Juan 17:19 - Chayahuita (Shahui)

¹⁹ Imarinacosopita nosoroato, yaꞌipi cancanëhuë quëran quëmasáchin natëaranquën. Inapitantaꞌ noꞌtëquën yonquiatonaꞌ, nóya natëinënquën.

Juan 17:19 ပူးပေါင်းရင်းမြစ်များ

Jeremías 1:5

“Coꞌhuara nasichátërasënquënhuëꞌ, huayonanquën. Naporo chachin acoranquën pënëntacaso marëꞌ. Yaꞌipi nisha nisha piyapiꞌsa nipisopita pënënaran,” itërinco.

Juan 10:36

Tata Yosë chachin acorinco nanamën aꞌchinaꞌhuaso marëꞌ. Ina marëꞌ isoroꞌpaquë aꞌpaimarinco. “Casoꞌ Yosë huiꞌninco,” topatëra, ¿onpoatontaꞌ ina marëꞌ pinoramaco? tënahuë.

Juan 15:13

Niꞌcoꞌ iyaroꞌsaꞌ. Nipayarësoꞌ naꞌcon nosorohuatëra, ina nichaꞌëcaso marëꞌ chiminëꞌ. Inapochachin cantaꞌ naꞌcon nosoroatënquëmaꞌ, canpita nichaꞌëcaꞌhuanquëmaso marëꞌ chiminarahuë. Co insontaꞌ ina pochin nosororinquëmahuëꞌ.

Juan 15:3

Carinquëmaꞌ nani anoyacancantëranquëmaꞌ. Aꞌchintëranquëmasoꞌ natëramaꞌ niꞌton, anoyacancantëranquëmaꞌ.

Juan 17:17

Catahuaquëꞌ quëmasáchin cancanchinën. Noꞌtëquën ayonquiquëꞌ noya nicacaiso marëꞌ. Quëma nanamën quëran noꞌtëquën anitotëran.

Juan 17:20

Co isopita marëáchin nontaranquënhuëꞌ. Aꞌna tahuëri inapitanta aꞌnapita aꞌchintohuachinaꞌ, imasarinaco.

1 Corintios 1:2

Corintoquë yaꞌhuëramasopita ninshitaranquëmaꞌ. Canpitantaꞌ Yosë huëntonënquë yaꞌconamaꞌ. Quisocristo imapatamaꞌ, anoyacancantërinquëmaꞌ niꞌton, noyápiachin cancantëramaꞌ. Yosë acorinquëmaꞌ piyapinënpita nicacamaso marëꞌ. Nisha nisha parti aꞌnapitantaꞌ Quisocristo imapi. Yaꞌipinpoaꞌ ina huaꞌanëntërinpoaꞌ. Aꞌna huënton pochin ninëhuaꞌ.

2 Corintios 4:15

Canpitantaꞌ imacamaso marëꞌ parisitërai. Inaora nohuanton, Yosë naꞌcon nosororincoi. Naꞌcon naꞌcon piyapiꞌsaꞌ ina nohuitohuachinaꞌ, noya cancantatonaꞌ, Yosë nontapi. “Ma noyanquëncha, Sinioro, paya. Nosoroatoncoi, nichaꞌësarancoi niꞌton, ‘Yosparinquën,’ Sinioro,” itapi.

2 Corintios 7:14

Coꞌhuara Tito paꞌshátërasohuëꞌ, shaꞌhuitërahuë: “Corintoquë yaꞌhuëpisopita noya imatonaꞌ, natëarinënquën,” itërahuë. Canpita noꞌtëquën nontërainquëmaso pochachin Titontaꞌ noꞌtëquën nontërahuë. Paꞌpachina, tëhuënchachin noya natëramaꞌ niꞌton, co tapanahuëꞌ.

2 Corintios 8:9

Sinioro Quisocristo nosoroatonpoaꞌ, catahuarinpoasoꞌ nani nitotëramaꞌ. Iráca noya noya inápaquë yaꞌhuëpirinhuëꞌ, isoroꞌpaquë oꞌmarin nichaꞌëinquëmaso marëꞌ. Co mantaꞌ isëquë yaꞌhuëtërinhuëꞌ. Parisitërin quëran nichaꞌërinquemaꞌ noya noya cancantacaso marëꞌ. Parisitaton, naꞌcon catahuarinquëmaꞌ.

Colosenses 1:6

Noya nanan chachin yaꞌipi parti aꞌchinapi. Aꞌna parti aꞌna parti piyapiꞌsaꞌ natëtatonaꞌ, noya imasapi. Canpitantaꞌ noya imasaramaꞌ. Yaꞌnan natantapomaꞌ, natëramaꞌ. “Yosë nosoroatonpoaꞌ, inaora nohuanton, nichaꞌësarinpoaꞌ,” itërinënquëmaꞌ. Napotohuachinënquëmara, “Noꞌtëquën shaꞌhuitërinpoaꞌ,” taꞌtomaꞌ, natëramaꞌ.

