Juan 4:10 - Chayahuita (Shahui)

¹⁰ —Yosë yanicanapirinquënhuëꞌ, co quëmasoꞌ nitotëranhuëꞌ. “Iꞌsha mananso cantaꞌ oꞌoi,” itëranquën nipirinhuëꞌ, co nohuitërancohuëꞌ. Nohuitëranco naporini, quëma nataintoncohuëꞌ. Carinquën nanpirin iꞌsha quëchitënquënhuëꞌ, itërin Quisosori.

Juan 4:10 ပူးပေါင်းရင်းမြစ်များ

Salmos 46:4

Aꞌna noyápiachin iꞌ nininsoari, Yosë ninanonënquë yaꞌhuëpisopita acapacancanin. Inaquësoꞌ, Yosë chini chiníquën nanantërinsoꞌ chinotopi.

Isaías 42:6

Ina chachin piyapinën nontaton itaantapon: “Carinquën acoranquën nohuantërahuësoꞌ nicacaso marëꞌ. Imirahuë quëran sëꞌquëatë pochin, carinquën achiniaranquën. Quëmá quëran piyapiroꞌsa nichaꞌëcaꞌhuaso marëꞌ acoranquën. Inapitaroꞌco anoyatërahuëso ayonquiamaso marëꞌ acoranquën. Yaꞌipi nacionoꞌsa aꞌpintatë pochin noꞌtëquën anitotaran.

Isaías 43:20

Tanan maꞌsharoꞌsa noya niꞌsarinaco. Asaniroꞌsaꞌ, apistroroꞌsaꞌ, inapitanta noya niꞌsarinaco. Co manta maꞌsha noyatërinquëhuëꞌ, iroꞌsa acoarahuë. Piyapinëhuëpita huayonahuëso oꞌocaiso marëꞌ inapoarahuë niꞌton, noya niꞌsarinaco.

Isaías 44:3

Ca nohuanton inotëroquë naꞌcon iꞌ yaꞌhuëapon. Yaniroquëntaꞌ, iꞌshanaroꞌsa yaꞌhuëapon. Canpita quëran pipipisopitanta ispiritonëhuë ayaꞌcoancantarahuë. Inapotahuato naꞌcon catahuaarahuë.

Isaías 49:10

Co huachi tanaponahuëꞌ. Co huachi yamoroaponahuëꞌ. Co piꞌiri tëranta piꞌcaton aparisitaponhuëꞌ. Cari nosoroato insëchinsona pacacaisoꞌ, aꞌnotapo. Huinanoꞌsa yaꞌhuërinquë cari quëpapo.

Isaías 9:6

Canpoa marëꞌ aꞌnara quëmapiaꞌhua nasitërin. Huiꞌnanpoa Yosë quëtërinpoaso pochin aꞌnara yaꞌipiya marëꞌ quëtërinpoaꞌ. Ina mini huaꞌanëntacaso marëꞌ acorinsoꞌ. Nisha nisha quëran nohuitaponaꞌ: “Paꞌyapiro yonquirinsoꞌ.” “Co minsëchináchinhuëꞌ Yosë.” “Yaꞌhuëmiatonaꞌpi tata.” “Sano cancantonaꞌpi huaꞌan.” Ina pochinpita nohuitaponaꞌ.

Jeremías 2:13

Piyapinëhuëpitasoꞌ naꞌcon naꞌcon oshahuanpi. Caso inapita marëꞌ nanpirin iꞌsha huinan pochin nipirahuëꞌ, aꞌporinaco. Naporahuatona iꞌsha tapainanoꞌsa acopirinahuëꞌ, nopoatonpi niꞌton, co iꞌsha yaꞌhuëirinhuëꞌ. Ina pochin niconinsoꞌ imacaiso marëꞌ aꞌporinaco niꞌton, napopi.

Lucas 11:13

Canpitasoꞌ co noyahuëꞌ yonquiapomarahuëꞌ, huiꞌnamaꞌ nosororamaꞌ. Noya maꞌsha quëtëramaꞌ. Yosësoꞌ noya noya niꞌton, naꞌcon naꞌcon nosororinquëmaꞌ. Inápaquë yaꞌhuaponahuëꞌ, huiꞌninpita pochin niꞌninquëmaꞌ. Nontohuatamaꞌ, ‘Ispirito Santo ayaꞌcoancantoco,’ itohuatamaꞌ, ayaꞌcoancantarinquëmaꞌ,” itërin.

