Juan 15:15 - Chayahuita (Shahui)

¹⁵ Co casoꞌ patron pochin cancantërahuëꞌ. Patronsoꞌ piyapinënpita camairin. Camaipirinhuëꞌ, yonquirinso chachin co shaꞌhuitërinhuëꞌ. Nipayarinso nipirinhuëꞌ yaꞌipiya shaꞌhuitërin. Inapochachin carinquëmantaꞌ yaꞌipiya shaꞌhuitëranquëmaꞌ. Co piyapinëhuë pochin niꞌnanquëmahuëꞌ. Nipayarahuëso pochachin niꞌnanquëmaꞌ. Yaꞌipi Tatahuë shaꞌhuitërincosopita anitotëranquëmaꞌ.

Juan 15:15 ပူးပေါင်းရင်းမြစ်များ

Amós 3:7

Inapita naporinso pochachin canta maꞌsha yanipatora, piyapinëhuëpita pënëntonaꞌpiroꞌsaꞌton anitotarahuë.

Mateo 13:11

“Yosë huaꞌanëntërinsoꞌ co insontaꞌ inaora yonquinën quëran nitotërinhuëꞌ. Canpitasoꞌ yaꞌipiya aꞌchintaranquëmaꞌ. Aꞌnapitaso nipirinhuëꞌ co yaꞌipi aꞌchintarahuëꞌ. Pënënto nanan quëransáchin aꞌchintarahuë.

Lucas 10:23

Nani aꞌchintohuachina, caꞌtanoꞌsanënpita amasha quëparahuaton, shaꞌhuitërin: “Isoroꞌpaquë oꞌmato, nani maꞌsha ninahuë. Ma noya Yosë nosororinquëmaꞌ niꞌton, niꞌnamaꞌ.

Juan 12:26

Nohuantërahuësoꞌ yanipatamaꞌ, ca pochin cancantatomaꞌ imaco. Insëquësona paꞌpato, piyapinëhuëpita imasarinaco. Inquëma tërantaꞌ ca marëꞌ sacatohuatamaꞌ, Yosë noya niꞌsarinquëmaꞌ, itërin Quisosori.

Juan 13:16

Tëhuënchachin iyaroꞌsaꞌ patronsoꞌ chiníquën nanantërin. Piyapinënpitaso nipirinhuëꞌ co ina pochin chiníquën nanantopihuëꞌ. Comisionëontaꞌ co huaꞌanën pochin chiníquën nanantërinhuëꞌ.

Juan 15:20

Noꞌhuirinaco niꞌton, canpitantaꞌ noꞌhuiarinënquëmaꞌ. Nani shaꞌhuitëranquëmaꞌ: ‘Huaꞌanëmaco niꞌton, co canpitasoꞌ noya noya niꞌsarinënquëmahuëꞌ,’ itëranquëmaꞌ. Aparisitërinaco niꞌton, canpitantaꞌ aparisitarinënquëmaꞌ. Aꞌchinahuësoꞌ natëhuachinaꞌ, canpitantaꞌ natëarinënquëmaꞌ.

Juan 16:12

Naꞌcon yaaꞌchintopiranquëmahuëꞌ, co ipora nanitaramahuëꞌ yaꞌipiya yonquicamasoꞌ.

Juan 17:26

Quëma nanamën nani aꞌchintërahuë nohuitinënquënso marëꞌ. Ipora huantaꞌ aꞌchintarahuë niꞌton, noya noya nohuitarinënquën. Quëma nosororancoso pochachin ninosorocaiso marëꞌ. Inapohuachinaꞌ, inapita yaꞌcoancantato, yaꞌhuëmiatarahuë,” itërin.

Juan 20:17

—Aꞌpoco imoya. Co tatahuë yaꞌhuërinꞌpaꞌ pantayátërarahuëꞌ. Apira paaton, iyahuëpita pochin niꞌnahuësopita shaꞌhuitonquëꞌ: “Yosë yaꞌhuërinꞌpaꞌ panantarahuë. Inasoꞌ: ‘Tata,’ itato chinotërahuë. Canpitantaꞌ imaramaco niꞌton, ‘Tata,’ itatomaꞌ chinotëramaꞌ, tënin Quisoso, itonquëꞌ,” itërin.

Juan 4:19

—Quëmasoꞌ sinioro ninotonaꞌpinquën, tënahuë.

Juan 8:26

Canpitaso co noyahuëꞌ ninama niꞌton, naꞌcon shaꞌhuitaꞌhuanquëmaso yaꞌhuërin. Aꞌpaimarincosoꞌ noꞌtëquënáchin nonin. Ina shaꞌhuitohuachincora natanato, ina chachin shaꞌhuitaranquëmaꞌ, tënin.

Romanos 7:15

Noya nisarahuë, topirahuëꞌ, aꞌnaroáchin co noyahuëꞌ yaninahuë. Co yaoshahuanpirahuëꞌ, oshahuanahuë. Onpoatosoꞌ napomaraco, co nitotërahuëꞌ.

1 Corintios 2:16

Quiricanënquë naporin: “¡Co insontaꞌ Yosë yonquirinsoꞌ nitotërinhuëꞌ! ¡Co incari tërantaꞌ nanitërinhuëꞌ ina aꞌchintacasoꞌ!” tënin. Canpoaso nipirinhuëꞌ Quisocristo imapatëhuaꞌ, yonquirinso chachin ayonquiarinpoa huachi.

