Juan 7:37 - Chayahuita (Shahui)

³⁷ Pita taꞌhuantërinsoꞌ tahuëri naꞌcon naꞌcon yonquipisoꞌ niꞌton, notohuaroꞌ piyapiꞌsaꞌ niyontonpi. Naporoꞌ Quisosori huanirahuaton, chiníquën itapon: —Yamororëso pochin cancantohuatamaꞌ, huëcoꞌ imaco sano cancantamaso marëꞌ.

Juan 7:37 ပူးပေါင်းရင်းမြစ်များ

Salmos 42:2

Yamoro yatëparincoso pochin cancantato, Yosë naꞌcon naꞌcon nohuantërahuë. Inasoꞌ nanpiárin niꞌton, yachinotërahuë. ¿Onporo huarëcha ina pëinënquë paato, chinotaantarëꞌpoya? tënahuë.

Salmos 63:1

Quëmasáchin Yosënëhuënquën. Paꞌpi yamororëso pochin cancantato, yanohuitëranquën. Inotëroquë noꞌpaꞌ yanirin. Inaquë shaꞌtohuatëra, co noyatërinhuëꞌ. Ina pochin cancantato noyá nohuitaꞌhuanquë huarëꞌ sano cancantarahuë.

Proverbios 1:20

Yonquiso piyapi pochin nicaton, piyapiroꞌsa yonquínahuan acocaso marëꞌ cachiroꞌsaquë chiníquën shaꞌhuirárin. Prasaroꞌsaquëntaꞌ, naporárin.

Proverbios 8:1

Yonquisoꞌ, piyapi pochin nicaton chiníquën shaꞌhuitarinpoaꞌ. Yonquínahuan acoinpoaso marëꞌ napoarin.

Proverbios 8:17

Nosororinacosopita, carinta nosororahuë. Inpitaso cancantohuachinaco, quënanarinaco.

Proverbios 8:3

ninano yaꞌcoanaroꞌsaquë, inaquëpita huanirahuaton tapon:

Isaías 40:2

Noyasha nontatoma piyapinëhuëpita catahuaco chiníquën cancanchinaꞌ. Sontaro sirihuitërinso pochin nininsoꞌ, nani nanirin. Tëhuëpiso marëꞌ anaꞌintërahuësoꞌ, nani pahuërëtatë pochin nipi. Oshanëna marëꞌ nani naꞌcon naꞌcon parisitopi,” tënin.

Isaías 40:6

Ina quëran napoantarin natanahuë: “Chiníquën shaꞌhuiquëꞌ,” tënin. Napohuachina cari natanahuë: “Maꞌta chiníquën shaꞌhuiꞌi,” itërahuë. “Yaꞌipi piyapiꞌsa panpatoro pochin niconpi. Iminquë yanco yaꞌhuërinso pochin co chinipihuëꞌ.

Isaías 44:3

Ca nohuanton inotëroquë naꞌcon iꞌ yaꞌhuëapon. Yaniroquëntaꞌ, iꞌshanaroꞌsa yaꞌhuëapon. Canpita quëran pipipisopitanta ispiritonëhuë ayaꞌcoancantarahuë. Inapotahuato naꞌcon catahuaarahuë.

Isaías 55:1

Sinioro tënin: “Yamororëso pochin cancantohuatamaꞌ, huëco anoyacancanchinquëmaꞌ. Co coriqui yaꞌhuëtopirinquëmahuëꞌ, catahuararanquëmaꞌ. Nontohuatamaco cosharo achinitërinso pochachin achincancanaranquëmaꞌ. Huino, ohuaca shoꞌshoiꞌ, inapita achinitërinso pochin asanocancanaranquëmaꞌ.

Isaías 55:3

Huëcapairahuatomaco noya natancoꞌ. Natanpatamaco nanpiaramaꞌ. Tapi nosoroato nani shaꞌhuitërahuë. Ina nanicaso marëꞌ canpitaroꞌco anoyatomiatarahuë.

Isaías 58:1

Sinioro shaꞌhuitërinco: “Ama manta tëꞌhuatonhuëꞌ chiníquën nonquëꞌ. Tronpita pihuihuachina irininso pochin niquëꞌ. Piyapinëhuëpita co noyahuëꞌ nipiso marëꞌ pënënquëꞌ. Cacopo quëran pipipisopita oshahuanpiso marëꞌ inapotëquëꞌ.

