Jueces 16:24 - Chayahuita (Shahui)

²⁴ Ina nicatona aꞌnapita huiristinosantaꞌ, cantarapi. Cantatonaꞌ, mamanshinëna chinotopi. Napopi: “Mamanshinënpoa catahuarinpoa niꞌton, Sanson canarëhuaꞌ. Inasoꞌ inimiconënpoa niꞌton, shaꞌtërëhuasopita tapirin. Naporahuaton naꞌaquënpoa tiquirinpoaꞌ,” topi cantatonaꞌ.

Jueces 16:24 ပူးပေါင်းရင်းမြစ်များ

Daniel 5:23

Yosë tëꞌhuataton natëcaso nipirinhuëꞌ, nocanatë pochin ninan. Inapoaton minëroꞌsa ina pëinën quëran quëpiso amatohuatana, quëshirinën. Quëpachinara, inaquë përaransopita huino ichioꞌoran. Naporahuaton mamanshinënpita oro quëran nipisoꞌ, mosharan. Prata, shaꞌpi huaꞌna, huaꞌnamia, nara, naꞌpi, inapita quëran nipisontaꞌ, mosharan. Inapitaso co máquënoꞌsahuë niꞌtonaꞌ, co quënantopihuëꞌ, co natantopihuëꞌ, co manta nitotopihuëꞌ, napopi. Napopirinahuëꞌ, inapitaso chinotëran. Yosëso ananpirinquën. Ina nohuantohuachin maꞌpitaso yonquiranso ninan. Inaso napopirinhuëꞌ, co chinotëranhuëꞌ.

Daniel 5:4

Inaquë huino oꞌosahuatonaꞌ, mamanshinënapita oro quëran nipisoꞌ, mosharápi. Prata, shaꞌpi huaꞌna, huaꞌnamia, nara, naꞌpi, inapita quëraonta nipisoꞌ, mosharápi.

Habacuc 1:16

Napoaton inapitasoꞌ, ritinënaꞌ, yoꞌnananënaꞌ, inapita moshapi. Inapita moshacaiso marëꞌ maꞌsharoꞌsa tëpapi. Yonarin pochin nininsontaꞌ, aꞌpëpi. ‘Inapita catahuarincoi niꞌton, naꞌa noya cosharo yaꞌhuëtërincoi,’ topi.

Deuteronomio 32:27

Inapotohuatoso nipirinhuëꞌ, inimicoroꞌsa tëhuaponaco: “Quiyasoꞌ chini chiníquën nanantërai. Co Sinioro nohuantopirinhuëꞌ, israiroꞌsa tiquirai. ¡Ma noyacha ninai quiyaso paya!” tosapi. Napoaton co israiroꞌsa tiquicaisoꞌ nohuantërahuëꞌ.

Apocalipsis 11:10

Tëpapi niꞌton, capa cancantatonaꞌ, pita nisapi. Maꞌshanënantaꞌ topinan aꞌnaya aꞌnaya niquëtapi. “Huaꞌquiꞌ pënënatonpoaꞌ, apininpoaꞌ nipirinhuëꞌ, iporasoꞌ nani chiminpi,” taꞌtonaꞌ, capa cancantapi.

Jueces 15:14

Nii itopiquë canconpachinara huiristinoꞌsasoꞌ, capa cancantatona noncarorëꞌnachin nacapitapi. Capa cancantapirinahuëꞌ, Sinioro ispiritonëni Sanson yaꞌcoancantërin. Naporoꞌ tanpaquën, imirin, inapita tonpopisoꞌ oshitërin. Rino piꞌshi pënquë aꞌpërëso pochin nitaton oshitërin.

Jueces 15:16

Inapotahuaton tapon: —Mora cohuirachaquë, aꞌna imo, cato imo imorahuë. Mora cohuirachaquë huaranca huiristino sontaroꞌsa tëparahuë, tënin.

Jueces 15:8

Napotaton huiristinoꞌsa ahuëmiatërin. Inapotaton notohuaroꞌ tiquirin. Ina piquëran Itan natëtëana itopiquë paꞌsahuaton yaꞌhuëconin.

Jueces 16:25

Naporápatona capa cancantopi. Capa cancantonënaquë: “Sanson macontaco tëhuahuaꞌ,” topachinara, tashinan pëi quëran ocoipi. Ocoirahuatona tëhuarápi. Niyontopiso pëisoꞌ, naꞌpi quëran niꞌton, achinicaso marëꞌ cato onëroꞌsa pochin yaꞌhuëtërin. Pëi huáncana acopi.

1 Samuel 31:9

Quënanahuatonaꞌ, Saonosoꞌ nishitëconotopi. Ahuëtacaso marëꞌ ohuararinsopitanta matopi. Inapotahuatonaꞌ, yaꞌipi yaꞌhuëpiquë nanan shaꞌhuicaiso marëꞌ sontaroꞌsa aꞌpapi. Aꞌpahuachinara, inahuaso mamanshi pëiroꞌsaquë shaꞌhuiconpi.