Juan 12:13 - Chayahuita (Shahui)

¹³ mërëmë pochin nininsoꞌ mapi. Ina quëran nacapiaponaꞌ paꞌsapi. Paꞌyatatonaꞌ, chiníquën itaponaꞌ: —¡Nichaꞌëcoi Tata Yosë! ¡Ma noyacha Quisososo paya! ¡Quëmari chachin chiníquën nanan quëtëran! ¡Quëma nohuanton, israiroꞌsacoi huaꞌanëntarincoi! tosapi.

Juan 12:13 ပူးပေါင်းရင်းမြစ်များ

Isaías 44:6

Siniorosoꞌ yaꞌipi nanitaparin. Inasoꞌ, israiroꞌsa nichaꞌësahuaton huaꞌanëntërin. Ina nontatënquëma naporin: “Coꞌhuara isoroꞌpaꞌ yaꞌhuëyátërasohuëꞌ, caꞌton yaꞌhuërahuë. Nani maꞌsha yaꞌhuërinsopita taꞌhuantopiriontaꞌ, caso yaꞌhuëápo. Casáchin Yosëco.

Oseas 3:5

Ina piquëran israiroꞌsasoꞌ, Yosë chachin tahuërëtaantaponaꞌ. Naporahuaton aꞌnara Tapi copirno shiin, copirnonëna nisarin. Tahuëri yanitiquirahuachin, Sinioro noya nicatonaꞌ, chinotapi. Inapotohuachina inarintaꞌ, noya nicaton catahuaantapon.

Levítico 23:40

Caniaritërinso tahuëri, sharoꞌsa noya noyatërinsopita nitërinsoꞌ masaramaꞌ. Palmeraroꞌsa monoquëntaꞌ, masaramaꞌ. Panca taꞌan nara sëꞌpaquëontaꞌ, masaramaꞌ. Iꞌ yonsanquë huanirinsopita aramo nara itopisoꞌ sëꞌpaquëonta masaramaꞌ. Inapita quëran imënamëtatomaꞌ, chinotamacoso huayonahuëquë canchisë tahuëri ca yonquiatomaco nóya cancantaramaꞌ.

Mateo 23:39

Cantaꞌ, co huachi quënanaramacohuëꞌ. Oꞌmantaꞌhuasoꞌ tahuëri huarëꞌ quënaantaramaco. Naporoꞌ: ‘¡Ma noyanquëncha quëmaso paya! Sinioro chachin aꞌpaimarinquën,’ itaramaco huachi,” itërin Quisosori.

Mateo 27:42

—Aꞌnapitasoꞌ yanichaꞌëponahuëꞌ, inaora chachinsoꞌ co nanitërinhuëꞌ chaꞌëcasoꞌ. Israiroꞌsaꞌ copirno nipachin, corosë quëran nohuarain nicatëhuaꞌ natëahuaꞌ.

Juan 1:49

—Quëmasoꞌ Maistro, Yosë huiꞌninquën. Israiroꞌsaꞌ copirnonquën, tënahuë, itërin.

Juan 12:14

Mora quënanconahuaton, ina aipi Quisoso huënsërin. Iráca Yosë quiricanënquë, pënëntonaꞌpi ninshitërin Quirosarinquë yaꞌhuëpisopita nitotacaiso marëꞌ.

Juan 12:15

“Quirosarinquë yaꞌhuëramasopita, ama paꞌyancosohuëꞌ. Niꞌcoꞌ. Huaꞌanëmaꞌ huëꞌsarin. Mora huiꞌnapishin aipi huënsëriarin. Inaquë yaꞌmitahuaton huëꞌsarin,” tënin ninshitaton.

Juan 19:15

—Co quiyarisoꞌ nohuantëraihuëꞌ. ¡Aꞌnaroáchin atëpatëquëꞌ! ¡Corosëquë apatanantëquëꞌ chimiin! itaantapi huaꞌanoꞌsari. —Copirnonëmaꞌ nipirinhuëꞌ, ¿atëpachi ti? itërin. —¡Noma copirnoíchin natërai quiyantaꞌ! Co aꞌna copirno yaꞌhuëtërincoihuëꞌ, itopi.

Apocalipsis 15:3

Iráca Moisësë Yosëíchin natëton, inimiconënpita minsërahuaton, cantarin. Inapochachin isopitantaꞌ cantarapi. Carniroaꞌhua cantarinsontaꞌ cantarapi. “¡Ma noyanquëncha, Sinioro, quëmaso paya! Yaꞌipi nanitaparan. Ma noyacha catahuarancoi paya. Chiníquën nanantaton, noya ninan. Noya huaꞌanëntaton, noꞌtëquën anaꞌintëran. Co onporontaꞌ nonpinanhuëꞌ. Yaꞌipi piyapiꞌsaꞌ natëinënquën.

Apocalipsis 19:16

Aipi aꞌmorinsoquë nani ninshitërin: iso quëmapi chini chiníquën nanantaton, yaꞌipi copirnoroꞌsantaꞌ, huaꞌanëntarin. inasáchin natëcasoꞌ yaꞌhuërin tënin. Tonamënquëntaꞌ ina chachin ninshitërin.

Apocalipsis 7:9

Ina quëran huaꞌnarëso pochin niantarahuë. Huaꞌhuayatërahuëꞌ piyapiꞌsaꞌ Yosëꞌpaꞌ quënanahuë. Co pichicasohuëꞌ. Nisha nisha piyapiꞌsaꞌ Yosë huaꞌanëntacasoꞌ shiranën notënanquë huaniapi, nisha nisha nananquë nonpisopita. Nisha nisha parti quëran huëcatonaꞌ, Carniroaꞌhua yamotatonaꞌ, notërapi. Inapitasoꞌ huiríchin aꞌmopi. Mërëmë pochin nininsoꞌ sëꞌquërahuatonaꞌ, Yosë chinotapi.