1 Tesalonicenses 4:7

Co Yosë nohuantërinhuëꞌ oshahuanacasoꞌ. Acorinpoaꞌ noyasáchin nicacaso marëꞌ.

2 Timoteo 2:10

“Yosë nohuanton, huayoninsopita oshaquëran imasapi,” taꞌto, yaꞌipiya ahuantërahuë. Quisocristo imapachinaꞌ, nichaꞌësarin. Oshanënaꞌ inquitahuaton, anoyacancantarin niꞌton, aꞌna tahuëri Yosëꞌpaꞌ nanpiantarapi. Inatohuaꞌ noya noya yaꞌhuëcontapi. Co onporontaꞌ pipiapihuëꞌ.

Tito 2:14

Iráca canpoa marëꞌ chiminin oshanënpoaꞌ inquitinpoaso marëꞌ. Anoyacancantërinpoaꞌ piyapinënpita nicacaso marëꞌ. Huëntonënquë chachin yaꞌconpatëhuaꞌ, noya nicacasoráchin nohuantarihuaꞌ.

Hebreos 10:29

Yosë huiꞌnin chachin aꞌpohuatamaꞌ, ¡aquë aquëtëꞌ anaꞌintinquëmasoꞌ yaꞌhuërin! Quisocristo canpoa marëꞌ chiminin. Huënainën aꞌparin anoyacancantinpoaso marëꞌ. Inapoaton, nasha quëran anoyatërinso shaꞌhuitërinpoaꞌ imacaso marëꞌ. Aꞌnaquënso nipirinhuëꞌ imapirinahuëꞌ. Ina quëran Quisocristo aꞌpopi. Huënainën quëran anoyacancantopirinhuëꞌ, nisha cancantatonaꞌ, ina huënainën chachin nocanpi. Ispirito Santori nosoropirinhuëꞌ, co piꞌpian tërantaꞌ yanatëpihuëꞌ. Inapitasoꞌ Yosëri chini chiníquën anaꞌintarin.

Hebreos 2:11

Anoyacancantohuachinpoara, huiꞌninpita pochin niꞌninpoaꞌ. Canpoarintaꞌ “Tata” itërëhuaꞌ. Napoaton Quisocristo co tapanatonhuëꞌ, iinpita pochin niꞌninpoaꞌ.

Hebreos 9:13

Cotioroꞌsaꞌ co yaꞌipi Moisësë pënëntërinsoꞌ natëhuachinahuëꞌ, nëꞌhuëtërinso pochin niꞌtonaꞌ, co nanitopihuëꞌ chinotopiso pëiquë yaꞌconacaisoꞌ. Napohuachinara, maꞌsharoꞌsaꞌ, chipo, toroaꞌhuaya, inapita chinotopiso pëiquë quëpapi. Inaquë corto huaꞌani tëparahuaton, huënainën manin. Huënainën masahuaton, ohuacaꞌhuaya huiquitërinsoꞌ yanonën ayontërin. Ayontahuaton, oshahuanaꞌpi taꞌsatërin. Inapotohuachina, nëꞌhuëtërinsoꞌ inquirinso pochin ninin niꞌton, naquëranchin nanitërin chinotopiso pëiquë yaꞌconacasoꞌ.

Hebreos 9:18

Napoaton yaꞌnan anoyatërinsontaꞌ shaꞌhuitohuachina, maꞌsharoꞌsaꞌ tëparahuatonaꞌ, huënainënaꞌ aꞌpatopi. Inapotatonaꞌ, iráca anoyatërinsoꞌ imapi.

Hebreos 9:26

Aꞌnaroíchin chiminaponahuëꞌ, yaꞌipi piyapinënpita marëꞌ chiminin. Co aꞌnaromarëáchin nanitërinpoahuëꞌ naporini, iráca quëran huarëꞌ naꞌaroꞌ chimiantaꞌitonhuëꞌ. Iporasoꞌ nani ayaro tahuëri yaꞌcariapirinpoahuëꞌ, aꞌnaroíchin chiminin oshanënpoaꞌ inquitinpoaso marëꞌ.

1 Juan 3:18

“Yaꞌipi imapisopita nosororahuë,” topatëhuaꞌ, ama, apiaꞌhuaroꞌsaꞌ, topinan quëran napoaꞌhuasohuëꞌ. Cancanënpoa quëran huarëꞌ nosoroatëhuaꞌ, catahuahuaꞌ.

1 Juan 3:3

“Aꞌna tahuëri Quisocristo niꞌsarëhuaꞌ,” taꞌtëhuaꞌ, co noyahuëꞌ yonquirëhuasopita naniantarëhuaꞌ. Quisocristosoꞌ noyápiachin cancantërin niꞌton, canpoantaꞌ noyápiachin cancantacasoꞌ nohuantarihuaꞌ.