Jeremías 2:2

“Quirosarinquë yaꞌhuëpisopita nontoonquëꞌ. Chiníquën nonaton ca Sinioroco naporahuësoꞌ shaꞌhuitëquëꞌ: ‘Iráca casáchin cancantëramaco. Niꞌquëꞌ. Nanon nasha soꞌyahuachina, soꞌin naꞌcon nosororin. Ina pochin canpitanta cancantatomaꞌ, inotëro parti imaquiramaco. Inaquëso co maꞌsha tëranta shaꞌnëhuë nipirinhuëꞌ, naporamaꞌ.

Levítico 23:36

Canchisë tahuëri chachin corto huaꞌani maꞌsha tëpapisoꞌ, ca marëꞌ ahuiquitarin. Nani canchisë tahuëri naꞌhuëpachin, tahuëririnquëso niyontoantarahuatoma chinotaramaco. Naporonta maꞌsha tëpapisoꞌ, corto huaꞌani ca marëꞌ ahuiquitarin. Naporonta pita tahuëri niꞌton, co manta sacatamaso yaꞌhuërinhuëꞌ.

Levítico 23:39

Nanan anoyatacaso tahuëri yoquiquë chachin shonca aꞌnatërápo tahuëri nanihuachin, canchisë tahuëri pita nisaramaꞌ. Trico nani nanquiramaso piquëran, chinotamacoso marëꞌ inapoaramaꞌ. Caniaritërinso tahuëri chinotatomaꞌ, yonquiaramaco. Nitiquirinso tahuëririnquënta chinotatomaꞌ, yonquiantaramaco.

Miqueas 6:9

(-)

Zacarías 9:15

Siniorosoꞌ, yaꞌipi nanitaparin. Inimiconënapitasoꞌ, israiroꞌsa ahuëcaiso marëꞌ naꞌpira tëꞌyatopiquë quëcaponaꞌ. Inanpiquë naꞌpiroꞌsa tëꞌyatopirinahuëꞌ, israiroꞌsaso Siniorori paꞌpoyapon. Inari catahuapon niꞌton, inimiconëna minsëaponaꞌ. Minsëhuachinaꞌ, pita nicaponaꞌ. Naꞌcon huino oꞌopiso pochin noncaroaponaꞌ. Corto huaꞌanoꞌsa maꞌsha tëpahuachinara, tasonoꞌsaquë huënaiꞌ mëntaitopi. Inapotatona artaro aipi opopi. Inapochachin inapitantaꞌ, tasonënaquë huino mëntaitaponaꞌ.

Mateo 11:28

Huëcoꞌ casáchin imaco catahuainquëmaꞌ. Isoroꞌpaquë maꞌsha onporamaꞌ niꞌton, sëtaramaꞌ. Naporahuaton, nisha nisha yanatëpiramahuëꞌ, co canpitaora nanitëramahuëꞌ noya cancantacamasoꞌ. Pëꞌpëto quëquën quëparamaso pochin ninatanama niꞌton, napion cancantëramaꞌ. Napoaton huëcoꞌ catahuainquëmaꞌ sano cancantacamaso marëꞌ.

Mateo 3:3

Iráca Yosë nohuanton, Isaiasë ninorin. Ninshitaton, naporin: “Inotëro parti aꞌna quëmapi pënëntápon: ‘Sinioro oꞌmacaso tahuëri naniriarin niꞌton, yonquicoꞌ. Niꞌcoꞌ. Huaꞌan chiníquën nanantonaꞌpi niꞌton, aꞌna parti yapaꞌpachina, comisionën aꞌparin ira tapatacaso marëꞌ. Ira otëërin noya paꞌtacaiso marëꞌ. Inapochachin iporasoꞌ cancanëmaꞌ anoyatocoꞌ Sinioro oꞌmain,’ tapon ina quëmapi, pënëntohuachin,” tënin. Coansha pënëntacasoꞌ ninoton, naporin.

Mateo 5:6

Tanarëso pochin, yamororëso pochin cancantatomaꞌ, Yosë naꞌcon nohuantocoꞌ. Ina pochin cancantacasoáchin nohuantohuatamaꞌ, noya niꞌsarinquëmaꞌ. Catahuarinquëmaꞌ ina pochin cancantacamaso marëꞌ. Sano cancantaramaꞌ.