Juan 16:3

Co Tata Yosë nohuitopihuëꞌ. Cantaꞌ huiꞌninco nipirahuëꞌ, co nohuitërinacohuëꞌ niꞌtonaꞌ, aparisitarinënquëmaꞌ.

Juan 17:3

Quëmasáchin Yosënquën. Isoroꞌpaquë aꞌpaimaranco. Piyapiꞌsaꞌ nohuitahuatënënquën, cantaꞌ nohuitohuachinaco, nanpimiatapi.

Juan 3:16

Yosësoꞌ yaꞌipi piyapiꞌsaꞌ paꞌpi nosoromiatërin. Napoaton aꞌnaíchin huiꞌnin nipirinhuëꞌ, isoroꞌpaquë aꞌpaimarin chiminacaso marëꞌ. Ina natëtëhuaꞌ: “Ca marëꞌ chiminin,” topatëhuaꞌ, co parisitopiquë paꞌsarëhuahuëꞌ. Yosë nohuitatëhuaꞌ, nanpimiatarëhuaꞌ.

Juan 4:14

Nisha iꞌsha carinquën quëtaranquën. Ina yaꞌhuëtohuachinquën, co huachi yamororëso pochin cancantaranhuëꞌ. Niꞌquëꞌ. Pancaiꞌ noꞌpa quëran pipihuachina, noyápiachin pipirárin. Co onporontaꞌ yanimarinhuëꞌ. Inapochachin nanpirin iꞌsha quëtohuatënquën, cancanënquë chachin yaꞌhuëtarinquën. Inaquë yaꞌhuápon huachi. Yosë nohuitaton, nanpimiataran, itërin.

Juan 6:35

—Ca inaco. Casoꞌ cosharo pochinco niꞌto, piyapiꞌsaꞌ ananpitomiatarahuë. Imapatamaco, co huachi tanarëso pochin cancantaramahuëꞌ. Natëhuatamaco, co huachi yamororëso pochin cancantaramahuëꞌ. Yosë nohuitohuatamaꞌ, sano cancantaramaꞌ.

Juan 6:51

Ca nanpirin cosharo pochinco. Inápa quëran oꞌmato, noya noya ananpiaranquëmaꞌ. Ca nonëhuë chachin quëtarahuë yaꞌipi piyapiꞌsa marëꞌ. Coshatëramaso pochin nitohuatamaco, yaꞌcoancantaranquëmaꞌ, nanpimiatarama huachi, itërin.

Hechos 9:11

“Huanirahuaton, noꞌtëquën cachi itopiquë paquëꞌ. Inatohuaꞌ Cotasë pëinën yaꞌhuërin. Inaquë aꞌna quëmapi Tarsoquë yaꞌhuërinsoꞌ yacapatarin. Inasoꞌ Saono itopi. Apira inasoꞌ nontarinco.

Romanos 8:32

Yosë chachin nosoroatonpoaꞌ co huiꞌnin tërantaꞌ apiratërinpoahuëꞌ. Isoroꞌpaquë aꞌpaimarin chiminacaso marëꞌ. Canpoa marëꞌ chiminin. Ipora chachintaꞌ nosoroatonpoaꞌ, catahuarinpoaꞌ. ¡Quisocristo imarëhuaꞌ niꞌton, co mantaꞌ pahuantarinpoahuëꞌ Yosë pochin cancantacaso marëꞌ! Nóya nichaꞌësarinpoaꞌ.

1 Corintios 1:30

Yosë nohuanton, Quisocristo imarëhuaꞌ. Imapatëhuaꞌ, yaꞌcoancantërinpoaꞌ niꞌton, yonquínahuan pochin Yosë niꞌninpoaꞌ. Naporahuaton, catahuarinpoaꞌ noꞌtëquën yonquicasoꞌ. Oshanënpoaꞌ inquitohuachinpoaꞌ, noya huachi niꞌninpoaꞌ. Nasha cancan quëtërinpoaꞌ noya nicacaso marëꞌ. Quisocristo chachin nichaꞌërinpoaꞌ.

