Juan 1:14 - Chayahuita (Shahui)

¹⁴ Quisocristo isoroꞌpaquë nasitimarin. Yosë niponahuëꞌ, piyapi chachin nasitërin. Canpoarë chachin yaꞌhuërin. Quiyasoꞌ niꞌnai. Inasoꞌ nóya, tënai. Yosë pochachin ninin. Inaíchin huiꞌnin inasoꞌ. Inaora nohuanton nosororinpoaꞌ. Noꞌtëquën nontërinpoaꞌ.

Juan 1:14 ပူးပေါင်းရင်းမြစ်များ

Salmos 2:7

Copirno acorinsonta pënëntaton: “Iporaso Sinioro yonquirinsoꞌ, shaꞌhuichinquëmaꞌ. Inachachin nontatonco: ‘Quëmasoꞌ huiꞌnahuënquën. Ipora acoranquën huaꞌanëntamaso marëꞌ.

Isaías 40:5

Naporoꞌ Sinioro chini chiníquën nanantërinsoꞌ aꞌnotarinpoaꞌ. Napohuachina yaꞌipi piyapiꞌsari niꞌsapi. Sinioro chachin naporin,” tapon.

Isaías 53:2

Sinioro nohuanton piyapinën, co chiníquën nanantonaꞌpi pochin yaꞌnoarinhuëꞌ. Naraaꞌhuaya yaniroquë co noyatërinhuëꞌ. Inapochachin inantaꞌ, co noya noyatarinhuëꞌ.

Isaías 7:14

Sinioro chachin napoahuarëꞌ maꞌsona aꞌnotarinquëma nitotamaso marëꞌ: Niꞌquëꞌ. Ca nohuanton nanon cayoapon. Inapoaton quëmapiaꞌhuaya huaipon. Inasoꞌ huaꞌhuin nohuitaton, Imanino itapon.

Ezequiel 37:27

Inapita huáncana yaꞌhuëarahuë. Inapitasoꞌ piyapinëhuëpita nisapi. Caso inapita Yosënëna nisarahuë.

Mateo 1:16

Cacopontaꞌ huiꞌnahuanpachina, Cosi itopi. Cosi yasaꞌapachina, Maria manin. Ina huaꞌhuinsoꞌ Quisoso, Cristo itopisoꞌ.

Lucas 2:11

Ipora tashiꞌ aꞌnara quëmapiaꞌhuaya Pirinquë nasitërin. Inasoꞌ Cristo, Yosëri aꞌpaimarinsoꞌ. Sinioro niꞌton, chinotacasoꞌ yaꞌhuërin. Nani oꞌmarin piyapiꞌsaꞌ cancanënaꞌ anoyatacaso marëꞌ.

Lucas 2:7

Paninan huairin, quëmapiaꞌhuaya. Nëꞌmëtërinquë soꞌquëëtahuaton, nonaꞌhuayaquë acorin, ohuaca coshatërinquë. Huëꞌëcaisoꞌ pëiꞌ nani yaꞌsotopi niꞌton, co inaquë huëꞌëpatërinhuëꞌ. Napoaton nonaꞌhuayaquë huaꞌhuin acorin.

Lucas 9:32

Caꞌtanoꞌsanënpitaso nipirinhuëꞌ huëꞌëiꞌ iquitatonaꞌ, yahuëꞌëpirinahuëꞌ. Capayatantahuachinara, Quisoso huënaráchin nininsoꞌ quënanpi. Moisësë, Iniasë, inapitantaꞌ quënanpi.

Juan 1:1

Iráca quëran huarëꞌ Yosë noninsoꞌ yaꞌhuërin, Quisocristo itërëhuasoꞌ. Tata Yosërëꞌ yaꞌhuërin. Yosë pochachin ninin antaꞌ.

Juan 11:40

—Ama imoya ina pochin yonquiquësohuëꞌ. Yosë yaꞌipiya nanitaparin. Natëhuatanco, Yosë nóya nininsoꞌ niꞌsaran, itërin.

Juan 14:6

—Ca ira pochinco. Yaꞌipiya noꞌtëquën aꞌchintëranquëmaꞌ. Casáchin nanpicasoꞌ quëtëranquëmaꞌ. Imaramacosopitarachin Yosëꞌpaꞌ cancontaramaꞌ.

