Juan 3:5 - Chayahuita (Shahui)

⁵ Napotohuachina, Quisosori itaantapon: —Noꞌtëquën shaꞌhuitaranquën. Iꞌquë amarëso pochin cancanëmaꞌ anoyatacasoꞌ yaꞌhuërin. Yaꞌipi co noyahuëꞌ yonquiramasopita naniantocoꞌ. Ina naniantohuatamaꞌ, Ispirito Santo anoyacancantohuachinquëmaꞌ, nasitaantarëso pochin nisaramaꞌ. Naporo huarëꞌ Yosë huaꞌanëntërinquë yaꞌconaramaꞌ.

Juan 3:5 ပူးပေါင်းရင်းမြစ်များ

Mateo 18:3

—Natanco iyaroꞌsaꞌ piꞌpian aꞌchinchinquëmaꞌ. Co noꞌtëquën yonquiyátëraramahuëꞌ. Huaꞌhuasharoꞌsaꞌ yonquicoꞌ. Co chiníquën nanan nohuantopihuëꞌ. Co aꞌnapita nocanpihuëꞌ. Co inapita pochin cancantohuatamahuëꞌ, co onporontaꞌ Yosë huaꞌanëntërinquë yaꞌconaramahuëꞌ.

Mateo 19:24

Niꞌcoꞌ iyaroꞌsaꞌ. Nahuan huëratën piꞌpiraꞌhuaya naninën yaꞌhuëtërin. Camiyoso panca masho niꞌton, sacaiꞌ inaquë yaꞌconacasoꞌ. Maꞌhuanoꞌsasoꞌ ina quëran saca sacai Yosë huaꞌanëntërinquë yaꞌconacaisoꞌ, itërin.

Mateo 21:31

Catoꞌ huiꞌnin chachin shaꞌhuitopirinhuëꞌ, ¿insoaritaꞌ natërinsoꞌ? itërin Quisosori. —Yaꞌnan camairinsoꞌ paꞌpin natëton, sacatërin, itopi. —Noꞌtëquën naporamaꞌ. Aꞌnasoꞌ “Paꞌi nipachin,” taponahuëꞌ, co paꞌninhuëꞌ. Inapochachin copirno marëꞌ coriqui maꞌpatonaꞌpiroꞌsaꞌ, monshihuanaꞌpiroꞌsaꞌ, inapita co noyahuëꞌ yonquipirinahuëꞌ, iporasoꞌ ina naniantahuatonaꞌ, Yosë imasapi. Imatonaꞌ, tëhuënchachin huaꞌanëntërinquë yaꞌconapi. Canpitaso nipirinhuëꞌ co yayaꞌconamahuëꞌ.

Mateo 28:19

Napoaton canpita paatomaꞌ, yaꞌipi piyapiꞌsaꞌ aꞌchintocoꞌ. Nisha nisha nananquë nonpisopita aꞌchintocoꞌ imainaco. Insosona natëhuachinaco, iꞌquë aporintocoꞌ. “Tata Yosë, Huiꞌnin, Ispirito Santo inapita nanan quëtërincoi niꞌton, aporintaranquën,” itahuatomaꞌ, aporintocoꞌ.

Mateo 3:11

Co noyahuëꞌ yonquiramasopita naniantohuatamaꞌ, iꞌquë aporintaranquëmaꞌ. Ca piquëranso nipirinhuëꞌ aꞌna quëmapi huëꞌsarin. Inasoꞌ chini chiníquën nanantërin. Casoꞌ co piꞌpian tërantaꞌ ina pochin chiníquën nanantërahuëꞌ. Co maquëyancohuëꞌ niꞌto, co sapatën quëpacaꞌhuaso tërantaꞌ nanitarahuëꞌ. Inasoꞌ huëꞌpachin, aꞌnaquëmaꞌ Ispirito Santo ayaꞌcoancantarinquëmaꞌ. Aꞌnaquëmaso nipirinhuëꞌ pënquë chiníquën anaꞌintarinquëmaꞌ.

Mateo 5:20

Cotio maistroꞌsaꞌ, parisioroꞌsaꞌ, inapita Yosë quiricanën noya nitotaponaraihuëꞌ, co cancanëna quëran imapihuëꞌ. Canpitantaꞌ co yaꞌipi cancanëma quëran huarëꞌ imapatamahuëꞌ, co onporontaꞌ Yosë huaꞌanëntërinquë yaꞌconaramahuëꞌ,” tënin.

