Juan 5:23 - Chayahuita (Shahui)

²³ Ina quëran yaꞌipi piyapiꞌsaꞌ noya niꞌsarinaco. Tatahuë noya niꞌpiso pochachin niꞌsarinaco. Ina marëꞌ nanan quëtërinco. Co noya niꞌpatamacohuëꞌ, Tatahuëntaꞌ co noya niꞌnamahuëꞌ. Ina aꞌpaimarinco.

Juan 5:23 ပူးပေါင်းရင်းမြစ်များ

Salmos 2:12

Isonama quëran huiꞌnin chinotocoꞌ. Inapotatomaꞌ, apinorantëcoꞌ. Coꞌhuara noꞌhuiyátërasënquëmahuëꞌ, inapocoꞌ. Noꞌhuihuachinquëmasoꞌ, pahuayanpiramahuëꞌ chiminaramaꞌ. Coꞌsoꞌ chinotohuatamahuëꞌ, aꞌnanaya inaso noꞌhuiarinquëmaꞌ. Ina natëtoma chinotohuatamaso nipirinhuëꞌ, tëhuënchachin noya cancantaramaꞌ.

Isaías 42:8

Ina quëran Sinioro taantarin: “Caso Sinioroco. Ina mini nininëhuë. Casáchin noya noyaco niꞌton, paꞌyatiinacoso yaꞌhuërin. Co mamanshiroꞌsasoꞌ noya nicatona natëcaiso yaꞌhuërinhuëꞌ.

Isaías 44:6

Siniorosoꞌ yaꞌipi nanitaparin. Inasoꞌ, israiroꞌsa nichaꞌësahuaton huaꞌanëntërin. Ina nontatënquëma naporin: “Coꞌhuara isoroꞌpaꞌ yaꞌhuëyátërasohuëꞌ, caꞌton yaꞌhuërahuë. Nani maꞌsha yaꞌhuërinsopita taꞌhuantopiriontaꞌ, caso yaꞌhuëápo. Casáchin Yosëco.

Isaías 45:15

Sinioro quëmasoꞌ, co aꞌninquëchin yaꞌnoranhuëꞌ. Napoaponahuëꞌ, israiroꞌsacoi nichaꞌërancoi.

Isaías 45:21

Huëco paꞌahua coisëquë. Noꞌtëquën yonquihuatamaꞌ, aꞌpaniaramaco: ¿Inta caniaritërin quëran maꞌpitaso onpocasoꞌ nani shaꞌhuirin? ¿Inta iráca quëran huarëꞌ inapita shaꞌhuirin? Ca mini Sinioroco niꞌto, inapita nani shaꞌhuirahuë. Co aꞌna Yosë ca pochin yaꞌhuërinhuëꞌ. Casáchin noꞌtëquën yonquirahuë. Casáchin nanitërahuë minsëtato nichaꞌëtaꞌhuasoꞌ.

Zacarías 9:9

Sinioro chachin naporin: “Sion motopiaꞌhuaquë yaꞌhuëramasopita, capa cancantomiatocoꞌ. Quirosarinquë yaꞌhuëramasopitantaꞌ, capa cancantatoma cantacoꞌ. Niꞌcoꞌ. Copirnonëma huëꞌsarin. Inaso noyasáchin ninin. Yaꞌipi inimicoroꞌsa minsërin. Ina niponahuëꞌ, topinan piyapi pochin mora huiꞌnapishinquë yaꞌmitëahuaton, huëꞌsarin.

Mateo 10:37

Yaimapatamaco, ca naꞌcon naꞌcon nosoroco. Tatamaꞌ, mamamaꞌ, huiꞌnamaꞌ inapita co onpopinchin nosorocasoꞌ yaꞌhuërinhuëꞌ. Co naꞌcon naꞌcon nosorohuatamacohuëꞌ, co tëhuënchachin imaramacohuëꞌ tënahuë.

