Juan 6:27 - Chayahuita (Shahui)

²⁷ Cosharomia aꞌnaroáchin chanatërin. Ama inasáchin nohuantocosohuëꞌ. Cosharo pochin nininsoꞌ yaꞌhuërin. Cancanëma marëꞌ quëtaranquëmaꞌ. Ina co onporontaꞌ chanatarinhuëꞌ. Yaꞌhuëtohuachinquëmaꞌ, Yosë nohuitatomaꞌ nanpimiatarama. Ina naꞌcon naꞌcon yonquicoꞌ. Yosë quëran quëmapico niꞌto, quëtaranquëmaꞌ. Ina marëꞌ Tata Yosë acorinco. Ina nohuanton, nani maꞌsha nanitaparahuë nohuitamacoso marëꞌ, itërin.

Juan 6:27 ပူးပေါင်းရင်းမြစ်များ

Salmos 2:7

Copirno acorinsonta pënëntaton: “Iporaso Sinioro yonquirinsoꞌ, shaꞌhuichinquëmaꞌ. Inachachin nontatonco: ‘Quëmasoꞌ huiꞌnahuënquën. Ipora acoranquën huaꞌanëntamaso marëꞌ.

Salmos 40:7

Napoaton naporahuë: Maꞌtana Sinioro isëquë nisarahuë. Quiricanënquë naporinso chachin nitocoꞌ.

Isaías 42:1

Sinioro naporin: “Natanco shaꞌhuichinquëmaꞌ. Piyapinëhuë nohuitocoꞌ. Cari chachin ina achiniapo. Huayonahuëso niꞌton, nóya niꞌnahuë. Ispiritonëhuë nani ayaꞌcoancantërahuë. Noya coisë pochin nicaton, yaꞌipi nacionoꞌsa noꞌtëquën shaꞌhuitapon.

Isaías 55:2

Noya natanpatamaco, noya coshatërëso pochin acoaranquëmaꞌ. Cosharomia co achinimiatërinquëmahuëꞌ. ¡Co topinan quëran pahuërëtatë maꞌpatacaso yaꞌhuërinhuëꞌ!

Jeremías 15:16

Quëma nontohuatancora, paꞌyátërahuë natanaꞌhuasoꞌ. Huaꞌanëntëranco niꞌton, quëma nanamën acapacancamiatërinco. Quëmaso Sinioro Yosënquën, yaꞌipi nanitaparan.

Habacuc 2:13

Natanco shaꞌhuichinquëmaꞌ: Caso Sinioroco yaꞌipi nanitaparahuë. Ca nohuanton sacatatoma canotëramasoꞌ, topinan quëran nisarin. Pëni yaꞌipi ahuiquitapon.

Mateo 17:5

Nonaquëyaꞌ, chitorori imotërin. Huënaráchin huënaráchin ninin. Chitoroꞌ huáncana quëran Yosëri shaꞌhuitërin: “Isosoꞌ ca huiꞌnahuë, naꞌcon nosororahuësoꞌ. Nóya niꞌnahuë. Ina noya natancoꞌ,” itërin.

Mateo 25:46

Parisitopiquë paꞌsahuatonaꞌ, inaquë yaꞌhuëmiatapi huachi. Noya nipisopitaso nipirinhuëꞌ, Yosë pochin nanpimiatapi huachi,” itërin Quisosori.

Mateo 3:17

Naporoꞌ inápa quëran Yosë noninsoꞌ natanpi. —Isosoꞌ ca huiꞌnahuë chachin, naꞌcon nosororahuësoꞌ. Noya niꞌnahuë, tënin.

Mateo 6:19

Ina quëran itaantarin: “Ama iyaroꞌsaꞌ maꞌsharáchin yonquicosohuëꞌ. Ama naꞌcon coriqui, maꞌsha, inapita yontoncosohuëꞌ. Isoroꞌpaquë yaꞌipi maꞌsha aꞌnaroáchin mocarin, chanatërin. Noꞌsoni pëꞌyarin. Chiꞌchirotërin. Ihuatëroꞌsaꞌ yaꞌconatonaꞌ, ihuarinënpoaꞌ. Naporin. Napoaton, isoroꞌpaquë yaꞌhuërinsopita co yaꞌhuëmiatërinhuëꞌ.