Juan 14:9

—Isonápoꞌ piꞌipi iyasha, canpitaroꞌco yaꞌhuëpirahuëꞌ, ¿co nohuichatërarancohuëꞌ ti? Niꞌpatamaco, tatahuëntaꞌ niꞌnamaꞌ. ¿Onpoatontaꞌ nipachin, “Tata aꞌnotocoi niꞌii,” itëranco?

Juan 17:22

Quëma nohuanton, noyápiachin cancantërahuë. Imarinacosopitantaꞌ catahuarahuë noyápiachin cancantacaiso marëꞌ. Ina quëran aꞌna huënton pochin napopianachin yonquiapi. Canpo pochachin cancantapi.

Juan 17:24

Quëma nohuanton Tata, isopitasoꞌ imasarinaco. Inapita nohuantërahuë carëꞌ yaꞌhuëcaisoꞌ. Iráca quëran huarëꞌ quëma nosororanco. Coꞌhuara isoroꞌpaꞌ yaꞌhuëyátërasohuëꞌ, nosoroatonco, nóya acoranco. Inatohuaꞌ inapitantaꞌ pantahuachinaꞌ, noya noya niꞌsarinaco. Ina naꞌcon nohuantërahuë.

Juan 18:37

—Napoahuarëꞌ ¿quëmasoꞌ copirnonquën? itërin Piratori. —Inaco mini. Ina marëꞌ nasitimarahuë. Oꞌmarahuë noꞌtën nanan pënëntaꞌhuaso marëꞌ. Noꞌtëquën yonquipisopita natëarinaco, itërin.

Juan 2:11

Naporoꞌ Quisoso caniaritërin Yosë pochin nicacasoꞌ. Piyapiꞌsari nicatonaꞌ: “Tëhuënchachin Yosëri catahuarin niꞌton, nanitaparin,” topi. Caꞌtanoꞌsanënpitacointa niꞌsahuatoi: “Quisososoꞌ, Yosëri aꞌpaimarinsoꞌ,” tënai. Canaquë naporin. Inaso ninanoꞌ, Cariria parti yaꞌhuërin

Juan 3:16

Yosësoꞌ yaꞌipi piyapiꞌsaꞌ paꞌpi nosoromiatërin. Napoaton aꞌnaíchin huiꞌnin nipirinhuëꞌ, isoroꞌpaquë aꞌpaimarin chiminacaso marëꞌ. Ina natëtëhuaꞌ: “Ca marëꞌ chiminin,” topatëhuaꞌ, co parisitopiquë paꞌsarëhuahuëꞌ. Yosë nohuitatëhuaꞌ, nanpimiatarëhuaꞌ.

Juan 3:18

Huiꞌnin natëhuatëhuaꞌ, co Yosë anaꞌintarinpoahuëꞌ. Co natëpisopitahuëꞌ nani Yosëri yonquirin anaꞌintacasoꞌ. Inaíchin huiꞌnin nipirinhuëꞌ, co natëpihuëꞌ. Napoaton anaꞌintarin.

Juan 6:51

Ca nanpirin cosharo pochinco. Inápa quëran oꞌmato, noya noya ananpiaranquëmaꞌ. Ca nonëhuë chachin quëtarahuë yaꞌipi piyapiꞌsa marëꞌ. Coshatëramaso pochin nitohuatamaco, yaꞌcoancantaranquëmaꞌ, nanpimiatarama huachi, itërin.

Juan 8:32

Imamiatohuatamaco, noꞌtëquën yonquiaramaꞌ. Co insontaꞌ camaiarinquëmahuëꞌ, itërin.

Hechos 13:33

Iporasoꞌ nani Quisoso aꞌpatimarinpoaꞌ. Shinpitanpoaꞌ niꞌtëhuaꞌ, yonquirinpoaꞌ. Quisoso ananpitaantarahuaton, catahuarinpoaꞌ canpoantaꞌ. Yosë quiricanënquë iráca ninshitërin. ‘Quëmasoꞌ huiꞌnahuënquën. Ipora chachin acoaranquën huaꞌanëntamaso marëꞌ,’ tënin Tapi. Sarmo catoquë naporin.

Romanos 8:3

Iráca Yosë pënënpirinpoahuëꞌ. Co noyahuëꞌ cancantatëhuaꞌ, co nanitërëhuahuëꞌ noꞌtëquën natëcasoꞌ. Ina quëran huiꞌnin chachin isoroꞌpaquë aꞌpaimarin. Piyapi chachin nasitimarin. Co oshahuanaponahuëꞌ, oshanënpoaꞌ inquitinpoaso marëꞌ chiminin. Inapoaton, nichaꞌërinpoaꞌ ama huachi anaꞌintinpoaso marëhuëꞌ.

