Juan 14:23 - Chayahuita (Shahui)

²³ Napotohuachina, Quisosori itërin: —Co yaꞌipi piyapiꞌsaꞌ nanitopihuëꞌ nohuitinacosoꞌ. Insosona nosorohuachinaco, natëarinaco. Natëhuachinaco, Tata Yosëri nosoroarin. Inaroꞌco yaꞌcoancantatoi, inaquë yaꞌhuëarai.

Juan 14:23 ပူးပေါင်းရင်းမြစ်များ

Génesis 1:26

Naporo tahuëri chachin tapon: “¡Iporaso huachi piyapi niahuaꞌ! Inaso canpoa pochachin nisarin. Chiníquën nanantaton, samiroꞌsaꞌ, anpiantëhuanoꞌsaꞌ, inapita huaꞌanëntarin. Maꞌsharoꞌsa pëꞌtahuacaiso nipisopita, tananquë yaꞌhuëcaiso nipisopita, niohuaratërinsopita, yaꞌipi inapitanta huaꞌanëntarin,” tënin.

Génesis 11:7

Napoaton acopitacaso marëꞌ, paꞌmatëhua nonpiso anishatahuaꞌ. Ama huachi ninatanacaiso marëhuëꞌ, napotahuaꞌ,” tënin.

Salmos 90:1

Sinioro quëmasoꞌ paꞌpoyarancoi. Iráca quëran huarëꞌ aꞌpairancoi.

Salmos 91:1

Siniorosoꞌ chini chiníquën nanantaton, yaꞌipi nanitaparin. Ina yaꞌipi cancanënpoa quëran imapatëhuaꞌ, sano yaꞌhuëarihuaꞌ. Chiníquën nanantaton aꞌpaiarinpoaꞌ.

Juan 10:30

Caso Tatahuëroꞌco napopináchin cancantërahuë, itërin Quisosori.

Juan 14:15

Ina quëran taantarin: “Nani pënënanquëmaꞌ. Nosorohuatamaco, natëaramaco.

Juan 14:17

Ispirito Santosoꞌ noꞌtëquënáchin nonin niꞌton, Yosë nanamën noꞌtëquën anitotarinquëmaꞌ. Co imarinacosopitasohuëꞌ nipirinhuëꞌ co ina natëpihuëꞌ. Napoaton co nohuitapihuëꞌ. Canpitaso nipirinhuëꞌ nohuitaramaꞌ. Nani tahuëri catahuarinquëmaꞌ. Yaꞌcoancantarinquëmaꞌ.

Juan 14:21

Nani pënënanquëmasoꞌ nitotatomaꞌ natëhuatamaco, tëhuënchachin nosoroaramaco, tënahuë. Nosorohuatamaco, Tata Yosëntaꞌ nosoroarinquëmaꞌ. Carinquëmantaꞌ nosoroaranquëmaꞌ. Inápaquë panantaporahuëꞌ, cancanëma quëran nontaranquëmaꞌ. Noya noya nohuitaramaco,” itërin Quisosori.

Juan 14:24

Coꞌsoꞌ nosorohuachinacohuëꞌ, co natëarinacohuëꞌ. Co caora yonquinëhuë quëran shaꞌhuitëranquëmahuëꞌ. Tata Yosë shaꞌhuitohuachincora, inachachin shaꞌhuitëranquëmaꞌ. Ina aꞌpaimarinco.

Juan 15:10

Tata Yosë noꞌtëquën natërahuë niꞌton, paꞌpi nosororinco. Inapochachin natëhuatamaco, carinquëmantaꞌ paꞌpi nosoroaranquëmaꞌ.

Juan 16:27

Tatahuë chachin nosororinquëmaꞌ. Nosororamaco niꞌton, nosororinquëmaꞌ. Ina aꞌpaimarincosoꞌ natëramaꞌ niꞌton, nosororinquëmaꞌ canpitantaꞌ.

Juan 6:56

Tëhuënchachin nonëhuë caꞌnëso pochin nipatamaꞌ, huënainëhuëntaꞌ oꞌorëso pochin nipatamaꞌ, yaꞌcoancantaranquëmaꞌ niꞌton, imamiataramaco.

Juan 8:51

Noꞌtëquën itaranquëmaꞌ. Natëhuatamaco, co chiminaramahuëꞌ, itërin Quisosori.

Juan 8:52

—Sopai mini nani yaꞌcoancantërinquën. Co huachi yonquiranhuëꞌ. Apraan nani chiminin. Pënëntonaꞌpiroꞌsantaꞌ chiminpi antaꞌ. Quëmaso nipirinhuëꞌ: “Natëhuatamaco, co chiminaramahuëꞌ,” itërancoi.

