Juan 15:16 - Chayahuita (Shahui)

¹⁶ Co canpitaora nohuanton imaramacohuëꞌ. Ca nohuanto, imaramaco. Carinquëmaꞌ huayonanquëmaꞌ. Nani acoranquëma opa sëꞌpaquën naꞌcon nitërinso pochin nisápamaso marëꞌ. Inapohuatamaꞌ: ‘Quisoso nanan quëtërinco,’ taꞌtomaꞌ, Yosë nontocoꞌ catahuainquëmaꞌ. Ca pochin yonquiatomaꞌ, maꞌsona nipatamaꞌ, acochinquëmaꞌ.

Juan 15:16 ပူးပေါင်းရင်းမြစ်များ

Salmos 145:4

Huiꞌnahuëipitarëꞌcoi chachin, huiꞌnahuëipitanta huiꞌninarë chachin acoransopita yonquiatoi chinotápoinquën. Chiníquën nanantaton nani maꞌsha ninansoꞌ, shaꞌhuirápoi. Noya noya niꞌton, huënaráchin yaꞌnoransontaꞌ, shaꞌhuirápoi. Paꞌyapiro ninansopita shaꞌhuirápoi. Chiníquën nanantaton huëhuëpiro ninansopita shaꞌhuirápoi. Noya noya yaꞌnoranso shaꞌhuirápoi. Nosoromiatërancoisoꞌ yonquiatoi shaꞌhuirápoi. Noyasáchin ninansontaꞌ, chiníquën shaꞌhuirápoi. Naporaisoꞌ, co onporonta nishatapoihuëꞌ.

Miqueas 5:7

Naporoꞌ aꞌnapitaso nisha nisha nacionquë quëpapirinahuëꞌ, yaꞌhuëhuanoꞌsa ahuëaponaꞌ. Oꞌnan, poroncayo, inapitaso co piyapiꞌsa nohuantaiquë huarëꞌ anotërinhuëꞌ. Siniorori aꞌpaimahuachina anotërin. Inapochachin inapitantaꞌ, yaꞌhuëhuanoꞌsa ahuëatona napotaponaꞌ.

Mateo 21:22

Yosë nontohuatamaꞌ, noya natëcoꞌ. “Tëhuënchachin Yosë catahuarinco,” topatamaꞌ, naꞌcon catahuarinquëmaꞌ. Maꞌsona tërantaꞌ nipatamaꞌ, acotarinquëmaꞌ, tënin.

Mateo 7:7

Ina quëran itaantarin: “Nani tahuëri Yosë nontocoꞌ nataꞌinquëmaꞌ. Pahuantërinquëmasoꞌ nipatamaꞌ, quëtarinquëmaꞌ. Maꞌsha yonirëso pochin cancantatomaꞌ, nontácoꞌ catahuainquëmaꞌ. Yaꞌcoana piꞌnirëso pochin cancantatomaꞌ, nontocoꞌ ayaꞌcoinquëmaꞌ.

Lucas 6:13

Tahuërihuachina, imarinsopita përarin. Huëꞌpachinara, shonca catoꞌ acorin naꞌcon naꞌcon aꞌchintacaso marëꞌ. “Aꞌchinacaso marëꞌ aꞌparahuësopita itaranquëmaꞌ,” itërin.

Juan 13:18

“Co yaꞌipinquëmaꞌ noya cancantëramahuëꞌ. Shonca catoyaꞌpinquëmaꞌ huayonanquëmaꞌ caꞌtanamacoso marëꞌ. Yaꞌipinquëmaꞌ noyá nohuitëranquëmaꞌ. Yosë quiricanënquë iráca naporin: ‘Aꞌnaraꞌ carëꞌ coshataponahuëꞌ, inimicotarinco,’ tënin. Ipora huarëꞌ ina pochin nisarin.

Juan 15:19

Inapita pochin cancantëramaꞌ naporini, noya niꞌitënënquëmahuëꞌ. Inahua capiniráchin nipaꞌyatopi. Nipirinhuëꞌ, nani huayonanquëmaꞌ. Ca nohuanto, co inapita pochin cancantëramahuëꞌ. Imaramaco niꞌton, noꞌhuiarinënquëmaꞌ.

Juan 15:5

Ca opa yaꞌhuë pochinco. Canpitasoꞌ sëꞌpaquën pochinquëmaꞌ. Yaꞌcoancantaranquëmaꞌ. Nani tahuëri yonquihuatamaco, catahuaaranquëmaꞌ. Opa noya nitërinso pochin noya nisaramaꞌ. Canpitaora co nanitaramahuëꞌ Yosë pochin cancantacamasoꞌ.

Juan 6:70

—Shonca catonquëmaꞌ acoranquëmaꞌ imacamacoso marëꞌ. Aꞌnaëmaso nipirinhuëꞌ, sopai pochin cancantërin, itërincoi.