Mateo 8:20

—Sacaiꞌ imancosoꞌ iyasha, tënahuë. Anashiroꞌsaꞌ, huëꞌëshinantëna yaꞌhuëtopi, inaquë huëꞌëpi. Inairaroꞌsantaꞌ pëꞌpëtëna yaꞌhuëtopi. Caso nipirinhuëꞌ Yosë quëran quëmapico niporahuëꞌ, co pëiꞌ yaꞌhuëtërincohuëꞌ. Paꞌsápato, co yaꞌhuëmiatërahuëꞌ, itërin.

Marcos 1:11

Naporoꞌ inápa quëran Yosëri itapon: “Quëmasoꞌ huiꞌnahuënquën chachin ninan. Naꞌcon nosoroatënquën, noya niꞌnanquën,” itërin.

Marcos 9:7

Naporoꞌ chitorori imotërin. Chitoroꞌ huáncana quëran Yosëri shaꞌhuitërinsoꞌ natanpi. “Isosoꞌ ca huiꞌnahuë, naꞌcon nosororahuësoꞌ. Ina natancoꞌ,” itërin.

Lucas 3:22

Ispirito Santo nëpë pochin nohuaraimarahuaton, Quisoso yaꞌcoancantomiatërin. Naporoꞌ inápa quëran Yosëri itërin: —Quëmasoꞌ huiꞌnahuënquën chachin ninan. Naꞌcon nosoroatënquën, nóya niꞌnanquën, itërin.

Lucas 9:35

Chitoroꞌ huancana quëran Yosëri nontërinsoꞌ natanpi. “Isosoꞌ huiꞌnahuë huayonahuësoꞌ. Ina natancoꞌ,” itërin.

Juan 10:28

Ca nohuanto, nanpimiatapi. Co parisitopiquë paꞌsapihuëꞌ. Noya aꞌpaiarahuë. Co insontaꞌ osërëtarinacohuëꞌ.

Juan 11:42

Nani tahuëri natanatonco, catahuaranco noya nicaꞌhuaso marëꞌ. Quëma chachin isoroꞌpaquë aꞌpaimaranco. Casoꞌ nitotopirahuëꞌ, isopitasoꞌ co nitotopihuëꞌ. Inapita natëinacoso marëꞌ aꞌninquëchin nontaranquën, tënin.

Juan 14:6

—Ca ira pochinco. Yaꞌipiya noꞌtëquën aꞌchintëranquëmaꞌ. Casáchin nanpicasoꞌ quëtëranquëmaꞌ. Imaramacosopitarachin Yosëꞌpaꞌ cancontaramaꞌ.

Juan 15:24

Naꞌa piyapiꞌsaꞌ aꞌnaroáchin anoyatërahuë. Nani maꞌsha Yosë pochin ninahuë. Aꞌnapita piyapiꞌsasoꞌ co nanitapapihuëꞌ. Yosë anohuitaꞌhuaso marëꞌ sacaiꞌ nininsoꞌ aꞌnotërahuë. Co aꞌnotërahuëꞌ naporini, co ina marëꞌ oshahuaintonahuëꞌ. Nani nicaponaracohuëꞌ, noꞌhuirinaco. Tata Yosëntaꞌ noꞌhuipi.

Juan 17:2

Nani chiníquën nanan quëtëranco yaꞌipi piyapiꞌsaꞌ huaꞌanëntaꞌhuaso marëꞌ. Quëma nohuanton, aꞌnaquën imasarinaco. Inapitasoꞌ anoyacancantërahuë quëma nohuitatënën nanpimiatacaiso marëꞌ.

Juan 3:15

Natëhuatamaco, Yosë nohuitatomaꞌ, nanpimiataramaꞌ. Ina marëꞌ achinpiarinaco, itërin Quisosori.

Juan 3:33

Aꞌnaquënpoaso nipirinhuëꞌ natëtërëhuaꞌ. “Yosë noꞌtëquën nonin. Inari aꞌpaimarin,” taꞌtëhuaꞌ, natëtërëhuaꞌ.

Juan 6:40

“Quëmasoꞌ tëhuënchachin Yosë huiꞌninquën,” itatomaco imapatamaco, Yosë nohuitatomaꞌ nanpimiatarama huachi. Ayaroꞌ tahuëri ananpitaantaranquëmaꞌ. Ina Yosë nohuantërin, itërin Quisosori.

