Juan 20:17 - Chayahuita (Shahui)

¹⁷ —Aꞌpoco imoya. Co tatahuë yaꞌhuërinꞌpaꞌ pantayátërarahuëꞌ. Apira paaton, iyahuëpita pochin niꞌnahuësopita shaꞌhuitonquëꞌ: “Yosë yaꞌhuërinꞌpaꞌ panantarahuë. Inasoꞌ: ‘Tata,’ itato chinotërahuë. Canpitantaꞌ imaramaco niꞌton, ‘Tata,’ itatomaꞌ chinotëramaꞌ, tënin Quisoso, itonquëꞌ,” itërin.

Juan 20:17 ပူးပေါင်းရင်းမြစ်များ

2 Reyes 4:29

Ina natanaton, piyapinën camairin: —Tapatahuaton pitananëhuë maquëꞌ. Ina quëran iso sanapi pëinënquë paquëꞌ. Inso tëranta nacapihuatan ama nontëquësohuëꞌ. Nontopirinënhuë tërantaꞌ, ama aꞌpaniquësohuëꞌ. Canconpatan, huaꞌhuasha yaꞌpirin aipi pitananëhuë acoquëꞌ, itërin.

2 Reyes 7:9

Naporápi quëran inahua capini: —Canpoa marëáchin maꞌsha macatëhuaꞌ, canpoasoꞌ co noyahuëꞌ nisarëhuaꞌ. Iporasoꞌ noya nanan shaꞌhuicasoꞌ yaꞌhuëpirinhuëꞌ, co shaꞌhuirëhuahuëꞌ. Tahuëri huarëꞌ shaꞌhuihuatëhuasoꞌ, anaꞌintaponënpoaꞌ. Ipora chachin paꞌsahuatëhua copirno pëinënquë siriaroꞌsa taꞌapisoꞌ shaꞌhuicontaꞌahuaꞌ, niitopi.

Salmos 22:22

Inapotohuatanco, imarinquënsopita achinicancanarahuë. Niyontonaiquë chinotatënquën: “Yosparinquën,” itarainquën.

Salmos 43:4

Artaronënquë huarëꞌ canconahuato chinotaranquën. Arpa piꞌniato: ‘Yosparinquën,’ itaranquën. Quëmasáchin yonquiatënquën capa cancantërahuë,” itërahuë.

Salmos 89:26

Nontohuachincora, ‘quëmaso tatahuënquën, Yosënëhuënquën, paꞌpoyaranco, nichaꞌëranco, napotëranco,’ itaponco.

Isaías 41:10

Ama manta tëꞌhuacosohuëꞌ, caꞌtanaranquëmaꞌ. Ama paꞌyancosohuëꞌ. Caso Yosëco niꞌsáranquëmaꞌ. Carinquëma achiniatënquëma catahuaranquëmaꞌ. Chiníquën nanantato inchinanëhuë quëran sëꞌquëaranquëmaꞌ.

Jeremías 31:33

Naporo tahuëriꞌsa israiroꞌsarëꞌco anoyatohuato, iso pochin nisarahuë: Aꞌchintërahuësopita yonquinëna quëran anitotarahuë. Ina nitotohuachinaꞌ, noꞌtëquën natëtacaisoꞌ catahuararahuë. Casáchin chinotarinaco. Inapitanta piyapinëhuëpita nisapi.

Ezequiel 36:28

Shimashonëmapita noꞌpaꞌ quëtërahuëquë yaꞌhuëapomaꞌ. Canpitaso piyapinëhuëpita nisaramaꞌ. Canta Yosënëmaco, nisarahuë.

Ezequiel 37:27

Inapita huáncana yaꞌhuëarahuë. Inapitasoꞌ piyapinëhuëpita nisapi. Caso inapita Yosënëna nisarahuë.

Mateo 12:50

Yosë natëpisopita iyahuëpita pochin niꞌnahuë. Sanapiꞌsantaꞌ Yosë nanamën natëhuachinaꞌ, oshihuëpita pochin niꞌnahuë. Payaroꞌsantaꞌ Yosë imapachinaꞌ, mamahuë pochin niꞌnahuë, itërin.

Mateo 25:40

‘Coꞌta, imarinacosopita parisitohuachinara, catahuaramaꞌ. Topinan piyapiꞌsaꞌ, saꞌahuaroꞌsaꞌ, inapita maꞌsha pahuantohuachinara, quëtëramaꞌ. Imatomaco, aꞌnapita catahuaramaꞌ niꞌton, cantaꞌ catahuaramacoso pochin niꞌnahuë,’ itarahuë.

