Juan 4:21 - Chayahuita (Shahui)

²¹ —Natanco imoya. Nani tahuëri naniarin. Yosë yachinotohuatamaꞌ, co paso motopiquë paꞌsaramahuëꞌ. Co Quirosarinquë tërantaꞌ pacacaso yaꞌhuërinhuëꞌ.

Juan 4:21 ပူးပေါင်းရင်းမြစ်များ

Isaías 66:1

Naquëranchin Sinioro taantarin: “Piꞌiroꞌtësoꞌ, huaꞌanëntërahuëso shiranëhuë pochin ninin. Isoroꞌpantaꞌ, nantëhuë ayaꞌnanahuëquë pochin ninin. Ina pochin niꞌton, ¡co insëquë tërantaꞌ, pëi nitamacoso marëꞌ nanirinhuëꞌ! ¡Co insëquë tëranta chinotaꞌhuaso marëꞌ nitamacosoꞌ nanitëramahuëꞌ!

Malaquías 1:11

Yaꞌipi isoroꞌpaquë nisha nisha piyapiroꞌsa yaꞌhuëpisoꞌ, noya nicatonaco natërinaco. Inapotatonaco yonarin pochin nininsoꞌ, chinotiinacoso marëꞌ aꞌpëpi. Naporahuaton noya nininsopita maꞌsha quëshirinaco.

Mateo 18:20

Chinotamacoso marëꞌ niyontonpatamaꞌ, canpitaroꞌco yaꞌhuarahuë. Carayanquëma tërantaꞌ niyontonpatamaꞌ, cantaꞌ inaquë yaꞌhuërarahuë,” tënin Quisoso.

Mateo 28:19

Napoaton canpita paatomaꞌ, yaꞌipi piyapiꞌsaꞌ aꞌchintocoꞌ. Nisha nisha nananquë nonpisopita aꞌchintocoꞌ imainaco. Insosona natëhuachinaco, iꞌquë aporintocoꞌ. “Tata Yosë, Huiꞌnin, Ispirito Santo inapita nanan quëtërincoi niꞌton, aporintaranquën,” itahuatomaꞌ, aporintocoꞌ.

Lucas 21:24

Inimicoroꞌsaꞌ huëcatonaꞌ, naꞌa piyapiꞌsaꞌ sahuëniquë tëparapi. Nisha nisha sontaroꞌsari yaꞌhuëpiquë quëparapi asacatacaiso marëꞌ. Nisha piyapiꞌsaꞌ Quirosarinquë yaꞌconahuatonaꞌ, camaitapi. Huaꞌquiꞌ inaquë yaꞌhuaponaꞌ. Tahuërinën nanihuachina, Yosë nohuanton, pipiapi.

Juan 14:6

—Ca ira pochinco. Yaꞌipiya noꞌtëquën aꞌchintëranquëmaꞌ. Casáchin nanpicasoꞌ quëtëranquëmaꞌ. Imaramacosopitarachin Yosëꞌpaꞌ cancontaramaꞌ.

Juan 16:2

Niyontonpiso pëiroꞌsa quëran ocoiarinënquëmaꞌ. Aꞌna tahuëri yatëparinënquëmaꞌ. ‘Co noyahuëꞌ nipi niꞌton, tëpahuatoi, Yosë noya niꞌsarincoi,’ taꞌtonaꞌ, aꞌnaquëmaꞌ tëpaarinënquëmaꞌ.

Juan 16:32

Ipora tashi chachin yaꞌipinquëmaꞌ taꞌananpiaramaco. Yanquëërahuatomaꞌ, pëinëmaquë paꞌsaramaꞌ. Patopiramacohuëꞌ, co caora yaꞌhuapohuëꞌ. Tatahuë caꞌtanarinco.

Juan 4:23

Ipora quëran huarëꞌ Yosë yachinotohuatamaꞌ, yaꞌipi cancanëma quëran huarëꞌ chinotocoꞌ. Ispirito Santo catahuarinquëmaꞌ niꞌton, noꞌtëquën yonquiatomaꞌ, Yosë chinotocoꞌ. Ina pochin nohuantërin chinotacasoꞌ.

Juan 5:25

Casoꞌ Yosë huiꞌninco. Iporaso huachi aꞌnaquën chimipi pochin nipisopita natanarinaco. Inapita noya natanpachinaco, Yosë anohuitarahuë. Ina nohuitohuachinaꞌ, nanpimiatapi.

Juan 5:28

Ama ina yonquiatomaꞌ, paꞌyancosohuëꞌ. Aꞌna tahuëri yaꞌipi chiminpisopita natanarinaco.

Hechos 6:14

Quisoso Nasaritoquë yaꞌhuërinsoꞌ imaton, naporinsoꞌ aꞌchinarin. “Aꞌna tahuëri Quisosori Yosë chinotopiso pëiꞌ ataꞌhuantarin. Moisësë pënëninpoasontaꞌ ananiantatonpoaꞌ, nisha aꞌchintarinpoaꞌ,” toconin Istipan natanai, topi shaꞌhuirapitonaꞌ.

Efesios 2:18

Quisocristo chiminin niꞌton, yaꞌipinpoaꞌ nanitërëhuaꞌ Tata Yosë nontacasoꞌ. Ispirito Santo catahuarinpoaꞌ niꞌton, ina nontohuatëhuara, noya nataninpoaꞌ.

Efesios 3:14

“Ma noyacha Yosë yonquirinpoa paya,” taꞌto, isonahuato, Tata Yosë nontërahuë.

1 Timoteo 2:8

Napoaton nani parti niyontonpachinaꞌ, quëmapiꞌsaꞌ Yosë nonchinaꞌ, tënahuë. Ama noꞌhuichinasohuëꞌ. Ama nisha nisha ninonchinasohuëꞌ. Noyápiachin cancantatonaꞌ, Yosë nonchinaꞌ.

1 Pedro 1:17

Yosë nontohuatamara, “Tata,” itëramaꞌ. Aꞌna tahuëri inasoꞌ coisë pochin niꞌton, yaꞌipi piyapiꞌsaꞌ noꞌtëquën shaꞌhuitarin. Co noyahuëꞌ nipisopita noꞌtëquën anaꞌintarin. Yaꞌipi oshahuaninsopita anaꞌintarin niꞌton, tëꞌhuatacasoꞌ yaꞌhuërin. Chiminaquë huarëꞌ ina yonquiatomaꞌ, noya nicoꞌ.

Apocalipsis 21:22

Inaquësoꞌ co Yosë chinotacasoꞌ pëiꞌ yaꞌhuërinhuëꞌ. Yosë chini chiníquën nanantërinso chachin yaꞌipi parti yaꞌhuarin. Carniroaꞌhuantaꞌ yaꞌhuarin niꞌton, noya noya chinotarihuaꞌ.