Juan 17:11 - Chayahuita (Shahui)

¹¹ Co huaꞌquiya quëranhuëꞌ quëmataquë paantarahuë. Isoroꞌpasoꞌ patarahuë. Imarinacosopitaso nipirinhuëꞌ, isëquë yaꞌhuaponaꞌ. Quëma nohuanton, imasarinaco. Quëmasoꞌ Tata nóyanquën niꞌton, noya aꞌpaiquëꞌ imamiachinaco. Yaꞌipiya nanitaparan niꞌton, catahuaquëꞌ napopianachin yonquiꞌinaꞌ. Canpoꞌ ninosororëso pochin ninosoroꞌinaꞌ.

Juan 17:11 ပူးပေါင်းရင်းမြစ်များ

Isaías 64:2

Sarsa naraaꞌhuaroꞌsa pëni ahuiquitërinso pochin, iꞌshahuë nipon ainpiitërinso pochin nicaton, inimiconënpita anaꞌintëran naporini, nohuichitënënhuëꞌ. Nisha nisha nacionoꞌsaquë yaꞌhuëpisopitantaꞌ, quëma notënanquë ropachitonahuëꞌ.

Jeremías 14:21

Quëmaso noyanquën. Naporanso nitotacaiso marëꞌ, ama aꞌpocoisohuëꞌ. Huaꞌanëntëranso shiranën huënaráchin huënaráchin Quirosarin ninanoquë yaꞌhuërin. Ina yonquiaton iso ninanosoꞌ nosoroquëꞌ. Iráca quiyarëꞌquën anoyatëran. Ama ina naniantaton, nonpinatë pochin niquësohuëꞌ.

Jeremías 14:7

Sinioro tëhuënchachin quiyasoꞌ oshahuancoi niꞌton, co catahuancoiso inashitëraihuëꞌ. Napopiraihuëꞌ, noyanquën ninanso nitotacaiso marëꞌ catahuacoi. Nisha nisha cancantatoi naꞌaro tëhuëtërainquën. Inapoatoi naꞌcon oshahuanai.

Mateo 10:16

Ina quëran itaantarin: “Niꞌcoꞌ iyaroꞌsaꞌ. Ohuicaroꞌsaꞌ co nanitopihuëꞌ niaꞌpaicaisoꞌ. Aꞌnaroáchin huëntonën niꞌniroꞌsari mapi. Aꞌchintohuatamaꞌ, aꞌnaquën piyapiꞌsaꞌ niꞌniroꞌsa pochin cancantatonaꞌ, noꞌhuiarinënquëmaꞌ. Napoaton noya yonquicoꞌ. Noꞌhuipirinënquëmaontaꞌ, ama noꞌhuicosohuëꞌ. Noya cancantatomaꞌ, sanoanan quëran nontocoꞌ.

Mateo 5:48

Tata Yosë pochin cancantacasoꞌ yaꞌhuërin. Inaso noyasáchin ninin niꞌton, canpitantaꞌ ina pochin cancantatomaꞌ, noyasáchin nicoꞌ,” tënin.

Mateo 6:9

Napoaton Yosë yanontohuatamaꞌ, iso pochin nontocoꞌ: ‘Tata Yosë, quëmaso inápaquë yaꞌhuaponahuëꞌ, natanancoi. Quëmasáchin noya noyanquën niꞌton, yaꞌipi piyapiꞌsaꞌ chinochinënquën.

Juan 13:1

Aꞌna tahuëríchin pahuanarin Pascoa nanicasoꞌ. Naporoꞌ naniarin Quisoso chiminaton, Tata Yosëꞌpaꞌ panantacasoꞌ. Ina nitotërin. Caꞌtanoꞌsanënpitacoi naꞌcon nosororincoi. Chiminaquë huarëꞌ nosoromiatërincoi.

Juan 13:3

Quisososo nipirinhuëꞌ yaꞌipi nitotërin. Yosë yaꞌhuërin quëran nani oꞌmarin. Co huaꞌquiya quëranhuëꞌ naquëranchin inatohuaꞌ panantararin. Tata Yosëri chini chiníquën nanan quëtërin yaꞌipiya huaꞌanëntacaso marëꞌ. Inantaꞌ nitotaton, coshatasocoi,

Juan 14:20

Nani nanpiantahuato, noya noya nohuitaramaco. Tëhuënchachin Tata Yosë pochin ninahuësoꞌ nitotaramaꞌ. Imamiataramaco niꞌton, canpitarëꞌco aꞌnaíchin pochin nisarahuë. Yaꞌcoancantaranquëmaꞌ niꞌton, nóya ninohuitarihuaꞌ.

