Juan 3:16 - Chayahuita (Shahui)

¹⁶ Yosësoꞌ yaꞌipi piyapiꞌsaꞌ paꞌpi nosoromiatërin. Napoaton aꞌnaíchin huiꞌnin nipirinhuëꞌ, isoroꞌpaquë aꞌpaimarin chiminacaso marëꞌ. Ina natëtëhuaꞌ: “Ca marëꞌ chiminin,” topatëhuaꞌ, co parisitopiquë paꞌsarëhuahuëꞌ. Yosë nohuitatëhuaꞌ, nanpimiatarëhuaꞌ.

Juan 3:16 ပူးပေါင်းရင်းမြစ်များ

Génesis 22:12

Sinioro anquëninënisoꞌ, itapon: —Ama huiꞌnan tëpaquësohuëꞌ. Tëniponquën napotopiranquënhuëꞌ, iporasoꞌ nani nitotërahuë. Yaꞌipi cancanën quëran huarëꞌ imaranco tënahuë. Huiꞌnan aꞌnaíchin nipirinhuëꞌ, co apiratërancohuë niꞌton, nitotërahuë, itërin.

Génesis 22:2

Naporoꞌ Yosëri itapon: —Huiꞌnan Isaco itëransoꞌ, aꞌnaíchin niꞌton, nosoromiatëran. Ina nipirinhuëꞌ, masahuaton Moria parti quëpaquëꞌ. Inaquë canconpatan, aꞌna motopi aꞌnotaranquën. Inaquë chinotancoso marëꞌ ina tëparahuaton, yaꞌipi ahuiquitëquëꞌ, itërin.

Isaías 9:6

Canpoa marëꞌ aꞌnara quëmapiaꞌhua nasitërin. Huiꞌnanpoa Yosë quëtërinpoaso pochin aꞌnara yaꞌipiya marëꞌ quëtërinpoaꞌ. Ina mini huaꞌanëntacaso marëꞌ acorinsoꞌ. Nisha nisha quëran nohuitaponaꞌ: “Paꞌyapiro yonquirinsoꞌ.” “Co minsëchináchinhuëꞌ Yosë.” “Yaꞌhuëmiatonaꞌpi tata.” “Sano cancantonaꞌpi huaꞌan.” Ina pochinpita nohuitaponaꞌ.

Mateo 9:13

Oshahuanoꞌsaꞌ pënënaꞌhuaso marëꞌ oꞌmarahuë. “Co noyahuëꞌ yonquiramasopita naniantatomaꞌ, Yosë chachin tahuërëtantacoꞌ,” itërahuë. Aꞌnapitasoꞌ: “Quiyasoꞌ co oshahuancoihuëꞌ,” topiso marëꞌ co naꞌcon aꞌchintërahuëꞌ. Paatomaꞌ, Yosë quiricanën noya nitotocoꞌ noꞌtëquën yonquicamaquë. Inaquë iráca ninshitopi: “Aꞌnaquën topinan quëran chinotatonaco oshanëna marëꞌ maꞌsha tëpapirinahuëꞌ, co aꞌnapita nosoropihuëꞌ. Nosorotacasoꞌ naꞌcon naꞌcon nohuantërahuë,” tënin Yosë, itërin Quisosori.

Marcos 12:6

Napotohuachinara, huaꞌanëni yonquiantarin. ‘¿Maꞌcha onpochiya? Naꞌayaꞌpi aꞌpapirahuëꞌ, co mantaꞌ quëtopihuëꞌ. Huiꞌnahuë naꞌcon nosoropirahuëꞌ, ina huachi aꞌpaarahuë. Ina tëhuënchinsoꞌ natëponaꞌ nimara,’ taꞌton, huiꞌnin chachin aꞌparin.

Lucas 2:14

“¡Ma noyacha Yosëso paya! Inápaquë yaꞌhuaponahuëꞌ, piyapinquëmaꞌ yonquirinquëmaꞌ. Cancantatoma ina yanatëramasopitasoꞌ sano cancantaramaꞌ,” itopi anquëniroꞌsari.

Juan 1:14

Quisocristo isoroꞌpaquë nasitimarin. Yosë niponahuëꞌ, piyapi chachin nasitërin. Canpoarë chachin yaꞌhuërin. Quiyasoꞌ niꞌnai. Inasoꞌ nóya, tënai. Yosë pochachin ninin. Inaíchin huiꞌnin inasoꞌ. Inaora nohuanton nosororinpoaꞌ. Noꞌtëquën nontërinpoaꞌ.

Juan 1:18

Co inquënpoa tërantaꞌ Yosë quënanëhuahuëꞌ. Huiꞌniniso nipirinhuëꞌ noyá nohuitërin. Yosë pochachin niꞌton, napopianachin yonquipi. Inasáchin Tata Yosë anohuitërinpoaꞌ.

Juan 1:29

Tahuëririnquë inaquë Quisoso huëꞌsarin. Coanshari quënanahuaton, piyapiꞌsaꞌ itërin: “Pasoꞌ quëmapi niꞌcoꞌ. Yosëri aꞌpaimarinsoꞌ. Inasoꞌ carniroaꞌhua pochin nicaton, oshanënpoaꞌ inquitiinpoaso marëꞌ chiminapon.

Juan 10:28

Ca nohuanto, nanpimiatapi. Co parisitopiquë paꞌsapihuëꞌ. Noya aꞌpaiarahuë. Co insontaꞌ osërëtarinacohuëꞌ.

Juan 3:15

Natëhuatamaco, Yosë nohuitatomaꞌ, nanpimiataramaꞌ. Ina marëꞌ achinpiarinaco, itërin Quisosori.