Mateo 11:27

Ina quëran piyapiꞌsaꞌ aꞌchintantarin. “Tata Yosë nohuanton, pënëntarahuë. Yaꞌipi nanamën anitotërinco piyapiꞌsaꞌ aꞌchintacaꞌhuaso marëꞌ. Huiꞌninco niꞌton, inasáchin noya nohuitërinco. Inapochachin Tata Yosë nohuitërahuë. Casáchin noya nohuitërahuë. Aꞌnaquëontaꞌ cari anohuitohuato, nohuitapi antaꞌ.

Mateo 12:21

Nisha nisha piyapiꞌsari natanahuatonaꞌ: ‘Inasáchin nichaꞌësarinpoaꞌ,’ tosapi huachi,” tënin Yosë quiricanënquë. Iráca Isaiasë ninorinso chachin nanirin niꞌton, Quisosori sanoanan quëran piyapiꞌsaꞌ pënënarin.

Mateo 15:8

Yosë naporin: “Isopita piyapiꞌsaꞌ nanamëna quëran noya nontopirinacohuëꞌ, co cancanëna quëran imarinacohuëꞌ. Co ca pochin cancantopihuëꞌ.

Mateo 28:19

Napoaton canpita paatomaꞌ, yaꞌipi piyapiꞌsaꞌ aꞌchintocoꞌ. Nisha nisha nananquë nonpisopita aꞌchintocoꞌ imainaco. Insosona natëhuachinaco, iꞌquë aporintocoꞌ. “Tata Yosë, Huiꞌnin, Ispirito Santo inapita nanan quëtërincoi niꞌton, aporintaranquën,” itahuatomaꞌ, aporintocoꞌ.

Lucas 10:16

Ina quëran yaaꞌparinsopita itaantarin: “Iporasoꞌ pënëntacamaso marëꞌ aꞌpararanquëmaꞌ. Ca yaꞌhuërënamëhuë pënëntaramaꞌ. Noya natanpachinquëmaꞌ, natanarinaco cantaꞌ. Coꞌsoꞌ nohuantohuachinënquëmahuëꞌ, co cantaꞌ nohuantarinacohuëꞌ. Co nohuantohuachinacohuëꞌ, co Yosëntaꞌ nohuantapihuëꞌ,” itërin Quisosori. Itohuachina, paꞌpi huachi. Nisha nisha ninanoquë pënëntëraꞌpiapi.

Juan 14:1

Ina quëran aꞌchintaantarin: “Ama paꞌyancosohuëꞌ. Ama sëtocosohuëꞌ. Yosë natëcoꞌ. Cantaꞌ natëco. ‘Co naniantarincoihuëꞌ,’ taꞌtomaꞌ, nani tahuëri natëco.

Juan 16:14

Ca nonahuëso chachin aꞌchintarinquëmaꞌ niꞌton, noya noya niꞌsaramaco.

Juan 17:10

Yaꞌipi imarinacosopita imarinënquën quëmantaꞌ. Quëmari huiꞌnanpita pochin cancantëran. Napopianachin imarinënpoꞌ. Noya natërinaco niꞌton, piyapiꞌsaꞌ noya niꞌsarinaco.

Romanos 1:7

Napoaton Nomaquë yaꞌhuëramasopita ninshitaranquëmaꞌ. Yosë paꞌpi nosororinquëmaꞌ. Nani acorinquëmaꞌ piyapinënpita nicacamasoꞌ. Niꞌton, inasáchin yonquicasoꞌ yaꞌhuërin. Tata Yosë inaora nohuanton, catahuainquëmaꞌ. Asanocancainquëmaꞌ. Quisocristontaꞌ inapochachin catahuainquëmaꞌ. Inasoꞌ huaꞌanëntërinpoaꞌ.