Mateo 28:7

Manóton paatomaꞌ, caꞌtanoꞌsanënpita shaꞌhuitoncoꞌ: “Nani nanpiantarin. Inaꞌton Caririaquë paꞌsarin. Inatohuaꞌ quënancoantaramaꞌ,” itoncoꞌ. Nani shaꞌhuitëranquëmaꞌ, itërin anquëniri.

Marcos 12:26

Chiminpisopita tëhuënchachin nanpiantarapi. ¿Coꞌna ina Moisësë ninshitërinquë nontëramahuëꞌ? Sarsa naraꞌhuaya orotarinsoꞌ nicasoꞌ, Yosëri nontërin. “Casoꞌ Yosëco. Apraan chinotarinco. Isaco, Cacopo, inapitantaꞌ chinotarinaco,” itërin Yosëri.

Marcos 16:19

Nani caꞌtanoꞌsanënpita nontohuachina, inápaquë Sinioro Quisoso panantarin. Yosëri quëpantarahuaton, inchinanën quëran ahuënsërin.

Lucas 10:4

Paꞌpatamaꞌ, ama mantaꞌ quëpacosohuëꞌ. Pëꞌpëto, coriqui, sapatë co inapita tërantaꞌ quëpacasoꞌ yaꞌhuërinhuëꞌ. Piyapiꞌsaꞌ nacapihuatamaꞌ, ama huaꞌquiꞌ nontocosohuëꞌ. Manóton pacoꞌ.

Juan 13:1

Aꞌna tahuëríchin pahuanarin Pascoa nanicasoꞌ. Naporoꞌ naniarin Quisoso chiminaton, Tata Yosëꞌpaꞌ panantacasoꞌ. Ina nitotërin. Caꞌtanoꞌsanënpitacoi naꞌcon nosororincoi. Chiminaquë huarëꞌ nosoromiatërincoi.

Juan 13:3

Quisososo nipirinhuëꞌ yaꞌipi nitotërin. Yosë yaꞌhuërin quëran nani oꞌmarin. Co huaꞌquiya quëranhuëꞌ naquëranchin inatohuaꞌ panantararin. Tata Yosëri chini chiníquën nanan quëtërin yaꞌipiya huaꞌanëntacaso marëꞌ. Inantaꞌ nitotaton, coshatasocoi,

Juan 14:2

Tatahuë yaꞌhuërinquë naꞌa pëiꞌ yaꞌhuërin. Co yaꞌhuërinhuëꞌ naporini, nani shaꞌhuichitënquëmahuëꞌ. Inatohuaꞌ panantarahuë canpita yaꞌhuëcamaso marëꞌ tapachinquëmaꞌ.

Juan 14:28

Nani shaꞌhuitëranquëmaꞌ. Inápaquë pantaporahuëꞌ, yaꞌcoancantimaranquëmaꞌ. Tëhuënchachin nosororamaco naporini, Tatahuëtaquë panantarahuëso marëꞌ noya cancanchitomahuëꞌ. Inasoꞌ chini chiníquën nanantërin.

Juan 14:6

—Ca ira pochinco. Yaꞌipiya noꞌtëquën aꞌchintëranquëmaꞌ. Casáchin nanpicasoꞌ quëtëranquëmaꞌ. Imaramacosopitarachin Yosëꞌpaꞌ cancontaramaꞌ.

Juan 16:28

Tatahuë quëran oꞌmato, isoroꞌpaquë yaꞌhuëpirahuëꞌ. Co huaꞌqui quëranhuëꞌ tatahuë yaꞌhuërinꞌpaꞌ panantarahuë,” itërincoi.

Juan 17:11

Co huaꞌquiya quëranhuëꞌ quëmataquë paantarahuë. Isoroꞌpasoꞌ patarahuë. Imarinacosopitaso nipirinhuëꞌ, isëquë yaꞌhuaponaꞌ. Quëma nohuanton, imasarinaco. Quëmasoꞌ Tata nóyanquën niꞌton, noya aꞌpaiquëꞌ imamiachinaco. Yaꞌipiya nanitaparan niꞌton, catahuaquëꞌ napopianachin yonquiꞌinaꞌ. Canpoꞌ ninosororëso pochin ninosoroꞌinaꞌ.

Juan 17:25

Quëmasoꞌ Tata noꞌtëquënáchin yonquiaton, noyasáchin ninan. Co imarinacosopitahuëꞌ co nohuitërinënquënhuëꞌ. Caso nipirinhuëꞌ nohuitëranquën. Quëma isoroꞌpaquë aꞌpaimaranco. Imarinacosopita nitotopi.

