpi huachi. Oro asoquirahuatona moshacaiso marëꞌ, toroaꞌhuaya nonanpi. Ina chinotacaiso marëꞌ pëꞌtahuanëna tëparahuatonaꞌ, ahuiquitopi. Nani chinotahuatonaꞌ: “¡Iso mini yosënënpoa Iquipito quëran ocoirinpoasoꞌ!” toconpi, itërin.

Jeremías 6:16

Naquëranchin Siniorori piyapinënpita itapon: “Paꞌnamaquë ira niosërarinsoꞌ quënanconpatamara, chiniconamaꞌ. Noya niꞌsahuatoma iracaya ira huayonamaꞌ. Canpitanta chihuërëso pochin cancantohuatamaꞌ, nontoco noꞌtën ira aꞌnotërëso pochin nichinquëmaꞌ. Inasáchin paꞌtohuatamaꞌ sano cancantaramaꞌ,” itërin. Canpitaso napoaponahuëꞌ: “Co nohuantëraihuëꞌ ina ira paꞌtaꞌhuaisoꞌ,” toconamaꞌ.

Oseas 2:2

Naquëranchin Siniorori israiroꞌsa itaantapon: “Israiro nacionsoꞌ, saꞌahuë pochin ninin. Inapitaso napoaponahuëꞌ, tëhuananpitatë pochin nitërinaco. Napotërinacoso marëꞌ carintaꞌ, inapita aꞌporahuë. Naporinso marëꞌ, huaꞌhuinpitari coisëquë quëpatona shaꞌhuirapiinaꞌ. ¡Ama huachi niminta paya pochin nisáinsohuëꞌ! ¡Ama huachi aꞌna aꞌna poꞌchinsohuëꞌ!

Amós 2:4

Naquëranchin Sinioro taantarin: “Cota huënton israiroꞌsantaꞌ, paꞌpi co noyahuëꞌ nipi. Aꞌchintërahuësopita nocanatonaꞌ, pënëntërahuësopitanta co natëpihuëꞌ. Shimashonëna moshapiso chachin inapitanta moshaantapi. Napoaton inapitanta anaꞌintaꞌhuaso yaꞌhuërin.

Gálatas 1:6

Yosë ayonquirinquëmaꞌ imacamaso marëꞌ. Quisocristo inaora nohuanton nosoroatënquëmaꞌ, catahuarinquëmaꞌ niꞌton, imaramaꞌ. Imapiramahuëꞌ, aꞌnaroáchin ina naniantatomaꞌ, nisha nanan yaimaramaꞌ. Ina yonquiato, paꞌyanahuë.

Deuteronomio 31:16

Naporoꞌ Siniorori Moisësë itapon: “Co huaꞌquiya quëranhuë quëmasoꞌ chiminapon. Aꞌnapitaso noꞌpaꞌ quëtarahuëquë yaꞌconpachinaꞌ, nisha cancantapi. Inapoatonaꞌ, nisha nisha mamanshiroꞌsa yaꞌhuëhuanoꞌsari moshapisoꞌ, moshatona aꞌpoaponaco. Inapitaroꞌco nani anoyatopirahuëꞌ, napoatona anoyatërahuëso tapiaponaꞌ.

Deuteronomio 31:18

Napopirinahuë tëranta caso aquë aquëtë co tahuërëtarahuëꞌ. Nisha nisha mamanshiroꞌsa moshatonaꞌ, paꞌpi co noyahuëꞌ nipiso marëꞌ, napotarahuë.

Deuteronomio 9:12

Ina quëtahuatonco: ‘Manóton nohuaramarahuaton, piyapiꞌsa nimaquëꞌ. Inapitasoꞌ Iquipito quëran ocoipiranhuëꞌ, paꞌpi co noyahuëꞌ nisapi. Pënënahuësopita naniantatonaꞌ, aꞌnaroáchin pëshonpi huachi. Huaꞌna asoquirahuatona moshacaiso marëꞌ mamanshi nipi,’ itërinco.

Deuteronomio 9:16

Yaꞌhuëarëhuaquë canquimahuatora, co Sinioro natëtomarahuëꞌ oshahuanamasoꞌ niꞌquimarahuë. Pënëninquëmaso aꞌporahuatomaꞌ, mamanshi, toroaꞌhua pochin nonanatomaꞌ, moshararamaꞌ.

Josué 24:24

—Sinioroso Yosënënpoa niꞌton, inasáchin chinotarai. Naporahuaton ina camaitërinsoráchin nisarai, topi yaꞌipi israiroꞌsaꞌ.

Josué 24:31

Israiroꞌsasoꞌ, Cosoi chiminaquë huarëꞌ Sinioroíchin chinotopi. Ansianoroꞌsa Siniorori catahuarinso niꞌpisopita chiminai huarëꞌ, inaíchin chinotopi.

Jueces 8:33

Quitiono chimininso piquëran israiroꞌsasoꞌ, Sinioro aꞌpoantapi. Paaro mamanshi nisha nisha nonanpisoꞌ moshacaiso marëꞌ aꞌpopi. Napoatona mamanshi Paaro-piri itopiso naꞌcon naꞌcon moshacaiso marëꞌ huayonpi.

1 Samuel 12:12

Napoaponahuëꞌ, amonoꞌsa copirno Naasë itopiso yaahuërinquëmasoꞌ, natantëramaꞌ. Ina natantatomaꞌ, copirno acotaꞌhuanquëmaso natanamaco. Sinioro chachin copirnonënpoaso nipirinhuëꞌ, naporamaꞌ. Inaso Yosënënpoa chinotërëhuasoꞌ.

1 Samuel 12:17

Ipora tahuëriꞌsa trico macacaso tahuëri niꞌton, ¿co oꞌnaninhuëꞌ paꞌ? Napopirinhuë Yosë nontohuato, ina nohuanton huira, oꞌnan, inapita anotarin. Inapohuachin, Sinioro yonquirapirinquëmasoꞌ, nitotaramaꞌ: “Copirno acotiinpoaso natanatëhuaꞌ, paꞌpi co noyahuëꞌ ninëhuaꞌ,” tosaramaꞌ, itërin.

1 Samuel 12:19

Napoaton yaꞌipiya quëran Samoiro itaponaꞌ: —Sinioroso Yosënën niꞌton, ina nontëquë quiya marëꞌ. Quiyasoꞌ quëma piyapinënpitacoi ninai. Ama anaꞌintatoncoi tëpaincoiso marëhuëꞌ ina nontëquëꞌ. Paꞌpi co noyahuëꞌ nicatoi oshahuanapiraihuëꞌ, copirno acotiincoiso natanatoi, naꞌcon naꞌcon tëhuërai, itopi.