1 Corintios 10:4

Inaquësoꞌ co iꞌsha yaꞌhuëpirinhuëꞌ, Yosë nohuanton, naꞌpi quëran pipirin, yaꞌipiya oꞌopi. Quisocristosoꞌ ina naꞌpi pochin ninin. Paꞌpachinara, co quënanpirinahuëꞌ, inari naꞌcon catahuarin chaꞌëcaiso marëꞌ.

2 Corintios 9:15

Yosëso nipirinhuëꞌ naꞌcon naꞌcon quëtërinpoaꞌ. Huiꞌnin chachin aꞌpaimarin nichaꞌëinpoaso marëꞌ. Inasoꞌ noya nóya niꞌton, “Yosparinquën, Sinioro,” itahuaꞌ.

Efesios 2:8

Nosoroatonpoaꞌ, inaora nohuanton nichaꞌërinpoaꞌ. “Quisocristoíchin anoyacancantërinpoaꞌ,” topatëhuaꞌ, oshanënpoaꞌ inquitatonpoaꞌ, nichaꞌërinpoaꞌ. Co canpoara nanitërëhuahuëꞌ Yosë imacasoꞌ. Ina catahuarinpoaꞌ cancanënpoa quëran natëcasoꞌ.

Hebreos 6:4

Ama Quisocristo aꞌpocosohuëꞌ. Ina aꞌpohuatamaꞌ, co nanitërinhuëꞌ anoyacancantinquëmasoꞌ. Aꞌnaquën Quisocristo nanamën nani nitotopi. “Quisocristo nichaꞌësarinpoaꞌ,” taꞌtonaꞌ, imapi. Cosharoꞌ piꞌnirëso pochin piꞌpian nohuitopi. Ispirito Santori chachin catahuarin.

1 Juan 5:20

Yosë huiꞌnin chachin oꞌmaton, noꞌtëquën Yosë anohuitërinpoaꞌ. Inasáchin noꞌtëquën yonquirin. Yosë nohuitatëhuaꞌ, yonquirinsoráchin imasarëhuaꞌ. Quisocristo nohuitërëhuaꞌ niꞌton, catahuarinpoaꞌ noꞌtëquën yonquicaso marëꞌ. Inaíchin Yosësoꞌ niꞌton, chinotacasoꞌ yaꞌhuërin. Ina nohuitohuatëhuaꞌ, nanpimiatarihuaꞌ.

Apocalipsis 21:6

Ina quëran itantarinco: —Nani yaꞌipiya anoyatërahuë. Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuárahuë. Co onporontaꞌ taꞌhuantarahuëꞌ. Napoaton nontoco catahuainquëmaꞌ. Niꞌquëꞌ. Chiníquën yamorohuatëra, oꞌorëꞌ. Oꞌopatëra, chiníquën cancantërëꞌ. Inapochachin cantaꞌ catahuaranquëmaꞌ. Yamororëso pochin cancantohuatamaꞌ, nanpirin iiꞌ quëchinquëmaꞌ noya cancantacamaso marëꞌ. Caora nohuanto, catahuaranquëmaꞌ. Insonquëma tërantaꞌ nohuantohuatamaco, huëcoꞌ anoyacancanchinquëmaꞌ.

Apocalipsis 22:17

Yaꞌipi Quisoso imarëhuasopita: “Oꞌmantaquëꞌ Sinioro,” itërëhuaꞌ. Ispirito Santontaꞌ, inachachin tënin. Natanamasopitantaꞌ, “Oꞌmantaquëꞌ Sinioro,” itocoꞌ. Yamororëso pochin cancantohuatamaꞌ, huëcoꞌ nanpirin iiꞌ quëchinquëmaꞌ. Achinirinpoaso pochin quëtarinquëmaꞌ noya cancantacamaso marëꞌ. Co mantaꞌ paꞌtërinhuëꞌ.

Apocalipsis 7:17

Niꞌcoꞌ. Huaꞌanëni ohuicanënpita noya aꞌpaiarin. Quëchitërahuaton, noya iiꞌ aꞌnotërin oꞌocaiso marëꞌ. Inapochachin Carniroaꞌhuari imapisopita aꞌpaiarin. Yosëꞌpaꞌ noya noya nanpiapi. Yosëri chachin naꞌnëiꞌ amitarin niꞌton, co huachi sëtaponahuëꞌ, itërinco.