Marcos 10:14

Ina niꞌsahuaton, Quisosori co noyahuëꞌ niꞌnin. —Tananpitocoꞌ iyaroꞌsaꞌ huaꞌhuaroꞌsantaꞌ huëꞌinaꞌ. Ama aꞌpacosohuëꞌ. Huaꞌhuaroꞌsa pochin cancantopisopita Yosë huaꞌanëntërinquë yaꞌconapi.

Marcos 16:16

Insosona noya nanan natëhuachinaꞌ, chaꞌësapi. Aporihuanahuatonaꞌ, imapachinaco, chaꞌësapi huachi. Co nanamëhuë natëhuachinahuëꞌ, Yosëri anaꞌintarin.

Marcos 9:47

Yaꞌpiramantaꞌ yaꞌhuëtërinquëmaꞌ noya niꞌtacaso marëꞌ. Nipirinhuëꞌ, yaꞌpirama quëran quënanatomaꞌ co noyahuëꞌ yonquihuatamaꞌ, oshahuanaramaꞌ. Yaꞌpiramaꞌ ocoiramaꞌ naporini, aꞌna quëran somaraya nipomarahuëꞌ, Yosë huaꞌanëntërinquë paꞌitomahuëꞌ. Cato quëran chachin niꞌtapomarahuëꞌ, parisitopiquë tëꞌyatohuachinquëmaꞌ, paꞌpi co noyahuëꞌ nisaramaꞌ. Maꞌsona tërantaꞌ anishacancantohuachinquëmaꞌ, aꞌnaroáchin naniantocoꞌ ama parisitopiquë paacamaso marëhuëꞌ.

Lucas 13:24

—Yosë huëntonën pëi pochin ninin. Yaꞌcoananënsoꞌ yamianasha. Naꞌa piyapiꞌsasoꞌ yayaꞌconpirinahuëꞌ, co noyahuëꞌ cancantatonaꞌ, co nanitopihuëꞌ yaꞌconacaisoꞌ. Canpitaso nipirinhuëꞌ ipora chachin yaꞌconacamasoꞌ nohuantocoꞌ. Ama huaꞌquicosohuëꞌ.

Lucas 13:3

Co inapita naꞌcon naꞌcon oshahuanpihuëꞌ. Canpitantaꞌ co noyahuëꞌ yonquiramaꞌ. Co ina naniantohuatamahuëꞌ, anaꞌintarinquëmaꞌ. Chiminatomaꞌ, parisitomiataramaꞌ.

Juan 1:13

Yaꞌipinpoaꞌ piyapi quëran nasitërëhuaso nipirëhuahuëꞌ, co ina quëran Yosë huëntonënquë yaꞌconëhuahuëꞌ. Co piyapi nanitërinhuëꞌ ayaꞌcoꞌinpoasoꞌ. Co canpoara nohuanton, yaꞌconëhuahuëꞌ. Yosëíchin ayaꞌconinpoaꞌ. Ina quëran huiꞌninpita pochin niꞌninpoaꞌ.

Juan 3:3

—Noꞌtëquën iyasha shaꞌhuitaranquën. Co nasitaantahuatanhuëꞌ, co onporontaꞌ Yosë huaꞌanëntërinquë yaꞌconaranhuëꞌ, itërin Quisosori.

Juan 3:4

—Nani mashotohuatëra, co huachi mamanpo yoꞌnamënquë yaꞌconëhuëꞌ. ¿Onporahuatëtaꞌ nasitaantarëꞌ? itaantarin Nicotimorintaꞌ.

Hechos 2:38

Napotohuachinara, Pitrori itaantarin: —Yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ. “Quisocristo imarahuë,” taꞌtomaꞌ, aporihuancoꞌ. Ina imapatamaꞌ, Yosë oshanëmaꞌ inquitarinquëmaꞌ. Ina quëran Ispirito Santo ayaꞌcoancantarinquëmaꞌ canpitantaꞌ.

Hechos 3:19

Napoaton iyaroꞌsaꞌ yaꞌipi co noyahuëꞌ yonquiramasopita naniantatomaꞌ, Yosë chachin tahuërëtantacoꞌ oshanëmaꞌ inquichinquëmaꞌ.

Romanos 14:17

Yosë noya huaꞌanëntërinpoaꞌ. Ina imapatëhuaꞌ, noya nisarëhuaꞌ. Asanocancanarinpoaꞌ niꞌton, co ninoꞌhuicasoꞌ yaꞌhuërinhuëꞌ. Yosësoꞌ, caꞌnëhuasoꞌ, oꞌorëhuasoꞌ, inapita co onpopinchin yonquirinhuëꞌ. Ispirito Santo catahuarinpoaꞌ noya cancantahuasoꞌ. Catahuahuachinpoaꞌ, capa cancantarihuaꞌ.