Hechos 1:24

Ina quëran Yosë nontopi. “Quëmasáchin Sinioro, yaꞌipi cancanëhuëi quëran yonquiraisoꞌ nitotëran. ¿Insotaꞌ nohuantëran acoaꞌhuaisoꞌ,

Hechos 1:8

Iporaso nipirinhuëꞌ Ispirito Santo naꞌcon catahuarinquëmaꞌ. Yaꞌcoancantohuachinquëmaꞌ, nóya pënëntaramaꞌ. Ina nohuanton, nani maꞌsha nanitaparamaꞌ. Yaꞌipi naporahuësoꞌ niꞌnamaꞌ, nani nitotëramaꞌ. Aꞌnapitantaꞌ shaꞌhuitocoꞌ. Quirosarinquë chachin shaꞌhuitocoꞌ. Ina quëran yaꞌipi Cotia parti paatomaꞌ, shaꞌhuitoncoꞌ. Samaria partintaꞌ shaꞌhuitoncoꞌ. Yaꞌipi parti paatomaꞌ, shaꞌhuitëraꞌpiacoꞌ, itërin Quisosori.

Hechos 10:41

Co yaꞌipi piyapiꞌsari niꞌpihuëꞌ. Yosë nohuanton, quiyarisoꞌ niꞌnai aꞌnapita shaꞌhuitaꞌhuaiso marëꞌ. Nani nanpiantahuachina, quiyarëꞌ coshatërin, oꞌorin. Quisocristo tëhuënchachin nanpiantarin, tënai.

Hechos 22:14

Ina quëran itaantarinco: ‘Yosë chinotërëhuasoꞌ nani huayoninquën nohuantërinso chachin nitotamaso marëꞌ. Ina nohuanton, Quisoso yaꞌnotërinquën. Noya noya inasoꞌ. Nontërinquënsoꞌ natanan.

Hechos 9:15

“Iꞌhua mini co noyahuëꞌ yonquipirinhuëꞌ, nani huayonahuë ca nanamëhuë aꞌchinacaso marëꞌ. Nisha nisha piyapiꞌsaꞌ aꞌchintarin imainacoso marëꞌ. Huaꞌanoꞌsanënpitantaꞌ shaꞌhuitarin. Israiroꞌsantaꞌ aꞌchintarin imainacoso marëꞌ.

Romanos 1:13

Tëhuënchachin iyaroꞌsaꞌ, iráca quëran huarëꞌ nicapënquëmaꞌ yapaꞌpirahuëꞌ. Ipora huantaꞌ co nanitërahuëꞌ pacaꞌhuasoꞌ. Nisha nisha parti aꞌchinpatëra, piyapiꞌsaꞌ natëtonaꞌ, Quisocristo imasapi. Canpitantaꞌ yaaꞌchintëranquëmaꞌ noya noya imacamaso marëꞌ.

Romanos 1:5

Ina nosoroatonco, acorinco nisha nisha piyapiꞌsaꞌ aꞌchintaꞌhuaso marëꞌ. Inapitantaꞌ nanamën natëcaiso marëꞌ pënënarahuë. Natëhuachinaꞌ, “Quisocristosoꞌ noya noya,” tosapi.

Romanos 15:4

Iráca Yosë quiricanënquë naꞌcon ninshitopi. Canpoantaꞌ yonquicaso marëꞌ napopi. “Iráca imapisopitantaꞌ maꞌsha onpoaponaraihuëꞌ, Yosë yonquiatonaꞌ, ahuantopi. Yosëri noya catahuahuachina, imamiatopi. Inapochachin Yosë noya catahuarinpoaꞌ canpoantaꞌ,” taꞌcaso marëꞌ ninshitopi.

Romanos 9:21

¡Coꞌta tëshitonaꞌpi noꞌpaꞌ mapachina, maꞌsona nohuantohuachina, ninin! Nohuantohuachina, aꞌnaquën ninshirayarin. Aꞌnaquënsoꞌ topinanaya. Inapochachin Yosësoꞌ yonquirinpoaꞌ.

1 Corintios 10:11

Yosë nohuanton, iráca napopisopita quiricanënquë ninshitopi pënëinpoaso marëꞌ. Inapita pochin nipatëhuaꞌ, anaꞌintarinpoaꞌ canpoantaꞌ. Nani anaꞌintacasoꞌ tahuëri naniriarin.

Gálatas 1:15

Yosë nosoroatonco, nohuantërinco huiꞌnin imacaꞌhuaso marëꞌ. Coꞌhuara nasichátërapohuëꞌ, yonquirinco nanamën aꞌchinaꞌhuaso marëꞌ. Inaora nohuanton, nosororinco niꞌton, huiꞌnin anohuitërinco nisha piyapiꞌsaꞌ pënënaꞌhuaso marëꞌ. Ina marëꞌ acohuachincora, co piyapiꞌsaꞌ paaparahuëꞌ aꞌchintinacoso marëꞌ.

Efesios 2:10

Yosë anoyacancantërinpoaꞌ. Anoyacancantahuatonpoaꞌ, acorinpoaꞌ nóya nicacaso marëꞌ. Quisocristo catahuahuachinpoaꞌ, noya nisarëhuaꞌ. Iráca quëran huarëꞌ yonquirinpoaꞌ ina pochin nicacasoꞌ. Ina marëꞌ nichaꞌërinpoaꞌ.

