Josué 3:16 - Chayahuita (Shahui)

¹⁶ Co inaꞌhuaya naporinhuëꞌ. Atamo ninanoquë naporin. Inaso ninanoꞌ, Sarëtan itopiso yaꞌcari yaꞌhuërin. Sarëtansoꞌ, sontaroꞌsa noyá niacorapipiquë. Pëꞌnatëran iꞌ paꞌmarinsoso nipirinhuëꞌ, Chimiriiꞌ marëꞌpaꞌ nitiquimarin. Ina pochin Siniorori Cortaniiꞌ patomairin. Inapohuachina israiroꞌsasoꞌ, Quirico ninano notënanquë pëntonpi huachi.

Josué 3:16 ပူးပေါင်းရင်းမြစ်များ

Salmos 33:7

Marënta pancaiꞌ nipirinhuëꞌ, yontonahuatë taparëso pochin itohua itohua acorin.

Salmos 66:6

Marë pancaiꞌ nipirinhuëꞌ, ayanirin. Iinta ayanipachina, noꞌpaꞌ paꞌtatonaꞌ, shimashonënpoapita pëntonpi. Inaquëpita Yosë yonquiatona capa cancantopi.

Éxodo 14:21

Moisësë marë parti huaranën ihuërin. Ihuëpachina, Yosë nohuanton naporo tashi piꞌi pipirin parti quëran, panca ihuan huëꞌnin. Yaꞌipi tashi chiníquën ihuantohuachina, marë patomairin huachi. Patomairin niꞌton, panca ira pochin yaniro yaꞌnorin.

Éxodo 14:22

Ahuënan quëran iꞌ paira pochin nisarin, inchinan quëraontaꞌ, napopin chachin niꞌton, inataquëchin israiroꞌsa pëntonapi huachi.

Éxodo 14:29

Israiroꞌsaso nipirinhuëꞌ, noya pëntonpi. Ahuënan quëran inchinan quëran iꞌ paira pochin ninin niꞌton, inataquëchin noya pëntonpi.

Éxodo 15:8

Quëmari pihuitë pochin nitohuatana, marë nipatomairin. Iꞌ tachitaton, cato paira pochin ninin.

Habacuc 3:8

¡Iroꞌsa noꞌhuiton Sinioro, chiníquën nanantëranso aꞌnoran! ¡Marëroꞌsanta noꞌhuiton, chiníquën nanantëranso aꞌnoran! ¡Napoaton cahuarioquë yaꞌmitërëso pochin huëꞌnan! ¡Minsëchantërinso huaꞌan toronanënquë canquirinso pochin ninan!

Deuteronomio 1:1

Moisësësoꞌ, israiroꞌsa camaicaso marëꞌ Cosoi acorin. Ina acorahuaton, yaꞌipi israiroꞌsaꞌ, pënëantarin. Arapa inotëroquë nicasoiꞌ, naporoíchin pënënin huachi. Inasoꞌ noꞌpaꞌ Cortaniiꞌ quëran, piꞌi pipirinso parti quëparitërin. Ina roꞌtë chachin Moapo canonamatë itopi antaꞌ. Aꞌnatëran Sopë ninano nisahuaton, Paran ninano yaꞌhuërin. Aꞌnatëraontaꞌ, Tohuiro, Napan, Asiroto, Tisaapa, inapita ninanoroꞌsa yaꞌhuërin.

Josué 3:13

Corto huaꞌanoꞌsa Sinioro caposonën, pitënpi quëran nohuaraitapi. Inaso Sinioro, yaꞌipiroꞌpaꞌ huaꞌanëntërin. Ipora nohuaraitasoi chachin, Cortaniiso yanisarin huachi. Inapoaton pëtëtëran iꞌsha oꞌmarinsoꞌ, iꞌ paꞌcopitopiquë sanoirinso pochin nicapon,” itërin.

Josué 4:22

Napotohuachinënquëmaꞌ: ‘Yosë yonquiaꞌhuaiso marëꞌ aꞌmitë aꞌmitëtërai. Iráca Sinioro caposonën, corto huaꞌanoꞌsari pitënpi quëran Cortaniiꞌ pëntontacaiso marëꞌ iꞌnaitomapi. Iꞌnaitasoi chachin Sinioro nohuanton iꞌ nipatomairin. Inaporin niꞌton, noꞌpaꞌ paꞌtatoi pëntonai. Iráca chachionta pëntonaꞌhuaiso marëꞌ Quëhuaiꞌ marë patomairin. Inapotasoꞌ, noꞌpaꞌ paꞌtatoi pëntonai. Inapochachin Cortaniinta nitërin,’ itaramaꞌ.

Josué 5:1

Cortaniiꞌ quëran piꞌi yaꞌconinso parti noꞌpaquë, nisha nisha copirnoroꞌsa yaꞌhuëpi. Amoro copirnoroꞌsaꞌ, Canaan copirnoroꞌsaꞌ, inapita yaꞌhuëpi. Amororoꞌsasoꞌ, Cortaniiꞌ yonsan parti yaꞌhuëpi. Cananoꞌsantaꞌ, marë Pancaiꞌ parti yaꞌhuëpi. Yaꞌipi inapita natantopi: “Siniorori Cortaniiꞌ ayanirin. Inapotasoꞌ, israiroꞌsanta pëntontopi,” topi. Ina natantatonaꞌ, naꞌcon naꞌcon paꞌyanpi. Napoaton co nanitopihuëꞌ israiroꞌsa chinitacaisoꞌ.