Josué 6:6 - Chayahuita (Shahui)

⁶ Napotohuachina Cosoisoꞌ corto huaꞌanoꞌsa përarin. Huëꞌpachinara itapon: “Canchisë yaꞌpima carniro pomon sëꞌquëramaquëran quëchitocoꞌ. Ina piquëran aꞌnapitanquëmantaꞌ, Siniororëꞌquënpoa anoyatërëhuaso caposonën quëpacoꞌ,” itërin.

Josué 6:6 ပူးပေါင်းရင်းမြစ်များ

Hechos 9:1

Saonoso nipirinhuëꞌ noꞌhuitárin. Quisoso imapisopita noꞌhuiton, yatëparin. Napoaton corto huaꞌan chini chiníquën nanantërinsoꞌ nontonin.

Josué 24:11

Ina quëran canpitasoꞌ, Cortaniiꞌ pëntontëramaꞌ. Pëntontatoma Quirico ninanoquë canconamaꞌ. Ina ninanoquësoꞌ, nisha nisha piyapiꞌsa yaꞌhuëpi: Amororoꞌsaꞌ, huirisëroꞌsaꞌ, cananoꞌsaꞌ, itiroꞌsaꞌ, quiriquiroꞌsaꞌ, iporoꞌsaꞌ, quiposoroꞌsaꞌ, inapita yaꞌhuëpi. Inapitaso chinitopirinënquëmahuëꞌ, carima catahuaranquëma niꞌton, inapita minsëramaꞌ.

Josué 3:3

Papona pochin israiroꞌsa iso pochin camaipi: “Nihui huënton corto huaꞌanoꞌsari, Yosërëꞌquënpoa anoyatërëhuaso caposonën quëparapi niꞌsaramaꞌ. Quëparahuachinaꞌ, canpitarinta imacoꞌ.

Josué 3:6

Tahuëririnquë corto huaꞌanoꞌsantaꞌ, itapon: “Yosërëꞌquënpoa anoyatërëhuaso caposonën pitënama quëran quëpacoꞌ. Quëchitahuatoma ina pitënama quëran Cortaniiꞌ pëntontocoꞌ,” itërin. Napotohuachina corto huaꞌanoꞌsasoꞌ, Cosoi camaitërinso chachin nipi.

Josué 6:13

Ahuëtai marëꞌ noyá niacoatona quëchitopisopita, quëchitopi. Ina piquëran carniro pomon quëpapisopita pomontërëꞌnachin paꞌantapi. Ina piquëran Sinioro caposonën quëpapisopitanta paꞌsapi. Piquëran huarëꞌ aꞌnapita Israiro sontaroꞌsanta paꞌsapi.

Josué 6:5

Canchisëroꞌ tahuitëramaso nanisëma chachin, pomonoꞌsa nisha pihuirapi huachi. Naporo canpitasoꞌ, chiníquën ‘yai,’ tocoꞌ. Naporo chachin ninano pairanën nohuatapon. Nohuatohuachina, notëtërama quëran chachin ninano yaꞌcontatoma ahuëcoꞌ,” itërin.

Josué 6:7

Israiro sontaroꞌsanta Cosoiri itapon: “Paatoma ninano tahuitocoꞌ. Ahuëtai marëꞌ noyá niacoatona quëchitopisopitaꞌton, quëchichinaꞌ. Ina piquëran carniro pomon quëpapisopita paꞌinaꞌ. Ina piquëran Sinioro caposonën quëpapisopitanta imachinaꞌ,” itërin.

Josué 6:8

Israiroꞌsasoꞌ, Cosoi camaitërinso chachin yaꞌipiya quëran nisapi. Ahuëtai marëꞌ noyá niacoatona quëchitopisopitaꞌton, quëchitaponaꞌ. Ina piquëran carniro pomon quëpapisopita pomontërëꞌnachin paponaꞌ. Sinioro caposonën quëpapisopitantaꞌ, imataponaꞌ. Piquëran huarëꞌ aꞌnapita Israiro sontaroꞌsanta paponaꞌ.

1 Samuel 4:3

Israiro sontaroꞌsa chinotopiquë paantahuachinara: “Iporaso co Sinioro catahuarinpoahuë niꞌton, huiristinoꞌsa canarinënpoaꞌ. ¿Onpoatoncha napotërinpoa nicaya?” topi ansianoroꞌsaꞌ. Napoatona yonquiantapi: “Huëco Siroꞌpaꞌ sontaroꞌsa aꞌpaꞌahuaꞌ. Inatohua quëran Siniororëꞌquënpoa anoyatërëhuaso caposonën macontaꞌinaꞌ. Sinioro chachin canpoarë paꞌpachin tëhuënchinsoꞌ, inimicoroꞌsa quëran nichaꞌësarinpoaꞌ,” niitopi.