Gálatas 4:6

Huiꞌnin pochachin nicatonpoaꞌ, Ispirito Santo ayaꞌcoancantërinpoaꞌ. Ina quëran Yosë nontohuatëhuaꞌ, Ispirito Santo nohuanton, “Tata” itërëhuaꞌ.

Efesios 1:9

Inaora nohuanton, nóya yonquirinpoaꞌ. Co canpoara nitotopirëhuahuëꞌ, yonquirinpoasoꞌ anitotërinpoaꞌ. Iráca quëran huarëꞌ yonquirin Quisocristo aꞌpaimacasoꞌ.

Efesios 3:5

Iráca co iso nanan nitotopihuëꞌ. Iporasoꞌ Quisocristo acorincoisopita nitotërai. Pënëntonaꞌpiroꞌsantaꞌ nitotopi. Ispirito Santo anitotërincoi aꞌchinaꞌhuaiso marëꞌ.

Colosenses 1:26

Iráca iso nanan co nitotopihuëꞌ. Iporaso nipirinhuëꞌ imarëhuasopita anitotërinpoaꞌ. Yonquirinso chachin anitotërinpoaꞌ.

Filemón 1:16

Quëma marëꞌ sacatopirinhuëꞌ, ama huachi piyapinën pochin niꞌquësohuëꞌ. Piyapinën niponahuëꞌ, iporasoꞌ noya noya niꞌquëꞌ. Quisocristo imarin niꞌton, iyanpo pochachin nosoroquëꞌ. Carisoꞌ naꞌcon nosororahuë. Quëmasoꞌ aquëtë huarëꞌ naꞌcon naꞌcon nosoroquëꞌ, tënahuë.

Santiago 1:1

Ca Santiacoco ninshitaranquëmaꞌ, niꞌcoꞌ. ¿Noya canpitantaꞌ yaꞌhuaramaꞌ? Cantaꞌ isëquë noya yaꞌhuarahuë. Tata Yosë huaꞌanëntërinco niꞌton, Sinioro Quisocristoíchin natërahuë. Yaꞌipi cotioroꞌsanquëmaꞌ Quisocristo imaramasoꞌ ninshitaranquëmaꞌ. Canpitasoꞌ yanquëërahuatomaꞌ, nisha nisha parti yaꞌhuaramaꞌ. Yaꞌipi Yosë piyapinënpitanquëmaꞌ ninamasoꞌ ninshitaranquëmaꞌ.

Santiago 2:23

Yosë quiricanënquë ninshitërin: “ ‘Yosë noꞌtëquën nontërinco,’ tëninso marëꞌ Yosëri noya niꞌnin,” tënin. “Inasoꞌ Yosërëꞌ nipayarin,” tënin antaꞌ. Noꞌtëquën naporin.

1 Pedro 1:11

Ispirito Santo nohuanton, iráca Cristo ninopi. “Parisitapon. Ina quëran nanpiantarahuaton, noya noya yaꞌhuapon,” topi ninotonaꞌ. Napoatonaꞌ, yonquiapi. “¿Ma quëmapitaꞌ oꞌmaton, parisitapon? ¿Onporotaꞌ parisitaponsoꞌ?” topi.

2 Pedro 1:1

Ca Simon Pitroco ninshitaranquëmaꞌ, niꞌcoꞌ. ¿Noya yaꞌhuaramaꞌ? Noya cantaꞌ yaꞌhuarahuë. Quisocristoíchin huaꞌanëntërinco niꞌton, inasáchin natërahuë. Ina acorinco nanamën aꞌchinaꞌhuaso marëꞌ. Yosë nohuanton, canpitantaꞌ Quisocristo natëramaꞌ. Quiya pochin imaramaꞌ niꞌton, canpitantaꞌ nichaꞌësarinquëmaꞌ. Ma noyacha Quisocristo anoyacancantërinpoa paya, tënëhuaꞌ. Inasoꞌ Yosë niꞌton, chinotërëhuaꞌ. Oshanënpoaꞌ inquitatonpoaꞌ, nóya niꞌninpoaꞌ. Napopianachin nosororinpoaꞌ niꞌton, catahuarinquëmaꞌ canpitantaꞌ cancanëma quëran huarëꞌ natëcamasoꞌ.

Judas 1:1

Ca Cotasëco ninshitaranquëmaꞌ. Santiaco iinco casoꞌ. ¿Noyanquëmaꞌ canpitantaꞌ? Cantaꞌ noya yaꞌhuarahuë. Quisocristoíchin natërahuë. Ina acorinco pënëntaꞌhuaso marëꞌ. Quisocristo imaramasopita ninshitaranquëmaꞌ. Tata Yosë nohuanton, imaramaꞌ. Inasoꞌ naꞌcon nosororinquëmaꞌ. Quisocristo imaramaꞌ niꞌton, nóya aꞌpaiarinquëmaꞌ, nichaꞌësarinquëmaꞌ.

Apocalipsis 1:1

Tata Yosë nohuantërin yaꞌipinpoaꞌ iso nanan nitotacasoꞌ. Napoaton aꞌna tahuëri maꞌsha onpocasoꞌ nininsoꞌ Quisocristo shaꞌhuitërin anitotinpoaso marëꞌ. Inasoꞌ anquëni aꞌpaimarin ca Coanshaco shaꞌhuitiincoso marëꞌ. Quisocristoíchin casoꞌ natërahuë. Anquëni oꞌmarahuaton, nani maꞌsha aꞌnotërinco.