Colosenses 1:23

Imamiatohuatamaꞌ, Yosë noya niꞌsarinquëma huachi. Noya nanan natanamaꞌ. “Nichaꞌësarinpoaꞌ,” taꞌtomaꞌ, natërama huachi. Natëmiatocoꞌ. Ama, iyaroꞌsaꞌ, nisha nisha yonquicosohuëꞌ. Ama piꞌpian tërantaꞌ aꞌpocosohuëꞌ. Yaꞌipi parti noya nanan chachin aꞌchinapi. Inachachin cantaꞌ aꞌchinarahuë.

Colosenses 1:6

Noya nanan chachin yaꞌipi parti aꞌchinapi. Aꞌna parti aꞌna parti piyapiꞌsaꞌ natëtatonaꞌ, noya imasapi. Canpitantaꞌ noya imasaramaꞌ. Yaꞌnan natantapomaꞌ, natëramaꞌ. “Yosë nosoroatonpoaꞌ, inaora nohuanton, nichaꞌësarinpoaꞌ,” itërinënquëmaꞌ. Napotohuachinënquëmara, “Noꞌtëquën shaꞌhuitërinpoaꞌ,” taꞌtomaꞌ, natëramaꞌ.

1 Timoteo 2:7

Ina nanan shaꞌhuicaꞌhuaso marëꞌ Yosë acorinco. Aꞌparinco nisha piyapiꞌsaꞌ aꞌchintaꞌhuaso marëꞌ. “Yosë noꞌtëquën nontërinpoaꞌ. Ina natëcoꞌ,” itërahuë. Tëhuënchachin noꞌtëquën nonahuë, co nonpinahuëꞌ.

2 Timoteo 1:11

Yosë acorinco nanamën shaꞌhuicaꞌhuaso marëꞌ. Pënëntaꞌhuaso marëꞌ aꞌparinco. Ina nohuanton, nisha piyapiꞌsaꞌ aꞌchintarahuë.

2 Timoteo 2:2

Piyapiꞌsaꞌ niyontonpachinara, Yosë nanamën aꞌchintërahuë. Quëmantaꞌ natanan. Inapochachin quëmantaꞌ caraíchin quëmapiꞌsaꞌ huayonahuaton, ina nanan chachin aꞌchintantaquëꞌ. Noya natërinsopita aꞌchintëquëꞌ. Inahuanta aꞌnapita aꞌchintacaiso marëꞌ inapotëquëꞌ.

Tito 1:5

Crita parti yaꞌhuarihuaꞌ, aꞌnaya aꞌnaya ninanoquë aꞌchintopirëhuahuëꞌ, pahuanarin yaꞌipi aꞌchinacasoꞌ niꞌton, inaquë huëshiranquën: “Imapisopita yaꞌipi aꞌchintacaso yaꞌhuërinso aꞌchintëquëꞌ. Naporahuaton, yaꞌipi ninanoroꞌsaquë ansianoꞌsaꞌ acoraꞌpiaquëꞌ,” itëranquën.

Hebreos 11:4

Iráca Apiri Yosë natërin. “Yosë catahuarinco,” taꞌton, maꞌsha tëparahuaton, Yosë chinotërin. Inapotohuachina, noya niꞌnin. “Noya natërinco,” tënin. Cainoso nipirinhuëꞌ co ina pochin cancantërinhuëꞌ. Napoaton Apiri nani chiminpirinhuëꞌ, ipora huantaꞌ “Ma noya Apiri natëtërin,” tënëhuaꞌ.

Santiago 3:18

Yosë yonquihuatëhuaꞌ, sano cancantatëhuaꞌ, nanan anoyatarihuaꞌ. Napoaton, noya niniꞌtëhuaꞌ yaꞌhuarihuaꞌ. Noya nipatëhuaꞌ, aꞌnapitantaꞌ nicatonpoaꞌ, noya nisapi.

1 Pedro 3:15

Yaꞌipi cancanëma quëran Quisocristo yonquicoꞌ. Inasoꞌ huaꞌanëntërinpoaꞌ niꞌton, chinotocoꞌ. Nani tahuëriya chiníquën cancantatomaꞌ, yonquicoꞌ Quisocristo nanamën shaꞌhuicamaso marëꞌ. Ina quëran “¿Onpoatomataꞌ imaramaꞌ?” itohuachinënquëmaꞌ, aꞌnaroáchin noꞌtëquën shaꞌhuitaramaꞌ.

1 Juan 4:10

Co canpoarisoꞌ nosoropirëhuahuëꞌ, Yosësoꞌ naꞌcon nosororinpoaꞌ. Ina nohuanton, huiꞌnin chachin oꞌmarahuaton, chiminin. Yaꞌhuërënamënpoaꞌ chiminin niꞌton, oshanënpoaꞌ inquitatonpoaꞌ, nanan anoyatërinpoaꞌ.

1 Juan 4:19

Yosëꞌton naꞌcon nosororinpoaꞌ niꞌton, canpoarintaꞌ Yosë nosoroatëhuaꞌ, aꞌnapitantaꞌ nosoroarihuaꞌ.