Juan 5:44 - Chayahuita (Shahui)

⁴⁴ Canpita capini nipaꞌyatacasoráchin yonquiatomaꞌ, co Yosë noya nicainquëmasoꞌ yonquiramahuëꞌ. Napoaton co natëramacohuëꞌ.

Juan 5:44 ပူးပေါင်းရင်းမြစ်များ

Mateo 23:5

Piꞌpian Yosë quiricanën ninshitahuatonaꞌ, tëꞌyainaquë achinpipi piyapiꞌsari nicacaiso marëꞌ. Naporahuatonaꞌ, naporopi aꞌmopi nohuitacaiso marëꞌ. ‘Inapohuatëhuaꞌ, piyapiꞌsaꞌ noya niꞌsarinënpoaꞌ,’ taꞌtonaꞌ, napopi. Napoaponaraihuëꞌ, co aquëtëꞌ Yosë yonquipihuëꞌ.

Lucas 19:17

‘Ma noya sacatëran. Natëranco niꞌquëhuarëꞌ, huaꞌan acoꞌinquën. Shonca ninanoroꞌsaꞌ huaꞌanëntaran,’ itërin.

Juan 12:43

Yosëáchin paꞌyatacaiso nipirinhuëꞌ, piyapiꞌsari paꞌyatacaisoꞌ naꞌcon naꞌcon nohuantatona napopi.

Juan 17:3

Quëmasáchin Yosënquën. Isoroꞌpaquë aꞌpaimaranco. Piyapiꞌsaꞌ nohuitahuatënënquën, cantaꞌ nohuitohuachinaco, nanpimiatapi.

Juan 3:20

Co noyahuëꞌ nipisopita co tahuëri pochin nininsoꞌ nohuantopihuëꞌ. Aꞌpininquë aꞌninquëchin huanicaisoꞌ co nohuantopihuëꞌ. Tahuëri nipachina, maꞌsha co noya nipisohuëꞌ quënanëꞌ.

Juan 5:41

Co canpita noya nicamacoso marëꞌ napotëranquëmahuëꞌ.

Juan 8:43

Aꞌchintopiranquëmahuëꞌ, ¿onpoatomataꞌ co natanamacohuëꞌ? Co natëtochináchinhuëꞌ cancantëramaꞌ niꞌton, co nanitëramahuëꞌ natanamacosoꞌ tënahuë.

Romanos 2:10

Noya nipisopitaso nipirinhuëꞌ, noya niꞌsarin. Noya noya acorarin. Asanocancanarin. Cotioroꞌsaꞌ noꞌtëquën chachin napotarin. Nisha piyapiꞌsantaꞌ inapochachin nitarin. Yaꞌipinpoaꞌ noya nipatëhuaꞌ, nichaꞌësarinpoaꞌ.

Romanos 2:29

Yaꞌipi cancanënpoa quëran Yosë imapatëhuaꞌ, tëhuënchachin piyapinënpita pochin niꞌsarinpoaꞌ. Marcanën cancanënpoaquë acotërinpoaꞌ. Co nonënpoaquë acotërinpoahuëꞌ. Ispirito Santo anoyacancantërinpoaꞌ. Ina quëran noya niꞌninpoaꞌ. Co piyapiꞌsaꞌ paꞌyatopirinënpoahuëꞌ, Yosësoꞌ noya niꞌsarinpoaꞌ.

Romanos 2:7

Noyasáchin nipatëhuaꞌ, noya niꞌsarinpoaꞌ. Yosë yonquiatëhuaꞌ, noya acoinpoaso marëꞌ naꞌcon nohuantohuatëhuaꞌ, ananpitaantarinpoaꞌ. Inarëꞌquënpoaꞌ yaꞌhuëmiatarihuaꞌ.

1 Corintios 4:5

Napoaton iporasoꞌ ama nishaꞌhuirapiahuasohuëꞌ. Aꞌna tahuëri Sinioro oꞌmantahuachin, yaꞌipi piyapinpoaꞌ tëniarinpoaꞌ. Yaꞌipi ninëhuasopita anitotarinpoaꞌ. Poꞌoana quëran ninëhuasopitantaꞌ aꞌninquëchin shaꞌhuitarinpoaꞌ. Yonquirëhuasopitantaꞌ nitotërin. Maꞌmarësona tërantaꞌ naporëhuasoꞌ anitotarinpoaꞌ. Naporoꞌ yaꞌipinpoaꞌ noꞌtëquën nontarinpoaꞌ. Noya nipatëhuaꞌ, noya niꞌsarinpoaꞌ.