Juan 1:23

—Yosë nohuanton, pënëntarahuë. Iráca Isaiasë ninotonco, naporin: “Aꞌna quëmapi inotëroquë pënëntaton, tapon: ‘Ira coꞌshon coꞌshon toconin niꞌton, otëëquëꞌ Sinioro oꞌmain,’ tënin. Naporinso chachin cantaꞌ piyapiꞌsaꞌ pënënarahuë. ‘Cancanëmaꞌ anoyatocoꞌ Sinioro oꞌmain,’ itarahuë,” itërin Coanshari.

Juan 14:6

—Ca ira pochinco. Yaꞌipiya noꞌtëquën aꞌchintëranquëmaꞌ. Casáchin nanpicasoꞌ quëtëranquëmaꞌ. Imaramacosopitarachin Yosëꞌpaꞌ cancontaramaꞌ.

Juan 4:10

—Yosë yanicanapirinquënhuëꞌ, co quëmasoꞌ nitotëranhuëꞌ. “Iꞌsha mananso cantaꞌ oꞌoi,” itëranquën nipirinhuëꞌ, co nohuitërancohuëꞌ. Nohuitëranco naporini, quëma nataintoncohuëꞌ. Carinquën nanpirin iꞌsha quëchitënquënhuëꞌ, itërin Quisosori.

Juan 4:11

—Quëmasoꞌ co mantaꞌ yaꞌhuëtërinquënhuëꞌ iꞌsha macamasoꞌ. Iꞌshasoꞌ acopoꞌ yaꞌhuërin. ¿Onporahuatoncha nanpirin iꞌsha manëꞌponquënya?

Juan 4:14

Nisha iꞌsha carinquën quëtaranquën. Ina yaꞌhuëtohuachinquën, co huachi yamororëso pochin cancantaranhuëꞌ. Niꞌquëꞌ. Pancaiꞌ noꞌpa quëran pipihuachina, noyápiachin pipirárin. Co onporontaꞌ yanimarinhuëꞌ. Inapochachin nanpirin iꞌsha quëtohuatënquën, cancanënquë chachin yaꞌhuëtarinquën. Inaquë yaꞌhuápon huachi. Yosë nohuitaton, nanpimiataran, itërin.

Juan 5:40

Noꞌtëquën ninopirinacohuëꞌ, co yaimaramacohuëꞌ. Ananpimiataꞌhuanquëmasoꞌ yaꞌhuëpirinhuëꞌ, co nohuantëramacohuëꞌ.

Juan 6:35

—Ca inaco. Casoꞌ cosharo pochinco niꞌto, piyapiꞌsaꞌ ananpitomiatarahuë. Imapatamaco, co huachi tanarëso pochin cancantaramahuëꞌ. Natëhuatamaco, co huachi yamororëso pochin cancantaramahuëꞌ. Yosë nohuitohuatamaꞌ, sano cancantaramaꞌ.

Juan 6:37

Aꞌnaquën Tata Yosë nohuanton, imasarinaco. Insosona imapachinaco, co onporontaꞌ aꞌpararahuëꞌ.

Juan 6:55

Nonëhuë cosharo pochin niꞌton, achinicancanaranquëmaꞌ. Huënainëhuë paꞌsarin niꞌton, imapatamaco, anoyacancantaranquëmaꞌ.

Juan 7:28

Quisososo nipirinhuëꞌ, Yosë chinotopiso pëiquë chiníquën itaantarin: —¿Nohuitëramaco ti? Intohua quëransoꞌ huëꞌnahuësoꞌ nitotapomarahuëꞌ, co tëhuënchachin nohuitëramacohuëꞌ. Co caora nohuanto, oꞌmarahuëꞌ. Yosë nohuanton, oꞌmarahuë. Inasoꞌ noꞌtëquën nonin. Nipirinhuëꞌ, inantaꞌ co nohuitëramahuëꞌ.

1 Corintios 10:21

Aꞌnaquën mamanshi moshacaiso marëꞌ pita nipi. Sopairoꞌsaꞌ yonquiatonaꞌ, napopi. Sinioro yonquihuatamaꞌ, co sopairoꞌsaꞌ yonquicamasoꞌ yaꞌhuërinhuëꞌ. Napoaton amatohuachinënquëmaꞌ, ama pacosohuëꞌ. Quisocristo chimininsoꞌ yonquiatomaꞌ, coshatëramaꞌ, oꞌoramaꞌ. Napoaton ama sopairoꞌsaꞌ yonquiatomaꞌ, coshatocosohuëꞌ, oꞌocosohuëꞌ.

