Juan 7:28 - Chayahuita (Shahui)

²⁸ Quisososo nipirinhuëꞌ, Yosë chinotopiso pëiquë chiníquën itaantarin: —¿Nohuitëramaco ti? Intohua quëransoꞌ huëꞌnahuësoꞌ nitotapomarahuëꞌ, co tëhuënchachin nohuitëramacohuëꞌ. Co caora nohuanto, oꞌmarahuëꞌ. Yosë nohuanton, oꞌmarahuë. Inasoꞌ noꞌtëquën nonin. Nipirinhuëꞌ, inantaꞌ co nohuitëramahuëꞌ.

Juan 7:28 ပူးပေါင်းရင်းမြစ်များ

Jeremías 31:34

Co huachi insonta aꞌnapita aꞌchintaponhuëꞌ. Co iin nontaton: ‘Sinioro nohuitëquëꞌ,’ co itaponhuëꞌ. Yaꞌipiya quëran nohuitarinaco. Huaꞌhuishinoꞌsa quëran mashoroꞌsaquë huarëꞌ nohuitarinaco niꞌton, co huachi niaꞌchintaponahuëꞌ. Inapitasoꞌ co noyahuëꞌ nicatona oshahuanpirinahuëꞌ, oshanëna inquitato nanan anoyatarahuë. Ca Sinioroco shaꞌhuitaranquëmaꞌ,” tënin.

Oseas 4:1

Israiroꞌsanquëmaꞌ. Sinioro naporinso natancoꞌ: “Iso noꞌpaquë yaꞌhuëpisopita paꞌpi co noyahuëꞌ nipi. Isëquësoꞌ, co noꞌtëquën ninosoropihuëꞌ. Nisha nisha cancantopi. Caso Yosëco nipirahuëꞌ, co nohuitërinacohuëꞌ. Nonpiáponaraihuëꞌ, ‘Yoscoarëꞌ,’ niitopi. Apira apira nitëpapi, niihuapi, nitëhuananpitopi, paꞌpi noꞌhuitërayaroꞌsa nipi, napopi.

Oseas 5:4

Israiroꞌsaso Yosë piyapinënpita nipirinahuëꞌ, co noyahuëꞌ nisápi. Napopisoari yaꞌcopirin niꞌton, co yaꞌipi cancanëna quëran ina chinotaantacaiso nanitopihuëꞌ. Mamanshi marëꞌ sacatopisopita sanapiꞌsarëꞌ pocatonaꞌ, co Sinioro noya nohuitacaisoꞌ nanitopihuëꞌ.

Mateo 11:27

Ina quëran piyapiꞌsaꞌ aꞌchintantarin. “Tata Yosë nohuanton, pënëntarahuë. Yaꞌipi nanamën anitotërinco piyapiꞌsaꞌ aꞌchintacaꞌhuaso marëꞌ. Huiꞌninco niꞌton, inasáchin noya nohuitërinco. Inapochachin Tata Yosë nohuitërahuë. Casáchin noya nohuitërahuë. Aꞌnaquëontaꞌ cari anohuitohuato, nohuitapi antaꞌ.

Mateo 2:23

Inatohuaꞌ aꞌna ninanoꞌ yaꞌhuërin, Nasarito itopisoꞌ. Inaquë yaꞌhuërarin. Iráca pënëntonaꞌpiroꞌsaꞌ ninopi. “Cristo huëꞌpachin, Nasarito piyapi itaponaꞌ,” topi. Napoaton Yosë nohuanton, inaquë yaꞌhuaton, huiꞌnapitërin huachi.

Mateo 26:55

Ina quëran piyapiꞌsaꞌ itapon: —Sahuëni, shonqui, inapita sëꞌquërahuatomaꞌ, huëcapairamaco. Tëpatonaꞌpi pochin cancantatomaco, ¿yamanamaco ti? Coꞌtana nani tahuëri Yosë chinotopiso pëiquë huënsëato, aꞌchinárahuë. Nicapomaracohuëꞌ, co manamacohuëꞌ.