2 Corintios 6:16

Yosë chinotërëhuaquë noyasáchin nicacasoꞌ yaꞌhuërin. Co inaquësoꞌ mamanshi moshacasoꞌ yaꞌhuërinhuëꞌ. Inapochachin canpoantaꞌ Yosë imapatëhuaꞌ, yaꞌcoancantarinpoaꞌ niꞌton, ina pëinën pochin ninëhuaꞌ. Yosësoꞌ nanpiárin. Quiricanën quëran naporin: “Imapatamaco, yaꞌcoancantaranquëmaꞌ. Canpitaroꞌco yaꞌhuarahuë. Chinotohuatamaco, noya aꞌpaiaranquëmaꞌ. Piyapinëhuëpita pochin niꞌsaranquëmaꞌ,” tënin.

Efesios 3:17

Yaꞌipi cancanëna quëran natëtatonaꞌ, Quisocristoíchin yonquiꞌinaꞌ. ‘Cancanëhuëquë yaꞌhuërarin,’ taꞌtonaꞌ, noya noya nohuichinën. Catahuaquëꞌ noya nosoroꞌinën. Yaꞌipi piyapiꞌsantaꞌ nosoroꞌinaꞌ, Nara itëquën acopoꞌ paꞌpachina, co inpaninhuëꞌ. Inapochachin inapitantaꞌ ‘Quisocristo naꞌcon nosororincoiꞌ,’ taꞌtonaꞌ, aꞌnapitantaꞌ nosoroꞌinaꞌ. Noya ninosorohuachinaꞌ, Ispirito Santori catahuararin chiníquën cancantacaisoꞌ.

1 Juan 2:24

Yaꞌnan imapomaꞌ, noꞌtëquën aꞌchintërainquëmaꞌ. Ina chachin imamiatocoꞌ. Ina imapatamaꞌ, cancanëma quëran Tata Yosë nohuitaramaꞌ. Huiꞌniontaꞌ noya nohuitarama huachi.

1 Juan 2:5

Yosë nanamën natëhuatëhuaꞌ, noya noya Yosë nosoroarihuaꞌ. Ina pochin cancantohuatëhuaꞌ, tëhuënchachin ina nohuitarihuaꞌ.

1 Juan 4:4

Canpitasoꞌ apiaꞌhuaroꞌsaꞌ, Yosë huiꞌninpitanquëmaꞌ ninamaꞌ. Noꞌtëquën yonquiatomaꞌ, nisha aꞌchinaꞌpiroꞌsaꞌ minsëaramaꞌ. Sopai nohuanton, nonpin nananoꞌsaꞌ aꞌchintopirinënquëmahuëꞌ, Ispirito Santo nani yaꞌcoancantërinquëmaꞌ. Inasoꞌ sopai quëran chini chiníquën nanantarin niꞌton, catahuahuachinpoaꞌ, co nonpin nananoꞌsaꞌ natëtarihuahuëꞌ.

1 Juan 5:3

Yosë nosorohuatëhuaꞌ, pënëninpoasoꞌ noꞌtëquën natëarihuaꞌ. Catahuahuachinpoaꞌ, nanitaparëhuaꞌ.

2 Juan 1:6

Yosë nosorohuatëhuaꞌ, natëarihuaꞌ. “Yaꞌipi piyapiꞌsaꞌ nosorocoꞌ,” itërinpoaꞌ. Yaꞌnan imarama quëra huarëꞌ ina natanamaꞌ.

Apocalipsis 21:22

Inaquësoꞌ co Yosë chinotacasoꞌ pëiꞌ yaꞌhuërinhuëꞌ. Yosë chini chiníquën nanantërinso chachin yaꞌipi parti yaꞌhuarin. Carniroaꞌhuantaꞌ yaꞌhuarin niꞌton, noya noya chinotarihuaꞌ.

Apocalipsis 21:3

Inápa quëran chiníquën noninsoꞌ natanahuë. —Iporaso huachi, Yosë piyapinënpitarë chachin yaꞌhuërarin. Co onporontaꞌ patarinhuëꞌ. Inapitarëꞌ yaꞌhuëmiatarin.

Apocalipsis 22:3

Inaquë co huachi anaꞌintinpoasoꞌ yaꞌhuaponhuëꞌ. Tata Yosë Carniroaꞌhuarë chachin huaꞌanëntarin huachi. Nani tahuëri piyapinënpoapita ina chinotáparihuaꞌ.