Juan 6:47

Noꞌtëquën shaꞌhuitëranquëmaꞌ. Imapatamaco, Yosë nohuitatomaꞌ nanpimiataramaꞌ.

Juan 6:51

Ca nanpirin cosharo pochinco. Inápa quëran oꞌmato, noya noya ananpiaranquëmaꞌ. Ca nonëhuë chachin quëtarahuë yaꞌipi piyapiꞌsa marëꞌ. Coshatëramaso pochin nitohuatamaco, yaꞌcoancantaranquëmaꞌ, nanpimiatarama huachi, itërin.

Juan 6:53

—Noꞌtëquën itëranquëmaꞌ. Casoꞌ Yosë quëran quëmapico niꞌto, yaꞌipi cancanëma quëran yonquico. Coꞌsoꞌ nonëhuë caꞌnëso pochin nitohuatamahuëꞌ, huënainëhuëntaꞌ co oꞌorëso pochin nitohuatamahuëꞌ, co onporontaꞌ nanpimiataramahuëꞌ.

Juan 6:54

Insosona nonëhuë caꞌnëso pochin nipachinaꞌ, huënainëhuëntaꞌ oꞌorëso pochin nipachinaꞌ, nanpimiatarin. Ayaroꞌ tahuëri ananpitaantarahuë.

Juan 6:58

Ca cosharo pochinco. Inápa quëran oꞌmarahuë. Shimashonëmapita cosharoꞌ Yosëri aꞌpatimarinsoꞌ caꞌpirinahuëꞌ, iráca chiminpi. Nipirinhuëꞌ, imamiatohuatamaco, nanpimiataramaꞌ, itërin.

Juan 6:62

Yosë quëran quëmapico niꞌto, aꞌna tahuëri Yosë yaꞌhuërinꞌpaꞌ panantararahuë. Ina niꞌpatamaꞌ ¿maꞌtaꞌ yonquiaramaꞌ?

Juan 6:68

—Co Sinioro aꞌpoarainquënhuëꞌ. Co aꞌna yaꞌhuërinhuëꞌ imacaꞌhuaisoꞌ. Quëma nóya aꞌchintarancoi Yosë nohuitatoi nanpimiataꞌhuaiso marëꞌ.

Juan 8:18

Carinquëmaꞌ nani shaꞌhuitaranquëmaꞌ. Tatahuëntaꞌ inachachin anitotarinquëmaꞌ. Ina aꞌpaimarinco, itërin Quisosori.

Hechos 10:38

Ina piquëran Yosëri chachin Quisocristo acorin, Nasaritoquë yaꞌhuërinsoꞌ. Yosë nohuanton, Ispirito Santori noyá yaꞌcoancantërin. Napoaton nani maꞌsha nanitaparin nicacasoꞌ. Nisha nisha parti paaton, nóya ninin. Naꞌa caniaꞌpiroꞌsaꞌ aꞌnaroáchin anoyatërin. Aꞌnaquën sopairi yaꞌcoancantërin niꞌton, chiníquën parisitopirinahuëꞌ, inari anoyatërin. Yosëri catahuarin niꞌton, aꞌnaroáchin anoyatërin.

Hechos 2:22

Natanco iyaroꞌsaꞌ. Canpitantaꞌ israiroꞌsanquëmaꞌ niꞌton, Yosë nanamën anitotarinquëmaꞌ. Quisoso naporinsoꞌ shaꞌhuichinquëmaꞌ, nitotocoꞌ. Inasoꞌ Nasaritoquë yaꞌhuërin. Nani maꞌsha nanitaparin. Piyapi aꞌnaroáchin anoyatërin. Co ina pochin niꞌchinëhuahuëꞌ. Yosëri catahuarin niꞌton, naporin. Napoaton: ‘Tëhuënchachin Yosë quëran oꞌmarin,’ topi. Canpitantaꞌ nicatomaꞌ, nitotëramaꞌ.

