Josué 4:19 - Chayahuita (Shahui)

¹⁹ Pascoa yoquiquë shonca tahuëritapasoꞌ, israiroꞌsa Cortaniiꞌ yanirin quëran pëntonpi. Pëntonahuatona Quiricaro itopiquë chinotai marëꞌ nëꞌmëtë pëinëna ótëantapi. Quiricarosoꞌ Quirico quëran, piꞌi pipirinso parti quëparitërin.

Josué 4:19 ပူးပေါင်းရင်းမြစ်များ

2 Reyes 2:1

Panca ihuanquë Siniorori Iniasë quëpacasoꞌ yonquirin. Yaquëpahuachina, Iniasëso Irisiorë chachin Quiricaro quëran pipirapi.

Amós 4:4

Siniorori israiroꞌsa nocanananquë pënënaton itapon: “Pitiri, Quiricaro, inapita ninanoroꞌsaquë moshatamaso marëꞌ acoramaꞌ. Inaquëpita pacoꞌ. Co natëtomacohuëꞌ, naꞌcon naꞌcon oshahuancoꞌ. Chinotatomaco tëpamaso marëntaꞌ, tashíramiachin quëcoꞌ. Diesmo ca marëꞌ acoamaso yaꞌhuërinsontaꞌ, nani cara tahuëri quëran quëcoꞌ.

Amós 5:5

Naquëranchin Sinioro taantarin: “Ama Pitiriquë moshatamaso marëꞌ pacosohuëꞌ. Ina ninanosoꞌ, ataꞌhuantaponaꞌ. Co Quiricaroquë tëranta moshatamaso marëꞌ pacamaso yaꞌhuërinhuëꞌ. Inaquë yaꞌhuëpisopitasoꞌ, onpopionta inimicoroꞌsari aꞌna noꞌpaꞌpaꞌ quëpaponaꞌ. Co Piirsipa ninanoquë tëranta moshatamaso marëꞌ paacamaso yaꞌhuërinhuëꞌ,” tënin.

Miqueas 6:5

Canpitaso piyapinëhuëpitanquëmaꞌ. Moapo copirno Paraco itopisoꞌ naporinso yonquicoꞌ. Paramo ama huachi noya yaꞌhuëcamaso marëhuëꞌ, shaꞌhuitiinquëmaso marëꞌ yapahuërërinsoꞌ, yonquicoꞌ. Inapotopirinhuëꞌ, ca nohuanton Paramori shaꞌhuitërinsontaꞌ, yonquicoꞌ. Shimashonëmapita Sitin quëran pipirahuatonaꞌ, Quiricaroquë canconacaiso marëꞌ napopisontaꞌ, yonquiricoꞌ. Cortaniiꞌ ayanirahuëtaquëchin pëntonatonaꞌ, paꞌpi canatopisopita pochin nipisoꞌ yonquicoꞌ,” itërinpoaꞌ.

Deuteronomio 1:3

Israiroꞌsa Iquipito quëran pipipisoꞌ nani cara shonca iscon piꞌi nisapi. Ina nisahuaton, shonca yoqui aꞌna tahuëriraꞌ naniso chachin Moisësëri israiroꞌsa shaꞌhuitaantarin. Yaꞌipi Sinioro pënëntërinsoꞌ shaꞌhuitaantarin.

Josué 10:6

Ina nicatona Capaonquë yaꞌhuëpisopitasoꞌ, Cosoi shaꞌhuitacaiso marëꞌ aꞌnara aꞌpapi. Quiricaroquë nincantahuaton shaꞌhuitonin: “Yaꞌipi amoro copirnoroꞌsaꞌ motopiroꞌsa parti yaꞌhuëpisoꞌ, nihuëntonpi. Nihuëntonahuatona ahuëinacoiso marëꞌ oꞌmapi. Nani anoyatërëhua piyapinëma nicaꞌhuaisoꞌ nichinapon chachin nosorocoi. Nosoroatoncoi sontaronënpitarëꞌquën chachin huëquë manóton inapita quëran paꞌpoyacoi,” itërin.

Josué 24:11

Ina quëran canpitasoꞌ, Cortaniiꞌ pëntontëramaꞌ. Pëntontatoma Quirico ninanoquë canconamaꞌ. Ina ninanoquësoꞌ, nisha nisha piyapiꞌsa yaꞌhuëpi: Amororoꞌsaꞌ, huirisëroꞌsaꞌ, cananoꞌsaꞌ, itiroꞌsaꞌ, quiriquiroꞌsaꞌ, iporoꞌsaꞌ, quiposoroꞌsaꞌ, inapita yaꞌhuëpi. Inapitaso chinitopirinënquëmahuëꞌ, carima catahuaranquëma niꞌton, inapita minsëramaꞌ.

Josué 4:18

Corto huaꞌanoꞌsa pipihuachinara, naquëranchin Cortaniisoꞌ, inachachin niantarin. Coꞌhuara yaniyátëraponhuëꞌ paquiitërinso pochachin niantarin.

Josué 5:10

Israiroꞌsasoꞌ inaquëranchin yaꞌhuëasoiꞌ, pascoa pita naꞌhuëpi. Catapini tahuëri pochin inaquë yaꞌhuëasoiꞌ, iꞌhuanahuanquë nispiratapi. Quiricarosoꞌ, Quirico ninano canonamatëquë yaꞌhuërin.

Josué 5:9

Naporoꞌ Siniorori Cosoi itapon: Iquipitoroꞌsa marëꞌ israiroꞌsa sacatatonaꞌ, taparo nisápirinahuëꞌ, cari inquitërahuë huachi. Iporasoꞌ marcahuanatonaꞌ, co huachi taparo nipihuëꞌ. Napoaton ina roꞌtësoꞌ, Quiricaro, itopi.

1 Samuel 10:8

Naporahuaton Quiricaroquë quëchitaton paquëꞌ. Inaquë cantaꞌ, oshaquëranchin paꞌsarahuë. Inaquë Sinioro marëꞌ maꞌsharoꞌsa tëparahuato yaꞌipi ahuiquitarahuë. Aꞌnaquëontaꞌ, nanan anoyatërëhuaso marëꞌ maꞌsharoꞌsa tëparahuato, piꞌpian ahuiquitarahuë. Inaquë canchisë tahuëri ninaco. Cancona huarëꞌ ninaco. Naporoꞌ shaꞌhuitaranquën maꞌsona nicacaso yaꞌhuërinsoꞌ, itërin.

1 Samuel 15:33

Samoiroriso napoaponahuëꞌ, itapon: —Sahuëninën quëran notohuaroꞌ piyapiꞌsa tiquiran. Napoatona aꞌshina saꞌahuapi. Inapita saꞌahuapiso pochin mamaparinta quëparitapon, itërin. Itahuaton, sahuëniquë tëparin. Sinioro camaitërinso chachin nitahuaton yaquirin. Quiricaroquë naporin.