Romanos 9:5

Shimashonënpitasoꞌ Yosëri chachin huayonin. Ina quëran Cristo isoroꞌpaquë oꞌmahuachina, Israiro sanapi quëran nasitërin. Inasoꞌ Yosë chachin. Yaꞌipiya huaꞌanëntërinpoaꞌ. ¡Ma noyacha inaso paya! tënëhuaꞌ. Amen.

1 Corintios 15:47

Atansoꞌ noꞌpa quëran ninin isoroꞌpaquë nanpicaso marëꞌ. Quisocristoso nipirinhuëꞌ Yosë yaꞌhuërin quëran oꞌmarin niꞌton, noya noya ninin.

2 Corintios 12:9

Sinioro shaꞌhuitërinco: “Ca nohuanto, ipora huantaꞌ parisitapiranhuëꞌ, nosoroatënquën, naꞌcon catahuaranquën. Carinquën achinicancanaranquën noya ahuantamaso marëꞌ. Co quëmaora nanitohuatanhuëꞌ, naꞌcon naꞌcon catahuaranquën. Maꞌsona tërantaꞌ onpohuatan, co onporontaꞌ pataranquënhuëꞌ,” itërinco. Napoaton co huachi sëtërahuëꞌ. “Co caora nanitohuatërahuëꞌ, Quisocristo naꞌcon naꞌcon catahuarinco,” taꞌto, noya cancantërahuë.

Gálatas 4:4

Ina quëran tahuërinën nanihuachina, Yosëri huiꞌnin aꞌpaimarin. Sanapi quëran nasitaton, piyapi chachin ninin. Cotio quëmapi niꞌton, iráca pënëntërinsoꞌ natëcasoꞌ yaꞌhuërin.

Efesios 3:8

Casoꞌ aꞌnapita imapisopita quëran naꞌcon naꞌcon co noyahuëꞌ nipirahuëꞌ, anoyacancantërinco. Ina quëran nosoroatonco, acorinco nisha piyapiꞌsaꞌ shaꞌhuitaꞌhuaso marëꞌ. Quisocristo nanamënsoꞌ noyápiachin. Ma inacha niꞌton, nosoromiatërinpoa paya, tënahuë yonquiato.

Colosenses 1:19

Quisocristosoꞌ Yosë huiꞌnin niꞌton, Yosë chachin antaꞌ. Co piꞌpisha tërantaꞌ pahuantërinhuëꞌ paꞌpin pochin nicacasoꞌ. Tata Yosë nohuanton, naporin.

Colosenses 2:3

Quisocristo yaꞌipi nitotërin. Noꞌtëquën yonquirin. Inasáchin catahuarinpoaꞌ noꞌtëquën yonquicasoꞌ. Ina naꞌcon yonquihuatëhuaꞌ, noya noya nitotarihuaꞌ. Naꞌa piyapiꞌsaꞌ co nitotopirinahuëꞌ, Yosë anitotërinpoaꞌ Quisocristo pochin yonquicaso marëꞌ.

Colosenses 2:9

Quisocristoíchin natëcasoꞌ yaꞌhuërin. Piyapi chachin niponahuëꞌ, Yosë chachin ninin antaꞌ. Co mantaꞌ pahuantërinhuëꞌ Yosë pochin nicacasoꞌ.

1 Timoteo 3:16

Iráca co Yosë nohuitopirëhuahuëꞌ, iporasoꞌ Quisocristo anohuitërinpoaꞌ: “Ma noyacha inaso paya,” tënëhuaꞌ. Yosë huiꞌnin isoroꞌpaquë oꞌmaton, piyapi chachin nasitimarin. Ispirito Santo chachin anitotërinpoaꞌ Yosë huiꞌnin nininsoꞌ. Nanpiantahuachina, anquëniroꞌsarintaꞌ quënanpi. Imapisopitari yaꞌipi parti paatonaꞌ, nanamën shaꞌhuiraꞌpiapi. Naꞌa piyapiꞌsaꞌ natëpi. Iporasoꞌ Yosëꞌpaꞌ noya yaꞌhuërin. Inatohuaꞌ Yosëri quëpantarin.