Romanos 4:11

Yosë natërin niꞌton, inari noya niꞌnin. Coꞌhuara marca niacochatërasohuëꞌ, piyapinën pochachin niꞌnin. Ina piquëran marca niacotërin imarinsoꞌ anitotacaso marëꞌ. “Noꞌtëquën nontërinco,” topachina, noya niꞌnin. Nisha piyapiꞌsantaꞌ ina pochachin natëtohuachinara, Apraan pochin cancantopi. Co marca niacotopirinahuëꞌ, Apraan huiꞌninpita pochin nipi.

Romanos 6:23

Piyapi asacatohuatëra, pahuërërëꞌ. Inapochachin co noyahuëꞌ nipatëhuaꞌ, chiminpatëhuaꞌ parisitomiatarihuaꞌ. Yosëso nipirinhuëꞌ, inaora nohuanton nosororinpoaꞌ. Quisocristo imapatëhuaꞌ, ina nohuitatëhuaꞌ, nanpimiatarihua. Inasoꞌ huaꞌanënpoaꞌ. Inasáchin natërëhuaꞌ.

1 Corintios 6:13

Aꞌnaquën napopi: “Cosharoꞌ yaꞌhuërin anpopitë marëꞌ. Anpopitëntaꞌ yaꞌhuërin cosharo marëꞌ,” topi. Inaso nipirinhuëꞌ, aꞌna tahuëri Yosë nohuanton, cosharoꞌ, anpopitëꞌ, inapita taꞌhuantarin. Niꞌton, co coshatërëhuaso marëꞌ oshahuanëhuahuëꞌ. Napoaponahuëꞌ, monshihuanacasoꞌ paꞌpi co noyahuëꞌ. Co Yosë nohuantërinhuëꞌ monshihuanacasoꞌ. Co ina marëꞌ nonënpoaꞌ acotërinpoahuëꞌ. Sinioro natëcaso marëꞌ acotërinpoaꞌ. Nonënpoantaꞌ nichaꞌërin.

1 Corintios 9:2

“Co Quisocristo chachin acorinquënhuëꞌ,” itërinaco aꞌnaquën. Canpitaso nipirinhuëꞌ co napotaramacohuëꞌ. Aꞌchintohuatënquëmara, Quisocristo imaramaꞌ niꞌton, acorincosoꞌ nitotëramaꞌ.

2 Corintios 4:18

Isoroꞌpaquë yaꞌhuërinsopita co naꞌcon naꞌcon yonquirëhuahuëꞌ. Iporasoꞌ parisitarihuarahuëꞌ, co ina marëꞌ sëtarihuahuëꞌ. Yosë naꞌcon naꞌcon yonquiarëhuaꞌ. Ina nohuitacasoáchin cancantarihuaꞌ. Isoroꞌpaquë yaꞌhuërinsopita quënanpirëhuahuëꞌ, co yaꞌhuëmiatarinhuëꞌ. Taꞌhuantarin. Yosë noya yonquirinpoasosoꞌ co quënanpirëhuahuëꞌ, yaꞌhuëmiatarin.

Gálatas 5:6

Quisocristo imapatëhuaꞌ, co marca yonquiarihuahuëꞌ. Aꞌnaquënsoꞌ nani niacotopi. Aꞌnaquënso nipirinhuëꞌ co niacotopihuëꞌ. Co ina yonquicasoꞌ yaꞌhuërinhuëꞌ. Cancanënpoa quëran huarëꞌ imacasoꞌ yaꞌhuërin. “Quisocristo catahuarinpoaꞌ. Co nonpintarinpoahuëꞌ,” taꞌtëhuaꞌ, yaꞌipi cancanënpoa quëran natëahuaꞌ. Ina natëhuatëhuaꞌ, catahuarinpoaꞌ nóya ninosorocasoꞌ. Ina pochin cancantohuatëhuaꞌ, Yosë noya niꞌsarinpoaꞌ.

Deuteronomio 30:13

Co marë aquëtëran yaꞌhuëarinhuëꞌ. Napoaton: ‘¡Canpoanta natëcaso marëꞌ marë aquëtëran macontarahuatona anitochinënpoaꞌ!’ Co taꞌcaso yaꞌhuërinhuëꞌ.