1 Corintios 10:4

Inaquësoꞌ co iꞌsha yaꞌhuëpirinhuëꞌ, Yosë nohuanton, naꞌpi quëran pipirin, yaꞌipiya oꞌopi. Quisocristosoꞌ ina naꞌpi pochin ninin. Paꞌpachinara, co quënanpirinahuëꞌ, inari naꞌcon catahuarin chaꞌëcaiso marëꞌ.

1 Corintios 11:25

Nani coshatohuachinara, minëaꞌhua manin. “Huënainëhuë pochin isoꞌ. Huënainëhuë paꞌsarin niꞌton, nasha quëran canpitarëꞌ Yosë anoyatërinsoꞌ shaꞌhuichinquëmaꞌ imacamaso marëꞌ. Chiminarahuë niꞌton, anoyacancantaranquëmaꞌ. Ca yonquiatomaco, oꞌocoꞌ. Ipora quëran huarëꞌ inapoatomaꞌ, yonquico,” itërin Quisosori.

1 Corintios 12:13

Ispirito Santo chachin Quisocristo huëntonënquë ayaꞌconinpoaꞌ. Cotioroꞌsahuë nipon, nisha piyapiꞌsahuë nipon, napopináchin Yosë niꞌninpoaꞌ. Aꞌnaquëmaꞌ canpitaora marëꞌ sacatëramaꞌ. Aꞌnaquëmaꞌ nani tahuëri patronëmaꞌ asacatërinënquëmaꞌ. Nisha nishanpoaꞌ nipirihuahuëꞌ, Ispirito Santo catahuarinpoaꞌ. Quisocristo imarëhuaꞌ niꞌton, huëntonënquë ayaꞌconinpoaꞌ. Aporintohuachinënpoara, aꞌna huëntoínchin ninëhuaꞌ. Yaꞌipi imarëhuasopita Ispirito Santo yaꞌcoancantërinpoaꞌ.

Efesios 5:18

Aꞌnaquën noꞌpicasoáchin cancantopi. “Huëcoꞌ noꞌpiahuaꞌ. Capa cancantahuaꞌ,” nitopirinahuëꞌ. Ama canpitasoꞌ noꞌpicosohuëꞌ, nishacancantotamaꞌ. Yosë nontocoꞌ Ispirito Santo noyá yaꞌcoancanchinquëmaꞌ. Nani tahuëri yaꞌcoancantomiachinquëmaꞌ. Ina quëran co noꞌpipomarahuëꞌ, tëhuënchachin capa cancantomiataramaꞌ.

Apocalipsis 21:6

Ina quëran itantarinco: —Nani yaꞌipiya anoyatërahuë. Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuárahuë. Co onporontaꞌ taꞌhuantarahuëꞌ. Napoaton nontoco catahuainquëmaꞌ. Niꞌquëꞌ. Chiníquën yamorohuatëra, oꞌorëꞌ. Oꞌopatëra, chiníquën cancantërëꞌ. Inapochachin cantaꞌ catahuaranquëmaꞌ. Yamororëso pochin cancantohuatamaꞌ, nanpirin iiꞌ quëchinquëmaꞌ noya cancantacamaso marëꞌ. Caora nohuanto, catahuaranquëmaꞌ. Insonquëma tërantaꞌ nohuantohuatamaco, huëcoꞌ anoyacancanchinquëmaꞌ.

Apocalipsis 22:1

Ina quëran Yosë nohuanton, huaꞌnarëso pochin niantarahuë. Nasha Quirosarin niantahuato, anquëni pancaiꞌ aꞌnotërinco, noyápiachin nininsoꞌ. Inasoꞌ, Nanpirin iiꞌ itopisoꞌ. Yosë huaꞌanëntërin quëran pipirarin. Inaquë Carniroaꞌhuantaꞌ huaꞌanëntarin.

Apocalipsis 22:17

Yaꞌipi Quisoso imarëhuasopita: “Oꞌmantaquëꞌ Sinioro,” itërëhuaꞌ. Ispirito Santontaꞌ, inachachin tënin. Natanamasopitantaꞌ, “Oꞌmantaquëꞌ Sinioro,” itocoꞌ. Yamororëso pochin cancantohuatamaꞌ, huëcoꞌ nanpirin iiꞌ quëchinquëmaꞌ. Achinirinpoaso pochin quëtarinquëmaꞌ noya cancantacamaso marëꞌ. Co mantaꞌ paꞌtërinhuëꞌ.