Jueces 2:15 - Chayahuita (Shahui)

¹⁵ Nani ahuëtai marëꞌ paꞌpiquë, Siniorori inimiconëna catahuarin niꞌton, israiroꞌsa canaraꞌpiapi. Inari shaꞌhuitërinso chachin nitopi. Siniorori maꞌsha onpotaton israiroꞌsa chiníquën aparisitërin.

Jueces 2:15 ပူးပေါင်းရင်းမြစ်များ

Jeremías 18:8

Napoaponahuëꞌ, inaquë yaꞌhuëpisopitaso oshanëna aꞌporahuatona noya yonquiantahuachinaꞌ, co huachi anaꞌintarahuëꞌ.

Miqueas 2:3

Napoaton Sinioro napotërinquëmaꞌ: “Naporamaso marëꞌ carimantaꞌ, nani yonquirahuë maꞌsha onpotaꞌhuanquëmasoꞌ. Paꞌpi chiníquën maꞌsha onpoarama niꞌton, co chaꞌësaramahuëꞌ. Inapotohuatënquëmaꞌ, co huachi nocantamasoꞌ yonquiaramahuëꞌ. Paꞌpi co noyahuëꞌ tahuëriꞌsa nisarin niꞌton, napoaramaꞌ.

2 Corintios 4:8

Nani maꞌsha onpopiraihuëꞌ, Yosë catahuarincoi ahuantaꞌhuaiso marëꞌ. “Oshaquëran nichaꞌësarincoi,” taꞌtoi, imarai. “¿Onpoatoicha maꞌsha onporai paya?” tapoiraihuëꞌ, co paꞌyanaihuëꞌ.

Deuteronomio 18:20

Aꞌnaquënso napoaponahuëꞌ, nonpinatonaꞌ: “Sinioro chachin aꞌparinco niꞌton, shaꞌhuitaranquëmaꞌ,” taponaꞌ. Nonpinatona naporapi niꞌton, inapitaso tëpamaso yaꞌhuërin. Aꞌnaquëntaꞌ, mamanshi moshacamaso marëꞌ pënënpachinquëmaꞌ, inanta tëpamaso yaꞌhuërin.

1 Samuel 12:15

Co natëtatomarahuëꞌ camaitërinsopita aꞌpohuatamasoꞌ, inasoꞌ anaꞌintarinquëmaꞌ. Copirnonëmarë chachin anaꞌintarinquëmaꞌ.

1 Samuel 13:6

Huiristinoꞌsa notohuaroꞌ huëꞌsapi nicatonaꞌ, israiroꞌsaso panca paꞌyanpi. Napoatona motopi naninoꞌsaquë naꞌpicaiso marëꞌ taꞌapi. Noꞌpaꞌ naninoꞌsaquë, natëtë casonantëroꞌsaquë, iꞌsha paꞌtacaso marëꞌ cashapisopitaquë, posoroꞌsaquë, inaquëpita naꞌpicaiso marëꞌ taꞌapi.

1 Samuel 14:24

Naporo tahuëri israiroꞌsari huiristinoꞌsa canapi. Napoaponahuëꞌ, coꞌhuara ahuëchátërasoihuëꞌ, Saonoso piyapinënpita camairin: “Ipora tahuëri inimiconëhuëpita iꞌhuërëtaꞌhuaso yaꞌhuërin. Coꞌhuara inapochátërasohuëꞌ insosona coshatohuachin, Yosëri anaꞌinchin. Yoscoarëꞌ inapochin,” tënin. Ina tëꞌhuatatona Israiro sontaroꞌsasoꞌ, co coshatopihuëꞌ. Inapo ahuëtatonaꞌ, paꞌpi canotopi.