Juan 4:48 - Chayahuita (Shahui)

⁴⁸ —Canpitasoꞌ co aꞌnaroáchin natëramacohuëꞌ. Coꞌsoꞌ Yosë pochin nipatohuëꞌ, co natëaramacohuëꞌ, itërin inarintaꞌ.

Juan 4:48 ပူးပေါင်းရင်းမြစ်များ

Daniel 4:2

Yosë chini chiníquën nanantaton napotërincosoꞌ, canpitanta shaꞌhuichinquëmaꞌ. Ina nitotohuatamaꞌ canpitanta catahuaponquëma niꞌton, shaꞌhuitaranquëmaꞌ: ¡Maꞌpitacha inaso ninin paya! Co piyapinpoa nanitaparëhuasohuëꞌ, inaso ninin. Ina huaꞌanëntërinsosoꞌ, yaꞌhuëmiatapon. Onpo shinpoapita huënton yaꞌhuëpirinhuë tërantaꞌ, ina chiníquën nanantërinsosoꞌ, inachachin nisápon.

Daniel 6:27

Inaíchin nichaꞌëtonaꞌpisoꞌ. Isoroꞌpaquë, piꞌiroꞌtëquë, inaquëpita co nanitapacasohuëꞌ nininsopita ninin. Naniri paꞌpiniquë tëꞌyatopiraihuëꞌ, inari nichaꞌërin niꞌton, co manta onpotopihuëꞌ,” tënin ninshitaton.

Números 14:11

Naporoꞌ Siniorori, Moisësë itapon: —¡Maꞌchachinta niꞌtonaꞌ, isopita yánocaninaco! Inapita catahuaꞌhuaso marëꞌ nani maꞌsha sacai nininsopita nipirahuëꞌ, ¡co yanatërinacohuëꞌ!

Mateo 16:1

Ina quëran parisioroꞌsaꞌ, satosioroꞌsaꞌ inapita Quisoso nontacaiso marëꞌ huëꞌpi. Nonpintatonaꞌ, nontopi atëhuëcaiso marëꞌ. “Yosë aꞌpaimahuachinquën, sacaiꞌ nicacaso nininsoꞌ niquëꞌ. Quiyantaꞌ ina nicatoi, natëiinquën,” itiipi.

Mateo 24:24

Naꞌa nonpin nanan pënëntonaꞌpiroꞌsaꞌ huëcaponaꞌ. ‘Casoꞌ Cristoco’ tosapi aꞌnaquën. ‘Casoꞌ ninotonaꞌpico,’ tosapi aꞌnaquëontaꞌ. Sacaiꞌ nininsopita nisapi piyapiꞌsaꞌ nonpintacaiso marëꞌ. Huayoninsopitantaꞌ nonpintochinaichin nisapi.

Mateo 27:42

—Aꞌnapitasoꞌ yanichaꞌëponahuëꞌ, inaora chachinsoꞌ co nanitërinhuëꞌ chaꞌëcasoꞌ. Israiroꞌsaꞌ copirno nipachin, corosë quëran nohuarain nicatëhuaꞌ natëahuaꞌ.

Marcos 13:22

Naꞌa nonpin nanan pënëntonaꞌpiroꞌsa huëcaponaꞌ. ‘Casoꞌ Cristoco,’ tëcaponaꞌ aꞌnaquën. ‘Casoꞌ ninotonaꞌpico,’ tosapi aꞌnaquëontaꞌ. Sacaiꞌ nininsoꞌ nisapi piyapiꞌsaꞌ nonpintacaiso marëꞌ. Niꞌsahuatonaꞌ: ‘Maꞌpitacha nitotërin paya. ¿Yosë quëran oꞌmamara, ti?’ taꞌtonaꞌ, naꞌa piyapiꞌsari imasapi. Yosëri huayoninsopita quëran huarëꞌ nonpintochinaichin nisapi.

Lucas 10:18

Napotohuachinara, Quisosori itërin; —Sopai huaꞌan chachin iráca inápaquë yaꞌhuëpirinhuëꞌ, Yosëri tëꞌyatërin. Oꞌcori pochin aꞌnaroáchin anotërinsoꞌ niꞌnahuë.

Lucas 16:31

‘Co Yosë quiricanën natëhuachinahuëꞌ, chimininsontaꞌ nanpiantapirinhuëꞌ, co onporontaꞌ natëapihuëꞌ,’ itërin Apraani,” tënin Quisoso.

Juan 12:37

Nani naꞌa piyapiꞌsaꞌ aꞌnaroáchin anoyatërin. Cosharoꞌ anaꞌatërin. Yosë pochin nininsoꞌ nicaponaraihuëꞌ, co yanatëpihuëꞌ.

