Josué 3:1 - Chayahuita (Shahui)

¹ Tahuëririnquë tashíramiachin Cosoisoꞌ Sitin quëran pipirin. Yaꞌipi israiroꞌsarë chachin pipirin. Paꞌsápatonaꞌ, Cortaniiquë canconpi. Canconahuatonaꞌ, nëꞌmëtë pëinëna ótëantapi. Sinioro camaitërinso ninacaiso marëꞌ inaquë yaꞌhuërapi.

Josué 3:1 ပူးပေါင်းရင်းမြစ်များ

Génesis 21:14

Tahuëririnquë tashiramiachin Apraansoꞌ, Acara quëtacaso marëꞌ cosharo manin. Aꞌnara shaꞌhuëtë morsaquë iꞌsha taꞌpanahuaton, quëtërin. Huiꞌnionta Ismairo itërinsoꞌ, aꞌpaantërin quëpacaso marëꞌ. Inahuaso paꞌpachinara, Piirsipa inotëro parti chihuëatonaꞌ, topinan paꞌsápi.

Génesis 22:3

Tahuëririnquë Apraansoꞌ, tashiramiachin huënsëintarahuaton, tapatarin huachi. Ihuë Yosë chinotaton ahuiquitacaso marëꞌ pëꞌshitërinsoꞌ, moranënquë aꞌmitërin. Ina quëran huiꞌnin, cato piyapinënpita, inapita quëparin. Yosëri shaꞌhuitërinquë paꞌnin huachi.

Jeremías 7:13

Canpitantaꞌ, co noyahuëꞌ ninamasoꞌ aꞌpocaso marëꞌ naquëranchin naquëranchin pënënanquëmaꞌ. Inapotopiranquëmahuëꞌ co yanatëramacohuëꞌ. Co natanamacoso tëranta nohuantëramahuëꞌ. Caso Sinioroco shaꞌhuitaranquëmaꞌ.

Miqueas 6:5

Canpitaso piyapinëhuëpitanquëmaꞌ. Moapo copirno Paraco itopisoꞌ naporinso yonquicoꞌ. Paramo ama huachi noya yaꞌhuëcamaso marëhuëꞌ, shaꞌhuitiinquëmaso marëꞌ yapahuërërinsoꞌ, yonquicoꞌ. Inapotopirinhuëꞌ, ca nohuanton Paramori shaꞌhuitërinsontaꞌ, yonquicoꞌ. Shimashonëmapita Sitin quëran pipirahuatonaꞌ, Quiricaroquë canconacaiso marëꞌ napopisontaꞌ, yonquiricoꞌ. Cortaniiꞌ ayanirahuëtaquëchin pëntonatonaꞌ, paꞌpi canatopisopita pochin nipisoꞌ yonquicoꞌ,” itërinpoaꞌ.

Marcos 1:35

Tahuëririnquë coꞌhuara noya huënihuayantërasohuëꞌ, Quisoso huënsërahuaton ninano quëran pipirin. Co piyapi yaꞌhuërinquëhuëꞌ Yosë nontacaso marëꞌ inaoraíchin paꞌnin.

Josué 2:1

Israiroꞌsasoꞌ, Sitin itopisoꞌ roꞌtëquë yaꞌhuëantarapi. Ina quëran Cosoisoꞌ catoyaꞌpi nëhuëtacaiso marëꞌ aꞌparin. Coꞌhuara paꞌshátërasoihuëꞌ itapon: “Poꞌoana quëran Canaan parti paatoma niꞌcontacoꞌ. Inaquë paꞌsahuatoma Quirico ninano noya niꞌcoꞌ. Nani niꞌsahuatomaꞌ, shaꞌhuitiimaco,” itërin. Napotohuachina, paꞌpi. Paꞌsápatona Quirico ninanoquë canconpi. Inaquë aꞌnara monshihuantë sanapi yaꞌhuërin. Inasoꞌ, Nacapa itopi. Ina pëinënquë cansahuatonaꞌ, huëꞌëpatacaiso marëꞌ quëparitopi.

Josué 6:12

Tahuëririnquë tashíramiachin Cosoisoꞌ capayataantarin. Yaꞌipi israiroꞌsanta capayatopi. Corto huaꞌanoꞌsantaꞌ, Sinioro caposonën maantarahuatona pitëantapi.

Josué 6:15

Canchisë tahuëri nanihuachina, tashiyachin huënsëintapi. Nani tahuëri napopiso chachin naquëranchin ninano tahuitaantapi. Ina tahuëriso napoaponahuëꞌ, canchisëroꞌ tahuitopi.

1 Samuel 17:20

Tahuëririnquë tashíramiachin Tapisoꞌ, paꞌpini cosharo quëtërinsoꞌ pëꞌpërin. Quisi ohuicanënpitasoꞌ, aꞌna piyapiri aꞌpaitarin. Ina pëꞌpërin quëran Israiro sontaroꞌsa yaꞌhuëapiquë canconin. Naporo chachin sontaroꞌsasoꞌ niyaꞌcariatona ninoꞌhuirápi natanconin.