Jueces 16:30 - Chayahuita (Shahui)

³⁰ Inapotahuaton chiníquën nonin: “¡Carëꞌquëma napopináchin canpitanta huiristinoꞌsanquëma chimincoꞌ!” tënin. Ina tosahuaton, yaꞌipi chinirin quëran pitarin. Pitahuachina, moshatacaiso pëi nohuatiimarin. Nohuatahuaton huiristino huaꞌanoꞌsa niꞌpirin. Aꞌnapita huiristinoꞌsanta inapotërin. Inapoaton Sansonsoꞌ chiminapon pochin naꞌcon naꞌcon huiristinoꞌsa tëparin. Nanpiponsoꞌ naꞌa tëpaponahuëꞌ, co ina nápo tëparinhuëꞌ.

Jueces 16:30 ပူးပေါင်းရင်းမြစ်များ

Génesis 3:15

Ca nohuanto sanapi inimicotarinquën. Quëmarinta ina inimicotaran. Quëmá quëran pipipisopitantaꞌ, sanapi quëran pipipisopitarëꞌ niinimicotaponaꞌ. Aꞌna tahuëri sanapi quëran pipirinsoari minsëmiatarinquën. Napoaponahuëꞌ, quëmarinta chiníquën ina aparisitaran, itërin.

Copo naporinso' 31:3

¡Co noyahuëꞌ nicatona oshahuanpisopita, Yosëri co noyahuëꞌ niꞌnin!

Eclesiastés 9:12

Naporahuaton co inquënpoa tëranta ninorëhuahuëꞌ onporosona chiminacasoꞌ. Canpoanta samira ritiquë manëso pochin, inairanta huënsonquë manëso pochin, co yonquiasëhuahuëꞌ, maꞌsha onpocasoꞌ cantiarinpoaꞌ.

Mateo 16:25

Noya nanpicamasoáchin yonquihuatamaꞌ, topinan quëran nanpiaramaꞌ. Aꞌna tahuëri chiminpatamaꞌ, parisitomiataramaꞌ. Nipirinhuëꞌ, casáchin yonquihuatamaco, parisitapomarahuëꞌ co topinan quëran nanpiaramahuëꞌ. Yosëꞌpaꞌ nanpimiataramaꞌ.

Hechos 20:24

Yatëpapirinacohuëntaꞌ, co casoꞌ tëꞌhuatërahuëꞌ. Co ina yonquirahuëꞌ. Sinioro Quisoso natëaꞌhuasoáchin cancantërahuë. Iráca ina shaꞌhuitërinco aꞌchinaꞌhuaso marëꞌ. ‘Yosëri yaꞌipi piyapi nosoroaton, anoyacancantacasoꞌ nohuantërin. Ina noya nanan chachin aꞌchintonquëꞌ,’ itërinco. Napoaton paato, aꞌchintárahuë. Co chiminaꞌhuasoꞌ tëꞌhuatërahuëꞌ.

Hechos 21:13

—¿Onpoatontaꞌ naꞌnëtomaꞌ asëtaramaco? Ama huachi naꞌnëcosohuëꞌ. Inatohuaꞌ paꞌpato, yatonpoarinaco. Nipirinhuëꞌ, yapaꞌsarahuë. Sinioro Quisoso imarahuëso marëꞌ yatëpapirinacohuëntaꞌ, paꞌsarahuë, itërincoi.

Filipenses 2:17

Iráca maꞌsha Yosë marëꞌ tëpahuachinaꞌ, huinontaꞌ opotopi. Inapochachin cantaꞌ canpita noya noya imacamaso marëꞌ tëpahuachinacontaꞌ, noya nisarin, co sëtarahuëꞌ. Aꞌchintëranquëmaꞌ niꞌton, noya imaramaꞌ. Napoaton noya cancantërahuë.

Filipenses 2:8

Isoroꞌpaquë yaꞌhuëhuachina, Yosëíchin natërin. Ina nohuanton, canpoa marëꞌ chiminin. Yosë huiꞌnin niponahuëꞌ, corosëquë patanantohuachinara, chiminin.

Colosenses 2:15

Quisocristosoꞌ chini chiníquën nanantërin. Corosëquë chiminaton, yaꞌipi sopai huaꞌanoꞌsaꞌ, sopairoꞌsaꞌ, inapita aꞌninquëchin minsërahuaton, atapanin. Co huachi inapita nanitapihuëꞌ shaꞌhuirapiinpoasoꞌ.

1 Tesalonicenses 5:2

Iráca shaꞌhuitërinpoasoꞌ nani nitotëramaꞌ. Co nitotasoihuëꞌ, oꞌmantararin. Niꞌcoꞌ iyaroꞌsaꞌ. Yono tashiꞌ co nitotasëhuahuëꞌ, ihuatonaꞌpi pëinënpoaquë yaꞌconin. Inapochachin aꞌnanaya Quisocristo oꞌmantararin.

Jueces 14:19

Naporoꞌ Sinioro ispiritonëni Sanson yaꞌcoancantërin. Yaꞌcoancantohuachina, Ascaron ninano itopiquë paꞌnin. Inaquë paꞌsahuaton cara shonca yaꞌhuëhuanoꞌsa tëparahuaton aꞌmopiso ocoitëraꞌpiarin. Ina quëparahuaton canapiso marëꞌ pahuërëtërin. Ninocaiso nanan noꞌtëquën shaꞌhuipiso marëꞌ Sansonsoꞌ nihuitërin niꞌton, ina pochin pahuërëtërin. Ina piquëran Sansonsoꞌ paꞌpi noꞌhuitahuaton, paꞌpin, aꞌshin, inapita yaꞌhuërinquë panantarin. Co sanapi ichiyaꞌhuëyátërasohuëꞌ, panantarin.

Jueces 15:15

Naporahuaton mora cohuiratë manin. Co noya yaniyátërarinsohuëꞌ masahuaton, inaquë ahuëaton huaranca huiristinoꞌsa tëparin.

Jueces 15:8

Napotaton huiristinoꞌsa ahuëmiatërin. Inapotaton notohuaroꞌ tiquirin. Ina piquëran Itan natëtëana itopiquë paꞌsahuaton yaꞌhuëconin.

Jueces 16:29

Napotahuaton moshatacaiso pëi achinirinsopita, cato tanpanquëranchin caririn. Carirahuaton piquëëconin.

Jueces 16:31

Ina piquëran iyaꞌhuainpita, quëmopinënpita, inapita oꞌmapi. Nonën masahuatona paꞌpincoꞌ Manoa itopisoꞌ poꞌoronënquë poꞌmoonpi. Inasoꞌ poꞌoroꞌ, Sora ninano quëran Istaoro ninanoquë ira paꞌninsoꞌ huáncana yaꞌhuërin.