Juan 17:5

Iráca coꞌhuara isoroꞌpaꞌ yaꞌhuëyátërasohuëꞌ, quëmaroꞌco noya noya yaꞌhuëpirahuëꞌ, aꞌpaimaranco. Iporasoꞌ, Tata, quëmataquë naquëranchin acoantaco quëmaroꞌco chachin yaꞌhuantaꞌi.

Juan 20:27

Ina quëran anquirahuaton, Tomasë itërin: —Imirahuë iyasha nicaton, sëꞌhuaquëꞌ. Nininpitëhuëntaꞌ sëꞌhuatoco. Ama huachi nisha nisha yonquiquësohuëꞌ. Natëco huachi, itërin.

Juan 7:33

Huëꞌpirinahuëꞌ, Quisosori itërin: —Co huaꞌquiꞌ canpitaroꞌco yaꞌhuapohuëꞌ. Paꞌmiatarahuë. Yosë nohuanton, oꞌmarahuë. Inaquë chachin panantarahuë.

Romanos 8:29

Iráca quëran huarëꞌ Yosë nohuitërinpoaꞌ. Nohuitatonpoaꞌ, huayoninpoaꞌ Quisocristo pochachin cancantacaso marëꞌ. Quisocristosoꞌ noya noya ninin. Ina quëran naꞌaquënpoaꞌ imapatëhuaꞌ, ina pochin cancantarihuaꞌ. Yosë huiꞌninpita pochin niꞌsarinpoaꞌ canpoantaꞌ.

2 Corintios 6:18

Tataparinquëma pochachin noya nosoroaranquëmaꞌ. Huiꞌnahuëpita pochin cancantëranquëmaꞌ, itërinpoaꞌ Tata Yosë. Chini chiníquën nanantaton, yaꞌipiya huaꞌanëntërin,” tënin quiricanënquë.

Gálatas 3:26

Iporasoꞌ Quisocristo imapatëhuaꞌ, huiꞌninpita pochin Yosë niꞌninpoaꞌ.

Hebreos 11:16

Nipirinhuëꞌ, co isoroꞌpaꞌ naꞌcon yonquipihuëꞌ. Yosë naꞌcon naꞌcon nohuantopi. Ina yaꞌhuërinquë chachin yaꞌhuëcaisoꞌ nohuantopi. Napoaton Yosë tapon: “Nóya yonquirinaco niꞌton, huiꞌnahuëpita pochin niꞌsarahuë. Aꞌna tahuëri inápaquë quëpantarahuë. Nani tapatërahuë yaꞌhuëcaisoꞌ,” tënin.

Hebreos 8:10

Ina quëran itantarin: “Tahuëri nanihuachin, nasha quëran anoyataantarahuë. Naporoꞌ anoyacancantarahuë noya yonquicaiso marëꞌ. Nasha cancan quëtarahuë ca pochin cancantacaiso marëꞌ. Casáchin chinotarinaco niꞌton, noya aꞌpaiarahuë. Ca pochin cancantatonaꞌ, piyapinëhuëpita chachin nisapi.

1 Pedro 1:3

Ma noyacha Tata Yosëso paya. Quisocristo paꞌpin inasoꞌ. Naꞌcon nosoroatonpoaꞌ, nasitantarëso pochin nasha cancan quëtërinpoaꞌ ina nohuitacaso marëꞌ. Quisocristo huaꞌanëntërinpoaꞌ. “Chiminaponahuëꞌ, nanpiantarin niꞌton, canpoantaꞌ nanpiantarihuaꞌ,” taꞌtëhuaꞌ, noya ninarëhuaꞌ. Natëtomiatërëhuaꞌ.

1 Juan 3:2

Naꞌcon, iyaroꞌsaꞌ, nosororanquëmaꞌ. Iporasoꞌ Yosë huiꞌninpita pochin niꞌninpoaꞌ. Aꞌna tahuëri noya noya acoarinpoaꞌ. Onpopinsona nicarihuaꞌ nimara. Co yaꞌipi nitochatërarëhuahuëꞌ. Nipirinhuëꞌ, Quisocristo oꞌmantahuachin, nirayarihuaꞌ. Ina niꞌpatëhuaꞌ, ina pochachin nicarihuaꞌ.

Apocalipsis 21:3

Inápa quëran chiníquën noninsoꞌ natanahuë. —Iporaso huachi, Yosë piyapinënpitarë chachin yaꞌhuërarin. Co onporontaꞌ patarinhuëꞌ. Inapitarëꞌ yaꞌhuëmiatarin.

Apocalipsis 21:7

Sopai minsëhuatamaꞌ, yaꞌipi tapatëranquëmasopita quëchinquëmaꞌ. Huiꞌnahuëpita pochin niꞌsaranquëmaꞌ. Casáchin yonquiaramaco.