Hebreos 1:3

Inasoꞌ paꞌpin pochachin noya nóya ninin. Ina pochachin niꞌton, inasáchin Yosë noꞌtëquën anohuitërinpoaꞌ. Chiníquën nanantërin niꞌton, ipora huantaꞌ ina nohuanton, maꞌsha yaꞌhuërarin. Co yonquirinpoahuëꞌ naporini, yaꞌipiya taꞌhuanchitërihuahuëꞌ. Iráca oshanënpoaꞌ inquitinpoaso marëꞌ chiminin. Chiminpirinhuëꞌ, nanpiantarahuaton, inápaquë panantarin. Inaquë panantarahuaton, Yosë inchinanën quëran huënsërin. Chiníquën nanantaton, huaꞌanëntarin.

Hebreos 1:5

Iráca Yosëri shaꞌhuitërin. Quiricanënquë naporin: “Quëmasoꞌ huiꞌnahuënquën. Ipora chachin noya nicatënquën, acoaranquën piyapiꞌsaꞌ huaꞌanëntamaso marëꞌ,” itërin. Ina quëran taantarin: “Ca huiꞌnahuë inasoꞌ. Casoꞌ ina paꞌpinco,” tënin. Co inso anquëni tërantaꞌ ina pochin nontërinhuëꞌ.

Hebreos 10:5

Napoaton Quisocristo isoroꞌpaquë yaoꞌmahuachina, paꞌpin itapon: “Iporaso huachi maꞌsharoꞌsaꞌ tëpacaisoꞌ, ofrenda quëcacaisoꞌ, inapita co nohuantëranhuëꞌ. Quëma nohuanton, piyapi chachin nasitomarahuë natëaꞌhuanquënso marëꞌ.

Hebreos 2:11

Anoyacancantohuachinpoara, huiꞌninpita pochin niꞌninpoaꞌ. Canpoarintaꞌ “Tata” itërëhuaꞌ. Napoaton Quisocristo co tapanatonhuëꞌ, iinpita pochin niꞌninpoaꞌ.

Hebreos 5:5

Quisocristontaꞌ co inaora nohuanton, corto huaꞌan chini chiníquën nanantërinsoꞌ yaꞌconinhuëꞌ. Yosëri noya nicaton, itapon: “Quëmasoꞌ huiꞌnahuë chachinquën. Ipora chachin acoaranquën piyapiꞌsaꞌ anohuitancoso marëꞌ,” itërin. Quiricanënquë chachin naporin.

1 Juan 4:14

Tata Yosëri huiꞌnin isoroꞌpaquë aꞌpaimarin nichaꞌëinpoaso marëꞌ. Quiyarisoꞌ niꞌnai. Nani tahuëri piyapiꞌsaꞌ shaꞌhuitárai.

1 Juan 4:9

Nosoroatonpoaꞌ, huiꞌnin chachin isoroꞌpaquë aꞌpaimarin anoyacancantinpoaso marëꞌ. Aꞌnaíchin huiꞌnin yaꞌhuëtopirinhuëꞌ, aꞌpaimarin. Quisocristo anoyacancantohuachinpoaꞌ, Yosë nohuitatëhuaꞌ, nanpimiatarihuaꞌ.

2 Juan 1:7

Aꞌnaquënso nipirinhuëꞌ piyapiꞌsaꞌ yanonpintatonaꞌ, nisha aꞌchinapi. Yaꞌipi parti paꞌsápi nonpin nanan shaꞌhuicaiso marëꞌ. “Quisocristosoꞌ Yosë huiꞌnin niponahuëꞌ, co piyapi chachin nininhuëꞌ. Co canpoa pochin nonën yaꞌhuëtërinhuëꞌ,” topi. Co noꞌtëquën aꞌchinpihuëꞌ. Insosona ina pochin aꞌchinpachina, nonpinarin. Inasoꞌ Quisocristo inimiconën, tënahuë.

Apocalipsis 19:13

Aꞌmorinsoꞌ huënaiquë aꞌshitërin. Inasoꞌ Yosë nanamën chachin ninin.

Apocalipsis 21:3

Inápa quëran chiníquën noninsoꞌ natanahuë. —Iporaso huachi, Yosë piyapinënpitarë chachin yaꞌhuërarin. Co onporontaꞌ patarinhuëꞌ. Inapitarëꞌ yaꞌhuëmiatarin.