2 Corintios 10:18

“Casoꞌ noyaco,” topatëhuaꞌ, co ina marëꞌ Yosë noya niꞌsarinpoahuëꞌ. Noya cancantohuatëhuaꞌ, Yosë noya niꞌsarinpoaꞌ. Ina naꞌcon naꞌcon yonquiaꞌahuaꞌ.

Filipenses 2:3

Aꞌnaquën chiníquën nanan nohuantopi. Inasáchin yonquiatonaꞌ, aꞌnapita nocanpi. “Casoꞌ noya noyaco,” topi yonquinëna quëran. Canpitaso nipirinhuëꞌ ama ina pochin cancantocosohuëꞌ. Aꞌnapita noya noya niꞌcoꞌ.

1 Tesalonicenses 2:6

Co piyapiꞌsaꞌ noya nicainacoisoꞌ yonquiatoi aꞌchinaihuëꞌ.

1 Timoteo 1:17

Napoaton Yosëíchin natëahuaꞌ. Nani tahuëriya: “¡Ma noyacha Yosëso paya!” itahuaꞌ. Inasoꞌ co onporontaꞌ taꞌhuantaponhuëꞌ. Co quënanpirëhuahuëꞌ, huaꞌanëntomiatërinpoaꞌ. Inaíchin chinotacasoꞌ yaꞌhuërin. Ama onporontaꞌ ina naniantahuasohuëꞌ. Amen.

Hebreos 3:12

Canpitantaꞌ iyaroꞌsaꞌ aꞌnayanquëma tërantaꞌ co cancanëma quëran huarëꞌ natëhuatamahuëꞌ, co noya cancantaramahuëꞌ. Niꞌcona Yosë chachin aꞌpotamaꞌ. Inasoꞌ, iporahuantaꞌ nanpiton niꞌsárinpoaꞌ.

Santiago 2:1

Quisocristo huaꞌanëntërinpoaꞌ. Inasáchin noya noya ninin. Ina imaramaꞌ niꞌton, ama iyaroꞌsaꞌ aꞌnapita nocancosohuëꞌ. Yaꞌipi piyapiꞌsaꞌ napopináchin nosorocoꞌ.

1 Pedro 1:7

Maꞌsha onpohuatëhuaꞌ, Yosë catahuararinpoaꞌ yaꞌipi cancanënpoa quëran imacaso marëꞌ. Oro tapacaiso marëꞌ aꞌirotopiso pochin nitarinpoaꞌ. Oro inapotohuachinara, noyápiachin pipirin. Yaꞌipi nëꞌhuë huiquitahuaton, orosachin ninin. Inapochachin iporasoꞌ Yosë nohuanton, pënquë ahuiquitërëso pochin maꞌsha onpotërinpoaꞌ noya noya acoinpoaso marëꞌ. Oro paꞌton niponahuëꞌ, co yaꞌhuëmiatërinhuëꞌ. Canpoaso nipirinhuëꞌ, Yosë natëhuatëhuaꞌ, nanpimiatarihuaꞌ. Napoaton naꞌcon yonquiaꞌahuaꞌ cancanënpoa quëran huarëꞌ natëcasoꞌ. Ina Yosë nohuantërinsoꞌ. Natëmiatohuatëhuaꞌ, Yosë noya noya niꞌsarinpoaꞌ. Quisocristo oꞌmantahuachin, noya noya acorarinpoaꞌ. Ina pochin yaꞌnoarihuaꞌ.

1 Samuel 15:30

Napotohuachina Saono taantarin: —Caso oshahuanahuë. Napopirahuëꞌ, onpopiontaꞌ, ansianoꞌsaꞌ, aꞌnapita israiroꞌsaꞌ, inapita niꞌtonënquë noya niꞌcoꞌ. Noya nicatonco natëco. Napoaton carëꞌquën Sinioro chinotacaso marëꞌ panantaꞌa. Inasoꞌ Yosë quëmari chinotëransoꞌ, itërin.

1 Samuel 2:30

Napoaton Sinioro israiroꞌsanpoa chinotërëhuaso naporin: ‘Nani yonquipirahuë piyapinëhuënquën nisápamasoꞌ. Quëmá quëran pipipisopitantaꞌ, inapoꞌina topirahuë. Iporaso nipirinhuëꞌ shaꞌhuitaranquën: Co onporo napocamaso yaꞌhuërinhuëꞌ. Noya niꞌninacosopita tëhuënchinsoꞌ, carinta noya niꞌsarahuë. Nocaninacopitaso nipirinhuëꞌ, atapamiatarahuëꞌ. Ca Sinioroco napotaranquëmaꞌ.