Juan 3:18

Huiꞌnin natëhuatëhuaꞌ, co Yosë anaꞌintarinpoahuëꞌ. Co natëpisopitahuëꞌ nani Yosëri yonquirin anaꞌintacasoꞌ. Inaíchin huiꞌnin nipirinhuëꞌ, co natëpihuëꞌ. Napoaton anaꞌintarin.

Juan 3:36

Huiꞌnin natëpisopitasoꞌ, Yosë nohuitatonaꞌ nanpimiatapi. Co natëpisopitasohuëꞌ, co ina pochin nanpimiatapihuëꞌ. Nani Yosëri yonquirin anaꞌintacaso marëꞌ. Aꞌna tahuëri anaꞌintomiatarin, parisitopiquë aꞌpararin huachi.

Juan 6:40

“Quëmasoꞌ tëhuënchachin Yosë huiꞌninquën,” itatomaco imapatamaco, Yosë nohuitatomaꞌ nanpimiatarama huachi. Ayaroꞌ tahuëri ananpitaantaranquëmaꞌ. Ina Yosë nohuantërin, itërin Quisosori.

Romanos 5:10

Iráca oshahuanatëhuaꞌ, Yosë inimicotopirëhuahuëꞌ, huiꞌnin chiminin niꞌton, nanan anoyatërinpoaꞌ. Iporasoꞌ noya nipayarëhuaso pochin ninëhuaꞌ niꞌton, noya noya catahuarinpoaꞌ. Nanpiantarin niꞌton, catahuarinpoaꞌ noya chaꞌëcahuaso marëꞌ.

Romanos 5:8

Quisocristoso nipirinhuëꞌ oshahuanoꞌsa marëꞌ chiminin. Oshahuanpirëhuahuëꞌ, yaꞌhuërëtërinpoaꞌ. Yosë nohuanton, canpoa marëꞌ chiminin. Napoaton: “Ma noyacha Yosë nosororinpoa paya,” tënëhuaꞌ.

Romanos 8:32

Yosë chachin nosoroatonpoaꞌ co huiꞌnin tërantaꞌ apiratërinpoahuëꞌ. Isoroꞌpaquë aꞌpaimarin chiminacaso marëꞌ. Canpoa marëꞌ chiminin. Ipora chachintaꞌ nosoroatonpoaꞌ, catahuarinpoaꞌ. ¡Quisocristo imarëhuaꞌ niꞌton, co mantaꞌ pahuantarinpoahuëꞌ Yosë pochin cancantacaso marëꞌ! Nóya nichaꞌësarinpoaꞌ.

Efesios 2:4

Yosëso nipirinhuëꞌ naꞌcon nosororinpoaꞌ. Nosoroatonpoaꞌ, yanichaꞌërinpoaꞌ.

2 Tesalonicenses 2:16

Sinioro Quisocristo catahuainquëmaꞌ chiníquën cancantacamaso marëꞌ. Inaora nohuanton, Tata Yosëntaꞌ nosoroatonpoaꞌ, achinicancamiatërinpoaꞌ. Aꞌna tahuëri yaꞌhuërinquë chachin quëpantarinpoaꞌ. Shaꞌhuitërinpoaꞌ niꞌton, ina ninarëhuaꞌ.

Tito 3:4

Yosëso nipirinhuëꞌ nosoroatonpoaꞌ, catahuarinpoaꞌ. Inasoꞌ noya niꞌton, huiꞌnin aꞌpaimarin nichaꞌëinpoaso marëꞌ.

Hebreos 2:9

Quisososo nipirinhuëꞌ yonquiaꞌahuaꞌ. Inasoꞌ isoroꞌpaquë oꞌmaton, piyapi chachin nasitimarin. Parisitaton, canpoa marëꞌ chiminin. Napoaton Yosëri chiníquën nanan quëtërin yaꞌipi huaꞌanëntacaso marëꞌ. Inaora nohuanton, Yosë nosoroatonpoaꞌ, huiꞌnin aꞌpatimarinpoaꞌ yaꞌhuërëtinpoaso marëꞌ. Yaꞌipi piyapinpoa marëꞌ chiminin.

1 Juan 3:1

Ma noya Tata Yosë nosororinpoaꞌ niꞌton, huiꞌninpita pochachin niꞌninpoaꞌ. Huëntonënquë chachin ayaꞌconinpoaꞌ. Co imapisopitasohuëꞌ nipirinhuëꞌ co nitotopihuëꞌ. “¿Onpoatontaꞌ Yosë pochin cancantacasoꞌ nohuantopi?” toconpi. Co Yosë nohuitatonahuëꞌ, napopi.

1 Juan 4:19

Yosëꞌton naꞌcon nosororinpoaꞌ niꞌton, canpoarintaꞌ Yosë nosoroatëhuaꞌ, aꞌnapitantaꞌ nosoroarihuaꞌ.

Apocalipsis 1:5

Quisocristontaꞌ inaora nohuanton, catahuainquëmaꞌ. Asanocancainquëmaꞌ. Iráca isoroꞌpaquë oꞌmarahuaton, noꞌtëquën aꞌchintërinpoaꞌ. Inaꞌton chiminaponahuëꞌ, nanpiantarin. Chimirin minsërahuaton, yaꞌipiya huaꞌanëntarin. Yaꞌipi huaꞌanoꞌsa quëran chini chiníquën nanantarin. Naporahuaton, naꞌcon nosororinpoaꞌ. Oshanënpoaꞌ inquitinpoaso marëꞌ huënainën aꞌparin. Chiminaton, nichaꞌërinpoa.