Lucas 10:22

Ina quëran aꞌparinsopita itantarin. “Tata Yosë nohuanton, chiníquën nanantërahuë. Yaꞌipi nanamën anitotërinco piyapiꞌsaꞌ aꞌchintaꞌhuaso marëꞌ. Huiꞌninco niꞌto, tatahuësáchin noyá nohuitërinco. Inapochachin cantaꞌ Tata Yosë nohuitërahuë. Casáchin noyá nohuitërahuë. Aꞌnaquën piyapiꞌsantaꞌ caora nohuanto, anohuitërahuë. Inapitantaꞌ Yosë nohuitapi huachi,” itërin.

Lucas 2:11

Ipora tashiꞌ aꞌnara quëmapiaꞌhuaya Pirinquë nasitërin. Inasoꞌ Cristo, Yosëri aꞌpaimarinsoꞌ. Sinioro niꞌton, chinotacasoꞌ yaꞌhuërin. Nani oꞌmarin piyapiꞌsaꞌ cancanënaꞌ anoyatacaso marëꞌ.

Lucas 2:39

Yaꞌipi iráca pënëntërinsoꞌ nani natëhuachinara, Cosiso saꞌinë chachin Cariria parti paantarin. Nasaritoquë yaꞌhuantarin.

Lucas 2:4

Cosisoꞌ Cariria parti yaꞌhuërin. Nasaritoquë yaꞌhuëpirinhuëꞌ, ina quëran pipirahuaton, Cotia parti paꞌnin. Inaquë canconahuaton, Pirinꞌpaꞌ paꞌnin. Iráca Tata masho Tapi inaquë huaꞌhuatërin. Ina shiin niꞌton, inaquë paꞌnin nininën niacotacaso marëꞌ.

Lucas 2:51

Ina quëran pipihuachina, aꞌshin, paꞌpin inapitarëꞌ Nasaritoquë paantarin. Inaquë paaton, aꞌshin, paꞌpin, inapita noya natërin huachi. Naporinsoꞌ aꞌshini cancanën quëran yonquirárin.

Juan 1:46

—Nasaritoroꞌsasoꞌ, paꞌpi co noya piyapiꞌsahuëꞌ. ¿Aꞌna tërantaꞌ taꞌmaꞌ inaquë yaꞌhuërinsoꞌ noya nihuan nica? tënin Natanino. —Huëquëꞌ paꞌa nohuitonquëꞌ, itërin Pinipiri.

Juan 10:36

Tata Yosë chachin acorinco nanamën aꞌchinaꞌhuaso marëꞌ. Ina marëꞌ isoroꞌpaquë aꞌpaimarinco. “Casoꞌ Yosë huiꞌninco,” topatëra, ¿onpoatontaꞌ ina marëꞌ pinoramaco? tënahuë.

Juan 12:49

Co caora yonquinëhuë quëran aꞌchinahuëꞌ. Tata Yosë shaꞌhuitërinco nani maꞌsha aꞌchinaꞌhuasoꞌ.

Juan 14:10

Caso Tata Yosë pochachin ninahuë. Tata Yosëntaꞌ ca pochachin ninin. ¿Co ina iyasha, natëyatëraranhuëꞌ ti? Aꞌchintohuatënquëmara, co caora yonquinëhuë quëran aꞌchinahuëꞌ. Yosë yonquirinso chachin yonquiato, aꞌchintaranquëmaꞌ. Ina nohuanton, nani maꞌsha nanitaparahuë.

Juan 14:31

co taꞌarahuëꞌ. Tata Yosë nosoroato, ina noꞌtëquën natëarahuë. Ina nohuanton, maꞌsha onpoarahuë. Piyapiꞌsaꞌ nicatonaco, “Tëhuënchachin Yosë nosoroaton, natërin,” tosapi. “Huëcoꞌ paꞌahua huachi,” itërincoi Quisoso.

Juan 16:3

Co Tata Yosë nohuitopihuëꞌ. Cantaꞌ huiꞌninco nipirahuëꞌ, co nohuitërinacohuëꞌ niꞌtonaꞌ, aparisitarinënquëmaꞌ.

