Juan 7:42 - Chayahuita (Shahui)

⁴² ¿Coꞌta “Tapicoꞌ shiin niꞌton, ina ninanonënquë chachin nasitapon? Pirinquë nasitapon,” tënin Yosë quiricanënquë, topi aꞌnaquëontaꞌ.

Juan 7:42 ပူးပေါင်းရင်းမြစ်များ

Salmos 89:4

“Ca nohuanton quëmá quëran pipipisopitanta huaꞌanëntaponaꞌ,” itëran.

Isaías 11:1

Nara motoꞌ itëquën quëran pichopitahuaton papotaantarinso pochin aꞌna tahuëri Quisi shiin copirno yaꞌconaton, huaꞌanëntapon.

Jeremías 23:5

Ina quëran Sinioro taantarin: “Ca nohuanton aꞌna tahuëri Tapi shiin yaꞌhuëapon. Ina huaꞌanëntohuachin, yonquínahuan copirno nisarin. Noyasáchin nicaton, noya coisë pochin nicapon.

Miqueas 5:2

Naquëranchin Sinioro taantarin: “Pirin ninanosoꞌ, Iporata itopi antaꞌ. Inasoꞌ ninanoꞌ, aꞌnapita ninanoroꞌsa Cota huëntonquë yaꞌhuërin quëran nani naniaꞌhuaya. Ina niponahuëꞌ, yaꞌipi israiroꞌsa huaꞌanëntacaso marëꞌ inaquë aꞌnara copirno nasitapon. Ina shimashonënpitasoꞌ, iráca quëran huarëꞌ yaꞌhuëpi,” tënin.

Mateo 1:1

Quisocristo nanamën shaꞌhuitaranquëmaꞌ. Inasoꞌ Yosë huiꞌnin. Iráca quëran huarëꞌ Yosë yonquirin ina aꞌpaimacaso marëꞌ. Tapico chachin Quisocristo shimashonën. Apraancontaꞌ shimashonën chachin. Yaꞌipi shimashonënpita iráca yaꞌhuëpisoꞌ shaꞌhuichinquëmaꞌ, nitotocoꞌ.

Mateo 2:5

—Cotia parti chachin nasitapon. Pirinquë nasitapon, itopi. Iráca pënëntonaꞌpi ninoton, Yosë quiricanënquë ninshitërin.

Mateo 2:6

“Cotiaquë aꞌna ninanoꞌ yaꞌhuërin, Pirin itopisoꞌ. Co panca ninanoyahuëꞌ niponahuëꞌ, inaquë aꞌna copirno nasitapon. Naꞌa copirnoroꞌsaꞌ Cotia parti yaꞌhuëpirinahuëꞌ, inasoꞌ chini chiníquën nanantapon. Yaꞌipi piyapinëhuëpita israiroꞌsaꞌ itopisoꞌ huaꞌanëntapon,” tënin Yosë, itopi.

Lucas 2:11

Ipora tashiꞌ aꞌnara quëmapiaꞌhuaya Pirinquë nasitërin. Inasoꞌ Cristo, Yosëri aꞌpaimarinsoꞌ. Sinioro niꞌton, chinotacasoꞌ yaꞌhuërin. Nani oꞌmarin piyapiꞌsaꞌ cancanënaꞌ anoyatacaso marëꞌ.

Lucas 2:4

Cosisoꞌ Cariria parti yaꞌhuërin. Nasaritoquë yaꞌhuëpirinhuëꞌ, ina quëran pipirahuaton, Cotia parti paꞌnin. Inaquë canconahuaton, Pirinꞌpaꞌ paꞌnin. Iráca Tata masho Tapi inaquë huaꞌhuatërin. Ina shiin niꞌton, inaquë paꞌnin nininën niacotacaso marëꞌ.

Juan 7:27

—Napochináchin, nipirinhuëꞌ Quisoso intohua quëransona huëꞌninsoꞌ nitotërëhuaꞌ. Cristoso huëꞌpachin intohua quëransona huëꞌninsoꞌ, co insonta nitotarinhuëꞌ, nitopi.

1 Samuel 16:1

Aꞌna tahuëri Siniorori Samoiro itapon: —¡Noya huachi! ¡Ama aquëtë Saono yonquiaton sëtáquësohuëꞌ! Co huachi nohuantërahuëꞌ inari israiroꞌsa huaꞌanëntápasoꞌ. Ohuaca pomonquë ca marëꞌ toma nininsoꞌ taꞌpanconquëꞌ. Inaporahuaton Quisi itopisoꞌ pëinënquë paquëꞌ. Inasoꞌ, Pirinquë yaꞌhuërin. Ina huiꞌninpita quëran, aꞌnara copirno nicacaso marëꞌ nani huayonahuë. Quëmari tomaquë opomototahuaton acoaran, itërin.

1 Samuel 16:18

Napotohuachina aꞌnara piyapinëni itapon: —Quisi Pirinquë yaꞌhuërinsoꞌ, aꞌnara huiꞌnin arpa noya piꞌnirin. Inasoꞌ, chiníquën cancantaton míso ahuëtërin. Noya yonquiaton nonin. Noyapin noyapin niꞌtërin. Siniorori naꞌcon catahuarin. Naporin. Inasoꞌ nininën Tapi, itërin.

1 Samuel 16:4

Napotohuachina Samoirosoꞌ Siniorori camairinso chachin ninin. Pirinquë canconpachina, ninano ansianoꞌsari, tëꞌhuainpichin natanpi: —¿Maꞌsha onpotancoiso marëꞌ huëꞌsamaranquën ti? itopi. Napotohuachinara, Samoiroso tapon: —Co naporinhuëꞌ. Maꞌsha tëpato Sinioro chinotaꞌhuaso marëꞌ huëꞌnahuë. Iporasoꞌ, Sinioro camaitërinso nicatoma nitapacoꞌ. Inapoatomaꞌ, caꞌtanco Sinioro chinochi. Naporahuatëhua coshatahuaꞌ, itërin. Ina quëran Samoirosoꞌ, Quisi huiꞌninpitarë chachin taparin. Sinioro camaitërinso nicaton, taparin. Inapotaton shaꞌhuitërin Yosë chinotacaso marëꞌ ohuacaꞌhua tëparinquë pacacaisoꞌ.

1 Samuel 17:58

Quëꞌcanconpachina, inari natanin: —Shaꞌhuitoco huiꞌnapi ¿Inta quëmaso tata? itërin. —Quëmasoꞌ sinioro copirno, chiníquën nanantëran. Caso tatahuë, Quisi itopi. Inasoꞌ, quëma piyapinën pochin ninin. Pirinquë yaꞌhuërin, itërin Tapiri.