Juan 16:28

Tatahuë quëran oꞌmato, isoroꞌpaquë yaꞌhuëpirahuëꞌ. Co huaꞌqui quëranhuëꞌ tatahuë yaꞌhuërinꞌpaꞌ panantarahuë,” itërincoi.

Juan 16:33

Nani naꞌcon shaꞌhuitëranquëmaꞌ sano cancantacamaso marëꞌ. Casáchin yonquihuatamaco, sano cancantaramaꞌ. Co paꞌyanaramahuëꞌ. Piyapiꞌsaꞌ aparisitopirinënquëmahuëꞌ, catahuaranquëmaꞌ niꞌton, chiníquën cancantocoꞌ. Yaꞌipi isoroꞌpaquë co noyahuëꞌ nipisopita nani minsëarahuë, itërincoi Quisoso.

Juan 17:23

Quëma pochachin yonquiato, inapita yaꞌcoancantërahuë canpo pochachin yonquicaiso marëꞌ. Ina quëran co imapisopitahuëntaꞌ nicatonaꞌ: ‘Tëhuënchachin Yosëri huiꞌnin aꞌpaimarin. Huiꞌnin nosororinso pochin imarinsopitantaꞌ nosororin,’ tosapi.

Juan 17:25

Quëmasoꞌ Tata noꞌtëquënáchin yonquiaton, noyasáchin ninan. Co imarinacosopitahuëꞌ co nohuitërinënquënhuëꞌ. Caso nipirinhuëꞌ nohuitëranquën. Quëma isoroꞌpaquë aꞌpaimaranco. Imarinacosopita nitotopi.

Juan 17:6

Quëma nohuanton, aꞌnaya aꞌnaya imasarinaco. Isoroꞌpaquë yaꞌhuëpirinahuëꞌ, huayonan imainacoso marëꞌ. Napoaton, imasarinaco. Nani aꞌchintërahuë. Onpopinsona quëma cancantëransoꞌ nani anitotërahuë niꞌton, nohuitërinënquën. Inapitasoꞌ quëma piyapinënpita. Iráca quëran huarëꞌ yonquiran imainacosoꞌ. Quëma nanamën natëpi.

Juan 7:33

Huëꞌpirinahuëꞌ, Quisosori itërin: —Co huaꞌquiꞌ canpitaroꞌco yaꞌhuapohuëꞌ. Paꞌmiatarahuë. Yosë nohuanton, oꞌmarahuë. Inaquë chachin panantarahuë.

Hechos 3:21

Iráca quëran huarëꞌ Yosë nohuanton, noya pënëntonaꞌpiroꞌsaꞌ ninopi. ‘Aꞌna tahuëri Yosëri yaꞌipiya anoyatarin,’ topi. Anoyataquë huarëꞌ inápaquë Quisoso yaꞌhuantarin.

Romanos 12:5

Inapochachin yaꞌipi Quisocristo imarëhuasopita aꞌnaíchin nonënpoa pochin ninëhuaꞌ. Yaꞌipinpoaꞌ ina imarëhuaꞌ niꞌton, ina pochin ninëhuaꞌ. Nisha nisha nitotërëhuasoꞌ nirihuarahuëꞌ, nicatahuarëhuaꞌ. Aꞌna huëntonaca ninëhuaꞌ.

Romanos 9:17

Iráca Iquipito copirnosoꞌ co noyahuëꞌ cancantopirinhuëꞌ, Yosëri huayonin huaꞌanëntacaso marëꞌ. “Piyapinëhuëpita huaꞌanëntopiranhuëꞌ, nichaꞌësarahuë noya pipicaiso marëꞌ. Ina quëran naꞌa piyapiꞌsaꞌ nicatonaꞌ, ‘Ma noyacha Yosësoꞌ nanitaparin paya. Copirno co nohuantopirinhuëꞌ, piyapinënpita nichaꞌërin,’ tosapi,” tënin. Quiricanën quëran shaꞌhuitërinpoaꞌ.