Juan 17:25

Quëmasoꞌ Tata noꞌtëquënáchin yonquiaton, noyasáchin ninan. Co imarinacosopitahuëꞌ co nohuitërinënquënhuëꞌ. Caso nipirinhuëꞌ nohuitëranquën. Quëma isoroꞌpaquë aꞌpaimaranco. Imarinacosopita nitotopi.

Juan 17:3

Quëmasáchin Yosënquën. Isoroꞌpaquë aꞌpaimaranco. Piyapiꞌsaꞌ nohuitahuatënënquën, cantaꞌ nohuitohuachinaco, nanpimiatapi.

Juan 3:33

Aꞌnaquënpoaso nipirinhuëꞌ natëtërëhuaꞌ. “Yosë noꞌtëquën nonin. Inari aꞌpaimarin,” taꞌtëhuaꞌ, natëtërëhuaꞌ.

Juan 5:32

Nipirinhuëꞌ, Tata Yosëntaꞌ inachachin shaꞌhuitarinquëmaꞌ. Noꞌtëquën nonin, tënahuë.

Juan 5:43

Yosë chachin aꞌpaimarinco niꞌton, oꞌmapirahuëꞌ, co nohuantëramacohuëꞌ. Aꞌnaquënso nipirinhuëꞌ inaora yonquinën quëran aꞌchintohuachinquëmaꞌ, nohuantaramaꞌ.

Juan 6:42

—Coꞌta inasoꞌ Quisoso. Cosi huiꞌnin. Aꞌshiontaꞌ nohuitërëhuaꞌ. ¿Onpoatontaꞌ “Inápa quëran oꞌmarahuë,” toconin? nitopi.

Juan 7:14

Simana huancana Quisoso Yosë chinotopiso pëiquë paꞌnin. Inaquë aꞌchinarin.

Juan 8:14

—Caora yonquinëhuë quëran napopirahuëꞌ, tëhuënchachin noꞌtëquën nonahuë. Intohua quëransona oꞌmarahuësoꞌ nitotërahuë. Aꞌna tahuëri inatohua chachin panantarahuë. Casáchin ina nitotërahuë. Canpitaso nipirinhuëꞌ co nitotëramahuëꞌ. Napoaton natëcamacosoꞌ yaꞌhuërin.

Juan 8:16

Shaꞌhuihuatëraso napoaponahuëꞌ, noꞌtëquën shaꞌhuirahuë. Co casáchin shaꞌhuirahuëꞌ. Tatahuëntaꞌ ina pochachin yonquiaton shaꞌhuitarinquëmaꞌ. Ina aꞌpaimarinco.

Juan 8:19

—¿Insëquëtaꞌ tataparin? itopi. —Canpitasoꞌ co ina nohuitëramahuëꞌ. Cantaꞌ co tëhuënchachin nohuitëramacohuëꞌ. Nohuitëramaco naporini, tatahuëntaꞌ nohuichitomahuëꞌ, itërin.

Juan 8:26

Canpitaso co noyahuëꞌ ninama niꞌton, naꞌcon shaꞌhuitaꞌhuanquëmaso yaꞌhuërin. Aꞌpaimarincosoꞌ noꞌtëquënáchin nonin. Ina shaꞌhuitohuachincora natanato, ina chachin shaꞌhuitaranquëmaꞌ, tënin.

Juan 8:42

Napotohuachinara: —Yosësoꞌ tatanëmaꞌ naporini, nosoroꞌitomacohuëꞌ. Yosë quëran oꞌmarahuë. Co caora nohuanto, oꞌmarahuëꞌ. Yosë aꞌpaimarinco.

Juan 9:29

Yosëri iráca Moisësë nontërin. Quisososo nipirinhuëꞌ intohua quëransoꞌ huëꞌmara. Co nitotëraihuëꞌ, itopi.