Romanos 15:12

Isaiasëntaꞌ Quisocristo ninoton, ninshitërin. “Aꞌna tahuëri Quisi shiin nasitimapon. Cotio piyapi niponahuëꞌ, mashotohuachin, yaꞌipi piyapiꞌsaꞌ huaꞌanëntarin. Nisha nisha piyapiꞌsarintaꞌ ina natëtonaꞌ, ninarapi,” tënin.

Romanos 6:22

Iporaso nipirinhuëꞌ co huachi oshanëma huaꞌanëntërinquëmahuëꞌ. Yosë nichaꞌërinquëmaꞌ ama huachi oshahuanacamaso marëhuëꞌ. Ina chachin huaꞌanëntërinquëmaꞌ. Napoaton noyápiachin cancantaramaꞌ. Aꞌna tahuëri Yosëꞌpaꞌ nanpimiataramaꞌ.

Romanos 8:9

Canpitaso nipirinhuëꞌ co noyahuëꞌ yonquiramasopita naniantëramaꞌ. Ispirito Santo yaꞌcoancantohuachinquëmaꞌ, ina nohuantërinsoꞌ nisaramaꞌ. Co Ispirito Santo yaꞌcoancantohuachinquëmahuëꞌ, co tëhuënchachin Quisocristo imaramahuëꞌ.

1 Corintios 1:3

Inaora nohuanton, Tata Yosë catahuainquëmaꞌ. Asanocancainquëmaꞌ. Sinioro Quisocristontaꞌ inachachin catahuainquëmaꞌ.

1 Corintios 10:31

Maꞌsona tërantaꞌ nipatamaꞌ, Yosë yonquiatomaꞌ, noya nicoꞌ aꞌnapitantaꞌ Yosë noya yonquicaiso marëꞌ. Napoaton coshatohuatamaꞌ, oꞌopatamaꞌ, maꞌsona tërantaꞌ nipatamaꞌ, ina yonquicoꞌ.

1 Corintios 16:22

Insosona co Sinioro Quisocristo nosorohuachinhuëꞌ, Yosëri anaꞌinchin. ¡Aꞌnaroáchin Sinioro oꞌmantaquëꞌ! tënahuë.

1 Corintios 6:19

Quisocristo imapatëhuaꞌ, Ispirito Santo yaꞌcoancantërinpoaꞌ. Nani ina nitotëramaꞌ. Yosë aꞌpatimarinpoaꞌ niꞌton, cancanënpoaquë chachin yaꞌhuërarin. Napoaton co huachi canpoara nohuantërëhuasopita nicacasoꞌ yaꞌhuërinhuëꞌ. Yosë chachin huaꞌanëntërinpoaꞌ.

2 Corintios 1:9

“Chiminapoi nimara,” topiraihuëꞌ, co chiminaihuëꞌ. Yosë nohuanton, maꞌsha onporai ina naꞌcon naꞌcon yonquicaꞌhuaiso marëꞌ. Napoaton “Quiyaora nanitërai,” co tënaihuëꞌ. “Catahuacoi Sinioro, co quiyasoꞌ nanitëraihuëꞌ,” itërai. Yosëíchin yaꞌipi nanitaparin. Chiminpisopitantaꞌ ananpitaantarin, tënai.

2 Corintios 13:14

Inaora nohuanton, Sinioro Quisocristo catahuainquëmaꞌ. Tata Yosë nosoroꞌinquëmaꞌ. Ispirito Santo chachin nani tahuëri noya ayonquiinquëmaꞌ. Nani huachi. Paono

2 Corintios 5:14

“Quisocristo naꞌcon nosororinpoaꞌ,” taꞌtoi, nanamën aꞌchinárai. Canpoa marëꞌ inasoꞌ chiminin. Ina imapatëhuaꞌ, canpoantaꞌ chiminëhuaso pochin niꞌninpoaꞌ.