Juan 15:24

Naꞌa piyapiꞌsaꞌ aꞌnaroáchin anoyatërahuë. Nani maꞌsha Yosë pochin ninahuë. Aꞌnapita piyapiꞌsasoꞌ co nanitapapihuëꞌ. Yosë anohuitaꞌhuaso marëꞌ sacaiꞌ nininsoꞌ aꞌnotërahuë. Co aꞌnotërahuëꞌ naporini, co ina marëꞌ oshahuaintonahuëꞌ. Nani nicaponaracohuëꞌ, noꞌhuirinaco. Tata Yosëntaꞌ noꞌhuipi.

Juan 2:18

Ina quëran cotioroꞌsari huëcapaipi. —¿Onpoapontaꞌ huaꞌan pochin nisaran? Chiníquën nanantohuatan, Yosë pochin niquëꞌ quiyantaꞌ nicatoi natëiinquën, itopi.

Juan 20:29

—Niꞌnanco niꞌton iyasha, natëranco. Aꞌnapitasoꞌ co nicaponaracohuëꞌ, natëarinaco. Inapitasoꞌ noya noya cancantapi, itërin Quisosori.

Juan 4:49

—Manóton Sinioro huëquëꞌ. Huiꞌnahuë chiminpachin, itaantarin.

Hechos 14:3

Huaꞌquiꞌ inaquë Paono yacapatërin. Pirnapirë chachin inaquë yaꞌhuëpi. Chiníquën cancantatonaꞌ, Siniorori nosororinsoꞌ shaꞌhuirápi. Noꞌtëquën shaꞌhuipi niꞌton, Siniorori catahuarin caniaꞌpiroꞌsaꞌ aꞌnaroáchin anoyatacaisoꞌ. Ina niꞌsahuatonaꞌ, “Tëhuënchachin Yosë catahuarinquëmaꞌ,” itopi.

Hechos 15:12

Ina natanahuatonaꞌ, “Noꞌtëquën nonin,” taꞌtonaꞌ, taꞌtápi. Ina quëran Pirnapi, Paono, inapitantaꞌ shaꞌhuitantapi: “Iꞌhua paꞌpatoira, Yosë naꞌcon catahuarincoi. Quisoso nanamën shaꞌhuitohuatoira, naꞌa nisha piyapiꞌsari natëpi. Inapitantaꞌ caniohuachinara, Yosë nohuanton, anoyatëraꞌpiarai. Niꞌsahuatonaꞌ, ‘Tëhuënchachin Yosëri catahuarin,’ topi,” tënin Paono.

Hechos 2:19

Inápaquë nani maꞌsha acoarahuë. Piyapiꞌsaꞌ quënanpachinaꞌ, paꞌyanapi. Isoroꞌpaquëntaꞌ, maꞌsha acoarahuë piyapiꞌsaꞌ yonquicaiso marëꞌ. Huënaiꞌ, pën, conaiꞌ tomontarinsoꞌ, inapita niꞌsapi, tënin Yosë.

Hechos 2:22

Natanco iyaroꞌsaꞌ. Canpitantaꞌ israiroꞌsanquëmaꞌ niꞌton, Yosë nanamën anitotarinquëmaꞌ. Quisoso naporinsoꞌ shaꞌhuichinquëmaꞌ, nitotocoꞌ. Inasoꞌ Nasaritoquë yaꞌhuërin. Nani maꞌsha nanitaparin. Piyapi aꞌnaroáchin anoyatërin. Co ina pochin niꞌchinëhuahuëꞌ. Yosëri catahuarin niꞌton, naporin. Napoaton: ‘Tëhuënchachin Yosë quëran oꞌmarin,’ topi. Canpitantaꞌ nicatomaꞌ, nitotëramaꞌ.

Hechos 2:43

Siniorori catahuahuachina, caꞌtanoꞌsaꞌ nani maꞌsha nanitapapi. Naꞌa piyapiꞌsaꞌ aꞌnaroáchin anoyatopi. Yaꞌipi piyapiꞌsari nicatonaꞌ, paꞌyanpi. “Tëhuënchachin Yosëri catahuarin,” topi.

Hechos 4:30

Caniaꞌpiroꞌsantaꞌ quëmari anoyatëquëꞌ. ‘Yosë huiꞌnin chachin nanan quëtërincoi,’ topatoi, catahuacoi piyapiꞌsaꞌ noyachinaꞌ. Ina niꞌpachinaꞌ, yonquiapi huachi,” itopi Yosë nontatonaꞌ.