Hechos 17:23

Cachiquë paꞌpatora, yaꞌipi moshatëramasoꞌ niꞌnahuë. Aꞌna artaro quënanahuë. Inaquë ninshitëramaꞌ. ‘isoso yosë co nohuitopirëhuahuëꞌ, moshahuaꞌ,’ tënamaꞌ ninshitatomaꞌ. Co nohuitapomarahuëꞌ, mosharamaꞌ. Apira carinquëmaꞌ aꞌchinchinquëmaꞌ, nohuitocoꞌ.

Romanos 1:28

Co Yosë yanatëpihuëꞌ niꞌton, inari aꞌporin co noyahuëꞌ nicacaiso marëꞌ. Nitapicancamiatopi.

Romanos 3:4

Yosërisoꞌ co onporonta nonpintarinhuëꞌ. Yaꞌipi piyapiꞌsaꞌ nonpinpirinahuëꞌ, Yosësoꞌ noꞌtëquënáchin nonin. Quiricanën quëran naporin: “Noꞌtëquënáchin nontërancoi niꞌton, aꞌnaquën nonpinapipirinënquënhuëꞌ, co onporontaꞌ minsëarinënquënhuëꞌ,” tënin.

2 Corintios 1:18

Yosë niꞌsárinco noꞌtëquën nontëranquëmaꞌ. Yosë noꞌtëquënáchin nonin niꞌton, cantaꞌ co nonpintëranquëmahuëꞌ. Co nisha nisha nonahuëꞌ.

2 Corintios 4:6

Yaꞌnan isoroꞌpaꞌ acoapon yaꞌipi parti tashipirinhuëꞌ: “Niiꞌsohuanchin huachi,” tënin Yosë. Napohuachina, tahuëri yaꞌhuërin. Inapochachin iporasoꞌ cancanënpoaquë aꞌpintërinpoaꞌ ina nohuitacaso marëꞌ. Inasoꞌ noya noya. Quisocristo yaꞌpirin quëran aꞌpintërinpoaso pochin ninin. Ina yonquihuatëhuaꞌ, Yosë chachin anohuitarinpoa huachi.

Tito 1:2

Quisocristo imapatëhuaꞌ, aꞌna tahuëri inápaquë quëpantarinpoaꞌ. Yaꞌhuërinꞌpaꞌ yaꞌhuëmiatarihuaꞌ. “Ananpitaantarinpoaꞌ,” taꞌtëhuaꞌ, ina ninarëhuaꞌ. Yosë iráca coꞌhuara isoroꞌpaꞌ acoyátërasohuëꞌ, ninotonpoaꞌ yonquirinpoaꞌ. Inasoꞌ co onporontaꞌ nonpintërinpoahuëꞌ.

Hebreos 6:18

Yosë chachin shaꞌhuitërinpoaꞌ. Naporahuaton “Casoꞌ Yosëco niꞌto, noꞌtëquën nontëranquëmaꞌ,” itomantarinpoaꞌ. Napoaton co onporontaꞌ nonpintarinpoahuëꞌ. Co piꞌpian tërantaꞌ nishataponhuëꞌ, tënëhuaꞌ. Ina yonquiatëhuaꞌ, chiníquën cancantahuaꞌ. Iráca Yosëíchin imarëhuaꞌ catahuainpoaso marëꞌ. “Nichaꞌësarinpoaꞌ,” taꞌtëhuaꞌ, yaꞌipi cancanënpoa quëran imahuaꞌ.

1 Juan 5:10

Yosë nani shaꞌhuitërinpoaꞌ niꞌton, imarëhuasopita nitotërëhuaꞌ. Cancanënpoa quëran anitotërinpoaꞌ. Aꞌnapitaso nipirinhuëꞌ, co Yosë natëpihuëꞌ. “Quisoso co Yosë huiꞌninhuëꞌ. Co nichaꞌësarinpoahuëꞌ,” taꞌtonaꞌ, Yosëri nonpintërinso pochin cancantopi. Noꞌtëquën shaꞌhuitopirinpoahuëꞌ, co natëpihuëꞌ.

1 Samuel 2:12

Iri huiꞌninpitasoꞌ, co noyahuëꞌ cancantopi. Napoatonaꞌ, co Sinioro tëranta tëꞌhuatatonaraihuëꞌ, co noyahuëꞌ nisápi.