2 Corintios 5:19

Yosë nohuanton, huiꞌnin chiminin anoyacancantinpoaso marëꞌ. Anoyacancantohuachinpoaꞌ, co huachi oshanënpoaꞌ yonquirinhuëꞌ, inquitërinpoa huachi. Nani nanan anoyatohuachinpoara, quiyantaꞌ acorincoi paatoi aꞌnapita shaꞌhuitaꞌhuaiso marëꞌ.

Efesios 6:24

Quisocristo huaꞌanëntarinpoaꞌ. Ina nosoromiatohuatamaꞌ, inaora nohuanton, Yosë noya catahuainquëmaꞌ, tënahuë. Amen. Nani ninshitëranquëma huachi. Paono

2 Timoteo 1:12

Ina marëꞌ aparisitopirinacohuëꞌ, co tapanato yaaꞌporahuëꞌ. Quisocristo imamiatarahuë. Ina nohuitato, inasáchin natërahuë. Yaꞌipi nanitaparin. Nani shaꞌhuitërinco nanamën aꞌchinaꞌhuasoꞌ niꞌton, noya aꞌpaiarinco. Oꞌmantaquë huarëꞌ nanamën yaꞌhuëmiatarin, tënahuë.

Hebreos 1:6

Huiꞌnin chachin nipirinhuëꞌ isoroꞌpaquë aꞌpaimahuachina, chini chiníquën nanan quëtaton, tapon: “Yaꞌipi anquëniroꞌsarintaꞌ ina chinochinaꞌ,” tënin.

2 Pedro 1:1

Ca Simon Pitroco ninshitaranquëmaꞌ, niꞌcoꞌ. ¿Noya yaꞌhuaramaꞌ? Noya cantaꞌ yaꞌhuarahuë. Quisocristoíchin huaꞌanëntërinco niꞌton, inasáchin natërahuë. Ina acorinco nanamën aꞌchinaꞌhuaso marëꞌ. Yosë nohuanton, canpitantaꞌ Quisocristo natëramaꞌ. Quiya pochin imaramaꞌ niꞌton, canpitantaꞌ nichaꞌësarinquëmaꞌ. Ma noyacha Quisocristo anoyacancantërinpoa paya, tënëhuaꞌ. Inasoꞌ Yosë niꞌton, chinotërëhuaꞌ. Oshanënpoaꞌ inquitatonpoaꞌ, nóya niꞌninpoaꞌ. Napopianachin nosororinpoaꞌ niꞌton, catahuarinquëmaꞌ canpitantaꞌ cancanëma quëran huarëꞌ natëcamasoꞌ.

2 Pedro 3:18

Canpitaso nipirinhuëꞌ, Sinioro Quisocristoíchin yonquicoꞌ. Inaora nohuanton, nosororinquëmaꞌ niꞌton, nani tahuëri yacatahuarinquëmaꞌ. Inasáchin yonquihuatamaꞌ, oshaquëran noya noya nohuitaramaꞌ. Inasoꞌ nichaꞌësarinpoaꞌ. Yaꞌipi piyapiꞌsari chinochinaꞌ. Ayaroꞌ tahuëriquë huarëꞌ inasáchin yonquiaꞌahuaꞌ. Amen. Nani ninshitëranquëma huachi. Pitro

1 Juan 2:23

Yosë huiꞌnin aꞌpohuachinaꞌ, co Tata Yosëntaꞌ nohuitapihuëꞌ. “Quisocristosoꞌ Yosë huiꞌnin chachin,” topachinaꞌ, Tata Yosëntaꞌ imasapi.

2 Juan 1:9

Aꞌnaquën co Quisocristo nanamënáchin imapihuëꞌ. “Quiyasoꞌ naꞌcon naꞌcon nitotërai,” toconpi. Inapitasoꞌ co Tata Yosë nohuitapihuëꞌ. Quisocristo nanamën imapatëhuaꞌ, Tata Yosë nohuitarihuaꞌ. Huiꞌniontaꞌ nohuitarihuaꞌ.