Hechos 5:12

Naporoꞌ tahuëriꞌsaꞌ Yosë nohuanton, caꞌtanoꞌsaꞌ nani maꞌsha nanitapapi. Naꞌa caniaꞌpiroꞌsaꞌ sëꞌhuarahuatonaꞌ, aꞌnaroáchin anoyatopi. Piyapiꞌsari niꞌpachinara, “Tëhuënchachin Yosëri catahuarin,” topi. Yaꞌipi imapisopita “Saromon ishpananën,” itopiquë niyontonapi.

Hechos 6:8

“Istipansoꞌ nóya pënëntërin,” topi yaꞌipiya. Ispirito Santori catahuarin niꞌton, sacaiꞌ nininsoꞌ nanitaparin. Caniaꞌpi marëꞌ Yosë nontohuachina, aꞌnaroáchin noyatopi. Napoaton: “Tëhuënchachin Yosëri catahuarin,” topi.

Hechos 7:36

Ina quëran Iquipitoquë paantarahuaton, nani maꞌsha Yosë pochin ninin, sacaiꞌ nininsopita. Inapoaton, Iquipito quëran ocoirahuaton, nichaꞌërin. Inapochachin Quëhuai marëquë, inotëro parti inaquëpita Yosë pochin ninin. Catapini shonca piꞌipi inaporin.

Romanos 15:19

Tëhuënchachin Ispirito Santo ananitërinco niꞌton, naꞌa caniaꞌpiroꞌsaꞌ aꞌnaroáchin anoyatërahuë Yosë natëcaiso marëꞌ. Ina niꞌsahuatonaꞌ, natëpi. Ispirito Santori yaꞌcoancantërin niꞌton, imapi. Quirosarinquë aꞌchintërahuë. Ina quëran paꞌsápato, Iriricoquë huarëꞌ Quisocristo nanamën aꞌchintëraꞌpiarahuë. Yaꞌipi parti pënëntërahuë.

1 Corintios 1:22

Cotioroꞌsasoꞌ co yanatëtopihuëꞌ. “Yosë pochin niquëꞌ. Ina niꞌpatoi, natëarainquën,” toconpi. Nisha piyapiꞌsantaꞌ co yanatëtopihuëꞌ. Naꞌcon naꞌcon nitotacasoráchin yonquipi. “Quiyaora yonquinëhuëi quëran nitotarai,” topi.

2 Corintios 12:12

Iráca isoroꞌpaquë nipon, aꞌnaya aꞌnaya huayonaton, acorin nanamën aꞌchinacaiso marëꞌ. Inapitasoꞌ naꞌcon catahuarin. Ina nohuanton, caniaꞌpiroꞌsaꞌ aꞌnaroáchin anoyatopi. Nani maꞌsha nanitapapi. Inapopi quëran acorinsopita nohuitërëhuaꞌ. Cantaꞌ acorinco niꞌton, inapochachin catahuarinco. Canpitataquë yaꞌhuapo, caniaꞌpiroꞌsaꞌ aꞌnaroáchin anoyatërahuë. Aparisitopirinacohuëꞌ, ahuantato, aꞌchintëranquëmaꞌ. “Ma noyacha Yosëri catahuarin paya,” taꞌtomaꞌ, imaramaꞌ.

2 Tesalonicenses 2:9

Nipirinhuëꞌ, coꞌhuara ina oꞌmayatërasohuëꞌ, notohuaroꞌ piyapiꞌsaꞌ nonpintarin. Satanasëri catahuarin niꞌton, nani maꞌsha nanitapaarin nicacasoꞌ. Piyapi inaora co nanitërinhuëꞌ ina pochin nicacasoꞌ. Nonpintaton, nani maꞌsha sacaiꞌ nininsoꞌ aꞌnotohuachina, natërapi. Niꞌpachinaꞌ, paꞌyanapi.

Hebreos 2:4

Yosëri catahuarin niꞌton, caꞌtanoꞌsanënpita nani maꞌsha nanitapapi. Ina nohuanton, Ispirito Santori catahuarin nisha nisha nitotacaiso marëꞌ. Aꞌnaya aꞌnaya catahuarin Yosë nohuantërinsoꞌ nicacaisoꞌ. Aꞌnaquën catahuarin caniaꞌpiroꞌsaꞌ aꞌnaroáchin anoyatacaisoꞌ. Aꞌnaquëontaꞌ catahuarin Yosë yonquirinso chachin nitotacaiso marëꞌ. Ina nicatëhuaꞌ: “¡Ma noyacha Yosëri catahuarin paya! Ina nohuanton, noꞌtëquën Yosë nanamën shaꞌhuitërinënpoaꞌ,” tënëhuaꞌ.