Juan 15:20 - Chayahuita (Shahui)

²⁰ Noꞌhuirinaco niꞌton, canpitantaꞌ noꞌhuiarinënquëmaꞌ. Nani shaꞌhuitëranquëmaꞌ: ‘Huaꞌanëmaco niꞌton, co canpitasoꞌ noya noya niꞌsarinënquëmahuëꞌ,’ itëranquëmaꞌ. Aparisitërinaco niꞌton, canpitantaꞌ aparisitarinënquëmaꞌ. Aꞌchinahuësoꞌ natëhuachinaꞌ, canpitantaꞌ natëarinënquëmaꞌ.

Juan 15:20 ပူးပေါင်းရင်းမြစ်များ

Ezequiel 3:7

Israiroꞌsaso nipirinhuëꞌ, co nohuantapihuëꞌ natëinënsoꞌ. Ca chachionta co nohuantopihuëꞌ natëinacoso niꞌton, napotarinën. Yaꞌipi inapitasoꞌ, co natantochináchinhuëꞌ cancantopi.

Mateo 10:24

Niꞌcoꞌ. Patron yaꞌhuëhuachina, co piyapinënpitasoꞌ chini chiníquën nanantërinhuëꞌ. Cantaꞌ canpita maistronëmaco niꞌton, chini chiníquën nanantërahuë.

Marcos 10:39

—Ahuantarai, itopi cato chachin. —¡Naporinchi paya! Ca pochin mini canpitantaꞌ main oꞌorëso pochin parisitaramaꞌ. Iꞌquë yaꞌcoitërëso pochin parisitaramaꞌ.

Lucas 2:34

—Yosë noya aꞌpainquëmaꞌ, itërin Simioni. Ina quëran aꞌshin itantapon: —Huaꞌhuan mashotohuachin, yaꞌipi israiroꞌsaꞌ pënënarin. Natanahuatonaꞌ, aꞌnaquën natëtonaꞌ, noya cancantapi. Aꞌnaquënso nipirinhuëꞌ co nohuantapihuëꞌ niꞌton, anotërëso pochin nisapi. Yosë nohuitacaiso marëꞌ noꞌtëquën pënëntapirinhuëꞌ, chiníquën noꞌhuiapi.

Lucas 6:40

Maistrosoꞌ noya noya nitotaton, aꞌnapita aꞌchintërin. Natanpisopitasoꞌ co naꞌcon naꞌcon nitotopihuëꞌ. Nani yaꞌipi aꞌchintohuachina, maistronëna pochin nisapi.

Juan 10:31

Ina natanahuatonaꞌ, naquëranchin naꞌpiroꞌsaꞌ maantapi. Tëpacaiso marëꞌ maantapirinahuëꞌ,

Juan 11:57

Corto huaꞌanoꞌsaꞌ, parisioroꞌsaꞌ, inapitasoꞌ nani piyapiꞌsaꞌ shaꞌhuitopi: “Quisoso quënanpatamaꞌ, shaꞌhuitocoi maii,” itopi. Tashinan pëiquë poꞌmocaiso marëꞌ napotopi.

Juan 13:16

Tëhuënchachin iyaroꞌsaꞌ patronsoꞌ chiníquën nanantërin. Piyapinënpitaso nipirinhuëꞌ co ina pochin chiníquën nanantopihuëꞌ. Comisionëontaꞌ co huaꞌanën pochin chiníquën nanantërinhuëꞌ.

Juan 5:16

Napoaton Quisoso noꞌhuipi. Chinoto tahuëri anoyatërinso marëꞌ co quëꞌyapihuëꞌ.

Juan 7:32

Ina pochin ninontopisoꞌ, parisioroꞌsaꞌ natantopi. Natantahuatonaꞌ, corto huaꞌanoꞌsarë chachin ponisiaroꞌsaꞌ aꞌpapi Quisoso macacaiso marëꞌ.

Juan 8:51

Noꞌtëquën itaranquëmaꞌ. Natëhuatamaco, co chiminaramahuëꞌ, itërin Quisosori.

Juan 8:52

—Sopai mini nani yaꞌcoancantërinquën. Co huachi yonquiranhuëꞌ. Apraan nani chiminin. Pënëntonaꞌpiroꞌsantaꞌ chiminpi antaꞌ. Quëmaso nipirinhuëꞌ: “Natëhuatamaco, co chiminaramahuëꞌ,” itërancoi.

Juan 8:59

Ina quëran naꞌpiroꞌsaꞌ masahuatonaꞌ, yatëꞌyarapi. Quisososo nipirinhuëꞌ naꞌpirahuaton, Yosë chinotopiso pëi quëran pipirin.

Hechos 14:22

Cara ninanoquë chachin Quisoso imapisopita pënënaꞌpiapi. “Ama iyaroꞌsaꞌ Quisoso aꞌpocosohuëꞌ. Imamiatocoꞌ. Aꞌnapita aparisitarinënpoaꞌ. Parisitacasoꞌ yaꞌhuërin. Parisitatëhuaꞌ, Yosë huaꞌanëntërinquë yaꞌconarëhuaꞌ. Napoaton noya ahuantocoꞌ,” itopi. Pënënpachinara, achinicancanpi.

1 Corintios 4:12

Chiníquën sacatatoi, canotërai. Noꞌhuipirinacoihuëntaꞌ, noya nontërai. Aparisitohuachinacoirantaꞌ, co noꞌhuiraihuëꞌ. Ahuantërai.

2 Corintios 4:9

Aꞌchinaiso marëꞌ chiníquën noꞌhuipirinacoihuëꞌ, co Yosë naniantërincoihuëꞌ. Aparisitopirinacoihuëꞌ, co ataꞌhuantërinacoihuëꞌ.

1 Tesalonicenses 2:15

Iráca cotioroꞌsari pënëntonaꞌpiroꞌsaꞌ noꞌhuitonaꞌ, tëpapi. Ina quëran Sinioro Quisocristo chachin oꞌmahuachina, inantaꞌ tëpaantapi. Quiyantaꞌ aparisitatonacoi, aꞌparinacoi. Napopiso marëꞌ Yosëri co noyahuëꞌ niꞌnin. Tëhuënchachin co yaꞌipi piyapiꞌsaꞌ nosoropihuëꞌ.

2 Timoteo 3:12

Yaꞌipi cancanënpoa quëran Quisocristo imapatëhuaꞌ, aparisitarinënpoaꞌ.

1 Samuel 8:7

Samoirosoꞌ co noyahuëꞌ cancantopirinhuëꞌ, Siniorori itapon: “Ina nohuantopi niꞌquëhuarëꞌ, acotëquë nipachin. Co quëma nocaninënhuëꞌ. Ama cari huaꞌanëntaꞌhuaso marëhuëꞌ ca nocaninaco.