1 Corintios 1:10

Apira iyaroꞌsaꞌ Sinioro Quisocristo nanan quëtërinco niꞌton, pënënaranquëmaꞌ. Ina imaramaꞌ niꞌquëhuarëꞌ, noya ninontocoꞌ. Ama nisha nisha yonquiatomaꞌ, aꞌnaꞌ aꞌnaꞌ imacosohuëꞌ. Napopináchin yonquiatomaꞌ, noya niniꞌtomaꞌ yaꞌhuëcoꞌ.

Gálatas 3:28

Yosësoꞌ co nisha nisha yonquirinpoahuëꞌ. Aꞌnaquënpoaꞌ cotio piyapinpoaꞌ, aꞌnaquëontaꞌ nisha piyapiꞌsaꞌ. Aꞌnaquëontaꞌ patronoꞌsaꞌ, aꞌnaquënsoꞌ piyapinënpita. Aꞌnaquën sanapiꞌsaꞌ, aꞌnaquënpoaꞌ quëmapinpoaꞌ nipirëhuahuëꞌ, yaꞌipinpoaꞌ Quisocristo imapatëhuaꞌ, aꞌna huëntoínchin pochin ninëhuaꞌ.

Efesios 4:4

Quisocristo imapatëhuaꞌ, yaꞌipinpoaꞌ aꞌna huëntoínchin pochin ninëhuaꞌ. Aꞌnaíchin Ispirito Santo yaꞌhuërinsoꞌ yaꞌcoancantërinpoaꞌ. Imarëhuasopita nichaꞌësarinpoaꞌ yaꞌhuërinquë chachin quëpantaꞌinpoaso marëꞌ. Inasáchin ninarëhuaꞌ.

Filipenses 2:9

Yosëíchin natërin niꞌton, inari ananpitaantarahuaton, inápaquë quëpantarin. Inaquë chini chiníquën nanan quëtërin. Yosë nohuanton, yaꞌipiya huaꞌanëntarin. “Sinioro” itarëhuaꞌ.

Hebreos 1:3

Inasoꞌ paꞌpin pochachin noya nóya ninin. Ina pochachin niꞌton, inasáchin Yosë noꞌtëquën anohuitërinpoaꞌ. Chiníquën nanantërin niꞌton, ipora huantaꞌ ina nohuanton, maꞌsha yaꞌhuërarin. Co yonquirinpoahuëꞌ naporini, yaꞌipiya taꞌhuanchitërihuahuëꞌ. Iráca oshanënpoaꞌ inquitinpoaso marëꞌ chiminin. Chiminpirinhuëꞌ, nanpiantarahuaton, inápaquë panantarin. Inaquë panantarahuaton, Yosë inchinanën quëran huënsërin. Chiníquën nanantaton, huaꞌanëntarin.

Hebreos 9:24

Iráca chinotopiso pëiꞌ, piyapiꞌsari ninin. Quisocristosoꞌ, co inaquë yaꞌconinhuëꞌ. Yosë yaꞌhuërinquë chachin pantarahuaton, canpoa marëꞌ Yosë nontárin. “Oshanënaꞌ inquitaꞌhuaso marëꞌ nani chiminahuë,” taꞌton, nontárin.

Santiago 4:4

Canpitasoꞌ co huachi Yosëíchin yonquiramahuëꞌ. Yosë yonquipiramahuëꞌ, nani maꞌsha naꞌcon naꞌcon nohuantatomaꞌ, yamonshihuaninso pochin cancantëramaꞌ. Capa cancantacasoáchin paꞌyatëramaꞌ. Maꞌsharáchin yonquiatomaꞌ, Yosë inimiconën pochin cancantëramaꞌ.

1 Pedro 1:5

Tata Yosë yaꞌipiya nanitaparin. “Yosë co quënanpirëhuahuëꞌ, catahuarinpoaꞌ,” topatëhuaꞌ, noya aꞌpaiarinpoaꞌ. Maꞌsha onpohuatëhuaꞌ, catahuarinpoaꞌ ahuantacasoꞌ. Ayaroꞌ tahuëri nóya nichaꞌësarinpoaꞌ. Nani yonquirin oꞌmantacasoꞌ. Aꞌna tahuëri niꞌsarëhuaꞌ. Oꞌmantaquë huarëꞌ aꞌpaiarinpoaꞌ.