Filipenses 2:13

Co noyahuëꞌ cancantatomaꞌ, co canpitaora nanitëramahuëꞌ Yosë natëcamasoꞌ. Nipirinhuëꞌ, Yosë nontohuatamaꞌ, catahuarinquëmaꞌ nohuantacasoꞌ. Ina quëran Yosë yanatëhuatamaꞌ, inari chachin catahuarinquëmaꞌ noꞌtëquën natëcamasoꞌ. Inasoꞌ noya noya ayonquiarinquëmaꞌ.

Colosenses 1:29

Ina marëꞌ paꞌsápato, aꞌchinárahuë. Quisocristo chachin catahuarinco. Achinicancaninco niꞌton, chiníquën cancantato aꞌchinárahuë.

Colosenses 2:22

Co ina pochin Yosë pënëninpoahuëꞌ. Cosharoꞌ, maꞌsha, inapitasoꞌ co yaꞌhuëmiatërinhuëꞌ. Aꞌna tahuëri taꞌhuantarin niꞌton, co inapitasoꞌ aquëtëꞌ Yosë yonquirinhuëꞌ. Piyapiꞌsaꞌ inahuara yonquinëna quëran ina pochin nipënënpi.

Colosenses 3:2

Ama maꞌsharáchin yonquicosohuëꞌ. Yosëꞌpaꞌ yaꞌhuërinsopita yonquirácoꞌ.

2 Timoteo 2:19

Yosë nanamënso nipirinhuëꞌ yaꞌhuárin, Yosë chachin acorinsoꞌ. Natëricho pëiꞌ achinirinsoꞌ pochin niꞌton, yaꞌhuëmiatarin. Cato quëran chachin ninshitopi. “Yaꞌipi imapisopita Yosëri nohuitërin,” tënin. “Quisocristo imapisopita nóya cancanchinaꞌ. Yaꞌipi co noyahuëꞌ yonquipisopita nanianchinaꞌ,” tënin antaꞌ.

Hebreos 12:16

Niꞌcona nisha nisha cancantotamaꞌ. Ama monshihuancosohuëꞌ. Noyápiachin cancantocoꞌ. Ama maꞌsha yonquiatomaꞌ, Yosë naniantocosohuëꞌ. Isao iráca naporinsoꞌ yonquicoꞌ. Maꞌsharáchin yonquiaton, co onpopinchin Yosë yonquirinhuëꞌ. Tanaton, iin nontërin: “¿Yosë naꞌcon catahuainquënsoꞌ nohuantëran ti? Co casoꞌ ina yonquirahuëꞌ. Cosharoꞌ naꞌcon naꞌcon nohuantërahuë,” itërin.

Hebreos 4:11

Napoaton naꞌcon yonquiaꞌahuaꞌ Yosë huëntonënquë yaꞌconacaso marëꞌ. Iráca co natëtonahuëꞌ, co imamiatopihuëꞌ. Ama inapita pochin cancantahuasohuëꞌ.

Santiago 1:11

Niꞌcoꞌ. Piꞌi chiníquën picatohuachina, papotërinsoꞌ aꞌnaroáchin ahuirin. Yanconëontaꞌ anotohuachina, co huachi noyápiachin nininhuëꞌ. Ahuirin huachi. Inapochachin maꞌhuanoꞌsantaꞌ aꞌna tahuëri chiminapi antaꞌ. Sacatápirinahuëꞌ, chiminaponaꞌ. Nani maꞌsha yaꞌhuëtopirinahuëꞌ, patapi.

1 Pedro 1:24

“Panpatëroꞌ aꞌnaroáchin ahuirin. Inapochachin canpoantaꞌ chiminarihuaꞌ. Yancoroꞌsantaꞌ noyápiachin nipirinhuëꞌ, aꞌnaroáchin ahuihuachina, nohuatërin. Inapochachin nani maꞌsha niꞌnëhuasopita taꞌhuantarin antaꞌ.

2 Pedro 1:17

Quisocristoroꞌcoi aꞌna motopiꞌpaꞌ paꞌnai. Inaquë Yosë nohuanton, huënaráchin huënaráchin yaꞌnorin, niꞌnai. Naporo chachin inápa quëran Tata Yosë noninso natanai: “Isosoꞌ huiꞌnahuë, nosororahuësoꞌ. Nóya niꞌnahuë,” tënin. Yosë nohuanton, inaquë quënanatoi, natanai. Inapotatoncoi, Quisocristo chiníquën nanantërinsoꞌ anitotërincoi.