Romanos 8:2

Oshanënpoa natëhuatëhuaꞌ, co noyahuë ninëhuaꞌ. Inapohuatëhuaꞌ, chiminpatëhuaꞌ, anaꞌintarinpoaꞌ. Nipirinhuëꞌ, Quisocristo imapatëhuaꞌ, Ispirito Santo catahuarinpoaꞌ nanpimiatacaso marëꞌ. Naporahuaton, co huachi oshanënpoa natëcasoꞌ yaꞌhuërinhuëꞌ.

1 Corintios 15:50

Nonënpoaꞌ ipora yaꞌhuëtërinpoasoꞌ co nanitërinhuëꞌ Yosë huaꞌanëntërinquë paacasoꞌ. Chiminpatëhuaꞌ, nonënpoaꞌ chanatarin, co yaꞌhuëmiatarinhuëꞌ.

1 Corintios 2:12

Imarëhuasopitasoꞌ co piyapi yonquipisoꞌ imarëhuahuëꞌ. Yosë nohuanton, Ispirito Santo yaꞌcoancantërinpoaꞌ. Aꞌchintinpoaso marëꞌ aꞌpatimarinpoaꞌ. Yaꞌcoancantohuachinpoara, Yosë yonquirinpoasoꞌ anitotërinpoaꞌ.

1 Corintios 6:11

Iráca aꞌnaquëmaꞌ ina pochin nipiramahuëꞌ. Sinioro Quisocristo imapatamara, oshanëmaꞌ inquitërinquëmaꞌ. Nani anoyacancantërinquëmaꞌ niꞌton, Yosë noya niꞌninquëmaꞌ. Ispirito Santo chachin catahuarinquëmaꞌ noya cancantacasoꞌ.

Gálatas 6:15

Marcasoꞌ co onpopinchin yonquicasoꞌ yaꞌhuërinhuëꞌ. Co ina marëꞌ Yosë noya niꞌninpoahuëꞌ. Quisocristo imapatëhuaꞌ, nasha cancan quëtërinpoaꞌ. Ina marëꞌ tëhuënchinsoꞌ noya niꞌninpoaꞌ.

Efesios 5:26

Quisocristo chiminin anoyacancantinpoaso marëꞌ. Nanamën natëhuatëhuara, noyápiachin cancan quëtërinpoaꞌ. Iꞌquë amarëso pochin oshanënpoaꞌ inquitërinpoaꞌ.

1 Pedro 1:2

Iráca quëra huarëꞌ Tata Yosë nohuitërinquëmaꞌ. Nosoroatënquëmaꞌ, huayoninquëmaꞌ huëntonënquë yaꞌconacamaso marëꞌ. Ispirito Santo anoyacancantërinquëmaꞌ natëcamaso marëꞌ. Quisocristo corosëquë chiminin oshanëmaꞌ inquitiinquëmaso marëꞌ. Yosë nontëramaꞌ niꞌton, oshanëmaꞌ inquitërinquëmaꞌ. Yosë inaora nohuanton, noya catahuainquëmaꞌ. Asanocancainquëmaꞌ.

1 Pedro 3:21

Inapochachin iporasoꞌ Yosë nichaꞌësarinpoaꞌ. Anoyacancantohuachinpoaꞌ, aporintërinënpoaꞌ. Co nëꞌhuë inquitinënpoaso marëꞌ aporintërinënpoahuëꞌ. Aporintohuachinënpoara, Yosë nontërëhuaꞌ catahuainpoaso marëꞌ. “Yaꞌipi oshanëhuë inquitoco. Catahuaco noyasáchin nicato, noyápiachin cancanchi,” itërëhuaꞌ. Ina marëꞌ anoyacancantërinpoaꞌ. Quisocristo nanpiantarin niꞌton, nichaꞌësarinpoaꞌ.

1 Juan 2:29

Quisocristo noyasáchin ninin, nitotërëhuaꞌ. Napoaton Yosë huëntonënquë yaꞌconpatëhuaꞌ, noya nicarihuaꞌ. Inpitasona noya nipachinaꞌ, nani Yosëri anoyacancantërin niꞌton, huiꞌnin pochin niꞌsarin, tënëhuaꞌ.

1 Juan 5:1

Yaꞌipi Quisocristo imarëhuasopita aꞌna huënton pochin ninëhuaꞌ. “Quisocristo Yosë huiꞌnin chachin,” tënëhuaꞌ niꞌton, huëntonënquë yaꞌconëhuaꞌ. Huiꞌninpita pochin niꞌninpoaꞌ. Niꞌcoꞌ. “Quëmapi tëhuënchachin nosorohuatëra, huiꞌninpitantaꞌ nosororëꞌ,” topi.