1 Juan 3:12

Iráca Cainosoꞌ sopai natëton, iin tëparin. ¿Maꞌmarëtaꞌ tëparin? Iinsoꞌ noya ninin niꞌton, noꞌhuiton, tëparin. Ama ina pochin cancantocosohuëꞌ.

1 Juan 5:19

Imarëhuasopitasoꞌ Yosë huiꞌninpitanpoaꞌ ninëhuaꞌ. Aꞌnapitaso nipirinhuëꞌ co imapihuëꞌ niꞌton, sopairi huaꞌanëntërin. Camaihuachina, ina natëpi. Ina nitotërëhuaꞌ.

Judas 1:1

Ca Cotasëco ninshitaranquëmaꞌ. Santiaco iinco casoꞌ. ¿Noyanquëmaꞌ canpitantaꞌ? Cantaꞌ noya yaꞌhuarahuë. Quisocristoíchin natërahuë. Ina acorinco pënëntaꞌhuaso marëꞌ. Quisocristo imaramasopita ninshitaranquëmaꞌ. Tata Yosë nohuanton, imaramaꞌ. Inasoꞌ naꞌcon nosororinquëmaꞌ. Quisocristo imaramaꞌ niꞌton, nóya aꞌpaiarinquëmaꞌ, nichaꞌësarinquëmaꞌ.

Judas 1:24

Tata Yosësoꞌ yaꞌipi nanitaparin. Noya aꞌpaiarinquëmaꞌ ama anotërëso pochin tëhuëcamaso marëhuëꞌ. Catahuahuachinpoaꞌ, co sopai minsëarinpoahuëꞌ. Noya noya tapararinpoaꞌ imamiatacaso marëꞌ. Aꞌna tahuëri yaꞌhuërinquë noya niꞌsarinpoaꞌ. Inatohuasoꞌ noya noya. Capa cancantarihuaꞌ. Tata Yosëíchin huaꞌanëntërinpoaꞌ. Ina nohuanton, Quisocristo nichaꞌësarinpoaꞌ. Inasáchin catahuarinpoaꞌ noya chinotacasoꞌ. Ma noyacha Tata Yosëso paya. Iráca quëra huarëꞌ chini chiníquën nanantërin. Noya noya niꞌton, yaꞌipi piyapiꞌsari chinochinaꞌ. Inasáchin natëahuaꞌ. Ama onporontaꞌ naniantahuasohuëꞌ. Amen. Nani huachi. Cotasë

Apocalipsis 15:4

Yaꞌipiya Sinioro tëꞌhuachinënquën. Yaꞌipiya yonquiꞌinënquën. Quëmasáchin nóyanquën. Aꞌna tahuëri noꞌtëquën oshahuanoꞌsaꞌ anaꞌintaran niꞌton, nisha nisha piyapiꞌsaꞌ huëcatonaꞌ, chinotarinënquën,” topi cantatonaꞌ.

Apocalipsis 19:12

Yaꞌpirin pën nënërinso pochin huënaratarin. Naꞌa yancotëroꞌsaꞌ oro quëran nininsoꞌ yancorin. Inaquë aꞌna nininëontaꞌ ninshitërin, inaora nitotërinsoꞌ.

Apocalipsis 4:8

Nisha nisha niponaraihuëꞌ, yaꞌipiya anpiantëhuanpi. Saota saota yaꞌhuëtopi. Ina aipi, ina acopoꞌ, cato quëran chachin yaꞌpirin yaꞌhuëtopi. Inapitasoꞌ tahuërirë chachin, tashirë chachin Yosë chinotápi. Co taꞌtopihuëꞌ. Napopianachin naporapi: “¡Ma noyacha Tata Yosëso paya! ¡Noyasáchin ninin! Chini chiníquën nanantaton, yaꞌipiya huaꞌanëntarin. Iráca quëra huarëꞌ yaꞌhuërin. Ipora huantaꞌ nanpiárin. Inasoꞌ yaꞌhuërárin. ¡Ma noyacha inaso paya!” tosapi.